Ngond wa 3

Ngand yisu kand kal yeza. Pakwez tongin piur pa yom yimwing tumena, mud atutumbu, mitond, annam ni antu. Kwikil muntu ukutwisha kutadik kwikalaku kwa yom yiney ap anch pa chisu chimwing yadingapaku. Anch nlel yidaku, chid mulong Yehova wayitanga. (Dis. 1:1, 26, 27) Nzamb wetu ukwet kand rutong ra kulet ngand yisu. Ukuwanyish chakin kamu rutong rend riner. Mwi ngand yisu, antu akusanger mwom wa chikupu nich ukash wa mujimbu uwanyidina. Tukutwish kwikal nich kashinsh anch ngand yisu yikwez pa chisu chatenchikay kal Nzamb. (Isay 65:17; Kuj. 21:3, 4) Pituchingedina ngand yisu, sal usu wey win wawonsu mulong wa kukasikesh ritiy rey. Mekesh chisu chin chawonsu anch ud mwin kujikitish mulong wa difut. Tongijokin pa dikand da Yehova. Ipana mu mijikit yikukusejisha piswimp ni Yehova. Anch wasal yom yiney, ukutwish kwikal pakach pa antu ‘aswanina kushilamu kusutin ritiy ni kushimpish muchim.’​—Heb. 6:11, 12. w23.04 31 par. 18-19

Yesu watala mes mwiur ni walembila kurutu kwa antu awonsu. Wakata kumwinkish Yehova katumb mulong wa yom yasadika. Kupwa Yesu watoya anch: “Lazar, budik pol!” (Yoh. 11:43) Ni Lazar wabudika mwi nzay! Pinap Yesu wasala chom chading chitonginau antu amwing anch kakutwishap kuchisal. Rusang riner rikasikeshin ritiy retu mu ruchingej ra divumbuk. Mulong wak tulondina mwamu? Vurik mazu mamulejau Mart kud Yesu anch: ‘Mpanyey ukuvumbuk.’ (Yoh. 11:23) Mud Tatukwend, Yesu ukwet impu ni usu wa kuwanyish kushilamu kwinoku. Padilay wamekesha anch ukwet impu nakash ya kuyivumbul afu ni kudosh kusansan kukata kudokal ku rufu. Pavumbukay Lazar, Yesu wamekesha anch ukwet usu wa kuyivumbul afu. Tongijokin kand pa yom yamuvurishau Mart kud Yesu yisambidinau mu mufund wa nlel. Tukwet kand mayingishin mawamp ma kwitiyij anch Nzamb ukuwanyish kushilamu kwend kwa kuyivumbul afu. w23.04 11-12 par. 15-16

Chikutwish kutwit kuswimp yom tukata kwit mu malembil anch twajingunin kamu patok chida rusot ra Yehova. Tufanyidin kuvurik anch Yehova ukwet rutong ni ukuriwanyish pa chisu chatenchikay kal. Mu rutong riner mud kupwish rawonsu milong yikata kutumesh mar nlel unou—milong mud mar madokila ku yom yatangau, mayej, ni rufu. Yehova ukuwanyish rutong riner kusutin Want wend. (Dan. 2:44; Kuj. 21:3, 4) Pakwez djat ni katat, Yehova ulikidil chakwel Satan adandamen kuyikel mangand. (Yoh. 12:31; Kuj. 12:9) Anch Yehova wapwish milong ya antu nlel, chikutwish kumekan mud Satan watwishin kuyikel mangand nawamp mu chilik kanang. Chawiy, kuchingel anch Yehova awanyisha kushilamu kwend, chirumburikinap anch kakatap kutukwash. Yehova ukat kutukwash. w23.05 8 par. 4; 9-10 par. 7-8

Mutapu ik tukutwisha kuyikwash antu akwau chakwel ataninamu mu Chivurikish? Cha kusambish ufanyidin kuyitazuk. Chikwau kand ufanyidin kuyitazuk antu tutanijadining nau chisu chawonsu mu mudimu wa kulejan, tukutwish kusal list wa antu tukutazuka. Pakach pa antu tukutazuka pakutwish kwikal anamakwetu, ambay netu a mudimu, a ku shikol ni antu akwau. Ap anch tukwetap maladikij mavud ma kuchap, tukutwish kuyitumin ma elektronik. Nany wija anch antu avud akwez! (Mul. 11:6) Ijik anch antu tukutazuka akwikal ni yipul, pakampwil anch kandikal akumanganangap ku yikumangan yetu. Chawiy tukutwish kutongin pa yipul yikutwishau kwipul ni kusal usu wa kuyakul. Kupwa kwa kukumangan ku Chivurikish, antu asu asangaredina akutwish kwikal ni yipul. Tukatin kusal usu wetu wawonsu—​kurutu, pa chisu, ni kupwa kwa Chivurikish​—mulong wa kuyikwash antu ada “mu mwikadil uwanyidina” kutaninamu ku yom yamanangau.​—Mid. 13:48. w24.01 12 par. 13, 15; 13 par. 16

