Mulong Wak Tufanyidin Kumwov Yehova Wom?

1-2. Kukwatijan ni Kuseng 25:14, yom ik tufanyidina kusal anch tusotin kwikal mu urund ni Yehova?

OV, MIKADIL ik umena anch yikutwish kukukwash kulam urund wey ni muntu kampand? Chimeken kamu anch ukwakul anch arund awamp afanyidin kukatijan ni kukwashijan umwing ni mukwau. Pamwing ap ukutong anch wom udiap mwikadil wa usey mulong wa kwikal ni urund uwamp. Pakwez mud mutapu mudia mazu ma verse pimedina mutu wa mulong winou, antu akatina kwikal mu urund wa piswimp ni Yehova afanyidin ‘kumwov wom.’​—Tang Kuseng 25:14.

² Chikalap nchik uvud wa mivu twamusadidina kal Yehova, etu awonsu tufanyidin kumulimish chikurikina. Pakwez chirumburikin ik kumwov Nzamb wom? Mutapu ik tukutwisha kwilej kumwov Yehova wom? Ni yom ik tukutwisha kwilejin ku chilakej cha Abidias mwin kutakel wa chikumbu cha Mwant Akab, Mwin Kupesh Mujim Jehojada, ni Mwant Jowas piur pa kumwov Nzamb wom?

CHIRUMBURIKIN IK KUMWOV NZAMB WOM?

3. Rumburil yom yikutwisha kutubachik kwov wom ni mutapu ukutwisha wom winou kutuchidij.

³ Tukutwish kwov wom wa chom anch twijik anch chikutwish kutuletin mar ap kusansan. Wom wa mutapu winou ukutwish kutuking ni kutubachik kukwat mipak yiwamp. Wom wa kuwil mu mem ukutukwash kulik kwendil kuns kwa chikum cha kawit. Wom wa kwisupul chitat ukutwish kutubachik kwiyep yom ya ubaj. Wom wa kuyipish urund ni muntu ukutukwash kwipuk kumusal ap kumulond chom chiyimp.

4. Satan ukatin anch antu ikala ni wom wa mutapu ik piur pa Yehova?

⁴ Satan ukatin anch tumwova Yehova wom mu mutapu uyimp. Satan ukatin twitiyija anch Yehova ukat kujimanang chisu chawonsu, ni ukatin kutupup ni anch tukutwishap kumusangaresh ap pakemp. (Job 4:18, 19) Satan ukatin tumwova Yehova wom kushik ni mu chilik cha kulik kumusadin. Pakwez tufanyidinap kumwov Yehova wom mu mutapu winou. Pa ndond pa kusal mwamu, tufanyidin kumulimish ni kwov wom wa kumurumbukin.

5. Chirumburikin ik kumwov Nzamb wom?

⁵ Muntu umulimishina Nzamb chikurikina kakatap kusal chom chikutwisha kuyipish urund wend ni Ndiy. Yesu wading “mwin kumuziyil Nzamb ni kumulimish.” (Heb. 5:7) Kazalangap kurutu kwa Yehova. (Isay 11:2, 3) Pakwez, wading umukatin nakash ni wading ukatin kamu kumuziyin. (Yoh. 14:21, 31) Mud Yesu, niyetu tumulimishin Yehova chikurikina ni tumwovil wom mulong Ukweting rukat, manangu, utentamin ni ukwet kand dikand. Twij kand anch Yehova utukatin nakash ni chinech chikat kutubachik kuziyin ku mafundish mend. Anch twamubwambwil Yehova, ukat kunenganan, pakwez anch twamuziyin chinech chikat kumusangaresh.​—Kus. 78:41; Jnsw. 27:11.

TUKUTWISH KWILEJ KUMWOV NZAMB WOM

6. Mutapu ik umwing tukutwisha kwilej kumwov Nzamb wom? (Kuseng 34:11)

⁶ Twavadikap ni mwikadil wa kumwov Yehova wom; pakwez tukutwish kuukudish. (Tang Kuseng 34:11.) Mutapu umwing tukutwisha kusal mwamu ud kusutil kushinshikin yitang. Anch twajingunin mutapu umekeshina yom yatangay Yehova manangu mend, dikand diend, rukat rend rikurikina, tukumulimish ni kumukat chikurikina. (Rom 1:20) Nambaz Adrienne walonda anch: “Anch natal yom yawonsu yatangay Yehova ni naman mutapu ukwetay manangu, nikat kujingunin anch wij kamu yom niswirikedina.” Mulong wading udandamedin kutongijokinap, walonda anch: “Nisotinap kusal chom ap chimwing chikutwisha kuyipish urund wam ni Yehova Musul wa mwom wam.” Rubing riner itekina chisu cha kutongijokin pa chom chimwing chatangay Yehova. Anch wasal mwamu, ukukudish kalimish ni rukat rey mulong wa Yehova.​—Kus. 111:2, 3.

