Ngond wa 5

Pa chisu kwashika kamungun mukash “mwi ngand yawonsu,” wayikwata ap in Kristu a mu mivu chitot ya kusambish. Chakin kamu anvaj arisha piur pa mutapu wafanyinau kutan yakudia mulong wa majuku mau. Chad chid nchik piur pa ansand ading arijekina kutanduril mudimu wau wa kulejan? Ov, afanyina pamwing ap kwiyipul anch akutwish kuchingel djat ni pakupwila kamungun mulong wa kusal mwamu? Chikalap nchik kamungun winou washikena, in Kristu inay asala usu wa kwijidin mashakamin minam. Adandamena kulejan kukwatijan ni mashakamin mau, ni asangera kwanganijan ni akadivar ni anambaz nau yom yading yikwetau.​ (Mid. 11:29, 30) Antu atambula ukwash amana anch Yehova wading uyikwashin. (Mat. 6:31-33) Iyova anch ad pamwing ni ambay nau in Kristu ayikwasha. Ni antu apana ukwash ap ipana mu mudimu wa kukwash mu mitapu yikwau, imenap ayinau yiyukish yikata kudiokal ku kupan.​—Mid. 20:35. w23.04 16 par. 12-13

Yisu yimwing, Yehova ukat kwakul ku malembil ma antu end kusutin kuyibachik antu akad kwitiyij mulong wa kuyikwash. Chilakej, wamubachika Mwant Aritaserisis kwitiy anch Nehemiy achirik ku Yerusalem mulong wa kukwash mudimu wa kutungiril musumb. (Neh. 2:3-6) Nlel, Yehova ukutwish kand kuyibachik ap antu akad kumwifukwil ndiy mulong wa kutukwash chisu tukweta kuswir kwa ukwash kanang. Malembil metu kakatap kumakul mu mutapu wa pakampwil. Pakwez yakul tukata kutambul yawiy kamu tuswirikedining mulong wa kushal ashinshamena kud Tatukwetu wa mwiur. Chawiy shinshikinang yakul ya Yehova ku malembil mey. Chisu ni chisu, tufanyidin kwiman ni kutongijokin mutapu ukatay Yehova kwakul ku malembil metu. (Kus. 66:19, 20) Tufanyidin kumekesh ritiy kadiap kwau ching kusutin kumulembil Yehova, pakwez kand kusutin kwitiy yakul ya malembil metu chikalap nchik mutapu usadidinay mulong wa kutwakul.​—Heb. 11:6 w23.05 11 par. 13; 12 par. 15-16

Patwipana kud Yehova, twachipa kumwifukwil ndiy ni kusal rusot rend. Tufanyidin kulimish machip minam. Kushakam kukwatijan ni machip metu chidiap chisend chilimina. Mulong Yehova watutanga chakwel tusal rusot rend. (Kuj. 4:11) Patutangay watwinkisha maswir ma mu spiritu ni watutanga kand mu chifu chend. Mud chibudikin, tukutwish kumusejin ni kusanger kusal rusot rend. Chikwau kand, anch twasal rusot ra Nzamb ni twamulondul Mwanend, tukat ‘kwiswedish.’ (Mat. 11:28-30) Komb kasikesh rukat rey mulong wa Yehova kusutil kutongijokin pa yom yawonsu yiwamp yakusadidinay kal ni pa yiyukish yikukaninay. Anch wamukat Nzamb nakash, chikukuswapel kand kumuziyin. (1 Yoh. 5:3) Yesu watwisha kusal rusot ra Nzamb mulong wamulembilang Yehova ni washinshikinang pa difut diend. (Heb. 5:7; 12:2) Mud Yesu, mulembila Yehova chakwel akwinkish usu ni dandamen kutongijokin pa ruchingej rey ra mwom wa chikupu. w23.08 27-28 par. 4-5

Etu awonsu tukatining antu akata kushimpish muchim. Mulong wak? Tukat kuyilimish antu akata kuchingel chom nich kushimpish muchim. Tukat kuyijikitish antu akata kutushimpishin muchim anch twarumbuk. Ni tuyijikitishin kand antu atufundisha Bibil mulong atushimpishina muchim ap anch chading chitukasikedin kwilej, kwitiy, ap kusadin mafundish ma Bibil. Cha usey nakash, tumujikitishin nakash Yehova Nzamb mulong ukat kutushimpishin muchim. Ap anch tukatining antu akata kushimpish muchim, chikutwish kutukasiken ayinetu kwikal in kushimpish muchim chisu chawonsu. Chilakej, chikutwish kutukasiken kushimpish muchim anch tuchingedin yakudia, pakampwil anch twovang kal nzal nakash. Tukutwish kujiman nakash anch antu akwau atusarumun. Ni yisu yimwing, chikutwish kutukasiken nakash kudandamen kuchingel kushilamu kwa Yehova piur pa ngand yisu. w23.08 20 par. 1-2

