Ngond wa 2

Payelay Mwant Ezekias nakash, wamwilembina Yehova chakwel ayerika. Yehova wamwoka. (2 Ant 20:1-6) Ku mutambu ukwau, pitay kambuy Paul anch Yehova amudosha ‘muy mu mujimbu,’ Yehova kapwishap mulong winou. (2 Kor. 12:7-9) Kambuy Jakobu ni Pita akimba kuyijip kud Mwant Herod. Jakobu amujipa, pakwez Pita amupandisha mu chilay kud mwangel. (Mid. 12:1-11) Tukutwish kwiyipul anch: ‘Mulong wak Yehova wamupandisha Pita pakwez Jakobu bwat?’ Bibil kalondinap chom pa mulong winou. Kashinsh tufanyidina kwikal nich kad anch Yehova kakwetap ‘kasolikany.’ (Kuv. 32:4) Yisu yimwing Yehova kakwakulangap malembil metu mud mutapu twada tuchingejina. Mulong tukwet kashinsh anch Yehova ukat kwakul malembil metu nich rukat ni kutentam, tukutwishap kwidjidjek piur pa chisu chikatay kutond mulong wa kutwakul.​—Job 33:13. w23.11 21 par. 6

Jakobu amupepila kufund anch antu akweta manang akat ‘kuziyin swa.’ Tongin chirumburikina kusal mwamu. Tufanyidin kwikal aswapela kuyiziyin antu awonsu inkishinau kal yisend kud Yehova. Pakwez, Yehova katwitinap anch tumuziyin muntu utulejina kubwambwil kwi mbil jend. (Mid. 4:18-20) Tufanyidin kumuziyin Yehova nakash pa ndond pa kuyiziyin antu. Chakin kamu, Yehova ukat kupan ching umutakel uwanyidina. (Kus. 19:8) Pakwez chikasikening kusal mwamu kud antu akweta mwaz. Chikalap nchik mwamu, Tatukwetu uda mwiur upanin chisend kanang kud anvaj, mbur matad, ni amakurump a chikumangen. (Jnsw. 6:20; 1 Tes. 5:12; 1 Pita 2:13, 14) Chisu tukata kuyiziyin tukat kumuziyin kand Yehova. w23.10 6 par. 2-3

Chom chakusambish chikutukwasha kukasikesh ritiy retu chid kutongijokin pa dikand da Yehova. Ukwet dikand da kusal chom chin chawonsu chitukaninay. Ndiy ukutwish kusal mwamu mulong ud Nzamb Mwin Dikand Dawonsu. (Job 42:2; Mar. 10:27; Efes 3:20) Wamuleja Aburaham ni Sara anch akuval mwan ku upal. (Dis. 17:15-17) Yehova wamuleja kand Aburaham anch ukez kayinkish antu a majuku mend ngand ya Kanan. Mu mivu yivud, yashakamau antu a majuku ma Aburaham, in Isarel, mu usuk mu Idjibit, chafanyina kumekan mud kushilamu kwinoku kwafanyinap kuwanyin. Pakwez kwawanyina. Wamuleja kand Mariy, wading kajik, anch ukumuval Mwan a Nzamb, ni chinech chafanyina kuwanyish kushilamu kwashilayimu Yehova mu tunan twa mivu mu chir cha Eden! (Dis. 3:15) Anch twatongijokin piur pa kushilamu kwawonsu kwa Yehova kwakanay ni mutapu wawanyishay kushilamu kwinoku, tukat kuman chakin kamu anch ukwet dikand dipandakena.​—Jos. 23:14; Isay 55:10, 11. w23.04 28 par. 10-12

Yehova wakula ku malembil ma David pamwitay mulong wa kumukamunin. (1 Sam. 19:10, 18-20; 2 Sam. 5:17-25) Niyetu tukutwish kwikal nich kashinsh mud kinak. (Kus. 145:18) Chisu chawonsu, Yehova kakatap kwakul ku malembil metu mu mutapu tuchingejina. Paul wamwita Nzamb amudosha ‘muy wading mu mujimbu wend.’ Tupamp tusatu, Paul wamulembila Yehova piur pa mulong winou. Ov, Yehova wakula ku malembil minam? Mwaning, pakwez kadap mud mwading muchingejinay Paul. Pa ndond pa kupwish chikokujol chinech, Yehova wamwinkisha usu wading uswirikedinay mulong wa kudandamen Kumusadin nich kushinshaman. (2 Kor. 12:7-10) Niyetu yisu yimwing tukutwish kutambul chakul chishalijadina ni mutapu twading tuchingejina. Tukutwish kwikal nich kashinsh anch Yehova ndiy wija kamu mutapu uwamp wa kutukwash. ‘Ukusal yom yipandakena nakash kusutamu yom yawonsu twitina ap kutongin.’ (Efes 3:20) Mulong wa diyingishin dined, chakul ku malembil metu chikutwish kushiken pa chisu ap mu mutapu twakad kutongin. w23.05 8-9 par. 4-6