Bibil wisambidin divumbuk da antu chinan avumbulau panap pa divu. Ov, ukutwish kushinshikin nakash rusang piur pa divumbuk ni divumbuk? Piwilejina, shinshikin malejan ukutwisha kwilejinaku. Tongin mutapu ukutwisha yilakej yiney yawonsu kumekesh impu ni dikand dikwetay Nzamb mulong wa kuyivumbul afu. Cha usey nakash, tongijokin chikurikina pa divumbuk da Yesu, dida da usey nakash pakach pa antu avumbulau pasak. Vurik anch pavumbukay Yesu kwading yitot ya antu imenap ayinau ni mes mau kuvumbuk kwend ni chinech chikasikeshin ritiy retu. (1 Kor. 15:3-6, 20-22). Tumujikitishin nakash Yehova mulong wa kushilamu kwa divumbuk! Tukutwish kwikal nich kashinsh anch kushilamu kwinoku kukuwanyin kamu mulong Yehova ukwet impu ni dikand da kuwanyish kushilamu kwinoku. Elany amboku tudandamen kukasikesh ritiy retu mu kushilamu kwinoku kwa usey. Anch twasal mwamu, tukwikal mu urund wa piswimp nakash ni Nzamb, umukanina muntu ni muntu wa pakach petu anch, ‘Akatish ney akuvumbuk!’​—Yoh. 11:23. w23.04 8 par. 2; 12 par. 17; 13 par. 20

Kwijik mimbu ni kwikepish yid mikadil yendining pamwing. Tukat kumekesh anch twij mimbu yetu mu kwikal ni chitongijok chisikena piur petu ni piur pa yom tukangenya kusal. Anch twikepishin, tukutwish kuyilimish antu akwau ni kuyiman mud ad a usey nakash kutupandakamu etu. (Fil. 2:3) Yisu yivud, muntu wija mimbu yend uding kand muntu wikepishina. Gedeyon wading ikundj wikepishina ni wija mimbu yend. Pamulejau Gedeyon kud mwangel wa Yehova anch amutondin mulong wa kuyikol in Isarel mu makas ma in Madian, ikundj winou wikepishina wakula anch: “Dijuku diam diburedin yom mu muchid wa Manase, niyam nidi kwam wa kwinsudiel mu dijuku diam.” (Ank. 6:15) Wiyova anch kawanyidinap kusend chisend chinech, pakwez Yehova wading wij nawamp anch ukutwish kamu. Nich ukwash wa Yehova, Gedeyon watwisha kuwanyish chisend chamwinkishau. Amakurump asadining usu wau wawonsu mulong wa kwijik mimbu yau ni kwikepish mu yom yawonsu. (Mid. 20:18, 19) Kakatap kwibaz mulong wa ukaliweny wau ap mulong wa yom yisadinau; kakatap kand kwinan mulong wa kurumbok kwau ap mulong wa yom yikangenyau kusal. w23.06 3 par. 4-5

Uprofet wa kuchany mutu wa Satan ukuwanyin mu mivu 1 000 ni kusut. (Kuj. 20:7-10) Kurutu kwa yom yiney kusadik, Bibil ulejen yinship yiney yikwamushena. Cha kusambish, michid yikez kulond anch ‘chisambu ni diking!’ (1 Tes. 5:2, 3) “Pawiy pinipa kamu,” mar makash makusambish chisu chikurishikishau marelijon ma makasu kud in michid. (Kuj. 17:16) Kupwa kwa yom yiney, Yesu ukuyirumburish antu, ni ukuyauril amikoku nau ampemb. (Mat. 25:31-33, 46) Pa chisu chinicha, Satan ukudandamen kumubwambwil Yehova. Mulong wa rikis rend, ukubachik kubombakan kwa michid kutazukinau mu Bibil anch Gog wa ngand ya Magog mulong wa kuyirishikish atushalapol a Yehova. (Ezek. 38:2, 10, 11) Pa chisu kanang, in Kristu azizidilau many akushalaku akuyikumangej mwiur pamwing ni Kristu ni chisak chend cha angel mulong wa kurish kwi njit ja Armagedon jikumekesha disudiel dia mar makash. (Mat. 24:31; Kuj. 16:14, 16) Kupwa Winyikel wa Mivu Kanan wa Kristu ukusambish pa divu.​—Kuj. 20:6. w23.10 20-21 par. 9-10