Yehova wamuleja Gedeyon kukepish uvud wa amasalay tupamp 99 pa chitot. Wafanyina kwiyipul anch: Ov, ‘Kuswimp kwinoku kud kamu kwa usey? Kukutukwash?’ Chikalap nchik mwamu, Gedeyon waziyina. Nlel, amakurump akat kumwimburij Gedeyon kusutil kuziyin anch dirijek dayilej kusal yom mutapu windjing. (Heb. 13:17) Gedeyon wamuziyina Yehova chisu chadingay ni wom ni chikalap nchik ubaj wafanyina kumushiken mu chisend chamwinkishau. (Ank. 9:17) Kupwa kwa kumwinkish kashinsh kud Yehova, Gedeyon wamana chad anch Nzamb ukumukwash pa kuyichidijay antwend. Amakurump ashicha mu jingand mukangeshinau mudimu wa kulejan akat kumwimburij Gedeyon. Akat kutakel Yikumangan ni mudimu wa kulejan nich kutakaman chikalap nchik kuyikas, kuyipol yipul, kushadish midimu yau, ap chisum chiyimekeshidinau. Pa chisu cha mar makash, amakurump akwikal nich kuswir kwa kutakaman mulong wa kuziyin ku umutakel ukutambulau—ap anch kuziyin umutakel winou kukutwish kuyitek pamwing ap mu ubaj. w23.06 5-6 par. 12-13

Yehova wapepila chakwel rusangu ra Jehojada arifunda mu Bibil chakwel tutwish kwilejinaku. (Rom 15:4) Ni pafay Jehojada, wamulimisha chipandakena kusutil kumujik “pamwing ni ant mu musumb wa David, mulong ndiy wasala yom yitentamina mu Isarel kurutu kwa Nzamb [wakin ni chikumbu Chend].” (2 Jsng. 24:15, 16) Rusangu ra Jehojada rikutwish kutukwash etu awonsu kukudish mwikadil wa kumwov Nzamb wom. Amakurump a chikumangen akutwish kumwimburij Jehojada kusutil kukimb mitapu ya kuchidij chikumangen. (Mid. 20:28) Amapal akutwish kumwimburij Jehojada anch amwov Yehova wom ni kushal ashinshamena. Ni anch asal mwamu, Yehova ukutwish kuyisadin mulong wa kuwanyish rusot Rend. Ansand akutwish kushinshikin mutapu wamusadinau Jehojada kud Yehova ni Kumwimburij kusutil kuyisadin amapal nich kalimish, pakampwil amapal amusadidina kal Yehova mu mivu yivud. (Jnsw. 16:31) Chawiy komb, el tuyikwashany “in kutakel” mu kuyiziyin.​—Heb. 13:17. w23.06 17 par. 14-15

Ku yikumangan, sadin nkeu piukwatina mupak piur pa tupamp ukwakula. Anch twazambul chikas tupamp tuvud nakash pa chisu cha dilejan, tukutwish kumubachik ntakel kututond tupamp tuvud ap anch antu akwau kand kal akulap. Chinech chikutwish kuyiziyish antu akwau kuzambul makas. (Mul. 3:7) Anch in kulejan avud azambul chikas pa chisu cha dilejan, tukutwishap kwakul mud mutwading tukatina. Yisu yimwing, ntakel kakutwishap kututond mulong wa kwakul. Chakin kamu, chinech chikutwish kutuziyish, pakwez tufanyidin kwikasikesh kulik kujiman anch katutondinap. (Mul. 7:9) Anch ukwetap mutapu wa kwakul tupamp tuvud mud mutapu wadia ukatina, ukutwish kuyitesh nawamp antu akwau chisu chakwilau ni kupwa kwa yikumangan ukutwish kuyijikitish mulong wa yakul yau. Anch wayijkitish akadivar ni anambaz ney, kujikitish kwinoku kukutwish kuyikasikesh mud kand ukutwisha kuyikasikesh anch wakul. w23.04 23-24 par. 14-16

Tang Dizu dia Nzamb ni kuditongijokin. Mud mutond ukata kujamish nich mij, tukutwish niyetu kushal iminya dang anch ritiy retu rimedin nakash pa Dizu dia Nzamb. Pakata mutond kupam, mij niyau yikat kwandam nakash mu divu ni kupalangan chakwel yikwasha mutond. Pitukata kwilej ni kutongijokin pa yom twilejina, tukat kukasikesh ritiy retu ni kwikal nich kashinsh anch jinjil ja Yehova jipandaken kuwap. (Kol. 2:6, 7) Kutongijokin pa mafundish ni umutakel wa Yehova, ni pa diking kwayikwasha atushalapol end. Chilakej, Ezekiel ulejen patok chisend cha angel chamanay mu chishimushimu chadingau nich cha kupim tempel. Chishimushimu chinech chamukasikesha Ezekiel, ni chitukwashin kwilej yom tufanyidina kusal mulong wa kunung chikas ku yijil yitentamina ya Yehova piur pa difukwil dishitwila. (Ezek. 40:1-4; 43:10-12) Tukutwish kutaninamu kand anch twitekin chisu cha kutang ni kutongijokin pa yom yikurikina yidia mu Dizu dia Nzamb. Tukutwish niyetu kwikal ni muchim ukash chikalap nchik yikokujol tukutwisha kurish nich, ni kumuchingejin nakash Yehova.​—Kus. 112:7. w23.07 18 par. 15-16