Chid chiwamp kutongijokin chisu ni chisu piur pa kushilamu kwa divumbuk kuda mu Bibil. Mulong wak? Mulong mayej makash ap rufu ra muntu tukatina yikutwish kushiken pakad kutongin. (Mul. 9:11; Jak. 4:13, 14) Ruchingej retu ra divumbuk rikutwish kutukwash kujijamen yikokujol ya mutapu winou. (1 Tes. 4:13) Mifund yitwinkishin kashinsh anch Tatukwetu wa mwiur utwij nawamp ni utukatin nakash. (Luka 12:7) Mulong Yehova ukututangiril nich wuntu ni manang metu mud mutwading kurutu kwa kufa, chinech chimekeshin anch utwij nawamp nakash. Ni mulong Yehova utukanin kutwinkish mwom wa chikupu, ap kand kutuvumbul anch twafa, chinech chimekeshin anch utukatin nakash. Mulong wak tukutwisha kwikal ni ritiy mu kushilamu kwa divumbuk? Mulong tukwet kashinsh anch ukatin kusal yom yikaninay ni ukwet dikand da kusal mwamu. w23.04 8-9 par. 2-4

Jozef ni Mariy asala kand usu pamwing mulong wa kukasikesh urund wau ni Yehova. Ading ij usey wa kumwifukwil Yehova pamwing mu dijuku. (Luka 2:22-24; 4:16) Chid chilakej chiwamp nakash kud ambay a uruw nlel unou! Anch ukwetany an mud mwadingay Jozef ni Mariy, chikutwish kukukasikenany kukumangan, ap kwikal ni program wa kusal difukwil da mu dijuku. Chikutwish kand pamwing ap kukukasikenany kutenchik chisu cha kwilej ap kulembil pamwing. Pakwez vurikany anch, kumwifukwil Yehova pamwing, kukukusejishany piswimp ni ndiy, ni ayinen ukwikalany kand piswimp nakash. Chawiy tekany difukwil pa ndond ya kusambish. Anch ukwetany milong mu dijuku, chitongijok cha kusal difukwil da mu dijuku chikutwishap pamwing ap kukusangareshany. Anch chid mwamu, kwinsambishin ukutwishany kwen kwisambinany yom yikemp, ni yisangareshina. Kusal mwamu kukutwish kukasikesh urund wen ni impu ya kumwifukwil Yehova pamwing. w23.05 22 par. 7-8

Wom winou uwamp wamukwasha Abidias mutapu ik? Cha kusambish wamukwasha kwikal mwin kashinsh ni muntu wa kuchingejin; chawiy, mwant wamuteka kwikal mwin kutakel wa chikumbu chend. (Ilakej ni Nehemiy 7:2.) Wom winou wamwinkisha kand Abidias kutakaman kupandakena, mwikadil wading uswirikedinay kamu nakash. Washakama pa chirung cha Mwant muyimp Akab. (1 Ant 16:30) Chikwau kand, mukajend, Jezabel, wamwifukwilang Baal, wading umukisin nakash Yehova ni wasala usu wa kudosh difukwil dakin mu want wa kwiyand. Wajipa aprofet avud a Nzamb. (1 Ant 18:4) Chisu chakimbay Jezabel aprofet a Nzamb mulong wa kuyijip, Abidias wasenda aprofet 100 ni wayijindjika ‘makum matan pa ndond yimwing ni makum matan pa ndond yikwau, mwinimwa wayitwadilanga yakuda ni mem ma kuna.’ (1 Ant 18:13, 14) Anch Jezabel wajingunina yom yiney yasalay Abidias, wafanyina kumujip. Chakin, Abidias wading kamu wovil wom ni kakatap kufa. Pakwez Abidias wading umukatin nakash Yehova ni antu ading amusadidina kusutamu mutapu wading ukatinay mwom wend. w23.06 16 par. 9-10