7. Mutapu ik ukutwisha malembil kutukwash kumulimish Yehova chikurikina?

⁷ Mutapu ukwau tukutwisha kukudish wom wetu mulong wa Nzamb ud kusutin kumulembil chisu chawonsu. Tukat kushiken kumwijik Yehova nawamp anch twamulembil chisu chawonsu. Chisu chin chawonsu tukata kumwit usu chakwel tujijamena chikokujol, tukat kuvurik anch ud mwin dikand. Anch twamujikitish mulong wa chipan cha Mwanend, tukat kuvurik anch Yehova utukatin kamu nakash. Ni anch twamwilembin Yehova chakwel atukwash kurish ni mulong kanang, tukat kuvurik anch ukwet manangu mapandakena. Malembil mud minam makat kutukwash kumulimish Yehova chipandakena. Ni makat kutukwash kukwat mupak wa kwipuk kusal chom chin chawonsu chikutwisha kuyipish urund wetu ni ndiy.

8. Mutapu ik tukutwisha kudandamen kumwov Yehova wom?

⁸ Tukutwish kudandamen kumwov Nzamb wom kusutin kutang Bibil nich chitongijok cha kwilejin ku yilakej yiwamp ni yiyimp yidiamu. Twisambinanyaku yilakej ya atushalapol aad ashinshamena a Yehova. Abidias mwin kutakel wa chikumbu cha Mwant Akab ni Mwin Kupesh Mujim Jehojada. Kupwa tukuman yom tukutwisha kwilejin ku chilakej cha Jowas piur pa kumwov Nzamb wom, wamwifukwilang Yehova pakwez mu kusut kwa chisu walikap.

IKAL UTAKAMENA MUD ABIDIAS

9. Kumwov Yehova wom kwamukwasha mutapu ik Abidias? (1 Ant 18:3, 12)

⁹ Kapamp ka kusambish kisambidinay Bibil piur pa Abidias,b ulondin anch: “Chawiy Abidias winou ndiy wading umwovila Nzamb wom kupandakan.” (Tang 1 Ant 18:3, 12.) Wom winou uwamp wamukwasha mutapu ik Abidias? Cha kusambish wamukwasha kwikal mwin kashinsh ni muntu wa kuchingejin; chawiy, mwant wamuteka kwikal mwin kutakel wa chikumbu chend. (Fanakesh ni Nehemiy 7:2.) Wom winou wamwinkisha kand Abidias kutakaman kupandakena, mwikadil wading uswirikedinay kamu nakash. Washakama pa chirung cha Mwant muyimp Akab, “wasala yom yiyimp ku mes kwa [Yehova], warumbuka nakash kupandakan [ant] awonsu ading kurutu kwend.” (1 Ant 16:30) Chikwau kand, mukajend, Jezabel, wamwifukwilang Baal, wading umukisin nakash Yehova ni wasala usu wa kudiosh difukwil diakin mu want wa kwiyand. Wajipa aprofet avud a Nzamb. (1 Ant 18:4) Chakin kamu, Abidias wamwifukwila Yehova pa chirung chikash.

10. Yom ik yimekeshina anch Abidias wading utakamen nakash?

¹⁰ Mutapu ik wamekeshay Abidias kutakaman kupandakena? Chisu chakimbay Jezabel aprofet a Nzamb mulong wa kuyijip, Abidias wasenda aprofet 100 ni wayijindjika ‘makum matan pa ndond ni makum matan pa ndond yikwau, mwinimwa wayitwadilanga yakudia ni mem ma kuna.’ (1 Ant 18:13, 14) Anch Jezabel wajingunina yom yiney yasalay Abidias, wafanyina kumujip. Chakin, Abidias wading kamu wovil wom ni kakatap kufa. Pakwez Abidias wading umukatin nakash Yehova ni antu ading amusadidina kusutamu mutapu wading umukatinay mukajend.

