Ngond wa 4

Atushalapol a pasak a Yehova arisha ni milong yakad kuchingejin. Tushinshikinany chilakej cha Jakob. Amuleja kud tatukwend kwat mband pakach pa an amband a Laban, amuleja nich kashinsh anch Yehova ukumuyukish nakash. (Dis. 28:1-4) Chawiy Jakob wasala chom chiwamp. Wadiokala mwi ngand ya Kanan ni kuya kwa Laban, muntu wading ni an amband aad—Leya ni Rechel. Jakob wamukata changadim mwanikanch wa Laban, Rechel, ni Jakob wovijana ni Laban kumusadin mudimu mu mivu sambwad mulong wa kumwat Rechel. (Dis. 29:18) Pakwez yom yasadikap mud mwachingejay Jakob. Laban wamudimba kusutil kumwinkish mwanend mband mukurump Leya. Laban wamuleja Jakob anch ukwatijan ni Rechel kupwa kwa rubing rumwing, pakwez ching anch wamusadin kand mudimu mu mivu yikwau sambwad. (Dis. 29:26, 27) Laban wamwisakina kand Jakob mu mulong ukwau. Mu yom yiney yawonsu, Laban wamwisakina Jakob mu mivu 20!​—Dis. 31:41, 42. w23.04 15 par. 5

Kud nany tufanyidina kukimb rongoj ni umutakel? Twij chakul ku chipul chinech. Tukutwish kumusejin Yehova mu malembil. Yehova utwitin chakin kamu kusal mwamu. Ukatin anch tulembilang chisu chawonsu—“kwakad kulik.” (1 Tes. 5:17) Tukutwish kumusejin mu malembil mulong wa kumwit umutakel mu yom yawonsu tukutwisha kusal mu mwom wetu. (Jnsw. 3:5, 6) Mulong ud Nzamb ukata kupan, Yehova katushidinap mimbu piur pa tupamp tufanyidina kumulembil. Yesu wading wij anch Yehova ukwatining malembil nich usey. Kurutu eza pa divu, wamanang mutapu wakulangay Tatukwend malembil ma amakundj nau amband ashinshamena. Chilakej, Yesu wading pamwing ni Tatukwend chisu chakulay ku malembil ma Ana, David, Eliya, ni ma antu akwau avud ading ashinshamena. (1 Sam. 1:10, 11, 20; 1 Ant 19:​4-6; Kus. 32:5) Chawiy, chidiap cha kushimok kuman anch Yesu wayifundisha in kwilej end kulembil chisu chawonsu, nich kashinsh!​—Mat. 7:7-11. w23.05 2 par. 1, 3

Mwin Kupesh Mujim Jehojada wading umwovil Yehova wom. Chom chinech chamekana kamu patok chisu chasambishay Atalia, mwan mband wa Jezabel, kuyikel ku usu mu Yuda. Wasala usu wa kujip an awonsu a ku chikit cha want ni an inay ading ijukurend. (2 Jsng. 22:10, 11) Jowas, umwing wa an inay wapanda ku ukwash wa Joshabet, mband wa Jehojada. Ndiy pamwing ni nfumwend amujindjika mwan winou ni amubanginang. Mulong asala mwamu, Jehojada ni Joshabet achidija muntu wa mu dijuku dia David wafanyina kwikal mwant. Jehojada wading umushinshamedin Yehova ni kamwovap Atalia wom. Pawanyishay Jowas mivu sambwad, Jehojada wamekesha kand kushinshaman kwend kud Yehova. Watenchika chom kanang. Anch watwisha kuwanyish chom chatenchikay, Jowas wafanyina kwikal mwant mulong wading wa ku dijuku dia David. Pakwez anch wakanganya, Jehojada wafanyina kamu kushadish mwom wend. Pakwez ku ukwash wa Yehova, watwisha kusal chom chinech chatenchikay. w23.06 17 par. 12-13