Nlel Yehova udandamedin kuyitakel antu end mud mwasalay pakur. Ukat kusal mwamu kusutil Dizu dend ni kusutil kand Mwanend uda ntakel wa chikumangen. Ov, tukwet uman umekeshina anch Nzamb udandamedin kuyisadin antu djat ni mu chisu chetu? Mwaning. Chilakej, shinshikin yom yashikena kupwa kwa muvu wa 1870. Charles Taze Russell ni antu asalay nend mudimu pamwing asambisha kujingunin anch muvu wa 1914 wafanyina kwikal wa usey nakash pantaliken ni winyikel wa Want wa Nzamb. (Dan. 4:25, 26) Imena pa uprofet wa Bibil mulong wa kwikal ni kashinsh kinak. Ov, Yehova wayitakela pa chisu chakimbijolangau mu Bibil? Chakin kamu wayitakela. Mu muvu wa 1914 yinship yasadika pa mangand ma kabuj yamekesha anch Want wa Nzamb wasambishin kal kuyikel. Kupwa kwa Njit ja Kusambish ja pa Mangand Mawonsu, kwalanka yipupu, kuzal kwa divu, ni kamungun. (Luka 21:10, 11) Yehova wayisadina amakundj in Kristu akin inay mulong wa kuyikwash antu end. w24.02 22 par. 11

Mulong tud atushalapol a Yehova, twij anch utukatin ni ukatin anch twikala ni mwom usangareshina nakash. (Rom 8:35-39) Tukwet kand kashinsh anch mbil ja Bibil jiding chisu chawonsu ja usey anch twajisadin. (Isay 48:17, 18) Pakwez yom ik tufanyidina kusal anch turishin ni milong? Chilakej, muntu umwing wa mu dijuku ukutwish kutuziyish mu mutapu kanang. Tukutwish kuyel mayej makash makutwisha kutukangesh kusal yom yivud mu mudimu wa Yehova. Tukutwish kurish ni mar madokila ku yom yatangau. Ap akutwish kutuzengol mulong wa yitiyij yetu. Chisu turishina ni yakamish tukutwish kwiyipul anch: ‘Mulong wak yom yiney yinshikedin? Ov, nasadin chom chiyimp? Ov, chinech chimekeshin anch Yehova kanyukishinap?’ Ov, niyey wiyovap kal mwamu? Anch mwawiy kangal waziy. Atushalapol avud a Yehova ashinshamena niyau arishinap kal ni yovil ya mutapu winou.​—Kus. 22:1, 2; Aba. 1:2, 3. w23.04 14 par. 1-2

Piturishina ni choziu, tufanyidin kwipuk kapamp kamwing chitongijok ap chisal chin chawonsu chikutwisha kuyipish urund wetu ni Nzamb. Yehova utwitin kuziyin “nich muchim wawonsu.” (Rom 6:17) Umutakel wend uding chisu chawonsu wa usey nakash kud etu, ni tukutwishap kuswimp yijil yend. (Isay 48:17, 18; 1 Kor. 6:9, 10) Djabul ukat kuturishikish ku mujimbu ni mu manang mulong wa kutuziyish. Rutong rend rid ra ‘kutuda’, charumburik anch kuyipish urund wetu ni Yehova. (1 Pita 5:8) In Kristu a mu mivu chitot ya kusambish ayirishikisha, ayibula ni kuyijip mulong akwata mupak wa kwiman daang. (Mid. 5:27, 28, 40; 7:54-60) Satan udandamedin kusadin rupompat riner djat ni nlel unou. Uyakin winou umeken patok kusutin mutapu uyimeshinau akadivar nau anambaz mar mu Risi ni mu jingand jikwau. Satan ukat kusadin kand “yom yawonsu yitenchikinay” mulong wa kutuzengol.​—Efes 6: 11. w23.07 15-16 par. 6-9