Bibil wizwil ni yilakej yiwamp ya ansand yifanyidina kwimburij. Amakundj inay a pasak ading amukatin Nzamb ni awanyisha yisend kushalijan mulong wa kuyibangin antu end. Ukutwish kutan kand yilakej yikwau yiwamp pakach pa ansand in Kristu aswila mu dijiku dey ni mu chikumangen. (Heb. 13:7) Ukwet kand chilakej chipandikena kuwamp cha Yesu Kristu. (1 Pita 2:21) Chisu wilejina yilakej yiney nawamp tongijokin piur pa mikadil yikusangareshina ya amakundj inay. (Heb. 12:1, 2) Kupwa kwat mupak piur pa mutapu ukutwisha kuyimburij amakundj inay. Ikundj ukweta manangu ukat kushinshikin yom yida kurutu kwend ni kubabal kurutu ayisala. Sal usu wa kukudish manangu makin ni kumalam. Sambish kwilej mbil ja Bibil ni kutongijokin mutapu jikutwisha kukuletin yiyukish. Kupwa sadin mbil jikutwisha kukukwash kukwat mipak yikutwisha kumusangaresh Yehova. (Kus. 119:9) Anch wakudish ukaliweny winou wa usey, ukukukwash kwikal ikundj mwin Kristu uswila.​—Jnsw. 2:11, 12; Heb. 5:14. w23.12 24-25 par. 4-5

Anvaj akutwish nich rukat kuyifundish anau mutapu ukutwishau kwakul nich kwitudish anch antu alond nayimp piur pa yitiyij yau. (Jak. 3:13) Anvaj amwing akat kusal mwamu chisu cha difukwil da mu dijuku. Akat kushinshikin mitu ya milong yikutwishau kuyipul anau ku shikol, ni kwisambin mutapu ukutwishau kwakul ni kuyifundish anau kulond nich kwitudish mu mutapu usangareshina. Kwilej yom ya kusal kukutwish kuyinkish ansand ayinau kashinsh ni kuyikwash kuman mutapu ukutwishau kuyirumburil antu akwau piur pa yitiyij yau. Mitu ya milong yida mu chikunku “Yipul Yikatau Ansand Kwiyipul” yidia pa jw.org kuwejaku ni mafish ma kutong nich ma ansand yidaku mulong wa kuyikwash nich ansand kukasikesh kashinsh mu yitiyij yau ni kuyikwash kurijek yakul mu mazu mau ayinau. Anch etu awonsu twilej mitu ya milong yiney mu dijuku, etu awonsu tukutwish kwilej mutapu wa kulondin ritiy retu nich kwitudish mu mutapu usangareshina. w23.09 17 par. 10; 18 par. 15-16

Ov, witekidinap kal mupak wa mu spiritu pakwez chakukasiken kuuwanyish? Anch mwawiy, udiap amwiney. Chilakej, Philip wading ukatin kuwapish mutapu wend wa kulembil ni tupamp tufanyidinay kusal mwamu, pakwez chamukasikenang kuman chisu cha kulembil. Erika witekina mupak wa kusambish kushik kurutu kwa chisu ku yikumangan ya mudimu wa kulejan; pakwez wadandamena kuswinkan piswimp ku yikumangan yawonsu. Anch kud mupak witekidina kal pakwez kandikal utwish kuuwanyish, ikal nich kashinsh anch ukangenyap bwat. Yisu yivud ap mupak ukemp witining chisu ni usu nakash mulong wa kuuwanyish. Mulong ni katat ukatin kuwanyish mupak wey, chinech chimekeshin anch ukwatin nich usey urund wey ni Yehova ni ukatin kumusadin nich usu wey wawonsu. Yehova ukwatin nich usey usu usadina. Chakin kamu, kakatap kuchingej anch umwinkish yom wakad kwikal ni mutapu wa kumwinkish. (Kus. 103:14; Mik. 6:8) Chawiy mupak wey ufanyidin kwikal wisikena, ufanyidin kukwatijan ni mutapu udia mashakamin mey. w23.05 26 par. 1-2