Chading chiswapel kud Mwant Nebukadinesar kumuman Daniel mud mukankuny nend ni wafanyina kumujip. Pakwez Daniel wamekesha kutakaman ni wamurumburila chilat. Yom ik yamukwasha Daniel kwikal utakamena mu mwom wend wawonsu? Tukwet kashinsh anch tatukwend ni makwend ading chilakej chiwamp kud ndiy padingay nsand. (Kuv. 6:6-9) Daniel kadingap kwend kija ching Yijil ya padishin, mud Yijil Dikum, pakwez wading wij yom yivud piur pa yijil yiney ni piur pa yom yafanyinau in Isarel kudia ap kulik kudia. (Lev. 11:4-8; Dan. 1:8, 11-13) Daniel wileja nsangu piur pa antu a Nzamb ni wading wij kand yom yayishikenang anch alik kulimish mbil ja Yehova. (Dan. 9:10, 11) Yom yashikena mu mwom wa Daniel yamwinkisha kashinsh anch Yehova ni Angel end akweta Usu afanyina kumukwash.​—Dan. 2:19-24; 10:12, 18, 19. w23.08 3 par. 5-6

Rebeka wading mband wa manang ni wakwata mipak nich kutakaman mu mwom wend wawonsu ni wading wij chisu ni mutapu wa kusal yom. (Dis. 24:58; 27:5-17) Pakwez wading ukwet kalimish ni walimishang umutakel. (Dis. 24:17, 18, 65) Anch walimish nich kwikepish yitenchik ya Yehova mud mwasalay Rebeka, ukwikal ni yibachikin yiwamp mu dijuku ni mu chikumangen chey. Kwijik mimbu ud mwikadil ukwau ufanyidinau in Kristu awonsu aswila kwikal nich. Ester wading mband wija mimbu yend. Mulong wading wij mimbu yend, kikalap ni chibud pikalay mwant mwad. Watesha chiyul cha musanyend Maridoke ni wachisadina. (Est. 2:10, 20, 22) Ukutwish kumekesh mwikadil winou anch wayit antu akwau chiyul ni kuchisadin. (Tit. 2:3-5) Ester wamekesha anch wij mimbu yend mu mutapu ukwau. Wading “changadim wa chimbu ni chifu chiwamp” pakwez, kipwitinap nkeu pad amwinend.​—Est. 2:7, 15. w23.12 19-20 par. 6-8

Kwifish nich kusutina chipim did dilim tufanyidina kudjibul. Anch twalejen chitil chetu, twakarumukin, ni anch tusadin usu wa kulik kuchirikin yitil yetu, tukutwish kwikal nich kashinsh anch Yehova watulikishidin kal. (Mid. 3:19) Kupwa kwa kusal yom yiney, Yehova kakatinap anch tudandamen kand kwifish nich. Wij anch chikutwish kutusal nayimp anch twadandamen kwifish nich. (Kus. 31:10) Anch twanenganan kusut chipim, tukutwish kulikap kubambil kwa mwom. (2 Kor. 2:7) Anch wadandamen kwifish nich, shinshikin pa “dilikishin [diakin]” dia Nzamb. (Kus. 130:4) Ukanin piur pa antu akatay kulikishin akarumukining chakin kamu anch: “Nikez [kavurikap] kand kuyip kwau.” (Jer. 31:34) Chirumburikin anch Yehova kakezap kand kakuchindin yitil wasala pakur. Kangal wijimen amwiney anch washadisha yisend mu chikumangen mulong wa kurumbuk wasala. Yehova kavurikinap kand yitil yey, chawiy niyey ufanyidinap kudandamen kuyitongin. w23.08 30-31 par. 14-15

Pa chirung cha chipupu cha KOVID-19, Atuman a Yehova alondula umutakel udiokila ku dirijek dietu ipuka kwiyakamish nakash mudi muchading kud antu itiyija jinsangu ja makasu. (Mat. 24:45) Tufanyidin kushinshikin pa ‘yom ya usey nakash.’ (Fil. 1:9, 10) Anch tukwet kampuw tukutwish kushadish chisu chetu chivud ni usu wetu. Yom tukata kusal dichuku dawonsu mud—kudia, kuna, kwipuwangej, kusal mudimu wa kumujimbu—yom yiney yikutwish kutuletin kampuw anch twayitek pa ndond ya kusambish mu mwom wetu. (Luka 21:34, 35) Chikwau kand, dichuku diawonsu tukat kutesh ni kutang jinsangu jipalangeshinau piur pa kupwitijan kwa chipolitik ni milong yikwau. Chawiy, tufanyidin kwikal nich kashinsh anch kupwitijan kwinoku kututekinap mu kampuw. Pakwez, mu manangu ni muchim wetu tufanyidinap kwikal ku mutambu kampand. Satan ukat kusadin mipit kushalijan nich rutong ra kuziyish mipak yetu ya kusal yom yitentamina. w23.07 16-17 par. 12-13