Piudandamedina kwilej Bibil, rukat rey mulong wa Yehova rikukul. Rukat riner rikukubachik kusadin yom wilejina. Ukukwat mipak yiwamp yimedina pa mbil ja Bibil. Ukwilej kutongijok ni kusal yom yidia yiwamp mulong wa kumusangaresh Nzamb. Mud mwan ukata kumwimburij nvaj wend wa rukat, ukwatin mupak wa kumwimburij Tatukwey wa rukat uda mwiur. (Efes 5:1, 2) Tufanyidin kwiyipul anch: ‘Ov, rukat ram mulong wa Yehova rid rikash kusutamu pa chisu nikala Mwin Kristu? Kudosh kwambatishinau, mutapu wam wa kutong ni yaku yam yikwatijadin ni mutapu umeningay Yehova yom, pakampwil mu kuyimekeshin akadivar nau anambaz nam rukat?’ Anch ‘rukat rey ra kusambish’ ratalel kal, kangal waziy. Chawiy chom chayishikena in Kristu a mu mivu chitot ya kusambish. Yesu kaziyap mulong wa awiy, ni kaziyinap mulong wetwetu bwat. (Kuj. 2:4, 7) Wij anch tukutwish kuchirishiril rukat retu mud ritwading nich chisu twileja uyakin. w23.07 8 par. 2-3

Kambuy Pita warumbuka nakash. Cha kusambish, Pita wichingejina kusut chipim, wibaza anch ukushal ushinshamena kud Yesu ap anch atwimbuy akwau akumuchin. (Mar. 14:27-29) Kupwa mu chir cha Getiseman, Pita wakanganya kuchish ku mes tupamp tuvud. (Mar. 14:32, 37-41) Chawiy peza yisak ya amasalay kumukas Yesu Pita wamuchina. (Mar. 14:50) Kupwa, Pita wamutuna Yesu tupamp tusatu ap anch wasala machip ma makasu. (Mar. 14:66-71) Mutapu ik wasalay Pita pajinguninay anch wasala chitil chijim? Wawa pansh ni wadila nakash. (Mar. 14:72) Pa ndond pa kumufish nich Pita mulong wa kurumbuk kwend, Yesu wamuleja murunend anch ukumwinkish yisend yijim. (Yoh. 21:15-17) Pita wijika anch wasala chitil chijim pakwez kaziyap. Mulong wak? Mulong wikala nich kashinsh anch Mwant wend Yesu Kristu wading udandamedin kumukat. Yom ik twilejidina ku chilakej cha Pita? Yehova ukatin twikal nich kashinsh anch utukatin ni ukat kutulikishin.​—Rom 8:38, 39. w24.03 18-19 par. 13-15

Masandj makutwish kulet yibudikin yiyimp mud: usany, kwiyov anch tukwetap usey, madikaj makad kuchingejin ni kujip majuku. Chakin kamu, chid cha manang kwipuk kuya ku “chikumbu” cha mband chisup ni kuda yakuda yend. Antu akata kusal masandj akat kufa mu spiritu, ni akutwish kukwachik mayej makutwisha kuyijip. (Jnsw. 7:23) Shapitre 9, verse 18 wa Jinswir upwishin ni mazu malondina anch: “Atazukay ad mwi ndond ya afu.” Chawiy mulong wak ukatau antu avud kwitiy kutazuk kukweta yibudikin yiyimp mwamu? (Jnsw. 9:13-18) Mupit ujim tufanyidina kwipuk ud pornografi. Antu amwing atongining anch kutal pornografi kuyipinap kwau. Pakwez pornografi ukutwish kuyisal antu nayimp, kuyipwishikish kalimish, ni kuyikadish asuk. Anch muntu watal yipich yijondila, chikasikening kuyivuramen mu manang. Cha ubaj kupandakan chid anch pornografi kakatap kuyikwash antu kulik maku mayimp, pakwez ukat kumapandakesh. (Kol. 3:5; Jak. 1:14, 15) Chakin kamu, antu avud akata kutal pornografi akat kushiken ku yisal ya masandj. w23.06 23 par. 10-11

Ap anch michid yikwau yikutwish kubwambwil ku Dikand da pa Mangand Mawonsu da Angleter ni Amerik, pakwez kakutwishap kudiswinkan. Twij mwamu mulong “diyal” dimekeshina Want wa Nzamb dikupuchol chidjatin, chikunku cha chirumbidij chimekeshina kubombakan kwa Angleter ni Amerik. (Dan. 2:34, 35, 44, 45) Ov, ukwet kashinsh anch uprofet wisambidina piur pa yidjatil ya utad ujal ni kam yid yakin? Anch mwawiy, chinech chikutwish kwikal ni usu mu mashakamin mey. Mulong wijik kal anch mangand minam makusheshik piswimp ap ukutwishap kwipan nakash mu kukimb mapit ma ku mujimbu. (Luka 12:16-21; 1 Yoh. 2:15-17) Kwijik uprofet winou kukutwish kukukwash kuman usey wa mudimu wa kulejan. (Mat. 6:33; 28:18-20) Kupwa kwa kwilej uprofet winou, chid cha usey kwiyipul anch: ‘Mipak nikwatina yimekeshin anch nitiyijin anch piswimp ap Want wa Nzamb ukushesh maguvernema mawonsu ma antu?’ w23.08 11 par. 13-14

