Ngond wa 1

Yesu ‘wamumana’ maku wading udidina ni kupwa “wamwovila riy.” (Luka 7:13) Yesu kimenap kusu kwend pa kumwovil maku winou riy; pakwez wamekesha anch umwanakedin. Wamwela, chakin kamu nich dizu da matul, anch: “Lik kudil.” Kupwa wasala chom kanang mulong wa kumukwash. Wamuvumbula mwan ni “wamupana kud makwend.” (Luka 7:14, 15) Yom ik tukutwisha kwilejin ku chilay chasalay Yesu pamuvumbulay mwan a mwadiamufu? Chilay chinech chitufundishin anch tufanyidin kuyanaken antu akweta ushon. Mud Yesu, tukutwish kukudish ranaken mulong wa antu afishang kal kusutil kuyibangin. Tukutwish kumekesh anch tuyanakedin kusutil kulond ni kusal yom yawonsu tukutwisha mulong wa kuyikwash ni kuyongoj. (Jnsw. 17:17; 2 Kor. 1:3, 4; 1 Pita 3:8) Ap tumazu tumekena mud twausweral ni tuyisal tuwamp tukemp tukemp tukutwish kumwongoj muntu nakash. w23.04 5-6 par. 13-15

Ap anch Yesu wading wij anch murund nend Lazar wafang kal, ndiy washakama kand kwinikwa machuku maad ni kupwa weza chad ku Betaniy. Chawiy kurutu Yesu ashika kwinikwa, Lazar wading wafang kal kwasutang kal machuku manying. Yesu wasala chom chimwing chayisangaresha arunend ni kumutumbish Nzamb. (Yoh. 11:6, 11, 17) Twilejin dilejan da usey piur pa urund winou. Tong bil: Chisu chamutuminau Yesu uruu kud Mariy ni Mart, kamulejap kuchirik ku Betaniy. Amuleja kwau anch murund nend mukatish uyedin. (Yoh. 11:3) Chisu chafay Lazar, Yesu wafanyina kwend kumuvumbul ap anch wading kulemp. Pakwez, Yesu wakwata mupak wa kuya ku Betaniy mulong wa kwikal pamwing nau arund nend Mariy ni Mart. Ov, ukwet murund ukutwisha kukukwash ap anch umwitinap ukwash? Chawiy wij anch ukutwish kumuchingejin ap mu ‘yirung yikash.’ (Jnsw. 17:17) Mud Yesu, el twikalany arund awamp kud antu akwau! w23.04 10 par. 10-11

Anch twajijamen chikokujol mu machuku mavud, tukutwish kutong anch ngand yisu ya Yehova yikwezap kwau. Ov, chinech chirumburikin anch ritiy retu riziyin? Bwat kwau. Shinshikin chilakej ech. Pa chirung cha mashik nakash, tukutwish kwiyov anch chirung cha marungul chikwezap. Pakwez kupwa kwa chirung cha mashik, kukat kwez chirung cha marungul. Chilik chimwing, chisu tuziyina nakash, tukutwish kwiyov anch ngand yisu yikwezap kwau. Anch ritiy retu rid rikash, tukat kwikal nich kashinsh anch kushilamu kwa Nzamb kukuwanyin. (Kus. 94:3, 14, 15; Heb. 6:17-19) Anch tukwet kashinsh kinak, tukutwish kudandamen kutek difukwil dietu mulong wa Yehova pa ndond ya kusambish mu mwom wetu. Tufanyidin kand kwikal ni ritiy rikash mulong wa kusal mudimu wa kulejan. Antu avud akat kwiyov anch “rusangu ruwamp” piur pa ngand yisu ya Nzamb yikweza chilata kwau. (Mat. 24:14; Ezek. 33:32) Tufanyidin kubabal chakwel kangal twidjidjek piur pa yom yitufundishinau kud Yehova mud musadinau antu inay. Chawiy, mulong wa kwipuk kusal mwamu, tufanyidin kukasikesh ritiy retu. w23.04 27 par. 6-7; 28 par. 14

Ov, wiyipwilap kal anch Yehova ukat kwakul ku malembil mey? Anch mwawiy, udiap kwey amwiney. Mwamu mukatau akadivar nau anambaz avud niyau kwiyipul, pakampwil anch arishin ni yakamish. Chisu tumena mar, chikutwish kutukasiken kujingunin mutapu ukatay Yehova kwakul ku malembil metu. Tukutwish kwikal nich kashinsh anch Yehova ukat kwakul ku malembil ma atushalapol end. Bibil utwinkishin kashinsh anch Yehova utukatin nakash ni tukwet usey nakash ku mes mend. (Age 2:7; 1 Yoh. 4:10) Chawiy chitukasikeshinay kumwit ukwash mu malembil. (1 Pita 5:6, 7) Ukatin kamu kutukwash kushal piswimp ni ndiy ni kujijaman mu yikokujol turishina nich. Yisu yivud, tutangining mu Bibil mutapu wakulay Yehova ku malembil ma atushalapol end. Ov, ukutwish kutongin pa chilakej chimwing? w23.05 8 par. 1-4