11. Mutapu ik udiau atushalapol a Yehova nlel mud Abidias? (Tal kand chipich.)

¹¹ Nlel atushalapol avud a Yehova ashich mu jingand mukangeshinau mudimu wetu. Pakwez mud Abidias, akadivar ni anambaz inay kitiyinap kwimik kumwifukwil Yehova, ap anch akat kuyimekeshin antakel a ngand kalimish! (Mat. 22:21) Akat kumekesh anch amwovil Nzamb wom kusutil kumuziyin ndiy pa ndond pa kuyiziyin antu. (Mid. 5:29) Akat kusal mwamu kusutil kudandamen kulejan rusangu ruwamp ni kukumangan pamwing ku ujindj. (Mat. 10:16, 28) Ni akat kusal usu wa kwikal nich kashinsh anch akadivar ni anambaz nau akwet yakudia ya mu spiritu yiswirikedinau mulong wa kudandamen kwikal piswimp ni Yehova. Tushinshikinany chilakej cha Henri, ushicha mwi ngand yimwing ya Afrik mwading mukangeshinau mudimu wetu. Mu chirung chinicha, Henri wasendang yakudia ya mu spiritu mulong wa kuyitwadin Atuman akwau. Wafunda anch: “Niding kwam muntu ukweting wom. Chawiy nikwet kashinsh anch kwikal ni kalimish kakurikina mulong wa Yehova kwawiy kwankwasha kwikal ni kutakaman nading niswirikedina.” Ov, niyey ukutwish kwikal ni kutakaman mud kwikalay nich Henri? Ukwikal nich anch wakudish kalimish kakurikina mulong wa Nzamb.

IKAL USHISHAMENA MUD MWIN KUPESH MUJIM JEHOJADA

12. Mwin Kupesh Mujim Jehojada ni mukajend amekesha mutapu ik kushinshaman kupandakena kud Yehova?

¹² Mulong Mwin Kupesh Mujim Jehojada wading umwovil Yehova wom, wawiy wamubachika kwikal ushinshamena ni kuyikasikesh antu akwau kumwifukwil Yehova. Chom chinech chamekana kamu patok chisu chasambishay Atalia, mwan mband wa Jezabel, kuyikel ku usu mu Yuda. Antu ading ni diyingishin diwamp dia kumwov Atalia wom. Wading ni chisum ni wading ukatin nakash kwikal mwant. Wasala usu wa kujip an awonsu a ku chikit cha want ni an inay ading ijukurend. (2 Jsng. 22:10, 11) Jowas, umwing wa an inay wapanda ku ukwash wa Joshabet, mband wa Jehojada. Ndiy pamwing ni nfumwend amujindjika mwan winou ni amubanginang. Mulong asala mwamu, Jehojada ni Joshabet achidija muntu wa mu dijuku dia David wafanyina kwikal mwant. Jehojada wading umushinshamedin Yehova ni kamwovap Atalia wom.​—Jnsw. 29:25.

13. Mutapu ik wamekeshay kand Jehojada mwikadil wa kushinshaman padingay Jowas ni mivu sambwad?

¹³ Pawanyishay Jowas mivu sambwad, Jehojada wamekesha kand kushinshaman kwend kud Yehova. Watenchika chom kanang. Anch watwisha kuwanyish chom chatenchikay, Jowas wafanyina kwikal mwant mulong wading wa ku dijuku dia David. Pakwez anch wakanganya, Jehojada wafanyina kamu kushadish mwom wend. Pakwez ku ukwash wa Yehova, watwisha kusal chom chinech chatenchikay. Jehojada, pamwing nau atulal a yitot ni in Levi, amudisha Jowas want ni amujipa Atalia. (2 Jsng. 23:1-5, 11, 12, 15; 24:1) Kupwa Jehojada “wasuka manswik pakach pa [Yehova] nend mwant nau antu chakwel awiy atwish kwikal kamu antu a [Yehova].” (2 Ant 11:17) Jehojada “wayiteka atulam ku yis ya Chikumbu cha [Yehova] chakwel kangal muntu ap kusu umwing wijondila wandamamu.”​—2 Jsng. 23:19.

14. Mu mitapu ik yamulimishau Jehojada kud Yehova mulong niyend wamulimisha?

¹⁴ Yehova watakela kulond anch: “Awiy akwinlimisha am niyam nikuyilimish.” Chakin, Yehova wamuyukisha Jehojada. (1 Sam. 2:30) Chilakej, wateka mu Bibil rusangu ra Jehojada chakwel tutwish kwilejinaku. (Rom 15:4) Ni pafay Jehojada, wamulimisha chipandakena kusutil kumujik “pamwing ni ant mu musumb wa David, mulong ndiy wasala yom yitentamina mu Isarel kurutu kwa Nzamb [wakin ni chikumbu Chend].”​—2 Jsng. 24:15, 16.