Nich kwikepish itiyin anch mivu yey, ukash wa mujimbu, ni mashakamin ukweta yikutwish kukukangesh kusal yom yimwing. Mud Barizilay, itiyin kutul yisend anch utwishinap kuyiwanyish mulong wa ukash wa mujimbu ap upal. (2 Sam. 19:36, 37) Mud Moses, itiy ukwash ni pan yisend kud antu akwau anch chitin kusal mwamu. (Kub. 18:21, 22) Kwijik mimbu yey kukukukwash kwipuk kuchingej yom yawakad kutwish kusal, mulong yikutwish kukuziyish. Tufanyidinap kwitwik chisend cha mipak yiyimp ya antu akwau. Tukutwishap kuyikwatin antu akwau mipak ni tukutwishap chisu chawonsu kuyichidij ku yibudikin ya mipak yau yiyimp yikatau kukwat. Chilakej, mwan ukutwish kukwat mupak wa kulik kumusadin Yehova. Mupak winou ukutwish kuyinenganesh anvaj nakash. Pakwez anvaj ifishina nich mulong wa mupak uyimp wa mwanau itwikin chisend chilimina nakash. Yehova kayichingejidinap awiy kusend chisend chinech. w23.08 29 par. 11-12

Samson wading muntu wakad kuwanyin mud etu, ni yisu yivud wakwatang mipak yiyimp. Mupak umwing wakwatay waleta yibudikin yiyimp kamu nakash. Kupwa kwa kusal mud nkalansambu mu chisu kanang, Samson “wamukata kand mband mukwau wadinga mwi Nkurubuk mwa Sorek, dijin diend Delila.” Kwisambishin, Samson wakimba kumwat mband umwing mwin Filistin, ni “Yehova ndiy wamubachika Samson kusal mwamu mulong chinech chafanyina kumukwash kuyirishikish in Filistin.” Kupwa, Samson washakama mu musumb wa Gaza mu chikumbu cha mband mwin kusochik umwing mwin Filistin. Pa chisu chimwing, Nzamb wamwinkisha Samson usu mulong wa kupandakan musumb winou. (Ank. 14:1-4; 16:1-3) Pakwez chafanyinap kwikal mwamu anch Samson wadinga ni Delila, mulong chimeken anch mband winou wading mwin Isarel. Delila watambula uvud wa nfalang kanang kud in Filistin mulong wa kumupan Samson. w23.09 5 par. 12-13

Manang makutwish kutukwash kwikal itudishina. Muntu ukweta manang ukat kuninet anch kwikal kupwitamijan ni muntu mukwau piur pa yitiyij yend. Tongin bil pa chilakej ech, anch twatal mukandu udia mu mem tumening kwetu ching musong, pakwez chikunku chijim chid mu mem. Chilik chimwing anch muntu watwipul chipul tukutwishap kamu kwijik nawamp mayingishin mamubachikina kwipul chipul chinech. (Jnsw. 16:23) Shinshikin mutapu wayakulau in Efirayim kuday Gedeyon. Amwipula nich ujim anch mulong wak kayitazukap chakwel eza amukwash kuyirishikish akankuny a in Isarel. Pakwez mayingishin ik mayibachika kujiman? Chikalap nchik diyingishin, Gedeyon wamekesha anch ukwet manang ni wakula nich kwitudish. Chibudikin ik chikalaku? Kamanap kand cha kusal ni “awiy apwisha ujim wau.”​—Ank. 8:1-3. w23.09 16 par. 8-9