Mariy wading ni urund wa pakampwil ni Yehova; ritiy rend radingap rimedina pa yom yasalangay Jozef. Wading wij nawamp Mifund. Wishilang kand chisu cha kutongijokin pa Mifund. (Luka 2:19, 51) Chakin kamu, urund wa Mariy ni Yehova wamwikadisha mband muwamp nakash. Nlel unou, angachik avud asadin usu wa kusal yom mud mwasalay Mariy. Chilakej, nambaz utazukinau anch Emiko ulondin anch: “Pinading mujich, nading ni chaku cham cha mu spiritu. Pakwez kupwa kwa kwingat, najingunina anch, mulong nfumwam ndiy walembilang ni kutakel difukwil da mu dijuku, ritiy ram rading rimedin pa yom yasalangay. Najingunina anch nading ni kuswir kwa kwitekin chisu cha kukasikesh urund wam ni Yehova. Chawiy nasambisha kwishil chisu cha kusutish pamwing ni Nzamb wam​—kusutin kulembil, kutang Bibil, ni kutongijokin pa yom nitangina.” (Gal. 6:5) Angachik, anch wadandamenany kukasikesh urund wen ni Yehova, anfumwen akwikal ni mayingishin ma kukushimekany ni kukukatany.​—Jnsw. 31:30. w23.05 21 par. 6

Twavadikap ni mwikadil wa kumwov Yehova wom; pakwez tukutwish kuukudish. Mutapu umwing tukutwisha kusal mwamu ud kusutil kushinshikin yitang. Anch twajingunin mutapu umekeshina yom yatangay Yehova manangu mend, dikand diend, rukat rend rikurikina, tukumulimish ni kumukat chikurikina. (Rom 1:20) Mutapu ukwau tukutwisha kukudish wom wetu mulong wa Nzamb ud kusutin kumulembil chisu chawonsu. Tukat kushiken kumwijik Yehova nawamp anch twamulembil chisu chawonsu. Chisu chin chawonsu tukata kumwit usu chakwel tujijamena chikokujol, tukat kuvurik anch ud mwin dikand. Anch twamujikitish mulong wa chipan cha Mwanend, tukat kuvurik anch Yehova utukatin kamu nakash. Ni anch twamwilembin Yehova chakwel atukwash kurish ni mulong kanang, tukat kuvurik anch ukwet manangu mapandakena. Malembil mud minam makat kutukwash kumulimish Yehova chipandakena. Ni makat kutukwash kukwat mupak wa kwipuk kusal chom chin chawonsu chikutwisha kuyipish urund wetu ni ndiy. w23.06 15 par. 6-7

Yehova wayinkishin kal atushalapol end yijil yovakena nawamp. Chilakej, chisak chitakedila cha mu mivu chitot ya kusambish chalejana anch in Kristu ading afanyidin kwiman dang mu yom yisatu ey: (1) kwipuk kwifukwil akish, pakwez ching kusu Yehova, (2) kulimish chijil cha Nzamb chilondina anch mash mad matumbila, ni (3) kuziyin ku yijil ya Bibil piur pa masandj. (Mid. 15:28, 29) Mutapu ik ukutwishau in Kristu nlel unou kwiman dang mu yom yiney yisatu? Kusutin kumwifukwil ni kumuziyin Yehova. Wayileja in Isarel kwipan kud ndiy nich muchim wawonsu. (Kuv. 5:6-10) Ni chisu chamupakau kud Djabul, Yesu wamekesha patok anch tufanyidin kumwifukwil ching kusu Yehova. (Mat. 4:8-10) Chawiy tulikining kwifukwil yirumbidij. Tukatap kand kuyifukwil antu—ap anch ad antakel achirelijon, achipolitik, ap antu ijikena nakash mu milong ya masengan ni kwipuwangej—tukatap kusal yom mud tuyifukwidin. Tukat kumwifukwil ching kusu ndiy “watanga yom yawonsu.”—Kuj. 4:11. w23.07 14-15 par. 3-4

Mangand ma Satan mizwil ni yaku ya masandj ni ya kutal pornografi. (Efes 4:19) Chawiy, tufanyidin kukudish mwikadil wa kumwov Nzamb wom mulong wa kwipuk kusal yom yiyimp. Mu Jinswir shapitre 9, isambidinamu piur pa manangu ni usup, yom yifanakeshinau nau amband aad. Umwing ni umwing amulejen anch ukat kutazuk antu akad manangu—antu “[akad] yitongijok.” Chid mud akat kulond anch: ‘Ez mu chikumbu cham, ni diangap ya kudia.’ (Jnsw. 9:1, 4-6) Pakwez kud kushalijan kujim piur pa yibudikin ya antu itiyina ku kutazuk kwinoku. Shinshikin kutazuk kudiokila kud “mband chisup.” (Jnsw. 9:13-18) Ukat kuyitazuk nich kutakaman antu aburedina manangu anch: “[Sutilany] kunoku” ni tusalany musambu. Yom ik yikuyishikena kwinsudien? “Mu chikumbu mwinimwa mudi afu.” Atubabeshin piur pa “mband wa kusochik” ni “wa usund.” Atulejin anch: “Chikumbu chend chiyil ku rufu.” (Jnsw. 2:11-19) Jinswir 5:3-10 ukwet kubabesh kukwau piur pa “mband wa kusochik” mukwau ulejenau anch “mend yend yikurumukin kuya ku rufu.” w23.06 22 par. 6-7