Nlel atushalapol avud a Yehova ashich mu jingand mukangeshinau mudimu wetu. Pakwez mud Abidias, akadivar ni anambaz inay kitiyinap kwimik kumwifukwil Yehova, ap anch akat kuyimekeshin antakel a ngand kalimish! (Mat. 22:21) Akat kumekesh anch amwovil Nzamb wom kusutil kumuziyin ndiy pa ndond pa kuyiziyin antu. (Mid. 5:29) Akat kusal mwamu kusutil kudandamen kulejan rusang ruwamp ni kukumangan pamwing ku ujindj. (Mat. 10:16, 28) Ni akat kusal usu wa kwikal nich kashinsh anch akadivar ni anambaz nau akwet yakuda ya mu spiritu yiswirikedinau. Tushinshikinany chilakej cha Henri, ushicha mwi ngand yimwing ya Afrik mwading mukangeshinau mudimu wetu. Mu chirung chinicha, Henri wasendang yakuda ya mu spiritu mulong wa kuyitwadin Atuman akwau. Wafunda anch: “Niding kwam muntu ukweting wom. . . . Yehova wankwasha kwikal ni kutakaman nading niswirikedina.” Ov, niyey ukutwish kwikal ni kutakaman mud kwikalay nich Henri? Ukwikal nich anch wakudish kalimish kakurikina mulong wa Nzamb. w23.06 16 par. 9, 11

Chisu chabwambwilau Adam ni Ev, chimeken anch Satan wakangesha chitongijok cha Nzamb cha kwizwish divu ni antu awanyidina ni aziyidina. Satan wading utongin pamwing ap anch Yehova kakutwishap kuwanyish kushilamu kwend. Watonga anch Nzamb wading ufanyidin kumujip Adam ni Ev ni kutang kand ambay a uruw akwau awanyidina mulong wa kuwanyish chitongijok Chend mulong wa antu. Pakwez anch Nzamb wasala mwamu, Djabul wafanyina kumufund Nzamb anch ud mukamakasu. Mulong wak? Mulong mud mulejenau mu Disambishil 1:28, Yehova wamuleja Adam ni Ev anch akwizwish divu ni anau. Ap pamwing ap Satan watonga anch Yehova wafanyina kumulik Adam ni Ev kuval an akad kuwanyin, akad kwez kutwish kwikal awanyidina ap pakemp. (Mul. 7:20; Rom 3:23) Anch mwamu chasadika, Djabul wafanyina kamu kumufish nich Yehova anch wakangany kal. Mulong wak? Mulong mutapu winou wafanyinap kuwanyish chitongijok cha Nzamb cha kwizwish divu ni an a Adam ni Ev awanyidina ni aziyidina. w23.11 6 par. 15-16

Yehova utwinkishin umutakel wovakena kusutin Dizu dend ni dirijek dend. Tukwetap diyingishin da kuwej mbil yikwau ku umutakel winou utwinkishinay. (Jnsw. 3:5-7) Chawiy, tufanyidinap kusal yom yakaday Bibil kutwit kusal ap kuyitekin ambay netu in Kristu mbil pa milong yau ya pakampwil. Satan ukat kusadin ‘makasu ma chamwamu’ ni ‘yom ya pa dishin ya mangand,’ mulong wa kuyipumbul ni kuyauril antu. (Kol. 2:8) Mu mivu chitot ya kusambish, mu yom yiney mwading filozofi wimedina pa yitongijok ya antu, mafundish ma in Yuda makad kwikal mu Bibil, ni mafundish mading malondina anch in Kristu afanyidin kuziyin ku Chijil cha Moses. Minam mading kamu makasu, mulong mayibachikang antu kulik kumutesh Yehova uda Musul wa manang makin. Nlel, Satan ukat kusadin ma radio, televizion ni tupend twa internet mulong wa kupalangesh nich nsang jakad misul yakin ni ma rapor ma makasu ma antakel a chipolitik. w23.07 16 par. 11-12

Yehova wapwisha mulong wa wintombwij mu mutapu umwing wamushimokisha Satan nakash. Pa ndond pa kwimekesh anch wading mukamakasu, Yehova wimekesha patok anch uding mwin yakin kusutil kukumulik Adam ni Ev chakwel avala an. Chikwau kand, Yehova wamekesha patok anch kwikil chom ap muntu kanang ukutwisha kumukangesh kuwanyish kushilamu kwend. Wamekesha anch chitongijok chend chikuwanyin kamu kusutil “mbut” yafanyina kupandish an aziyidina a Adam ni Ev. (Dis. 3:15; 22:18) Satan wafanyina kushimok mulong wa mutapu watenchikay Yehova yom! Mulong wak? Chid mulong kutenchik kwinoku kwading kwimedin pa rukat rakin. (Mat. 20:28; Yoh. 3:16) Satan kakwetap mwikadil winou, ndiy ud mwin kwitongin amwinend. Pakwez, yom ik yafanyina kusadik mulong wa ditenchik da yakupesh ya difut? Kwinsudien kwa Mivu Kanan, an a Adam ni Ev aziyidina ni awanyidina akushakam pa divu dikwikala paradis, mud mwadinga chitongijok cha kusambish cha Yehova. w23.11 6 par. 17