Dichuku da Chivurikish cha rufu ra Yesu did da usey nakash kud atushalapol a Yehova. Chid chinship chapanay Yesu amwinend mbil kud in kwilej end mulong wa kuchivurikang. (Luka 22:19, 20) Ud mutapu tukutwisha kumekesh kujikitish kwetu mulong wa chakupesh cha Yesu. (2 Kor. 5: 14, 15) Chikat kutwinkish kand mutapu wa kusanger ‘kukasikeshijan’ pamwing nau akadivar ni anambaz. (Rom 1:12) Ni antu avud akat kusanger yom yikatau kuman ni kutesh. Tongin kand mutapu ukata Chivurikish kutubomb pamwing ni akadivar nau anambaz pa mangand mawonsu. Yom yiney yawonsu yikat kusal anch Chivurikish chikala cha pakampwil kud etu! w24.01 8 par. 1-3

Anch twatongijokin chikurikina pa difut dapanay Yehova ni Yesu, tukuman kamu mutapu umukatinau muntu ni muntu wa pakach petu. (Gal. 2:20) Difut chid chipan cha rukat. Yehova watumekeshina rukat rend kusutin kumupan muntu wading wa usey nakash kud ndiy—Yesu. Yehova witiya anch Mwanend amana mar ni afa mulong wetwetu. Yehova kakwimenangap kwend ching pa kutukat, pakwez ukat kutulej kand mutapu utukatinay. (Jer. 31:3) Yehova watupwitina kud ndiy mulong utukatin. (Ilakej ni Kuvurik Yijil 7:7, 8.) Kwikil muntu ap chom chikutwisha kutwauril ku rukat riner. (Rom 8:38, 39) Mutapu ik wiyovila piur pa rukat riner? w24.01 28 par. 10-11

In Kristu azizidilau many akat kusanger ruchingej riner ra kuya mwiur. Mukadivar Frederick Franz, umwing wa pakach pau walonda anch: “Ruchingej retu ridi rakin ni muntu mwawonsu wa pakach pa a 144 000 ukuman kushilamu kwinoku kwa Nzamb.” Mu muvu wa 1991 Mukadivar Franz walonda nich kashinsh anch: “[Tushadishinap] usey wa ruchingej retu ripandakena kuwap. . . . Tusangaredin pitudandamedina kurichingel. Chid chom cha usey nakash tuchingedina. Ruchingej retu riner nirikwatin kamu nich usey nakash.” Ap anch tukusanger mwom pa divu ap mwiur, tukwet mayingishin ma kusanger ruchingej riner. Ni tukutwish kwikal ni kashinsh ka ruchingej retu. w23.12 9 par. 6; 10 par. 8

Pol ku chis cha kwandamin mu dizang da pasak, pading chintamb cha utad wa kwivre papeshinangau annam kud Yehova. (Kub. 27:1, 2; 40:29) Pakwez, yakupesh yiney yapwishangap rawonsu yitil ya antu. (Heb. 10:1-3) Kudandamen kupan yakupesh ya annam mu dizang kwading kumekeshin chakupesh chimwing chikeza kuyidiosh an a antu rawonsu ku yitil. Yesu wading wij anch Yehova wamutuma pa divu mulong wa kupan mwom wend mud chakupesh mulong wa antu. (Mat. 20:28) Chawiy pamubatishau, Yesu wimekesha ap wipana amwinend mulong wa kusal rusot ra Yehova. (Yoh. 6:38; Gal. 1:4) Mwom wa Yesu aupana “kapamp kamwing kusu” mulong wa kudosh ap kubwik rawonsu yitil ya muntu mwawonsu ukumwitiyija Kristu.​—Heb. 10:5-7, 10. w23.10 26-27 par. 10-11

Kwikil chom twafanyina kusal mulong wa kwikol ku chitil ni rufu. (Kus. 49:7, 8) Mulong Yehova warijeka anch Yesu apana mwom wend mulong wa kutukol, mwamu Yehova ni Yesu asala chom chijim nakash. Kutongijokin nakash pa yom yasalay Yehova ni Yesu mulong wetwetu kukat kutubachik kujikitish mulong wa difut. Pasalay Adam chitil washadisha ruchingej ra kushakam chikupu kadiap ching ndiy pakwez ni anend awonsu. Mulong wa kuchirish mwom washadishay Adam, Yesu wapana mwom wend uwanyidina mud difut. Padingay pa divu Yesu “kasalap chitil, mukan mwend kadimbanap.” (1 Pita 2:22) Pa chisu cha rufu rend, mwom wa Yesu uwanyidina wading wisiken kamu ni mwom washadishay Adam.​—1 Kor. 15:45; 1 Tim. 2:6. w24.01 10 par. 5-6