Muntu utakamena ukutwish pamwing ap kwov wom, pakwez kakulikap wom winou umukangesha kusal yom yitentamina. Daniel wading nsand utakamena nakash. Wilejang yom yafundau aprofet a Nzamb, kuwejaku ni yom yading mu uprofet wa Jeremiy. Kusutil kwilej yom yiney, Daniel wajingunina anch in Yuda kakulabap kand mu uswik wa in Babilon. (Dan. 9:2) Pamanay Daniel kuwanyin kwa uprofet wa Bibil, ruchingej rend mudiay Yehova rakasikana, ni antu amuchingejidina Nzamb akwikal atakamena nakash kamu. (Ilakej ni Rom 8:32, 37-39.) Chom chikwau cha usey nakash, Daniel wamulembilang chisu chawonsu Tatukwend wa mwiur. (Dan. 6:10) Wamulejang Yehova kurumbuk kwend ni yovil yend. Ni Daniel wamwitang ukwash. (Dan. 9:4, 5, 19) Wading muntu mud etu, ni kavadikap ni kutakaman. Pakwez, wakasikesha mwikadil winou kusutil kwilej, kulembil ni kumuchingejin Yehova. w23.08 2 par. 4; 4 par. 7

Anch twayiziyin antakel a piur, tukat kutaninamu ayinetu ni antu akwau akat kutaninamu niyawiy. Mutapu ik? Chakusambish, tukat kwiyepang ku yibudikin yiyimp ya kubwambwil ku yijil. (Rom 13: 1, 4) Kuziyin kwetu kud antakel a piur kuyikwashining antakel inay kuman anch Atuman a Yehova ad an angand akata kulimish yijil. Chilakej, pasutin kal mivu yivud mu Nigeria, amasalay andama mu Chot cha Want chisu chading chisadikina yikumangan mulong wa kukimb antu ading alikina kuland yitad. Pakwez, mukurump wau wayileja amasalay kubudik ni walonda anch: “Atuman a Yehova ad antu alandining yitad.” Piukata kuziyin ku yijil ya antakel, ukat kupan katumb kawamp mulong wa Atuman a Yehova​—katumb kinak kawamp kakutwish kuyikwash akadivar nau anambaz ney. w23.10 9 par. 13

Atushalapol amwing a Yehova achingela disudien da mangand mu chisu chilemp nakash. Mu kuman kwa antu, chikutwish kumekan pamwing ap anch kushilamu kwa Nzamb kulabin. Yehova wamekesha anch wijing mutapu ukatau kwiyov atushalapol end pa mulong winou, pamwinkishay muprofet Abakuk kashinsh anch: “Rufunda mulong chisu chau cha kuruwanyish kand kal chishika. Pakwez chikat kwez swa. Yom yinikulejina yikwikalaku kamu. Ap anch chisu chalabap nchik, ey chingel, chikuwanyin kwau. Kichikulabap, bwat.” (Aba. 2:3) Ov, Nzamb wapana kashinsh kinak ching kwau mulong wa Abakuk? Ov, mazu minam matutadin niyetu? Yehova wamupepila kambuy Paul chakwel ayifundina in Kristu mazu minam mulong achingedin ngand yisu. (Heb. 10:37) Chakin kamu, ap anch tutongin anch kushilamu kwa Yehova mulong wa kutupandish kulabin pa kuwanyin tufanyidin kwikal nich kashinsh anch, chisu “chikuwanyin kwau. Kichikulabap, bwat.” w23.04 30 par. 16

In Isarel avud alika kwitiyij anch Yehova wading umusadidin Moses mulong wa kuyitakel. (Kuch. 14:10, 11.) Tupamp tuvud, alika kwitiy chisend chadingay nich Moses cha kuyitakel. Mud chibudikin, in Isarel amwing akanganya kwandam mwi Ngand ya Kushilamu. (Kuch. 14:30) Pakwez in Isarel amwing alondula umutakel wa Yehova. Chilakej Yehova walonda anch: “Kaleb, . . . ukwet muchim windj wa kwinlondul am kamu.” (Kuch. 14:24). Nzamb wamufuta Kaleb, ni wamwinka want ipend wa kutond ndond yafanyinay kushakam mwi ngand ya Kanan. (Jos. 14:12-14) In Isarel andama mwi ngand ya kushilamu asha chilakej chiwamp cha kulondul umutakel wa Yehova. Yoshua pamuswinkanay Moses mud mwin kuyitakel in Isarel, “awiy amulimisha machuku ma mwom wend wawonsu.” (Jos. 4:14) Mud chibudikin, Yehova wayiyukisha kusutin kuyandjik mwi ngand ya kushilamu.​—Jos. 21:43, 44. w24.02 21 par. 6-7