Tukat kulimish chijil cha Nzamb piur pa kutumb ka mwom ni mash. Mulong wak? Mulong Yehova ulondin anch mash mamekeshin mwom, chipan chida cha usey nakash chatwinkishay. (Lev. 17:14) Chisu chayilejay Yehova antu kapamp ka kusambish anch ada mbij ja annam, wayijidika anch kuda mash bwat. (Dis. 9:4) Wachirikina kand chijil chinech mu Chijil cha Moses chayinkishay in Isarel. (Lev. 17:10) Ni watakela chisak chitakedila cha mu mivu chitot ya kusambish chakwel ayileja in Kristu awonsu anch ‘kangal ada mash.’ (Mid. 15:28, 29) Tukat kuziyin ku chijil chinech chisu tukwatina mupak piur pa milad ya kwiyokish. Tukat kuziyin kand ni muchim umwing kwi mbil yishitwila ya Yehova. Kusutin dizu da chifanakesh, kambuy Paul watuyula “kujip” yid yetu ya mujimbu—charumburik anch kukwat mupak wa kujip maku mayimp ma mujimbu. Tukat kwipuk kutal ap kusal chom chin chawonsu chikutwisha kututwal ku yisal ya masandj.​—Kol. 3:5; Job 31:1. w23.07 15 par. 5-6

Ov, Samson wading umuchingejidin nakash ni kumukat nakash Delila mu chilik cha kukangany kujingunin yom yading yisotinay Delila kusal? Chikalap nchik usu wasalay, Delila wadandamena kumushindin Samson chakwel amuleja kwading kudokila usu wend, ni disudien washikena kumujingunin ujindj. Cha ushon, chinech chamushikija Samson kushadish usu wend ni dilau da Yehova mu chisu kanang. (Ank. 16:16-20) Samson wamana mar nakash mulong wamuchingejina Delila pa ndond pa kumuchingejin Yehova. In Filistin amwalikesha Samson ni amujipa mes. Amuteka mu rukan mu musumb wa Gaza, ni mwawiy chad mwinamwa mwamutekau kwikal musuk mwin kutwa wung. Kupwa in Filistin aya ni Samson ku musambu wau umwing mulong wa kumusip. Alambula yakupesh yivud kud nzamb wau wa makasu Dagon, mulong ading atongin anch ndiy wayikwasha kumukwat Samson. Aya ni Samson ku musambu mulong “akayisangareshap”​—charumburik anch kumusip.​—Ank. 16: 21-25. w23.09 5-6 par. 13-14

Pamwing ap mbay netu wa ku mudimu ap wa ku shikol ukutwish kutwipul mulong wak tukat kuziyin kwi mbil ja Bibil. Tukusal usu wetu wawonsu wa kulond piur pa yitiyij yetu, pakwez tufanyidin kand kulimish yitongijok ya muntu twisambina nend. (1 Pita 3:15) Chawiy pa ndond pa kutong anch utwipwil mulong wa kutusarumun, tongin mutapu ukutwisha chipul chend kukukwash kwijik yom yisotilay kwijik. Chikalap nchik diyingishin dimubachikina muntu kwipul chipul tufanyidin kwakul mu mutapu uwamp ni wa kalimish. Chakul chetu chikutwish kumukwash kushinshikin nakash piur pa yitongijok yend. Anch mbay netu wa mudimu wipul mulong wak tukusalangap misambu ya dichuku da kuvadik, ukutwish kwiyipul anch: Ov, utongining anch tukatap kusutishang chisu mulong wa kwisangaresh? Tukutwish chakusambish kumukasikesh mbay netu wa mudimu kudandamen kuyibangin antu akwau ni kupwa kumwinkish kashinsh anch niyetu tukatin kushakam nawamp nau ambay netu a mudimu. Chinech chikutwish kutwinkish mutapu wa kwambambin yom yilondinay Bibil piur pa misambu ya machuku ma kuvadik. w23.09 17 par. 10-11

Tukwet chisend cha kusadil chisu chishadinaku mulong wa kupan uman kud antu a michid yawonsu. Kambuy Pita utukasikeshin anch ‘tulam mu manang’ dichuku da Yehova. (2 Pita 3:11, 12) Mutapu ik tukutwisha kusal mwamu? Tukutwish kusal mwamu anch twatongijokin pa yiyukish tukwikala nich mu mangand masu. Tongijokin mud ukat kusut rinkind muwamp, oku ukat kuda yakuda yiwamp, ukat kand kuyak akatish ney avumbukina ni kuyifundish antu afa kurutu uprofet wa Bibil uwanyina. Kutongijok mud kwinoku kukukukwash kuchingel nich impu chisu chikuwanyina yom yiney ni kwikal ni kashinsh anch disudiel dikwez. Anch ‘twijik yom yiney kurutu’ piur pa machuku ma kurutu, ‘kakutudimbap’ ni mafundish ma makasu. w23.09 27 par. 5-6