Amakurump afanyidin kwikal chilakej chiwamp mu kwikal isikena. (1 Tim. 3:2, 3) Chilakej, mukurump kafanyidinap kuchingejin anch yitongijok yend akutwish kuyitiy chisu chawonsu kud amakurump akwau ap anch ndiy ud mukurump ku mivu. Pakwez, ufanyidin kwijik anch spiritu wa Yehova ukutwish kumutakel mukurump win mwawonsu wa mu chisak cha amakurump kulond yom yikutwisha kuyikwash akwata mupak wa manangu. Anch amakurump awonsu itiy mupak wakad kujip mbil ja Bibil, mukurump wisikena ukutwish kwitiy mupak winou ap anch umusangareshinap. Anch twikal isikena tukutwish kwikal ni yiyukish yivud. Tukwikal mu urund uwamp pamwing ni akadivar nau anambaz ni chikumangen chikwikal mu chisambu. Tusangaredin wuntu ni yaku kushalijan yidia pakach pa atushalapol a Yehova adia mu uumwing. Chidia cha usey, tusanger kwijik anch etu awonsu tukat kumwimburij Yehova Nzamb wetu udia wisikena. w23.07 25 par. 16-17

Daniel wileja uprofet ni mayingishin mawamp nakash. Daniel wading kand mwin kwikepish, mulong wading wij nawamp anch Yehova ndiy ukutwisha kumukwash kutesh uprofet anch wamuziyin ni washal piswimp ni ndiy. (Dan. 2:27, 28) Daniel wamekesha anch wading muntu wikepishina kusutil kuchingejin mu ukwash wa Yehova. (Dan. 2:18) Daniel wilejang kand chikurikina. Wakimbijola yakul mu mifund ya Bibil yadingaku pa chisu chinicha. (Jer. 25:11, 12; Dan. 9:2) Mutapu ik ukutwisha kumwimburij Daniel? Shishinkin mayingishin makubachikina kwilej uprofet wa Bibil. Ov, ukat kwilej uprofet wa Bibil mulong usotin kamu kwijik uyakin? Anch mwawiy, Yehova ukukukwash. (Yoh. 4:23, 24; 14:16, 17). Antu amwing akat kwilej mulong wa kwikal ni kashinsh anch Bibil kadiokilap kud Nzamb. Akat kutong anch, ang Bibil kadiokilap kud Nzamb mwamu akutwish kwau kwitondinap ayinau yom yidia yiwamp ni yiyimp. Pakwez, tufanyidin kwilej Bibil ni mayingishin mawamp. w23.08 9 par. 7-8

Tukutwish kwitwik ayinetu chisend chilimina anch twasambish kwiyilakej nau antu akwau. (Gal. 6:4) Anch twasal mwamu, tukukwish kwikal in ris ni kukimb kwikal wa kusambish. (Gal. 5:26) Mu kukimb kusal yom mud musadinau antu akwau, sot chad ukakalijan yom yawakad kwikal nich ukaliweny wa kusal ap yakad kukwatijan ni mashakamin mey. Ni anch “ruchingej ra kulab labe rukat kuyedish muchim,” chad tongin mutapu ukutwisha kuchingej yom yawakad kutwish kusal kukuziyish! (Jnsw. 13:12) Kusal mwamu kukutwish kutuziyish nakash ni kutukangesh kubambil nawamp. Lik kukimb kusal yom yivud nakash kusutamu yikwitinay Yehova. Kakuchingejangap ap pakemp anch umwinkish yom yawakad kwikal nich. (2 Kor. 8:12) Ikal nich kashinsh anch Yehova kakwilikejangap yom usadina ni yisadinau antu akwau. (Mat. 25:20-23) Ukat kusanger mudimu wey umusadidining nich muchim wawonsu, kushinshaman kwey, ni kujijaman kwey. w23.08 29 par. 10-11