Mud dokter ukutwisha kushinshikin nawamp jinsangu piur pa ukash wa mujimbu wetu kusutil kushinshikin mutapu usadina ridwung, chilik chimwing niyetu tukutwish kushinshikin kukasikan kwa rukat retu mulong wa Nzamb kusutil kushinshikin rukat retu mulong wa antu akwau. Anch twajingunin anch rukat retu mulong wa ambay netu in Kristu ni antu akwau riziyin, chinech chikutwish kumekesh kand anch rukat retu mulong wa Nzamb riziyin. Pakwez anch twayimekeshin ambay netu in Kristu rukat chisu chawonsu, chikwikal chijingidij cha usey nakash chimekeshina anch rukat retu mulong wa Nzamb rikasiken. Anch rukat retu mulong wa akadivar nau anambaz riziyin winou ud mulong ujim nakash. Mulong wak? Mulong chirumburikin anch tud mu ubaj wa mu spiritu. Kambuy Yohan wovikesha patok chisu chalonday anch: “Anch muntu kamukatilap mwanamakwend umenay ku mes, kakutwishap kumukat Nzamb wakad kumekan ku mes.” (1 Yoh. 4:20) Yom ik twilejidinaku? Yehova ukat kutusanger ching anch “[tukatijadin] muntu ni mukwau.”​—1 Yoh. 4:7-9, 11. w23.11 8 par. 3; 9 par. 5-6

Padingay nsand, Mwant Jowas wakwata mupak wa manangu. Pa ndond pakwikal mud tatukwend, ndiy walondula umutakel wa mwin Kupesh Mujim ushinshamena, Jehojada. Mwin kupesh wamufundisha Jowas mud mwanend wa kuval. Mud chibudikin Jowas wakwata mupak wa manangu mulong wa kutakel difukwil diakin ni kumusadin Yehova. Jowas wawapisha kand tempel wa Yehova. (2 Jnsg. 24:1, 2, 4, 13, 14) Anch anvaj ey ap muntu mukwau akufundisha kumukat Yehova ni kulimish mbil jend, chimeken anch akwinkisha chipan cha usey nakash. (Jnsw. 2:1, 10-12) Anvaj akutwish kukufundish mu mitapu yivud. Anch wasadin chiyul chidiokila mu Mifund, ukuyisangaresh anvaj ey. Cha usey nakash, ukumusangaresh Nzamb ni urund wey ni ndiy ukukasikan nakash. (Jnsw. 22:6; 23:15, 24) Ov, umenap anch dined did diyingishin diwamp dia kwimburij chilakej cha Jowas padingay nsand? w23.09 8-9 par. 3-5

Yehova ushidinamu kutesh malembil metu. Nzamb wetu uyikatin atushalapol end ashinshamena, chawiy kakulikap kutesh malembil mau. (Kus. 10:17; 37:28) Pakwez chinech chimekeshinap anch ukutwinkish yom yawonsu tumwitina. Tukutwish kuchingel ngand yisu mulong wa kwikal ni yom yawonsu tukata kwit. Yehova ukat kushinshikin kwit kwetu kukwatijadina ni rusot rend. (Isay 55:8, 9) Pakach pa yom yikatinay usotin anch divu dizula nau antu akatina kumuziyin ndiy ni ku winyikel wend. Pakwez Satan ukat kulond anch akwikal nawamp anch itakel ayinau. (Dis. 3:1-5) Mulong wa kumekesh patok makasu ma Djabul, Yehova wayilika antu chakwel itakel ayinau. Pakwez winyikel wa antu waletishin kal milong yivud nakash turishina nich nlel unou. (Mul. 8:9) Tuteshin anch Yehova kakudioshap pa chisu chinech milong yawonsu yidiaku nlel. w23.11 21 par. 4-5

Yehova wakana anch ukuyukish michid yivud kusutin Aburaham. Pakwez Aburaham padingay ni mivu 100 ni Sara mivu 90, ading kand kal aman mwan wayikanau. Mu kuman kwa muntu, chading chimeken anch chikasiken kud Aburaham ni Sara kuval mwan. Kwading kamu kupak kukash kud Aburaham. “Nich ruchingej, ap anch kikwadingap chom cha kuchingej, chawiy mwamu ndiy wikala ngakiril wa michid yivud.” (Rom 4:18, 19) Chakin kamu, ruchingej riner rawanyina. Wikala tatukwend a Isak, mwan wachingelay mu mivu yivud. (Rom 4:20-22) Tukutwish kwikal ni dilau da Nzamb ni kwikal achindilau mud antu atentamina ni arund a Nzamb mud mwadingay Aburaham. Chawiy chakasikeshinay Paul pafunday anch: “Mazu malondau anch: ‘amwitiya anch [Aburaham], utentamin’ kamafundap ching kusu mulong wendendiy amwinend, bwat, pakwez amafunda kand mulong wetwetu akwitiyay Nzamb anch, tutentamin, mulong twamwitiyij kal Nzamb wamuvumbula Yesu Nsalejetu kwikal kand mwom.” (Rom 4:23, 24) Mud Aburaham, tukwet kuswir kwa kwikal ni ritiy rikash ni kusal midimu yiwamp, kulam ruchingej retu rikala rikash. w23.12 7 par. 16-17