Mu mangand minam, ansand akweting chaku cha “kuyibwambwil anvajau.” (2 Tim. 3:1, 2) Mulong wak avud pakach pau akat kubwambwil? Amwing akat kwiyov anch anvajau ad in rubabek. An akwau akat kutong anch anvajau akat kuyilej kusal yom yikangenyau ayinau kusal. Akwau niyau kand akat kuman anch mulong wa yom yiswimpina mu mangand, yiyul ya anvajau yimeken mud yikwetap kwau usey. Anch ud nsand, ov, watonginap kal mwamu? Chikutwish kuyikasiken ansand avud kuziyin kwi mbil ya Yehova tutanina mu mufund wa nlel. Yom ik yikutwisha kukukwash kuziyin? Ukutwish kwilej kuziyin kusutil chilakej chiwamp cha Yesu. (1 Pita 2:21-24) Wading muntu uwanyidina pakwez anvajend ading akad kuwanyin. Pakwez, Yesu wayilimisha anvajend ap anch yisu yimwing arumbukang ni amuteshang nayimp.​—Kub. 20:12 w23.10 7 par. 4-5

Kambuy Paul warumburila anch yakupesh yitangau mu Chijil yikutwishap kamu kudiosh chitil. Mulong wa chom chinech, Chijil chading ‘achitekin kal kuns.’ Chawiy Paul wading ukat kuyifundish malejan mamwing makurikina. Wayivurisha ambay nend in Kristu piur pa “ruchingej ripandakena kuwap” rimedina pa chakupesh cha Yesu, rikutwisha kuyikwash chakin kamu kumusejin ‘Nzamb piswimp.’ (Heb. 7:19) Paul wayirumburila akadivar nend in Hebereu anch mutapu wading umwifukwidinau Yehova wading uwamp nakash kusutamu mutapu wamwifukwilangau pasak. Mutapu wifukwilangau in Yuda wading kwau “mwizuzwimb wa yom yikweza kurutu, pakwez wakin win ud Kristu.” (Kol. 2:17) Mwizuzwimb ud kwau chijingidij cha chom kanang, pakwez chidiap kamu chom achinach. Chilik chimwing, mutapu wifukwilangau in Yuda pasak wading kwau mwizuzwimb wa mutapu uwamp wa kwifukwil wafanyina kwez kurutu. Tufanyidin kutesh nawamp ditenchik datekay Yehova mulong wa kulikishin yitil yetu, mwamu tukutwish kumwifukwil mu mutapu witiyinay. w23.10 25 par. 4-5

Daniel shapitre wa 11 wisambidin piur pa antu, ap usu wa chipolitik, arishina mulong wa kuyikel mangand. Kusutil ku kwisikesh uprofet winou ni makwau kand madia mu Bibil, tukutwish kulond anch “mwant wa kwiyand” ud Risi ni jingand jimunungina chikas pakwez “mwant wa kurul” did Dikand dia pa Mangand Mawonsu dia Amerik ni angleter. Antu a Nzamb ayikedilau kud “mwant wa kwiyand” ayizengodin kud mwant winou. Atuman amwing ayibudodin ni kuyitekol mu rukan mulong wa ritiy rau. Pa ndond pa kuyovish akadivar wom, yisalijok ya “mwant wa kwiyand” yakasikeshin ritiy rau. Mulong wak? Mulong akadivar netu ij anch kuyizengol antu a Nzamb kuwanishin uprofet wa Daniel. (Dan. 11:41) Kwijik mwamu kukutwish kand kutukwash kulam ruchingej retu rikash ni kushal ashinshamena kud Yehova. w23.08 11 par. 15-16

Mulong Yehova utukatin, ukat kutesh pakad kulab yovil yetu ni ukwet kamu impu ya kutuchidij. Ukat kov nayimp chisu turishina ni yikokujol. Chawiy tukutwish kwikal ni kashinsh anch ukwakul chisu tumulembila anch: “Nchidija mudi kan a dis.” (Kus. 17:8) Dis did chid cha mujimbu chiziyining nakash ni chikweting usey. Chawiy patufanikeshinau kud Yehova ni kan a dis dend, chid mud ukat kutulej anch, ‘Mwawonsu ukukusalanya en antu am yom yiyimp, wayipish kal yom yida ya usey kud am.’ Yehova ukatin wikal ni kashinsh anch ukukatin. Pakwez wij anch mulong wa yom yiyimp yakushikedina kal pakur mu mwom, ukutwish wiyipul anch ukutwish kudandamen kukukat. Ap kukutwish kwikal milong urishina nich katat yipakina kashinsh key mu rukat ra Yehova. Yom ik yikukasikesha kashinsh key? Shinshikin mutapu umekeshiningay Yehova rukat rend pantaliken ni Yesu, azizidilau many ni etu awonsu. w24.01 27 par. 6-7

Esidera wamana mutapu Yehova wayikwashay antwend mu yirung yikash. Kwinsambishin kwa Mivu 484 K.C.C., chimeken anch Esidera wading ushich mu Babilon pa chisu chapanay Mwant Asuwerus mbil ya kuyijip in Yuda awonsu ading ashicha mu Want wa in Peris. (Est. 3:7, 13-15) Mwom wa Esidera wading mu ubaj! Mulong wa kwakul ku kusarumun, in Yuda “mu musumb wawonsu” ajila ni kudil, amutazuka Yehova mu malembil mulong wa kuyitakel. (Est. 4:3) Tongin mutapu wiyovay Esidera ni in Yuda akwau pakarumuka yom, chisu chaletau mbil ja kuyijip antu akimba kuyijip in Yuda! (Est. 9:1, 2) Yikokujol yajijamenay Esidera pa chisu chinicha, yafanyina kumukwash kupandakan yikokujol yafanyina kushiken mu machuku ma kurutu ni kukasikesh kashinsh kend mu usu ukwetay Yehova wa kukwash Antwend. w23.11 17 par. 12-13

