Yipul ya in Kutang

Ov, mu mushet wa manswik mwadinga ching kusu masalet maad ma mayal, ap anch mwadinga kand yom yikwau?

Pa chisu cha kushikij tempel wa Salomon mu muvu wa 1026 K.C.C., “Mu mushet mwading ching kusu masalet maad ma mayal matekayimu Moses ku Horeb, pasukay [Yehova] manswik pamwing nau in Isarel, padiokalau kwi ngand ya Idjibit.” (2 Jinsangu 5:10) Pakwez, kichadingap mwamu chisu chawonsu.

“Pamekanay ngond musu wa kasatu kwinyim padiokalau in Isarel mwi ngand ya Idjibit,” awiy andama mwi mpay ya Sinay. (Kubudik 19:1, 2) Kupwa, Moses wakandama ku Mukandu wa Sinay ni watambula masalet maad ma mayal ma Chijil. Ndiy ushimunin anch: “Chawiy nashirika kudiokal ku mukandu, nateka masalet mu mushet unasala, mwawiy kamu mumadia mudi mwanlejay [Yehova].” (Kuvurik Yijil 10:5) Winou wadinga mushet wa pa chisu, ap anch wakulamin, wamulejau Moses kusal kud Yehova chakwel kulaminamu masalet ma Chijil. (Kuvurik Yijil 10:1) Djat kwinsudiel kwa muvu wa 1513 K.C.C., mushet wa manswik wadinga kandikal wikala tayad.

Chisu chikemp kusu kwinyim kwa kukolik kwau mu Idjibit, in Isarel asambisha kununganijan mulong wa yakudia. Chawiy Yehova wayinkisha mana. (Kubudik 12:17, 18; 16:1-5) Pa chisu chinech, Moses wamwela Aron anch: “Tambul nsab, utekamu chilik cha kachimpay kamwing ka yakudia yidiokila mwiur, yiteka kurutu kwa [Yehova] kulam mulong wa majuku mey ma kurutu.” Rusang ridandamedin kulond anch: “Mudi mwamulejau Moses kudi [Yehova], chawiy Aron wateka nsab kurutu kwa Uman kumulaminaku.” (Kubudik 16:33, 34) Pakad kwidjidjek Aron wateka mana mwi nsab pa chisu chinicha, kumatek kurutu kwa Uman kwadinga mulong wa kuchingel djat pakezay Moses kusal Mushet ni kutekamu masalet.

Mud mutwashinshikina kal, mushet wa manswik autunga kwinyim mu muvu wa 1513 K.C.C. Kwinyim eza kutek Mukombu wa Aron mu Mushet winou, kupwa kubwambwil kwa Kora ni akwau. Kambuy Paul ujimbwil ‘mushet wa manswik mwadinga or nich mananash, ni mukombu wa Aron wasapuka misil, ni mayal mafundilau manswik.’—Hebereu 9:4.

Mana madinga ditenchik diasalay Yehova mu chirung cha mivu 40 ya weny wa in Isarel mwi mpay. Kamaletap kand chisu ‘chasambishau kudia yakudia ya mwi ngand ya kushilamu. (Joshua 5:11, 12) Kwadinga diyingishin diatekinau mukombu wa Aron mu mushet wa manswik—kusadil mud chijingidij ap mud uman pantaliken nich dijuku dia in kubwambwil. Chinech chimekeshin anch mukombu washala pinipa piswimp mu chirung chawonsu cha weny wa mwi mpay. Chamekana kand, kwikal chifanyidina kulond anch chisu chimwing kwinyim kwa Isarel kwandam mwi Ngand ya Kushilamu ni kurutu kwa kushikij tempel wa Salomon, mukombu wa Aron ni nsab ya or mwadinga mana ayidiosha mu mushet wa manswik.