Anch urishin ni milong yikovishina wom, vurik anch Yehova umen mulong urishina nich ni mutapu wiyovila. Chilakej, Yehova wading umen mutapu uyimp wading uyisadidinau in Isarel kud in Idjibit, ni wading umen kand ‘kusansan ni mar mau.’ (Kub. 3:7) Ukutwish kushimok mutapu ukukwashinay Yehova kupandakan chikokujol chey. Chawiy mwita akukwash kujingunin ukwash wend. (2 Ant 6:15-17) Kupwa tong bil: Mutapu ik wakukasikesha diskur diasalau ku chikumangen? Mutapu ik mikand yetu, video, ap muminy wa orijinal wakukasikesha? Mutapu ik wakukasikeshay muntu kusutin chitongijok chend ap verse wakutanginay? Tukutwish pamwing ap kuvuramen tupamp twatumekeshinau rukat kud akadivar nau anambaz netu ni mutapu yakudia ya muspiritu yikata kutukasikesh. Pakwez, yid yipan yiwamp yidiokila kud Yehova. (Isay 65:13; Mar. 10:29, 30) Akat kumekesh anch akubangidin. (Isay 49:14-16) Ni akat kumekesh kand anch akuchingejidin. w24.01 4-5 par. 9-10

Kurutu achirika mwiur, Yesu wayivurisha in kwilej end chisend chayinkishay cha kupan uman piur pend “mu Yerusalem, ni mu Yudeya mwawonsu, ni mu Samaria, djat ni kusudiedila mangand.” (Mid. 1:8; Luka 24:46-48) Mu kusut kwa chisu chikemp, antakel a in Yuda amukwata kambuy Pita ni Yohan ni ayitwala kurutu kwa dirumburish dijin da in Yuda, ayileja amakundj inay ashinshamena anch afanyidin kwimik kulejan ni ayovisha wom. (Mid. 4:18, 21) Pita ni Yohan akula anch: “Tongany ayinen anch chitentamin kurutu kwa Nzamb kukuziyilany en kupandakanamu kumuziyil Nzamb. Mulong etu kitukutwishap kulik kulond yom yitwamana ni yitwatesha ayinetu.” (Mid. 4:19, 20) Kupwa kwa kumulikishaku Pita ni Yohan, in kwilej inay amulembila Yehova chakwel awanyisha rusot rend. Yehova wakula ku malembil minam makin.​—Mid. 4:31. w23.05 5 par. 11-12

Yehova ni Mwanend ashakamin kal pamwing mu mivu yivud nakash kusutamu muntu win mwawonsu. Urund wau wasadin kal mivu yivud nakash ni akudishin kal rukat rikurikina nakash umwing ni mukwau. Yehova wamumekeshina Yesu rukat rend mud mututangina mu mufund wa nlel. Yehova wafanyina kwend kulond anch, ‘Winou ndiy nitiyijina.’ Pakwez, wakata twijik mutapu umukatilay Yesu, chawiy wamutazuka anch “Mwanam mukatish.” Yehova wading umusangaredin Yesu pakampwil mulong wading ukimbin kupan mwom wend. (Efes 1:7) Ni Yesu wading kamu ni kashinsh piur pa mutapu wading umukatinau kud Tatukwend. Rukat radingay nich Yehova pantaliken ni Yesu rading rimeken kamu patok. Wachirikina tupamp tuvud nich kashinsh kin kawonsu anch tatukwend wading umukatin.​—Yoh. 3:35; 10:17; 17:24. w24.01 28 par. 8

Tongijok bil anch muntu ubangidining nakash walond yom yiyimp nakash piur peyey. Wij anch mad makasu, pakwez antu amwing amitiyin. Kupwa asambish kumapalangesh, ni antu akwau avud amitiy kwau. Ukwiyov nchik? Mwaning, makasu minam makutwish kukusal nayimp nakash, kimwawiyap? Yom yiney yikutukwash kwijik mutapu wiyovay Yehova payipishau kalimish kend. Umwing wa anend wamudimbena kud mband wakusambish Ev. Witiya makasu minam. Makasu minam mayibachika anvaj etu akusambish kumubwambwil Yehova. Mud chibudikin, chitil ni rufu yapalangana kud antu awonsu. (Dis. 3:1-6; Rom 5:12) Milong yawonsu tumena mu mangand, rufu, njit, mar, yidaku mulong wa makasu ma Satan mapalangeshay mu chir cha Eden. Ov, makasu minam ni yibudikin yidaku yikat kumovish Yehova nayimp? Chakin kamu. Pakwez, Yehova kalaminap ujim ap rukuny. Pakwez udandamedin kwikal “Nzamb wa musangar.”​—1 Tm. 1:11. w24.02 8 par. 1-2