Kambuy Paul wading wisambidin chakusambish “yom yilejenau mu chijil,” charumburik anch chijil chamwinkishau Moses ku Mukandu wa Sinay. (Rom 3:21, 28) Chimeken pamwing ap anch pa chirung cha Paul, chading chiyikasikedin in Kristu amwing in Yuda kwitiy anch chadingap cha usey kuziyin kand ku Chijil cha Moses ap kusal yom yading yitinau mu Chijil chinech. Chawiy, Paul wasadina chilakej cha Aburaham mulong wa kumekesh patok anch chakwel muntu ikala utentamina ku mes ma Nzamb chidap cha usey kuziyin “yom yilejenau mu chijil.” Pakwez chida cha usey chid kwikal ni ritiy. Chitongijok chinech chitukasikeshin mud ik pa kwijik anch tukutwish kwikal mu urund uwamp ni Nzamb. Charumburik anch ang tukwet ritiy mudiay Nzamb ni Yesu Kristu, tukutwish kwikal ni dilau dia Nzamb. Chawiy, “yom” yilondinau mu Jakobu 2 yidiap yom yitinau mu “chijil cha Moses” yilejenay Paul. Jakobu wisambina piur pa midimu ap mijikit yifanyidinay mwin Kristu kusal mu mwom wend wa dichuku diawonsu. (Jak. 2:24) Midimu mud yiney yikat kumekesh anch mwin Kristu ukwet ritiy mudiay Nzamb ap bwat. w23.12 3 par. 8; 4-5 par. 10-11

Nambaz utongina kwachik ufanyidin kutond mbay wa uruw nich kubabal. Vurik anch ukwikal mwinshin mwa umutakel wa ikundj ukukwata. (Rom 7:2; Efes 5:33) Chawiy iyipula anch: ‘Ov, ud mwin Kristu uswila? Ov, utekin yisakin ya mu spiritu pa ndond ya kusambish? Ov, ukat kukwat mipak ya manangu? Ov, ukat kwitiyin kurumbuk kwend? Ov, ukat kulimish amband? Ov, ukwet ukaliweny wa kwimbangin mu spiritu, ku mujimbu, ni mu manangu?’ Chakin kamu, anch ukimbin kutan ikundj muwamp, niyey ufanyidin kwikal mband muwamp. Mband muwamp ud “mwin kumukwash” nfumwend ni ud muntu ‘ukushakamay’ nend. (Dis. 2:18) Mulong umukatin Yehova, ukat kusal yom mulong wa kuyikwash antu akwau kuman mikadil yiwamp ya nfumwend. (Jnsw. 31:11, 12; 1 Tim. 3:11) Ukutwish kwirijek mulong wa chisend chinech cha machuku ma kurutu kusutin kumukat Yehova nakash ni mu kuyikwash antu akwau pa uchidia kol kwen ni mu chikumangen. w23.12 22-23 par. 18-19

Yehova ushidinamu kutwinkish manangu tuswirikedina mulong wa kukwat mipak yiwamp. Tukwet pakampwil kuswir kwa manangu ma Nzamb chisu tukwatina mipak yikutwisha kwikal ni usu mu mwom wetu. Ukat kutwinkish kand usu wa kujijaman. Mud mutapu wamusadinay kambuy Paul, Yehova ukutwinkish usu tuswirikedina mulong wa kurish ni yikokujol yetu. (Fil. 4:13) Njil yimwing yikatay kusadin mulong wa kutukwash yid dijuku detu da mu spiritu. Uchuku kurutu kwa kupan mwom wend, Yesu walembila nakash. Wamwilembina Yehova chakwel ayikwasha antu kulik kumuman mud mwin kusaal dijin diend. Pa ndond pa kusal mwamu, Yehova wamutumina umwing wa angel end mulong wa kumukasikesh. (Luka 22:42, 43) Yehova ukutwish kutukwash niyetu kusutin mukadivar ap nambaz ukutwisha kututazuk ap kutwendin mulong wa kutukasikesh. Etu awonsu tukutwish kukimb mitapu ya kulond “dizu diwamp” mulong wa kuyikasikesh ambay netu.​—Jnsw. 12:25. w23.05 10-11 par. 9-11