Pavumbakay Yesu, wandama mwi Ndond Yitumbila Nakash ya tempel wa mu spiritu. Pinap tumen kamu patok kuwap kwa ditenchik da Yehova mulong wa difukwil dishitwila dimedina pa difut diapanay Yesu ni win kupesh wa Yesu Kristu. Mwin kupesh mujim mu Isarel wandamang mwi Ndond Yitumbula Nakash yasalau kud antu nich mash ma annam, pakwez Yesu wandama “mwiur mwin,” ndond yitumbila nakash kusutamu jindond jawonsu, mulong wa kumekan kurutu kwa Yehova. Mwinimwa, wamekesha usey wa mwom wend uwanyidina wapanay mulong wetwetu “mulong wa kudiosh yitil nich yakupesh ya mash mend amwinend.” (Heb. 9:12, 24-26) Ruchingej retu rikala ra kuya mwiur ap ra kushakam pa divu, etu awonsu tukutwish kumwifukwil Yehova mu tempel wend wa mu spiritu. w23.10 28 par. 13-14

Tongin chisend chikwetay Yesu mwiur mud Mwant wetu ni Mwin Kupesh Mujim ukweta ranaken. Kusutin ndiy, tukutwish kusej mu malembil ku “ditand dia Nzamb, . . . kudia ranaken” ni kwit chakwel atwovil riy ni kutukwash “pa chisu chitukweta kuswir.” (Heb. 4:14, 16) Dichuku din diawonsu tufanyidin kusal usu wa kutongijokin pa yom yatusadidinau kal ni yitusadidinau Yehova ni Yesu. Rukat rau mulong wetwetu rifanyidin kupukun michim yetu ni kutubachik kwikal nich mushiku mu mudimu ni mu difukwil dietu. (2 Kor. 5:14, 15) Mutapu umwing wa pakampwil wa kumekesh kujikitish kwetu ud wa kusal usu wa kuyikwash antu akwau kwikal Atuman a Yehova ni in kwilej a Yesu. (Mat. 28:19, 20) Winou wawiy mutapu wasalay kambuy Paul. Wading wij anch rusot ra Yehova rid anch “antu awonsu apanda ni kwijik uyakin.”​—1 Tim. 2:3, 4 w23.10 22-23 par. 13-14

Antu avud akat kusadin mufund winou mulong wa kuyikasikesh nich antu chisu tulejena ni kuyilej kand mutapu ukwikala mwom mu Paradis. Mutapu ik tukutwisha kuyinkish antu akwau niyetu ayinetu kashinsh anch yiyukish yilejenau mu Kujingunik 21:3, 4 yid yakin? Yehova utwinkishin mayingishin makin mafanyidina kutukwash kwikal ni kashinsh anch kushilamu kwend kukuwanyin. Mu maverse malondwilaku am tukutan mayingishin matukwashina kuchingejin mu kushilamu kwa Yehova piur pa Paradis. Tutangin anch: Chad ndiy ushicha pa ditand walonda anch: ‘Katat nikat kusal yom yawonsu yisu!’ Wangela kand anch: ‘Fund mazu minam, mulong madi makin, mafanyidina kumachingej.’ Wawejaku kand anch: ‘Yom yiney yawanyin kal! Am’ nid Alpha ni Omega, yam disambishil, yam kand disudiel.​—Kuj. 21:5, 6a. w23.11 3 par. 3-5

Nsand ukumekesh anch ukudishin ukaliweny wa kutong kusutin kutond nawamp yidjal ni mutapu wa kwikidish. Yidjal yivud yipalangeshinau nlel yid ya antu akad kumulimish Yehova, ni yikat kuyitwal kusal yom yijondina. Yitongijok yijondina yikat kumeken mu mutapu wa kudjal masun malamatina nakash, ni mamumekeshina muntu ikundj mud mband. Chisu chitondinay yom yakudjal, nsand mwin Kristu uswila ukat kulondul mbil ja Bibil ni kulondul kand yilakej yiwamp mu chikumangen. Ukutwish kwiyipul anch: ‘Kutond kwam kukat kumekesh anch niyilimishin antu akwau? Ov, mutapu wam wa kudjal ukat kumekesh kud antu akwau anch nid kashalapol wa Nzamb?’ (1 Kor. 10:31-33) Nsand ukweta ukaliweny wa kutong akat kumulimish kud akadivar ni anambaz, kupandakanamu kand kud Tatukwetu wa mwiur. w23.12 26 par. 7

