Kujingunin Yijingidij Udi Mulong Ukash!

“Kwisambishil natonga anch mwanetu Andreas uyedil kusu mutu. Pakwez kovap ja kudia ni wayela musong ukash wa mashik. Mutu wamusweja nakash, kupwa niyakamisha kamu nakash. Pachirikay nfumwam ku chikumbu, twamutwala Andreas kwa dokiter. Dokiter wajingunina yijingidij ya kusambish ya mayej ni wamutuma Andreas ku rupital pinipa kamu. Mulong wikala ukash kupandakanamu kuswej kwa mutu. Andreas wadinga nich menejit. Amwoka ni kupwa wayerika.”—Gertrud, maku umwing mu Allemagne.

UMAN wa Gertrud wijiken piswimp kud anvaj avud. Akat kushinshikin yijingidij yilejena anch mwanau ukutwish kuyel. Ap anch madiap mayej mawonsu madinga makash, anvaj kafanyidinap kudiwul yijingidij ya mayej ma anau. Kushinshikin yijingidij ni kusal yisal yifanyidina kukwashining nakash. Udi mulong ukash.

Chidi kamu chakin mu milong yikwau kupandakanamu ya ukash wa mujimbu. Chilakej chimwing chifanyidina chidi chinship chapidilau anch tsunami chaletina kusheshik kujim pa Kachirikin 2004 mu jingand jombilamu Karung wa Inde. Yirijek ya guvernema mu jindond jinej mud mu Australie ni mu Hawaii yajingunina kujimb kwa kuzal kwa divu kwindum kwa Sumatra ni yasambela kuman disheshik dikwikalaku. Pakwez, kwadingap mutapu ap umwing kwinikwa chakwel antu adinga mu jindond ja ubaj atambula ap kwakul ku dibabesh ap dimwing. Mud chibudikin, antu 220 000 ni kusut ashadisha mwom wau.

Yijingidij Yijim Nakash

Padingay Yesu Kristu pa divu, wayileja in kumutesh end dilejan dia kushinshikin yijingidij ni kusal kwambatan nich. Ndiy wading wisambidin chom chimwing chijim nakash. Bibil ulondil anch: “Afaris ni Asaduse eza ni kupakish kumwit kuyilejip chijingidij cha mwiur. Pakwez ndiy wayakula wayel anch: ‘Anch kwazwek urel en ukat kulondany anch, “Kukwikal zwang, mulong diur diasunzang kal.” Ni pamanch ukat kulondany anch: “Lel unou kwafafanganang kal, mulong diur disunzil ni yinshish.” En wijany kurumburiluku ya mes ma diur, pakwez kiukutwishanyip kurumburil ya yijingidij ya miten.’”—Mateu 16:1-3.

Pajimbulay “yijingidij ya miten,” Yesu walejana anch in Yuda adinga ni kumutesh mu mivu chitot ya kusambish ading afanyidin kwijik kusut swa kwa chirung chading chishichau. Ditenchik dia yom dia in Yuda diadinga piswimp ni disheshik diadinga difanyidina kuyikwat awonsu. Machuku makemp kurutu kwa rufu rend, Yesu wayileja in kwilejend chijingidij chikwau—chijingidij cha kwikalaku kwend. Yalonday pa chisu chinicha yidi ya usey nakash kud muntu win mwawonsu ilel.