Antu alikina kal kusal mudimu wa kulejan akukumangana ku Chivuriksh akutwish kwov wom anch kakutwishap kuyak nawamp. Chawiy ipuk kwipul yipul yikutwisha kuyovish usany ap kuyisal nayimp. Akadivar nau anambaz inay ad ambay netu mu ritiy. Tukwet musangar wa kwifukwil kand nau pamwing! (Kus. 119:176; Mid. 20:35) Tujikitishin nakash mulong Yesu watuleja kuvurikang rufu rend muvu wawonsu, ni twij mulong wak chid cha usey kusal mwamu. Anch twakumangan ku Chivurikish, tukat kutaninamu ayinetu, ni antu akwau niyawiy akutwish kutaninamu kand mu mitapu yivud. (Isay 48:17, 18) Tukat kukudish rukat retu mulong wa Yehova ni Yesu. Tukat kumekesh anch tujikitishin mulong wa yom yatusadinau. Tukat kukasikesh urund wetu pamwing nau akadivar ni anambaz. Ni tukutwish kuyikwash antu akwau kwilej, kutaninamu, ni kusanger yiyukish yidokila ku difut. El tusalany usu wa kwirijek mulong wa Chivurikish cha muvu winou—dichuku da usey nakash mu muvu! w24.01 14 par. 18-19

Mutapu ik ukatay Yehova kututakel? Cha kusambish, kusutin Dizu dend, Bibil. Pakwez, ukat kusadin kand antu mulong wa kututakel. Chilakej, ukat kumusadin “kashalapol ushinshamena ni ubabela” mulong wa kutwinkish yakuda ya mu spiritu yikata kutukwash kukwat mipak ya manangu. (Mat. 24:45) Yehova ukat kusadin kand amakundj ayifuvu akwau mulong wa kututakel. Chilakej, atulam a munyingumuku, nau amakurump a yikumangen akata kukasikeshan ni kupan yiyul yikata kutukwash kurish ni yirung yikash. Tujikitishin nakash mulong wa umutakel utwinkinau mu machuku minam makash ma kwinsuden! Ukat kutukwash kulam dilau da Yehova ni kutukwash kwendin mwi njil yitwadina ku mwom. Chikalap nchik mwamu, yisu yimwing chikutwish kutukasiken kulondul umutakel wa Yehova, pakampwil anch udokil kud antu akad kuwanyin. Pa yisu mud yiney, chikutwit kwikal nich kashinsh anch Yehova ndiy ukata kuyitakel antu end ni anch kulondul umutakel wend kukat kulet yiyukish yivud nakash. w24.02 20 par. 2-3

Tukutwish kukul mu rukat mulong wa Nzamb kusutin kwilej Dizu diend nich mushiku. Pawilejina Bibil, pakish kushinshikin yimekeshinay verse ni verse piur pa Yehova. Iyipula anch: ‘Rusangu riner rimekeshin mutapu ik anch Yehova winkatin? Ringinkishin mayingishin ik ma kumukat Yehova?’ Mutapu ukwau tukutwisha kukul mu rukat retu mulong wa Yehova ud kusutin kumufungwil muchim wetu chisu chawonsu mu malembil. (Kus. 25:4, 5) Ku mutambu wend, Yehova ukwakul malembil metu. (1 Yoh. 3:21, 22) Tufanyidin kand kukudish rukat retu mulong wa antu akwau. Mivu kanang kupwa kwa kwikal mwin Kristu, kambuy Paul watanijana ni nsand muwamp utazukinau anch Timote. Timote wading umukatin Yehova, ni wading uyikatin kand antu. Paul wayileja in Filip anch: “Kinikwetap muntu mukwau nichingejina mwin kutal ku yom ya mwom wenen mudi [Timote].” (Fil. 2:20) Paul wamana rukat radingay nich Timote mulong wa akadivar nau anambaz nend. Chawiy chovaken patok mulong wak yikumangen yendinay Timote yading mu kumuchingel nich impu nakash.​—1 Kor. 4:17. w23.07 9 par. 7-10

Moses wafa kurutu in Isarel andam mwi Ngand yakushilamu. Ov, Yehova walika kuyikwash antu end pafay ikundj winou ushinshamena? Bwat kamu. Mulong ashala ashinshamena, Yehova wadandamena kuyibangin antu end. Kurutu Moses afa, Yehova wamuleja kumutond Yoshua mulong wa kuyitakel antu end. Moses wamufumba Yoshua mu mivu yivud. (Kub. 33:11; Kuv. 34:9) Kupwa kand, kwading amakundj avud awanyidina mulong wa kutakel—in kutakel a tunan, in kutakel a yitot, in kutakel a makum matan, in kutakel a dikum. (Kuv. 1:15) Antu a Nzamb ayichidija nawamp. Tutanin kand chilakej cha mutapu umwing piur pa Elija. Wasala mudimu wa usu nakash mu mivu yivud mulong wa kuyikwash in Isarel kumwifukwil Yehova. Pakwez chisu chawanyina pamwinkishau yisend kushalijan kud Yehova kwiyand kwa Yuda. (2 Ant 2:1; 2 Jnsg. 21:12) Ov, antu ashinshamena a michid dikum a mu Isarel ayilika? Bwat kwau. Elija wamufumba Elisha mu mivu yivud. Yehova wadandamena kuwanyish kushilamu kwend ni kuwanyish maswir ma atushalapol end ashinshamena. w24.02 5 par. 12