Pakur, “mwant wa kurul” wayirishikisha antu a Yehova. (Dan. 11:40) Chilakej mu mivu kanan ni yitot chidivu, akadivar avud ayiteka mu rukan mulong alika kwiyandjik mu milong ya mangand. An amwing a Atuman ayopata ku mashikol mulong wa diyingishin dawiy dimwing. Mu mivu yakwinyim ey, Atuman a Yehova adia mu winyikel wa mwant winou ayirishikishin nakash mulong ading amekeshin kushinshaman kwau ku Want wa Nzamb. Chilakej, pa chisu cha mavot, mwin Kristu ukutwish kwikal ni yovil ya kukwash chisak chimwing cha politik ap kunung chikas kud muntu kanang ukimbinau kuvot. Ap anch kakutwishap kamu kuvot, pakwez mu muchim ni mu manangu mend, ud ku mutambu kanang. Chid kamu cha usey nakash kulik kwiyandjik mu milong ya chipolitik kadiap ching mu yisal pakwez kand mu yitongijok ni mu yovil yetu!​—Yohan 15:18, 19. w23.08 12 par. 17

Patubambidina mulong wa mwom, tufanyidin ‘kubambil mu mutapu wa kuwin.’ (1 Kor. 9:24) Yesu walonda anch “kwifund kudia, ap kukwachik maar, ap . . . yakamish ya mwom” yikutwish kwikal chisend chilimina. (Luka 21:34) Mifund yiney ni yikwau kand yikutwish kutukwash kujingunin yom tufanyidina kuswimp patudia mu kubambil kwa mwom. Tukwet kashinsh anch tukuwin mu kubambil kwa mwom mulong Yehova ukutwinkish usu tuswirikedina. (Isay 40:29-31) Chawiy, kangal waziy! Mwimburija kambuy Paul, wasala usu wend win wawonsu mulong wa kutambul difut diading kurutu kwend. (Fil. 3:13, 14) Kwikil muntu ukutwisha kubambil pa ndond yey, pakwez nich ukwash wa Yehova ukutwish kuwin. Yehova ukutwish kukukwash kusend yisend yey ni kudjibul yakad usey. Nich ukwash wend, ukutwish kubambil nich kujijaman ni kuwin! w23.08 31 par. 16-17

Padingay Yesu ni mivu 12, anvajend amusha ku Yerusalem. (Luka 2:46-52) Chading chisend chijim cha Josef ni Mariy cha kwikal nich kashinsh anch anau awonsu ading pamwing chisu chachirikangau ku chikumbu kupwa kwa kudiokal mu weny wayau mulong wa kusal musambu. Josef ni Mariy pamutanau Yesu, Mariy wamwela Yesu mulong washala mu Yerusalem. Yesu kajimanap mulong wa yom yamwelau. Pakwez, wayakula anvajend mu mutapu uwamp ni wa kalimish. Ap mwamu, Josef ni Mariy “kovap kurumburik kwa yom yakulay.” Pakwez, Yesu ‘wadandamena kuyiziyin. Ansand, ov, yisu yimwing ukat kumanany anch chikasikening kuyiziyin anvajen anch arumbuk ap anch kakuteshinanyap nawamp? Yom ik yikutwisha kukukwashany? Tonginany pa mutapu ukatay Yehova kwiyov. Bibil ulondin anch, anch wayiziyilany anvajen “chom chinech chikat kumusangarsh Nsalejetu.” (Kol. 3:20) Yehova wij anch yisu yimwing anvajey kakutwishap kamu kukutesh nawamp ap akutwish kutek yijil yimwing yidia yikash kuziyil. Pakwez anch wakwat mupak wa kuziyin, ukutwish kuyisangaresh. w23.10 7 par. 5-6