Mutapu ik ukutwisha kumwimburij Jozef anch akupak? Ukutwish kukwat mupak wa yom ukusala anch akupak kusambish kamu katat. Ileja kulik kapamp kamwing yom yikisinay kamu Yehova ni ipuk kuyitongijokin. (Kus. 97:10; 119:165) Kusal mwamu kukukukwash kulik kuwil mu chitil. Ku mutambu wey wij anch watanin kal uyakin ni ukatin kumusadin Yehova ni muchim wey wawonsu, pakwez kud yom yimwing yikukangeshina kwipan ni kushiken ku dibatish. Ukutwish kusal yom yasalay Mwant David. Ukutwish kumutazuk Yehova anch: “Mpapata, A! Nzamb, wijik muchim wam. Mpaka, wijik yitongijok yam. Ntalamu bil anch mu am mudi chom chiyimp, ni wintakel mwi njil mwakad kushemunikang.” (Kus. 139:23, 24) Yehova ukat kuyiyukish antu akata “kumusurab.” Usu usadina mulong wa kwitekin mupak wa kwipan ni kushiken ku dibatish umekeshin anch umusurabin.​—Heb. 11:6. w24.03 6 par. 13-15

Mwin kupesh mujim wading uyimekeshin antu kurutu kwa Nzamb. Aron, mwin kupesh mujim wa kusambish wa in Isarel, amutonda kud Yehova chisu chapanau mwinkand. Pakwez, mud mwarumburilay kambuy Paul, “in kupesh aswananga ading avud, mulong afawolanga, chawiy chakanganyangau kudandamen ku mudimu wau.” (Heb. 7:23-26) Ni mulong ading niyau antu akad kuwanyin, in kupesh ajim inay apanang yakupesh mulong wa dilikishin da yitil yau ayinau. Pinap pawiy padia kushalijan kujim nakash pakach in kupesh ajim a mu Isarel ni Mwin Kupesh Mujim, Yesu Kristu. Mulong ud Mwin Kupesh wetu Mujim, Yesu Kristu ud ‘nkwash . . . wa dizang diakin, wawiy mwinkand watungay Yehova, kautungap kudi antu.’ (Heb. 8:1, 2) Paul warumburila kand anch “Yesu udi mwom chikupu, chawiy chikwetay win kupesh wa chikupu ni chikupu.” Paul wawejinaku kand anch Yesu kakwetap “chitil, amwaurila kumudiosh kudi akayitil,” ni chinyim nau in kupesh ajim a Isarel, “kakwetap kuswir kwa kulambul yakupesh pichuku pichuku” mulong wa yitil yend amwinend. w23.10 26 par. 8-9

“Diur dia kusambish” dimekeshin guvernema wa katat utakedinau kud Satan nau ayilembil end. (Mat. 4:8, 9; 1 Yoh. 5:19) Mud mudisadidinau mu Bibil, “divu” dikutwish kumekesh antu ashicha pa divu. (Dis. 11:1; Kus. 96:1) Chawiy, “mangand ma kusambish” mamekeshin chisak cha antu ayimp. Yehova kakurijekap kand “diur” ni “divu”; yidiaku nlel, pakwez ukuyishesh kamu chikupu ni kuyiswinkesh. Ndiy ukuswinkesh diur ni divu yidaku nlel nich “diur disu ni divu disu”—yimekeshina guvernema musu ni chisak cha antu asu. Yehova ukusal divu ni antu kwikal asu kusutil kuyikadish awanyidina. Mud mwasambelay Isay kulejan, Yehova ukusal divu diakabuj kwikal ndond yiwamp nakash mud mwadinga chir cha Eden. Etu awonsu tukuswimp kwikal antu asu pakwez muntu ni muntu ukutaninamu panrend. Ayishet, amputames, atujik a matu akuyerik, ni antu afila kal akwikal kand aom.​—Isay 25:8; 35:1-7. w23.11 4 par. 9-10

Mar ‘makash’ makushiken kwa chikashimwish. (Mat. 24:21) Pakwez, chinyim ni yinship yikwau yivud, mar makash makukashimwishap antu awonsu. Kwasut kal mivu piswimp 2 000 kudiosh kwayibabeshinay Yesu in kwilejend kwikal irijekina mulong wa dichuku dinida. Anch tud irijekina, chikutuswapel kujijamen yirung yikash ni kuyikwash antu akwau kusal mwamu. (Luka 21:36) Tukwikal ni kuswir kwa kujijaman mulong wa kumuziyin Yehova, ni kwikal ni kashinsh anch ukutuking. Yom ik tukusala anch akadivar netu ashadish yom yau yimwing ya ku mujimbu ap anch ayishadish yawonsu? (Aba. 3:17, 18) Tukwikal ni kuswir kwa ranaken rikutwisha kutubachik kuyikwash. Mutapu ik tukusala anch kurishikish kwa kubombakan kwa michid kwatusal anch twikala kamu piswimp piswimp nakash ni akadivar nau anambaz netu avud mu chisu kanang? (Ezek. 38:10-12) Tukwikal ni kuswir kwa rukat rijim mulong wa kutukwash kurish ni yirung yikash. w23.07 2 par. 2-3