Yehova ni Yesu ading ni urund wa piswimp mud urund uding pakach pa tatuku ni mwan. Chakin kamu, Yehova wova kusansan nakash pamumanay Mwanend akat kumumesh mar, akat kumulik, ni kumuzengol. Nvaj mwawonsu wafishap kal mwan wijing mar ni kusansan kudokilinga ku kufish. Tukwet ritiy rikash mu divumbuk, pakwez chinech chikutukangeshap kwov kusansan anch twashadish muntu tukatina. Chilakej chinech chitukwashin kwov mutapu wiyovay Yehova pamanay Mwanend mukatish ukat kuman mar ni kufa pa chirung cha mashik mu muvu wa 33 C.C. (Mat. 3:17) Kusambish kamu pinap kushik ku Chivurikish, umen nchik anch wapakish kwilej yom yivud piur pa difut mu Difukwil da mu Dijuku ap mu dilejan dey da pakampwil? Ni pa dichuku da Chivurikish kangal wavuramen kutal program wa pakampwil wa Difukwil da Pamanch. Anch twarijek muchim wetu mulong wa Chivurikish, chikutukwash kufund list wa antu twija mulong wa kuyitazuk chakwel niyau ataninamu.​—Esi. 7:10. w24.01 11 par. 10-12

Mutapu umwing ukutwishay Yehova kutwinkish usu wend ud kusutin malembil. Yehova ukwakul ku malembil metu kusutil kutwinkish “ukash upandakena ukash wawonsu.” (2 Kor. 4:7) Tukutwish kand kwikal ni usu anch twilej Dizu dend ni kutongijokin pa yom tutangina. (Kus. 86:11) Uruu utwinkishinay Yehova uda mu Bibil ukwet “ukash.” (Heb. 4:12) Anch ukat kulembil ni kutang Dizu dend, ukwikal nich usu uswirikedina chakwel ujijamana, ulama musangar wey ap kand uwanyisha chisend chimekena anch chikasiken. El tushinshikina mutapu wamukasikeshau muprofet Yona kud Yehova. Yona wova wom wa kuya kwi ndond kwamutumau kud Yehova. Mud chibudikin wakimba kufa ku rinkind mukash ni wateka mwom ya antu adingay nend mu ubaj. Kupwa amudjibwila mu wit ni insh mujim wamuminya. Yom ik yasalay Yona mulong wa kutambul usu padingay mwinvumu mwa insh mujim? Walembila.​—Yona 2:1, 2, 7. w23.10 13 par. 4-6

Ap anch kambuy Pita wafunda mikand yend mulong wa in Kristu ading mu mivu chitot ya kusambish, Yehova wayiweja mu Dizu Dend. Tukutwish niyetu kutaninamu mu mikand yiney. (Rom 15:4) Atunyingumukin kud antu akad kwijik yom yilondinay Bibil piur pa machuku ma kurutu. In rukis akutwish kutusip mulong twachingedin kal disudiel da mangand mu mivu yivud. Antu amwing akat kulond anch dikwezap kwau. (2 Pita 3:3, 4) Anch twatesh yom ya mutapu mud winou kud muntu tulejina rusang ruwamp, kud ambay netu a ku mudimu, ap antu a mu dijuku detu, ritiy retu rikutwish kuziy. Chawiy Pita warumburila yom yikutwisha kutukwash. Antu amwing akutwish kuman anch Yehova ulabin kulet disudiel da mangand minam mayimp. Mazu ma Pita makutwish kutukwash kwikal ni chitongijok chiwamp, ni kutuvurish anch mutapu umenay Yehova yom ushalijadin ni wa antu. (2 Pita 3:8, 9) Ku mes ma Yehova mivu kanan yid kwau mud dichuku dimwing. Yehova ushimpishin muchim, mulong kasotinap anch muntu ap umwing asheshika. Chisu chikushika dichuku dend, mangand minam makwikalapaku kand. w23.09 26-27 par. 2-5

Mulong wak kambuy Paul wayifundina in Kristu in Hebereu a mu Yudeya? Chimeken anch wayifundina mulong wa mayingishin maad. Da kusambish, chading mulong wa kuyikasikesh. Avud pakach pau apamina mu relijon wa in Yuda kurutu kwa kwikal in Kristu. Antakel a relijon wau mukur ayisipa pamwing ap mulong ikala in Kristu. Mulong wak? Mulong in Kristu kadingap nich tempel wa ufun wafanyinangau kuya mulong wa kwifukwil, kadingap nich chintamb mulong wa kupesh milambu kud Nzamb ni kadingap nau in kupesh mulong wa kuyisadin. Chinech chafanyina kuyiziyish in kwilej a Kristu ni kuziyish kand ritiy rau. (Heb. 3:12, 14) Amwing pakach pau afanyina kutong kuchirik kand mu relijon wau wa in Yuda. Da kaad, Paul wayileja in Kristu in Hebereu patok anch kasalangap kwau usu wa kutesh mafundish masu ap malejan makurikina ma mu spiritu, matazukinau anch ‘yakuda yikash’ yida mu Dizu da Nzamb. (Heb. 5:11-14) Chakin kamu, amwing pakach pau ading achid kudandamen kulondul Chijil cha Moses. w23.10 24-25 par. 3-4