Yehova wakula ku ma malembil ma Samson kusutin kumwinkish mem mu chilay. Panay Samson mem, “wova usu.” (Ank. 15:19) Chimeken anch, musul winou usu wa mem wadandamena kwikalaku mivu yivud kushik ni pamupepilau muprofet Samwel kufund buku wa Ankalansambu. Pamanangau in Isarel mem minam afanyinang kuvurik anch ang amuchingejin Yehova, ndiy ukuyikwash chisu chidau mu yakamish. Niyetu tuswirikedin ukwash wa Yehova chikalap nchik ukaliweny tukweta ap yom twasadina kal mu dirijek diend. Nich kwikepish tufanyidin kwitiyin anch tukutwishap kusal chom chitwitinay Yehova anch tumuchingejidinap. Samson wikala ni usu panay mem mamwinkishau kud Yehova, tukukul mu spiritu anch twataninamu mu yakudia yawonsu ya mu spiritu yitwinkishinay Yehova.​—Mat. 11:28. w23.09 4 par. 8-10

Yom ik tukutwisha kusal anch antu akwau atusarumun, chilakej anch muntu walond nayimp piur pa dijin da Yehova ap watadik yom yilondinay Bibil? Tufanyidin kumwit Yehova spiritu ni manangu mend chakwel twakula nich kwitudish. Chikwikal nchik anch twajingunin anch twakwilap mu mutapu uwamp? Tukutwish kand kulembil kapamp kakwau pa mulong winou ni kutong mutapu tukutwisha kusal nawamp mu machuku ma kurutu. Anch twasal mwamu, Yehova ukutwinkish spiritu wend utumbila chakwel tutwisha kuyikel yovil yetu ni kwikal antu itudishina. Maverse ma Bibil mavud makutwish kutukwash anch chitukasikedin kulond nich kwitudish. Spiritu wa Nzamb ukutwish kutukwash kuvurik maverse minam. (Yoh. 14:26) Chilakej, mbil tutanina mu buku wa Jinswir jikutwish kutukwash kwikal antu itudishina. (Jnsw. 15:18) Buku winou umekeshin kand mulong wak tufanyidin kwikal antu itudishina anch atusarumun.​—Jnsw. 10:19; 17:27; 21:23; 25:15. w23.09 15 par. 6-7

Kambuy Pita wading wij anch ud piswimp ni kufa. Mu mivu yamusadinay Yehova nich kushinshaman, wendang pamwing ni Yesu, wasambisha kusal mudimu wa kulejan ni wasala kand mu chisak chitakedila. Pakwez mudimu wa Pita wimenap pinapa. Piswimp ni muvu wa 62-64 C.C., amupepila kud Yehova kufund mikand yaad ya Bibil, 1 Pita ni 2 Pita. (2 Pita 1:13-15) Pita wafunda mikand pa chisu chading chirishinau ambay nend in Kristu nich “mar ma mitapu ni mitapu.” (1 Pita 1:6) Antu ayimp apakisha kulet mafundish ma makasu ni yaku yijondila mu chikumangen cha win Kristu. (2 Pita 2:1, 2, 14) In Kristu ading ashicha mu Yerusalem afanyina pakad kulab kurish ni ‘disudiel da yom yawonsu’—kusheshik kwa musumb winou ni kwa ditenchik da in Yuda kud akankuny in Rom. (1 Pita 4:7) Chakin kamu mikand ya Pita yayikwasha in Kristu kwijik mutapu wa kushal ashinshamena chikalap nchik yikokujol yading yirishinau nich ni kwirijek mulong wa yikokujol yikuyishikena mu machuku ma kurutu. w23.09 26 par. 1-2

Mud Yesu, niyetu tufanyidin kwilej kuziyin mu yisu ya mar ap yikash. Chilakej, kwisambishin kwa chipupu cha KOVID-19 patulejau anch tukukumanganap kand ku Yot yetu ya Want ni tukusalap kand mudimu wa kulejan wa ku chikumbu ni chikumbu, ov, chakukasikena kuziyin? Chawiy, kuziyin kwey kwakuchidijin ni kwakukwashin kwikal mu uumwing pamwing ni akadivar ni anambaz ney. Chikwau kand, kusal mwamu kwamusangaresha Yehova. Etu awonsu twirijekin katat nawamp kuziyin ku umutakel win wawonsu tukeza kutambul pa chisu cha mar makash. Kuziyin ku umutakel winou kukez kutupandish! (Job 36:11) Anch tumuziyidin Yehova chid mulong tumukatin ni tukimbin kumusangaresh. (1 Yoh. 5:3) Tukwetap chom ap chimwing cha kumufut Yehova mulong wa yom yin yawonsu yatusadinay kal. (Kus. 116:12) Pakwez, tukutwish kumuziyin Yehova ni antu atutakedina. Anch twaziyin, tukumekesh anch tud in manangu. Anch tukwet manangu Tukusangaresh muchim wa Yehova.​—Jnsw. 27:11. w23.10 11 par. 18-19