Mbay netu wa ku shikol ukutwish kulond anch Atuman a Yehova afanyidin kuswimp yitongijok yau piur pa utun. Tufanyidin kumwinkish kashinsh anch tukat kuyibangin antu a mitapu yawonsu ni tukat kulimish want ipend ukwetay muntu mulong wa kukwat mipak yend. (1 Pita 2:17) Tukutwish chad kwikal ni mutapu wa kumulej yom yilondinay Bibil ni mutapu tukutwisha kwikal ni mashakamin mawamp anch twasadin yom yiney. Anch muntu watutadik nakash, tufanyidinap kapamp kamwing kulond anch twij yitiyij yend. Chilakej, chid nchik anch mbay ney wa ku shikol walond anch kwitiyij mudiay Nzamb ud usup? Ov, tufanyidin kulond kapamp kamwing anch muntu winou witiyijin mu dikarumuk ni wij yom yiney nawamp? Chid chakin anch, ukutwish kuchirikin yom yateshinay kud muntu kanang. Pa ndond pa kusambish kulond yom yifundishinay siyans, ukutwish kumwinkish mbay ney wa ku shikol chom chikutwishay kutongijokin chisu chikwau. Pamwing ap ukutwish kumulej mikand ni mavideo madia pa jw.org misambidina piur pa yitang. Ukutwish pamwing ap mu kusut kwa chisu kwisambin mutu wa mulong ap video udiap. Inge, anch twamekesh kalimish mu mutapu winou, chikutwish kumukwash chakwel akata kwilej yom yivud piur pa yom yilondinay Bibil. w23.09 17 par. 12-13

Tukutwish kwikal nich kashinsh anch Yehova ukutwish kutusadin ni kutuyukish chikalap nchik kurumbuk kwetu, ching anch twasal yawonsu tukutwisha kusal mulong wa kuswimp ni kudandamen kand kumuchingejin. (Jnsw. 28:13) Samson kadingap muntu uwanyidina, pakwez kaziyap kumusadin Yehova, ap kupwa kwa kumulej Delila ujindj piur pa usu wend. Ni Yehova wadandamena kumusadin Samson. Nzamb wamusadina kand Samson chipandakena. Yehova wadandamena kumuman mud muntu wadinga ni ritiy rikash, ni wamuteka pakach pa antu ashinshamena afundinau mu Hebereu shapitre wa 11. Chitukasikeshin nakash pa kwijik anch tumusadidin Tatuku wa rukat udia mwiur ukweta impu ya kutwinkish usu, pakampwil chisu tuziyina! Chawiy mud Samson, el tumwilembinany Yehova anch: “Nsalejam nvurikap, ngikishap kand ukash.”​—Ank. 16: 28. w23.09 7 par. 18-19

Anch twalam dichuku da Yehova mu manangu, chikutuswapel kuyilej antu akwau rusangu ruwamp. Pakwez yisu yimwing chikutwish kutukasiken kusal mwamu. Mulong wak? Tukutwish pamwing ap kwov wom wa antu akwau. Yawiy yom yamushikena Pita. Uchuku kurutu kwa rufu ra Yesu, Pita wova wom wa kwitiyin anch ud mwin kwilej wa Yesu ni wamutuna tupamp tuvud anch kamwijap kwend! (Mat. 26:69-75) Pakwez pita wapandakana wom ni kupwa wafunda anch: ‘kangal wayovany wom, ap kwiyakamish.’ (1 Pita 3:14) Mazu ma Pita matwinkishin kashinsh anch tukutwish kupandakan wom wa antu. Yom ik yikutwisha kutukwash kupandakan wom wa antu? Pita utulejin anch: “Mutumbishany Kristu mu michim yen.” (1 Pita 3:15) Chinech chirumburikin kutongijokin pa ulabu ni usu ukwetay Nsalejetu udia Mwant Yesu Kristu. w23.09 27-28 par. 6-8

Tufanyidin kudandamen kurish mulong kangal twandam mu “yisalijok yiyimp yikat kusalau antu mu mididim.” (Efes 5:11) Kashinsh kad anch, ang muntu wasambish kutal, kutesh, ap kulond yom yijondina, chikumuswapel kusambish kusal yom yiyimp. (Dis. 3:6; Jak. 1:14, 15) Mangand ma Satan mapakishin kutudimb chakwel twitiyija anch yom yimenay Yehova anch yijondin yawonsu yiyipinap kwau. (2 Pi. 2:19) Djabul ukat kupakish kuyitek antu mu kanrumbangesh mulong akangany kwijik kwauril yom yiwamp ni yiyimp. (Isay 5:20; 2 Kor. 4:4) Chidap cha kushimok pa kuman yom yiney mu mafilim mavud, ku matelevizion, ni pa ma internet akat kupalangesh yitongijok yipwitamijadina ni mbil jitentamina ja Yehova! Satan ukat kupakish kutudimb kusutin kutubachik kutong anch yaku yijondina ni mitapu yakudjal yiyimp yidap ya ubaj.​—Efes 5:6. w24.03 22 par. 8-10