Amband amwing akat kutond kulik kwachik. (Mat. 19:10-12) Ikal ni kashinsh anch Yehova ni Yesu kakatap kuyipipej in Kristu ajich. Pa mangand mawonsu anambaz ajich ading chilakej chiwamp mu yikumangen. Mulong ayikatin ni akat kuyibangin antu akwau, amband inay in Kristu akat kwikal anambaz ni amaku a mu spiritu a antu avud. (Mar. 10:29, 30) Amwing ad atushalapol a chisu chawonsu. In Kristu amband akwet chibachikin chiwamp piur pa mudimu wa kulejan usadikina pa mangand mawonsu. (Kus. 68:11) Ov, ukutwish kwirijek kusambish katat mulong wa kusal mudimu wa chisu chawonsu? Ukutwish kusal mud chibol, kwipan ku mudimu wa kutung yot ya want, ap kusadin ku Betel. Lembil mulong wa ntong jey. Isamba ni antu akwau akweta niyau ntong jinej ni kimb mutapu ukutwisha kusal mulong wa kuwanyish yitinau. Tenchik mutapu ukutwisha kuwanyish rutong riner. Anch wikal kashalapol wa chisu chawonsu, chikukuswapel kusal yom yivud mu mudimu wa Yehova. w23.12 22 par. 16-17

Mulong mar makash makat kusej piswimp, chid cha usey nakash kud etu kuziyin nakash kwi mbil ya kwipan nakash mu mudimu wa kulejan. Chikutwish kutukasiken kushinshikin pa mudimu wetu wa kulejan, anch turishin ni milong ya nfalang ap anch turishin ni rupompat mu mudimu wetu wa kulejan. Yom ik yikutukwasha kutek yisakin ya Want wa Nzamb pa ndond ya kusambish? Tufanyidin kwikal nich kashinsh anch ‘Yehova wa yisak ya amasalay’ ukwikal ku mutambu wetu. Ukutukwash anch twadandamen kutek yisakin ya Want pa ndond yakusambish mu mwom. Chawiy kwikil chom chikutwovisha wom. (Age 2:4) Yehova ukatin anch tushinshikin pa mudimu wa kwikadish in kwilej ukupandisha antu. Age wayikasikesha antu a Yehova kutek mudimu utumbila pa ndond ya kusambish, mud ading akat kutungiril kand mufulandal wa tempel. Anch asala mwamu, Yehova wayikana anch ‘ukuyiyukish.’ (Age 2:18, 19) Niyetu tukutwish kwikal nich kashinsh anch Yehova ukuyukish usu wetu anch twatek mudimu utwinkinay kusal pa ndond ya kusambish. w23.11 16 par. 8; 17 par. 11

Mu mukand wayituminay in Rom, kambuy Paul walondang anch antu ad akayitil. Chad mutapu ik ukutwishau kumutazuk muntu uda mukayitil kud Nzamb anch utentamin ap uyingin nich ni kwikal ni dilau da Nzamb? Mulong wa kuyikwash in Kristu awonsu kwakul ku chipul chinech, Paul wasadina chilakej cha Aburaham. Yehova wamutazuka Aburaham anch muntu utentamina chisu chadokalay mwi ngand ya Kanan. Mulong wak Yehova wamutazuka Aburaham anch utentamin? Ov, chading mulong Aburaham walimisha nawamp nakash Chijil cha Moses? Bwat kwau. (Rom 4:13) Chijil chinech achipana ku muchid wa Isarel mivu 400 kupwa kwa Nzamb kumutazuk Aburaham anch ud muntu utentamina. Chad mulong wak Nzamb wamutazuka Aburaham anch utentamin? Yehova wamumekeshina Aburaham ranaken ni wamutazuka anch utentamin mulong wa ritiy rend.​—Rom 4:2-4. w23.12 3 par. 4-5