Anch mwangel ufanyidin kwambamb ney, ov, ukutesh yom yikukulejay? Chakin kamu, nlel unou mwangel umwing ukat kuyilej “antu a mangand mawonsu, ni a michid yawonsu, ni a jindim jawonsu.” Yom ik yilondinay? “Mwovany Nzamb wom . . . Mwifukwilany ndiy watanga diur, ni mangand.” (Kuj. 14:6, 7) Yehova ndiy kusu Nzamb umwing wakin ufanyidinau antu awonsu kwifukwil. Tumujikitishin nakash mulong watwinkisha mutapu uwamp wa kumwifukwil mu tempel wend mujim wa mu spiritu! Tempel wa mu spiritu chom ik chakin kamu, ni kwisu tukutwisha kutan jinsangu piur pa tempel winou? Tempel wa mu spiritu chidiap chom ap rubumbu ratungau ku makas ma antu. Did ditenchik da Yehova diatekay mulong wa kumwifukwil mu mutapu uwamp kusutil difut da Yesu. Kambuy Paul warumburila piur pa ditenchik dined mu mukand wend wayifundinay in Kristu in Hebereu a mu mivu chitot ya kusambish ading ashicha mu Yudeya. w23.10 24 par. 1-2

Mu muvu wa 522 K.C.C., akankuny a in Yuda asambisha kuyikangesh kutunguril tempel wa Yehova. Pakwez Zakariy wayinkisha in Yuda kashinsh anch Yehova ukusadin spiritu wend mulong wa kuyikwash kupandakan chikokujol. Mu muvu wa 520 K.C.C., Mwant Darius wayinkisha usu wa kudandamen kutung tempel ni wayikwasha kand in Yuda nfalang mulong wa kusal nich mudimu. (Esi. 6:1, 6-10) Yehova wayikana antwend anch ukuyikwash ang atek mudimu wa kutunguril tempel pa ndond yakusambish. (Ag 1:8, 13, 14; Zak. 1:3, 16) Kusutil kukasikesh kwa aprofet, in Yuda asambishirila mudimu wa kutunguril tempel mu muvu wa 520 K.C.C. ni apwisha kutunguril piswimp mu mivu yitan. Mulong in Yuda ateka rusot ra Nzamb pa ndond yakusambish, Yehova wayikwasha kusutil kuyinkish yom ya mu spiritu ni ya kumujimbu. Mud chibudikin amwifukwila Yehova nich musangar.​—Esi. 6:14-16, 22. w23.11 15 par. 6-7

Ap anch antu avud ateshinap kal piur pa kwikalaku kwa Aburaham, avud kijingap kamu yom yivud piur pend. Pakwez, wijaku yom piur pa Aburaham. Chilakej wij anch: Aburaham amutazuka anch “udi ngakiril wa in kwitiyij awonsu.” (Rom 4:11) Ukutwish kwiyipul anch: ‘Ov, niyam nikutwish kwikal ni ritiy rikash mudiay Nzamb mud Aburaham?’ Inge, ukutwish kwey. Mutapu umwing tukutwisha kukudish ritiy mud ra Aburaham kud kusutin kwilejin ku chilakej chend. Pamwinkishau mbil kud Nzamb, Aburaham washemunikina mwi ngand ya kulemp, washakama mu minkand mu mivu yivud, ni witiya pakad kulab kumupan mwanend Isak. Yom yiney yawonsu yasalay yamekesha ritiy rikash. Aburaham wikala murund wa Nzamb kusutin ritiy ni yisal yend. (Jak. 2:22, 23) Yehova ukatin anch etu awonsu—kuwejaku niyeyey—wikala ni yiyukish yiney. Mulong wa diyingishin dined, wamupepila Paul ni Jakobu kwisambin piur pa chilakej cha Aburaham. w23.12 2 par. 1-2

Anambaz, kudishany ukaliweny wa kwambamb nau antu nawamp. In Kristu afanyidin kwijik mutapu wa kwambamb nawamp. Piur pa mulong winou, mwin kwilej Jakobu uletin chiyul palondinay mazu madia mu mufund wa nlel. Anch watesh nawamp yom yilondinau antu akwau, umekeshin ranaken, ap “kwitek pa ndond ya antu” akwau. (1 Pita 3:8) Anch waman anch uteshinap yom yilondinay muntu ap wijap mutapu wiyovilay, mwipula yipul yiwanyidina. Itekina chisu cha kutongijok kurutu kwa kumwipul. (Jnsw. 15:28) Iyipula anch: ‘Yom nikimbina kulond yiwapin kamu ni yikasikeshin? Yid ya kalimish ni ya ranaken?’ Ilejina ku chilakej chiwamp cha anambaz aswila ni ija mutapu wa kwambamb nawamp. (Jnsw. 31:26) Tesh mutapu ulondinau yom. Anch wijik yom yiney nawamp, chikukuswapel kwikal mu urund ni antu akwau ni kwikal kand nau mu chisambu. w23.12 21 par. 12