Dizang diading mwinkand watungau in Isarel ni ausendang pashemunikangau ndond yimwing mulong wa kuya kwi ndond yikwau. Adisadina mu mivu piswimp 500 kushik ni patunginau tempel mu Yerusalem. (Kub. 25:8, 9; Kuch. 9:22) Dizang diading ndond yijim yayikwashang in Isarel kumusejin Nzamb, kupesh milambu yau ni kumwifukwil. (Kub. 29:43-46) Pakwez, dizang diading dimekeshin kand chom chimwing chijim nakash. Dizang da pasak diading ‘mwizwizwimb wa yom ya mwiur,’ ni diading dimekeshin tempel mujim wa mu spiritu wa Yehova. Kambuy Paul walonda anch “chom chinech [dizang ap mwinkand winou] chikal kal chijingidij cha chirung cha katat.” (Heb. 9:9) Chawiy pa chisu chayifundinay in Hebereu, tempel wa mu spiritu wading wikadinaku kal mulong wa in Kristu. Wikalaku mu muvu wa 29 C.C. Muvu winiwa, Yesu amubatisha, amuzizila many nich spiritu utumbila ni wasambisha kusal mud ‘mwin kupesh mujim’ wa Yehova mu tempel wa mu spiritu.​—Heb. 4:14; Mid. 10:37, 38. w23.10 25-26 par. 6-7

Mulong wa kwikal ni mwikadil wa mu spiritu uwamp, in Kristu afanyidin kwikal isikena mulong wa kumusadin Yehova nich musangar. Mutapu ik? Tufanyidin kwikal isikena mu kwijidin kuswimp kwa mashakamin kanang makutwisha kutushiken mu mwom ni kusutil ku kulimish yitongijok ni mipak ya antu akwau. Mulong tud atushalapol a Yevoha, tufanyidin kwikal isikena. Tufanyidin kand kwikal ikepishina ni antu akweta riy. Yehova amutazukin anch “Diyal” mulong ukweting muchim ukasikena ni kakuswimpangap. (Kuv. 32:4) Pakwez, uding kand wisikena. Ap anch kud yom yiswimpina mu mangand minam, Yehova uding wisikena ni ukweting kashinsh anch kushilamu kwin kwawonsu kwashilayimu kukuwanyin. Yehova wayitanga antu mu chifu chend ni ukaliweny wa kwijidin kuswimp kwa mashakamin. Utwinkishin mbil jidia mu Bibil jovikena nawamp mulong wa kutukwash tukwata mipak ya manangu chikalap nchik yom tukutwisha kurish nich. Chilakej cha Yehova ni mbil jend jikatay kutwinkish jikat kutukwash kwijik anch, ap anch ud “Diyal” pakwez Yehova uding kand wisikena. w23.07 20 par. 1-3

Yehova wifanikeshin amwinend ni maku ukweta rukat. (Isay 66:12, 13) Tukutwish kutongijokin piur pa maku umubangidina mwanend nich rukat. Anch turishin ni yikokujol, tufanyidin kuchingejin pa rukat ra Yehova. Ap anch twarumbuk Yehova ukat kudandamen kutumekeshin rukat rend. (Kus. 103:8) Muchid wa Isarel wamurumbukina Yehova tupamp tuvud; pakwez chisu chakarumukangau ni kulik kusal yom yiyimp wayimekeshinang rukat rend rishinshamena kusutin mazu mud manam: “Ukwetany usey ujim nakash kudi am. En udiany akarukat nam nilimishina.” (Isay 43:4, 5) Rukat ra Yehova riswimpinap. Ap anch twasala yitil yijim pakur, Yehova katudjibwilap bwat. Anch twakarumuk ni kumuchirikin, tukuman anch udandamedin kutukat. Utukanin anch ‘ukutulikishin swa.’ (Isay 55:7) Bibil ulejen anch ‘Nzamb ukutwinkish yirung ya kupizurish michim yetu.’​—Mid. 3:20. w24.01 27 par. 4-5