Pa uchuku wawiy umwing wamulejau David mazu ma mufund wa nlel kud muprofet Natan, Yehova wamuleja Natan anch kadap David ukutunga tempel. (1 Jsng. 17:3, 4, 11, 12) Mutapu ik wasalay David pateshay rusang riner? Washinshikina pa kukumangej nfalang ni yom yikwau yafanyinay kuswiriken Salomon mulong wa mudimu winou wa kutung. (1 Jsng. 29:1-5) Kapamp kamwing kupwa kwa kumulej David anch kadap ndiy ukutunga tempel, Yehova wasuka nend mansuk. Yehova wamushilamu David anch mwan umwing wa mu dijuku dend ukuyikel chikupu. (2 Sam. 7:16) Tongin mutapu ukwovay David musangar mwi ngand yisu pakwijikay anch Yesu, uda Mwant mu Winyikel wa Mivu Kanan, ud mwan wa mu dijuku dend! Rusang riner ritukwashin kwijik anch, ap anch tukutwishap kusal yom yawonsu twading tuchingejina kusal mulong wa Yehova, Nzamb wetu ukutwish kutuyukish nich yom yitwada twakad kuchingejin. w23.04 16 par. 8-10

Ukutwish kutan yikunku ya Bibil yikutwisha kukukasikesh kamu pakampwil chisu wovila wom. Chilakej, ukutwish kutan kukasikesh kuda mu buku wa Job, Kuseng ni Jinswir ap kand mazu ma Yesu mada mu mukand wa Mateu shapitre wa 6. Chisu umulembila Yehova ni kutang Dizu dend, ukwikal ukasikeshinau. Tukutwish kwikal nich kashinsh anch Yehova ukwikal netu pa chisu chikash mu mwom wetu. Tukwikalap ayinetu. (Kus. 23:4) Yehova ushidinamu kutuchidij, kutwinkish chisambu, kutukwash, ni kutukasikesh. Isay 26:3 ulondin piur pa Yehova anch: “Ukat kupan chisambu chiwanyidina kudi antu akata kwipan kudi ey, ni kukungamen kand kudi ey.” Chawiy muchingejina Yehova ni sal usu wey wawonsu mulong wa kutaninamu mu ukwash wend. Anch wasal mwamu, ukwikal ni usu ap mu yisu yikash. w24.01 25 par. 16-17

Mazu minam mapepinau ma mufund wa nlel mawanyidin nlel unou. Mazu am makasikeshena matadin kand chirung chetu: “Am amwinam nikez kayilej antwey, nikez kayinkish kuzangijal ni chisambu. Dirumburish ditentamina dikez kakukasikesh. . . . Nikez kakukasikesh. Nikez kakuchidij kudi in kukuzengol, ni ampopol.” (Isay 54:13, 14) Ap “nzamb wa mangand minam,” Satan, kakutwishap kukangesh mudimu usadinau atushalapol a Yehova mulong wa kuyifundish antu akwau piur pa Yehova. (2 Ko. 4:4) Difukwil dishitwila aditenchikin kal, kakudiyipishap kand kakwau. Dikwikalaku chikupu ni chikupu. Ut wawonsu ukuchilau mulong wa kukurishish ukez kupandikanap bwat! w24.02 4 par. 10

Mulong tud in Kristu, tukat kulimish machip metu ma kwipan kud Yehova. Chinech chikweting usu pa mipak yetu ni mutapu tukata kupwish milong kanang mu dijuku. Tusadining midimu ya usu nakash mulong wa kuwanyish maswir ma dijuku, pakwez tukatap kulik maswir ma antu a mu dijuku detu matukangesh kusal yom yitwitinay Yehova. (Mat. 10:35, 36; 1 Tim. 5:8) Yisu yimwing, tukutwish kukwat mipak yakad kuyisangaresh anamakwetu pakwez yikutwisha kumusangaresh Yehova. Ndiy watanga dijuku, ni ukatin anch twikal ni musangar mu dijiku. (Efes 3:14, 15) Anch tukatin kwikal ni musangar wakin, tufanyidin kusal yom yikatinay Yehova anch tusal. Chakin kamu Yehova ukat kusanger usu tusadina mulong wa kumwifukwil chisu tubangidina majuku metu ni kuyisadin nich rukat ni kalimish.​—Rom 12:10. w24.02 18 par. 11, 13