Nlel, Yehova ukutwish kusadin dijuku, arund, ap amakurump a chikumangen mulong wa kutukwash. Pakwez anch twaziy, akutwish kutukasikesh kud antu akwau. Tukutwish kukat kwikal ayinetu. Chid chitongijok chiwamp. Pakwez yom ik tufanyidina kusal chakwel Yehova atukwasha? Kangal kwiyauril nau akwen. Anch twiyauril nau akwetu, rusot retu ra kusal yom rikukep, ni tukusambish kushinshikin pa maku metu ayinetu ni pa milong tukweta. Yitongijok ya mutapu winou yikutwish kwikal ni yibudikin pa mipak yetu tukwatina. Chakin kamu, etu awonsu kud chisu tukatining kwikal ayinetu, pakampwil anch turishin ni yishiken yikash. Pakwez, anch twiyauril nau akwetu tukwikal ni yakamish mu chisu chilemp, tukutwish kulik ukwash wa antu akwau asadidinay Yehova mulong wa kutukwash. Chawiy anch ud mu yirung yikash, itiy ukwash wa dijuku dey, wa arund, ni wa amakurump a chikumangen. Yimana anch Yehova uyisadidin mulong wa kukukwash.​—Jnsw. 17:17; Isay 32:1, 2. w24.01 24 par. 12-13

In Nazir kafanyinap kukidish nsuch. Winou wading mutapu wa kumekesh kuziyin kwau kwawonsu kud Yehova. Cha ushon, pa chirung cha muprofet Amos, in Isarel in kupumbok “ayinishang in Nazir maar ma nviny,” mulong wa kuyibachik kujip mansuk mau makulik kuna maar. Yisu yimwing, chading chimwitin mwin Nazir kwikal utakamena mulong wa kulam mansuk mend ni kwikal ushalijadina nau antu akwau. (Amos 2:12) Mulong tutondin kuziyin ku rusot ra Yehova, antu akwau akat kuman anch tushalijadin nau. Tufanyidin kwikal atakamena mulong wa kuyilej akwetu ku shikol ap ku mudimu anch tud Atuman a Yehova. Payila yaku ni yisal ya mangand mu kuyip nakash, chikutwish kutukasiken kushakam kukwatijan ni mbil ja Bibil ni kulejan rusangu ruwamp kud antu akwau. (2 Tm. 1:8; 3:13) Chisu chawonsu vurik anch tukat “[k]usangaresh muchim wa [Yehova]” anch twikal atakamena ni twashalijan nau antu akwau.​—Jnsw. 27:11; Mal. 3:18. w24.02 16 par. 7; 17 par. 9

Shinshikin mutapu wading ushalijadinau antu adinga mu chikumangen cha ku Rom. Pakach pau padingap kwau kusu in Yuda afundishau kuziyin ku Chijil cha Moses, pakwez kand antu a michid yikwau, ading akweta yishankur yishalijadina ni ya awiy. In Kristu amwing ading pamwingap asuk, pakwez akwau bwat—pamwingap akwau ading akwet asuk. Mutapu ik wafanyinau in Kristu inay kupandakan kushalijan kwinoku ni kukasikesh rukat rau? Kambuy Paul wayikasikesha anch “akijanany mutapu uwamp muntu ni muntu.” Mazu minam marumburikin ik? Dizu dikarumwinau anch “akijanany” dirumburikin kumwak muntu nich ranaken ap kand kumwezishaku kwol kwey ap pakach pa arund. Chilakej, Paul wamuleja Filemon mutapu wa kumwak Onezim, musuk wachina anch: “Mwaka niyend [nawamp].” (Flm. 17) Prisil ni Akila niyau amwaka Apolo wading wija yom yikemp piur pa yom ya win Kristu, kusutin kumutazuk “kwol kwau.” (Mid. 18:26) Pa ndond pa kulikidil kushalijan kwau kuyaurila, in Kristu inay apandakana kushalijan kwau ni akijana muntu ni mukwau. w23.07 6 par. 13

Diyingishin dikukubachika kwipan amwiney kud Yehova did anch mulong umukatin. Rukat rey rimedinap kwau pa yovil. Pakwez, washikena kumukat Yehova kusutin kwikal ni “ronganyin rakin” piur pend ni rusot rend. (Kol. 1:9) Yom wileja mu Mifund yakwinkisha kashinsh anch (1) Yehova ud muntu udaku kamu chakin, (2) Bibil did Dizu dend dipepidinay, ni (3) usadidin dirijek dend mulong wa kuwanyish rusot rend. Antu ipanina kal ayinau kud Yehova afanyidin kwijik mafundish ma pa dishin mada mu Dizu da Nzamb ni kushakam kukwatijan ni mbil jidamu. Akat kusal usu wa kuyilej akwau yom yilejinau. (Mat. 28:19, 20) Rukat rau mulong wa Yehova rikat kupam ni rikat kuyinkish maswir nakash ma kumwifukwil ching ndiy. Kimwawiyap mutapu wiyovila? w24.03 4-5 par. 6-8