Ambay a uruw akutwish kwilejin ku chilakej cha Akila ni Prisil, ambay a uruw ading alimishinau kud in Kristu avud akusambish. (Rom 16:3, 4) Asalang mudimu, alejanang, ni ayikwashang akwau pamwing. (Mid. 18:2, 3, 24-26) Chikwau kand, pakatay Bibil kwisambin piur pa Akila ni Prisil, ukat kuyijimbul chisu chawonsu pamwing. Mutapu ik ukutwishau ambay a uruw kuyimburij? Tongijokin piur pa yom ufanyidina kusal pamwing ni mukajey. Ov, ukutwishany kusal yom yiney pamwing pa ndond pa kuyisal muntu ni muntu panrend? Chilakej, Akila ni Prisil alejanang pamwing. Ov, niyen mwamu ukata kusalany yisu yivud? Akila ni Prisil asalang kand mudimu pamwing. Pamwing ap ey ni mukajey ukwetanyap mudimu umwing, pakwez ov, ukutwishanyap kusal midimu ya ku chikumbu pamwing? (Mul. 4:9) Anch wakwashijanany kuwanyish chisend kanang, ukwiyovany anch usadinany chisak, ni ukwikalany ni mutapu wa kwambamb. w23.05 22-23 par. 10-12

Kud chisu tukata etu awonsu kwov wom. Chilakej, chisu chading chimulondwilau kud Mwant Saul mulong wa kumujip, David wakwata mupak wa kuchinin mu Gat musumb wa in Filistin. Akish Mwant wa in Gat, wijika anch David ndiy chifuvu warisha njit uwanginau mu mwas wijikena anch “makum ma tunan twend” twa in Filistin. David “wova wom nakash.” (1 Sam. 21:10-12) Wova wom piur pa yom yafanyinau kumusal kud Akish. Yom ik yafanyina ku mukwash David kwikal utakamena? Mu Kuseng 56, David ulejen mutapu mwovay wom padingay ku Gat. Mu kuseng winou David urumburil mulong wak wova wom ni urumburil kand yom yamukwash kulik kov wom. Chisu chovay wom David wamuchingejina Yehova. (Kus 56:1-3, 11) David wading ni mayingishin makin ma kumuchingejin Yehova. Nich ukwash wa Yehova, David wakwata mupak wa kusal yom nich kutakaman! Akish wamumana David mud muntu uyiswidoshina pakwez kadap mud mwin kulet ubaj, chom chinech chamukwasha David kuchin.​—1 Sam. 21:13–22:1. w24.01 2 par. 1-3

Ov, ad anany isambidinau mu mufund wa nlel? Azizidinau many akuvumbulau! Chawiy piswimp ni kwinsuden kwa mar makash, azizidinau many ashadinaku pakuyau mwiur, chisend chau chakusambish chikuyinkishau chikwikal cha kurish. Kupwa kwa kuya mwiur, akusal pamwing ni Kristu nau angel, kwi njit ja nsuden ja akankuny a Nzamb. Tongijokin pa chom chinech! Pa divu in Kristu amwing azizidinau many ananapin kal ni kakwetap kand usu. Pakwez pakuyivumbulau mulong wa kushakam mwiur, akwikal ni usu upandakena ku mujimbu ni mu spiritu ni akwikal yitang ya mu spiritu yakad kufang. Ayinkisha kal chisend cha kurish njit pamwing ni Mwant wau wija kurish njit Yesu Kristu. Kupwa kwa njit ja Armagedon, akusal pamwing ni Yesu mulong wa kuyikwash antu kwikal awanyidina. Chakin kamu, tukwet kashinsh anch pakwikalau mwiur in Kristu azizidinau many akuyisadin akadivar ni anambaz nau yom yiwamp nakash yivud kusutamu padau pansh mud antu akad kuwanyin! w24.02 6-7 par. 15-16

Antu amwing irijekina kal mulong wa kwipan ni kutambul dibatish akutwish kwidjidjek. Akutwish kwiyipul anch: ‘Chikwikal nchik anch nasal chitil chijim ni angopat?’ Anch wawiy wom ukweta, ikal nich kashinsh anch Yehova ukukwinkish chom chin chawonsu ukweta nich kuswir “chad [ukusal] machuku mawonsu yom yikatilay.” (Kol. 1:10) Ukukwinkish usu wa kusal yom yiwamp. Mulong wayikwashap kal kand antu akwau kusal yom yiwamp. (1 Ko. 10:13) Dawiy diyingishin dimwing dilikidiningau antu amwing kwandam mu chikumangen cha win Kristu anch mulong akuyopat. Yehova ukuyikwash antu end kushal ashinshamena. Muntu mwawonsu wakad kuwanyin akat kumupak mulong wa kusal yom yiyimp. (Jak. 1:14) Pakwez, ukutwish kutond yom ukutwisha kusal anch akupak. Kashinsh kad anch yey amwiney ukutonda mutapu wa kushakam. Ap anch antu amwing akutwish kulond anch ukutwishap kutakel yovil yey, pakwez ukutwish kwilej kutakel yovil yey. w24.03 5 par. 11; 6 par. 12