In Kristu a mu Efes andama mu chitokish cha uyakin wa Mifund. (Kus. 119:105) In Efes inay adokala mu yisalijok ya relijon wa makasu ni kulik kand mikadil yijondina. Ikala ‘in kumwimburij Nzamb’ ni asala usu wa kumwifukwil Yehova ni kumusangaresh. (Efes 5:1) Chilik chimwing, kurutu twileja uyakin twading mu marelijon ni mu yaku ya mididim. Amwing a pakach petu ifukwilang machuku matumbila ma chirelijon, akwau ading ni mashakamin mijondina. Pakwez twileja uyakin piur pa mbil ja Yehova ja kwijik kwauril yom yiwamp ni yiyimp, ni twaswimpa. Twasambisha kushakam kukwatijan ni mbil jend jishitwila. Mud chibudikin, twasangera yiyukish yivud. (Isay 48:17) Nlel, turishin ni yikokujol ya chisu chawonsu. Tufanyidin kwiyauril kulemp ni mididim ya twasha ni ‘kwikal nich yaku yiwamp mudi antu ada mu chitokish.’ w24.03 21 par. 6-7

Ukutwish kwiyov anch kandikal wirijek mulong wa kwipan ni kukubatish. Pamwing ap ukwet kuswir kwa kuswimp yom yimwing mu mashakamin mey chakwel makwatijana ni mbil ja Yehova, ap kand ukwet kuswir kwa chisu mulong wa kukasikesh ritiy rey. (Kol. 2:6, 7) In kwilej awonsu kakatap kukul mutapu umwing ni kadap ansand awonsu akata kushiken kwipan ni kuyibatish ni mivu yimwing. Pakish kushinshikin kukul kwey kukwatijan ni yom utwishina kusal ni ya wakad kutwish kusal, ni kangal kwifanakesh ni muntu mukwau. (Gal. 6:4, 5) Ap anch wajingunin anch kandikal wirijek mulong wa kwipan amwiney kud Yehova, dandamen kwitekin rutong riner. Mwita Yehova akukwasha kuswimp mu mwom wey. (Fil. 2:13) Ikal nich kashinsh anch ukukutesh ni ukukukwash.​—1 Yoh 5:14. w24.03 5 par. 9-10

Dichuku dimwing, Sara wading wajimanang kal, chawiy wamuleja Aburaham yom yawonsu yadingay nich ku muchim ni wamufisha kand nich. Aburaham wading wij anch Sara wading mband uziyidina ni wamunungang nfumwend chikas mu mipak yend. Aburaham wamutesha ni wikasikesha kupwish mulong. (Dis. 16:5, 6) Chilakej chinech chitufundishin ik? En amakundj, ukwetany chisend cha kukwat mipak mulong wa majuku men. (1 Kor. 11:3) Pakwez chom chiwamp ukutwisha kusal, chid kutesh yitongijok ya mukajey kurutu kwa kukwat mupak, pakampwil anch mupak winou ukwikal ni yibudikin padiay ndiy. (1 Kor. 13:4, 5) Dichuku dimwing Aburaham wasota kuyak angendj amukashimwisha ku chikumbu. Wamuleja Sara kwimik yading yisadinay mulong wa kosh mabot mavud. (Dis. 18:6) Sara wasala mwamu pakad kulab ni wanunga chikas ku mupak wa Aburaham. En amband, ukutwishany kumwimburij Sara kusutin kunung chikas ku mipak ya anfumwen. Anch wasal mwamu, ukukasikesh uruw wey.​—1 Pita 3:5, 6. w23.05 24-25 par. 16-17

Kupwa kwa kumutond Gedeyon mud nkalansambu, kuziyin ni kutakaman kwend akupaka. Amwinkisha chisend chikash cha kushesh chintamb cha baal chapeshinangay tatukwend. (Ank. 6:25, 26) Kupwa kwa kukumangej amasalay, amuleja tupamp twaad kukepish uvud wa amasalay. (Ank. 7:2-7) Kupwa, amuleja kurishikish akankuny nend mu mapep ma uchuku. (Ank. 7:9-11) Amakurump afanyidin kwikal in ‘kuziyin pakad kulab.’ Mukurump uziyidina ufanyidin kuziyin pakad kulab kwi mbil yilondinay Bibil ni ku umutakel udokila ku dirijek da Nzamb. Mwamu ukat kwikal chilakej chiwamp kud antu akwau. Pakwez chikutwish kumukasiken ndiy kuziyin. Chilakej, ukutwish kutambul mbil jivud pa kapamp kamwing ni chikutwish kumukasiken kuziyin kwi mbil jinej. Mu yisu yimwing, ukutwish kwiyipul anch mbil jimwing jatambulangay jading kamu ja usey ap ja manangu. Ap akutwish kumwit kusal chom chikutwisha kutek want ipend mu ubaj. Mutapu ik ukutwishau amakurump kwimburij chilakej cha Gedeyon mu yishiken mud yiney? Tesh mbil nawamp ni jisadina. w23.06 4-5 par. 9-11