Abigayil wading mband wa Nabal. Bibil ulondin anch Nabal wading uswejin nakash ni wading kand muntu muyimp. (1 Sam. 25:3) Chading chimukasikedin kamu nakash Abigayil kushakam ni muntu wa mutapu winou. Ov, Abigayil wading ni mutapu wa kujip uruw winou? Wikala ni mutapu wa kujip uruw winou chisu chezay David muntu wafanyina kwikal mwant mu Isarel mulong wa kumujip nfumwend wamusaala ndiy ni antu end. (1 Sam. 25:9-13) Abigayil wafanyina kuchin ni kulikidin anch David amujip Nabal. Pakwez, kasalap mwamu ni wamukangesha David kumujip Nabal. (1 Sam. 25:23-27) Mulong wak wasala mwamu? Abigayil wading umukatin Yehova ni wading ulimishin mbil jend piur pa uruw. Wading wij anch uruw chid chom chitumbila ku mes ma Yehova. Wading ukatin kumusangaresh Nzamb, ni chinech chawiy chamubachika kusal chom chawonsu chatwishay mulong wa kumupandish nfumwend. Wasala kamu pakad kulab mulong wa kumukangesh David kumujip Nabal. w24.03 16-17 par. 9-10

Ov, mu chikumangen chen mud antu amwing apakishina kupipej mashakamin mau mulong wa kwipan nakash mu mudimu wa Yehova? Ov, wijaku ansand iminya daang ni ashalijadina ni akwau ku shikol, ap anch chiyiswapedinap kusal mwamu? Chid nchik piur pa antu arishina pa kushal ashinshamena mulong wa rupompat ra majuku mau? Tukwatany mupak wa kukimb mitapu ya kuyikasikesh ambay netu in Kristu inay nich mazu mawamp, mamekeshina anch tusangaredin muchim wau wa kwipan ni kutakaman kwau. (Flm. 4, 5, 7) Yehova ukwet kashinsh anch tukatin kamu nich muchim umwing kumusangaresh ni anch tukatin kamu kwipan mulong wa kushakam kukwatijan ni machip metu. Ukat kutulimish kusutin kutwinkish dilau da kutond mutapu tukatina kumumekeshin rukat. (Jnsw. 23:15, 16) Chawiy, elany amboku tukwatany mupak wa kudandamen kumusadin Yehova, ni wa kumwinkish yom yetu ya usey. w24.02 18 par. 14; 19 par. 16

Tongin yom yasadika kwinsambishin kwa mudimu wa Yesu mu muvu wa 29 C.C. Yesu, makwend Mariy, ni in kwilejend amwing ayitazuka ku musambu wa uruw mu Kanan. Mariy chimeken anch wading uyikwashin kwak angendj. Pakwez mukach mwa musambu, kwasadika chom—maar mapwa. Pakad kulab Mariy waya kumuman mwanend, wamwel anch: “Maar ma nviny mayipwa kal.” (Yoh. 2:1-3) Yom ik yasalay Yesu? Wakarumuna mem mu chilay mikal “maar mawamp.” (Yoh. 2:9, 10) Yesu wasala kand yilay yikwau yivud pa chirung cha mudimu wend. Wasadina usu wend wa kusal nich yilay mulong wa kuyikwash antu avud nakash. Chilakej anch twasend kusu kwau yilay yaad yasalay—padishay amakundj 5 000 ni kupwa kand padishay amakundj 4000—chimeken anch wadisha antu 27 000 ni kusut anch twawejaku amband ni an adingap niyau. (Mat. 14:15-21; 15:32-38) Pasalay yilay yiney yaad, Yesu woka kand ayej avud.​—Mat. 14:14; 15:30, 31. w23.04 2 par. 1-2

Anch chom chikash chatushiken, tukutwish kuziy ku mujimbu ni mu manangu. Mud Elija, tukutwish kwiyov anch chitukasikedin kwiman ni tukatin kwetu kulal. (1 Ant 19:5-7) Tukutwish kwikal ni kuswir kwa ukwash mulong wa kudandamen kumusadin Yehova. Mu yisu mud yiney, Yehova utwinkishin kashinsh anch ukutukwash. Kukwatijan ni mufund wa nlel, Mwant David wimenap ukwash winou. Parishay ni yikokujol ni akankuny nend, wamuleja Yehova anch: “Chikas chey cha katatuku chinlamin.” (Kus. 18:35, TMK) Yehova utukwashining kusutin ukwash wa antu akwau. Chilakej paziyay David, murunend Jonatan waya kumutal mulong wa kumukwash ni kumukasikesh. (1 Sam. 23:16, 17) Chilik chimwing, Yehova wamutonda Elisha mulong wa kumukwash Elija.​—1 Ant 19:16, 21; 2 Ant 2:2. w24.01 23-24 par. 10-12