Yehova ukutukwash chisu turishina ni yakamish. Chilakej, anch twamwit ntakel wetu wa mudimu mulong wa kuya ku chitentam ap twamwit chakwel aswimp yom chakwel twikala ni mutapu wa kukumanganang ku yikumangan yawonsu, ud mutapu tukata kukimb kuman ukwash wa Yehova mu mwom wetu. Tukutwish kukashimuk mutapu ukusadika yom. Mud chibudikin, kashinsh ketu mudiay Yehova kakukasikan. Nich kwikepish Esidera wita ukwash kud Yehova. Chisu chawonsu pading piyakamishinay mulong wa kuwanyish yisend, Esidera wamulembilang Yehova nich kwikepish. (Esi. 8:21-23; 9:3-5) Mwikadil wa Esidera wayibachika antu adingay nend kumukwash ni kwimburij ritiy rend. (Esi. 10:1-4) Anch twiyakamish mulong wa maswir ma yom ya ku mujimbu ap mulong wa diking da dijuku dietu, tufanyidin kumulembil Yehova nich kashinsh. w23.11 18 par. 15-17

Yehova kalondinap anch ang tukimbin kwikal antu atentamina tufanyidin kamu kusal yom mud mwasalay Aburaham. Kud mitapu yivud tukutwisha kumekeshin ritiy kusutil yisal yetu. Tukutwish kuyak antu asu mu chikumangen, kuyikwash akadivar nau anambaz adia mu maswir, ni kusal yom yiwamp kud antu a mu dijuku dietu. Yiney yawiy yikutukwasha kwikal ni dilau ni yiyukish ya Nzamb. (Rom 15:7; 1 Tim. 5:4, 8; 1 Yoh. 3:18) Mutapu umwing wa usey tukutwisha kumekesh anch tukwet ritiy ud kusutin kulejan rusangu ruwamp kud antu akwau. (1 Tim. 4:16) Etu awonsu pakach petu tukutwish kumekesh kusutil yisalijok yetu anch tukwet ritiy mu kushilamu kwa Yehova anch kukuwanyin kamu chakin. Anch twasal mwamu, tukutwish kumekesh chakin kamu anch Nzamb ukutuman anch tutentamin ni ukututazuk anch arund nend. w23.12 2 par. 3; 6 par. 15

Padingay piswimp ni kufa, Mwant David wamuleja Salomon anch: “Katat jijaman ikal kamu muntu ikundj.” (1 Ant 2:1-3) Amakundj awonsu in Kristu nlel akat kusadin chiyul chinech. Mulong wa kusal mwamu, afanyidin kuziyin ku yijil ya Nzamb ni kusadin mbil ja Bibil mu mashakamin ma mwom wau wawonsu. (Luka 2:52) Mulong wak chid cha usey kud akadivar ansand kwikal amakundj in Kristu aswila? Akadivar in Kristu akwet yisend yivud nakash ya kuwanyish mu dijuku ni mu chikumangen. Akadivar ansand, ukwetany chakin kamu yisend ufanyidinanya kuwanyish mu machuku ma kurutu. Ukutwish kwitekin mupak wa kusal mudimu wa chisu chawonsu, kwikal nkwash wa mudimu, ni kupwa kushiken kwikal mukurump wa chikumangen. Ukusot kand pamwing ap kwatan ni kuval an. (Efes 6:4; 1 Tim. 3:1) Mulong wa kuwanyish ntong jinej ni kujitwish, ufanyidin kwikal mwin Kristu uswila. w23.12 24 par. 1-2

Amakurump in Kristu akwet chisend cha kulam amikoku a usey nakash a Yehova. Asangaredin chisend chau mu kuyisadin akadivar ni anambaz nau, ni akat kusal mudimu wa ‘kuyilam antu’ a Nzamb (Jer. 23:4; 1 Pita 5:2) Tujikitishin nakash mulong wa kwikal ni amakundj mud inay mu yikumangen! Amakurump akutwish kwilejin ku chilakej cha Nkalansambu Gedeyon. (Heb. 6:12) Wadinga ntakel ni mwin kuchidij antu a Nzamb. (Ank. 2:16; 1 Jsng. 17:6) Mud Gedeyon, amakurump ayitonda mulong wa kulam antu a Nzamb pa chirung chikash. (Mid. 20:28; 2 Tim. 3:1) Tukutwish kwilejin ku chilakej cha kwikepish ni cha kuziyin cha Gedeyon. Kujijaman kwend akupaka pa chisu chading chisotinay kuwanyish yisend yend. Anch tusadin mud mukurump wa chikumangen ap bwat, tukutwish kuyijikitish nakash amakurump. Tufanyidin kuyikwash amakundj inay a mu spiritu mulong wa mudimu ukash usadinau.​—Heb. 13:17. w23.06 2 par. 1; 2 par. 3