15. Yom ik tukutwisha kwilejin ku rusangu ra Jehojada? (Tal kand chipich.)

¹⁵ Rusangu ra Jehojada rikutwish kutukwash etu awonsu kukudish mwikadil wa kumwov Nzamb wom. Amakurump a chikumangen akutwish kumwimburij Jehojada kusutil kukimb mitapu ya kuchidij chikumangen. (Mid. 20:28) Amapal akutwish kumwimburij Jehojada anch amwov Yehova wom ni kushal ashinshamena. Ni anch asal mwamu, Yehova ukutwish kuyisadin mulong wa kuwanyish rusot Rend. Kakuyilikap bwat. Ansand akutwish kushinshikin mutapu wamusadinau Jehojada kud Yehova ni Kumwimburij kusutil kuyisadin amapal nich kalimish, pakampwil amapal amusadidina kal Yehova mu mivu yivud. (Jnsw. 16:31) Kupwa, etu awonsu tukutwish kwilejin ku atulal a Yitot ni in Levi amukwasha Jehojada. Chawiy lel, el tuyikwashany “in kutakel” mu kuyiziyin.​—Heb. 13:17.

KANGAL KWIKAL MUD MWANT JOWAS

16. Yom ik yimekeshina anch mwant Jowas wading uziyin?

¹⁶ Jehojada wamukwasha Jowas kwikal mwant muwamp. (2 Ant 12:2) Mud chibudikin, mwant winou nsand wakatang kusal yom yimusangareshina Yehova. Pakwez kupwa kwa rufu ra Jehojada, Jowas wasambisha kuyitesh atulal in kupumbok. Kwikala chibudikin ik? Ndiy pamwing nau antu end “aya ifukwil ku akish a Asitaret ni akish akwau.” (2 Jsng. 24:4, 17, 18) Ap anch yom yiney yamunenganesha nakash Yehova, ndiy ‘wadandamena kuyitumin aprofet mulong wa kuyichirish kud ndiy . . . , pakwez kateshap kwau.’ Alika kumutesh ap Zakariy mwan wa Jehojada, kadingap kwend ching muprofet wa Yehova ap mwin kupesh, pakwez wading kand musanyend a Jowas. Mwant Jowas washikena ap kumujip Zakariy ap anch anvaj a Zakariy apandisha mwom wa Jowas.​—2 Jsng. 22:11; 24:19-22.

17. Mutapu ik wayipa yom ku mutambu wa Jowas?

¹⁷ Jowas kadandamenap kumwov Yehova wom, ni yom yayipa nakash ku mutambu wend. Yehova walonda anch: “Pakwez awiy ankwimpipeja akwikal antu amwamu.” (1 Sam. 2:30) Mu kusut kwa chisu, ka chisak kakemp ka amasalay a in Siria kapandakana “chisak cha njit chijim” cha Jowas ni “amusha ni yitat.” Kupwa kwa in Siria kuchirik, Jowas amujipa kud antu end mulong wamujipa Zakariy. Antu amana anch mwant winou wading muyimp nakash ni “alika kumujik mu jinzay ja ant.”—2 Jsng. 24:23-25; tal “fils de Barakia” note d’étude wa Mateu 23:35.

18. Kukwatijan ni Jeremiy 17:7, 8, mutapu ik tukutwisha kulik kwimburij chilakej cha Jowas?

¹⁸ Yom ik tukutwisha kwilejin ku chilakej cha Jowas? Wading mud mutond wakad kujamish mij ukweta kuswir kwa dinguj. Kupwa kwa rufu ra Jehojada muntu wading mud dinguj, Jowas wasambisha kuyitesh in kupumbok ni kamushinshamenap kand Yehova. Chilakej chinech chimekeshin anch wom tumwovila Yehova ufanyidinap kwau kwimen pa yibachikin yiwamp ya anamakwetu in Kristu ap ya antu a mu dijuku dietu. Mulong wa kushal piswimp ni Yehova, tufanyidin kukudish rukat retu ni kwikal ni kalimish kakurikina mulong wendendiy.​—Tang Jeremiy 17:7, 8; Kol. 2:6, 7.

19. Yom ik yitwitinau kusal kud Yehova?

¹⁹ Yehova katwitinap kusal yom yikash. Yom yitulejinay yid mu Mulej 12:13, ulondina anch: “Mulimisha Nzamb, ziyil ku malejan mend, mulong wa chom chinech chawiy chamutangilau muntu.” Anch twamwov Nzamb wom, tukutwish kumushinshamen Yehova mud mwasalay Abidias ni Jehojada chikalap nchik yom yikushikena mu machuku ma kurutu. Kwikil chom ap chimwing chikutwisha kuyipish urund wetu ni Yehova.