Yehova ud mwin kupan ukata kuwanyish maswir mu chilik chipandakena. Mikadil yend yiney yikat kumeken mu “manangu [makin],” mafanakeshinau mud mband mu Jinswir shapitre 9. Rusangu rimekeshin anch mband wa chifanakesh winou wisuka mbij, wabomb maar ma nviny, ni warijeka tebur mu chikumbu chend. (Jnsw. 9:2) Chikwau kand, kukwatijan ni verse wa 4 ni wa 5: “Manangu [makin] makat kumwel muntu wakad yitongijok yakin anch: ‘Ezany udianyap yakudia yam.’” Mulong wak tufanyidina kuya ku chikumbu cha manangu makin ni kuda yakudia yipaninay mband winou? Yehova ukatin anch anend ikala in manangu ni in kwilam. Kakatinap anch twileja malejan ma usey mu mutapu uyimp, charumburik anch kusutin yibudikin yiyimp yikutwisha kutusal nayimp. Chawiy chisadina anch “ndiy ukat kuyilamin in kutentam manangu makin.” (Jnsw. 2:7) Anch twakudish wom wakin mulong wa Yehova, tukukat kumusangaresh chisu chawonsu. Tukutesh yiyul yend ya manangu, ni tukwikal ni musangar wa kuyisadin.​—Jak. 1:25. w23.06 23 par. 14-15

Anch kud yom yikutwisha kutukangesh kwipan mu mudimu wa Nzamb, tukutwish kwikal ni kashinsh anch Yehova usangaredin usu tusadina mulong wa kumusangaresh. Mutapu ik twija mwamu? Pa chirung cha Zakariy, Yehova wamuleja muprofet wend kusal chibangul cha utad wa or ni utad ujal watumau kud in Yuda adinga mu winkwal. (Zak. 6:11) “Chibangul chinech chipandikena kuwap” chafanyina kukwash “kuvurikinaku” yipan yau ya kwisotin. (Zak. 6:14) Tufanyidin kwikal ni kashinsh anch Yehova kakuvuramenap muchim wetu wa kwipan mulong wa kumusadin mu yirung yikash. Tukutwish chakin kamu kudandamen kurish ni yishiken mu machuku minam mansudien, ni yom yikutwish kuyip nakash mu machuku ma kurutu. (2 Tim. 3:1, 13) Pakwez, tukwikalap ni kuswir kwa kwiyakamish nakash. Vurik mazu ma Yehova mayilejay antu pa chirung cha Age anch “Nidi ni yenen . . . Chawiy kangal wakamany.” (Age 2:4, 5) Niyetu tukutwish kwikal ni kashinsh anch Yehova ukwikal niyetu pitudandamedina kusal rusot rend. w23.11 19 par. 20-21

Chafanyina kuswapal kulik kufund kurumbok kwa kambuy Pita mu Bibil. Pakwez afunda yom yiney mulong wa kutufundish nich. (2 Tim. 3:16, 17) Chisu twilejina yom yamushikena Pita, chikutukwash kwijik anch Yehova kakatap kuchingej anch tusala yom mud antu awanyidina. Ukatin anch tujijaman—mulong wa kudandamen—chikalap nchik kuziy kwetu. Mulong wak tufanyidin kujijaman? Kupwa kwa kwiyov anch twatwishin kupandakan kuziy kumwing, tukutwish kand twaziy. Pakwez tufanyidin kudandamen kusal usu mulong wa kuwanyish rutong. Etu awonsu tukat kulond ap kusal yom yikata kutunenganesh mu kusut kwa chisu; pakwez, anch tuziyinap, Yehova ukutukwash kudandamen kuya kurutu. (1 Pita 5:10) Riy ramwovilau Pita kud Yesu chikalap nchik kurumbuk kwend rikutwish kutukwash kudandamen kumusadin Yehova. w23.09 20-21 par. 2-3

Yesu wafanyina kumwok Lazar mud mwamulejau kud Mart kukwatijan ni mufund wa nlel. Pakwez Yesu wading ukatin kusal chom chisutinamu kumwok. Wamuleja anch: “Mwanamakwey ukuvumbuk.” Wamuleja kand anch: “Am yam mwin kuvumbul antu ni kuyinkish mwom.” (Yoh. 11:23, 25) Chakin kamu, Yehova wamwinkishin kal Yesu usu wa kuyivumbul afu. Kwinsambishin, wamulangwisha mwan mband chisu chikemp kupwa kwa kufa ni wamulangwisha kand mwan nsand, chimeken anch pa dichuku diawiy dimwing diafay. (Luka 7:11-15; 8:49-55) Pakwez, ov, ukutwish kumuvumbul muntu wafang kal pasutang kal machuku manying ni wasambishang kal kuvund? Mariy, mpanyend mukwau wa Lazar, waya kumusankan Yesu. Wachirikina mazu malonday yayend: “Nsalejam, anch ey wading kunoku, ing, mwanamakwam kafilap!” (Yoh. 11:32) Yesu niyend wanenganana nakash payimanay ni kuyitesh Mariy ni antu akwau ading nend akat kudil. Mulong wayovila arund nend riy, chawiy niyend wadila. Wova kusansan kudiokiling ku kufish mukatish. Chakin kamu, wading ni impu ya kudiosh chom chayiletina runeng! w23.04 10-11 par. 12-13