“Uman ku Michid Yawonsu”
“Ukez kwikalany atuman amam . . . ni kwisudiel kwa mangand.”—MIDIMU 1:8.
1. Chisu ik ni kwisu kwateshinau in kwilej kapamp ka kusambish uprofet ufundilau mu Mateu 24:14?
MAZU ma Yesu mafundau mu Mateu 24:14 mijiken nakash mu chilik chakwel anch avud pakach petu amij pa mutu. Ni madi ma uprofet ujim mud ik! Tongin mutapu wafanyinau in kwilej kutong pateshau mazu minam kapamp ka kusambish! Wadinga muvu wa 33 C.C. In kwilej adinga pamwing ni Yesu pasutil kal piswimp mivu yisatu, katat eza nend pamwing ku Yerusalem. Amana yilay yend ni atesha malejan mend. Ap anch awiy asangera uyakin upandikena kuwap wayilejau kud Yesu, awiy adinga ij nawamp win kamu anch antu awonsu kausangerap kwau. Yesu wadinga ni akankuny akash ni a usu.
2. Yak ni yom ik yikash yading yifanyidinau kurish nich in kwilej?
2 Pa Mukandu wa Olivet, in kwilej anying ashakama pamwing ni Yesu, atesha ni kuta matu chisu chadinga chisambidinay piur pa kwez kwa yak ni yom yikash yikezau kurish nich. Kwisambishil, Yesu wayileja anch akez kumujip. (Mateu 16:21) Katat wayovikesh patok anch niyawiy akez kuyizengol kwa chisum. Walonda anch: “Chawiy akez kanipanany ku mar ni kunijipany.” “Akez kanikisany kudi michid yawonsu mulong wa kwambat dijin diam.” Kiyadingap ching kusu yiney. Aprofet amakasu akez kuyidimb antu avud. Akwau akez kuwa ni akez kwitun ni kukisijan umwing ni mukwau. Akwau kand, chakin kamu “avud,” akez kulik rukat rau mulong wa Nzamb ni mulong wa Dizu diend kutalal zong.—Mateu 24:9-12.
3. Ov, mulong wak mazu ma Yesu madia mu Mateu 24:14 mamushen?
3 Yesu walonda mazu mayishimokisha in kwilej, kupwa kwa kwisambin yom yiney yiziyishena. Ndiy walonda anch: “Ni katumb kawamp ka want akez kukalejan ku mangand mawonsu, kakez kikal uman kudi michid yawonsu, chawiy lel disudiel chidikweza.” (Mateu 24:14) Mwaning, mudimu wasambishay Yesu mu Isarel—“kumekesh uman wa uyakin”—wafanyina kudandamen ni kujimb djat ku mangand mawonsu. (Yohan 18:37) Uprofet wamushena mud ik! Kushikij mudimu winou ku “michid yawonsu” kwadinga akwinaku kukash; kusal mwamu kurutu kwa ‘rikis ra michid yawonsu’ kwela kwikal mud chilay. Kuwanyish mudimu winou upandikena kujimb kukez kangal kusu kumekesh ukaleng ni dikand dia Yehova pakwez kand rukat rend, ranaken rend, ni kushimpish muchim kwend. Chikwau kand, kukez kuyinkish atushalapol end ndond ya kumekesh ritiy rau ni kwipan kwau.
4. Anany alejau kusal mudimu wa kupan uman, ni rongoj ik rapanay Yesu?
4 Yesu wayileja patok in kwilej end anch adinga nich mudimu umwing ujim nakash wa kusal. Kurutu kwa kuya kwend mwiur, Yesu wamekana kud awiy ni walonda anch: “En ukez kwakany ukash anch [s]piritu [u]tumbila wez padi en; ni yen ukez kwikalany atuman amam ku Yerusalem, ni ku Yudea mwawonsu ni Samaria, ni kwisudiel kwa mangand.” (Midimu 1:8) Chakin, antu akwau adinga afanyidina inunga nau. Ap mwamu, in kwilej adinga akemp. Chadinga cha rongoj mud ik kwijik anch spiritu utumbila wa Nzamb ukez kuyinkish usu wa kuwanyish mudimu winou wa Nzamb!
5. Chom ik chaburenau kwijik in kwilej piur pa mudimu wa kupan uman?
5 In kwilej ijika anch adinga afanyidin kulejan rusangu ruwamp ni ‘kuyikadish antu a michid yawonsu in kwilej.’ (Mateu 28:19, 20) Pakwez kijikap mutapu ukezau kupan uman, ni kadingap ija piyikeza kwez nsudiel. Niyetu kitwijap. Yiney yidi milong yimutadila Yehova amwinend kukwat chiyul. (Mateu 24:36) Anch uman aupan mu chilik chisotilay Yehova, ndiy ukez kulet nsudiel ku ditenchik dined diyimp dia yom. Pawiy pinipa pakezau kwijik in Kristu anch mudimu wa kulejan wasadikin kal mu chilik chasotay Yehova. In kwilej inay akusambish chayikasikena kuman kujimb kwa kupan uman ukezau kupan mu chisu chinech cha nsudiel.
Uman mu Mivu Chitot ya Kusambish
6. Chom ik chasadika pa Pentekot mu muvu wa 33 C.C. ni kwinyim kamu kwa chinech?
6 Mu mivu chitot ya kusambish, mudimu wa kulejan Want ni kwikadish in kwilej wasonga mabuj mashimokishena. Pa dichuku dia Pentekot muvu wa 33 C.C., piswimp in kwilej 120 adinga mu kapalikany ka piur mu Yerusalem. Ayizizila spiritu utumbila wa Nzamb, kambuy Pita wasala diskur dikasikeshina nich kurumburil kurumburik kwa chilay chinech, ni piswimp antu 3000 itiyija ni ayibabatisha. Dined diadinga kwau kusu disambishil. Chikalap nchik usu wa kujijaman kwa antakel a relijon mulong wa kwimik mudimu wa kulejan rusangu ruwamp, “Mwant [ Yehova] wading ni kuyibombakesh [in kwilej] apandishay pichuku-pichuku.” Kupwa, “kuyichind ashik ku tunan tutan.” Kwinyim kwa chinech, “Amakundj ni amband avud nakash amwitiyija Nsalejetu, chad iwejaku ku chisak cha in kwitiyij.”—Midimu 2:1-4, 8, 14, 41, 47; 4:4; 5:14.
7. Ov, mulong wak kukarumuk kwa Korney kudi chishiken chijim?
7 Muvu wa 36 C.C. mwashikena chishiken chikwau chijim—kukarumuk ni kubabatishiu kwa Korney, mwin Michid. Mu kumutakel kambuy Pita kud ikundj winou mwin kumwov Nzamb wom, Yehova wamekesha anch mbil ya Yesu ya ‘kwikadish in kwilej antu a michid yawonsu’ yadingap yisudedina kudiau in Yuda adinga mu jingand kushalijan. (Midimu 10:44, 45) Mutapu ik wasalau in kutakel? Pajinguninau atwimbuy ni amakundj amapal adinga mu Yudea anch rusangu ruwamp aritiyija kand kud antu a michid—akad kwikal in Yuda—awiy amutumbisha Nzamb. (Midimu 11:1, 18) Pa chisu chawiy chimwing, mudimu wa kulejan wadandamena kusong mabuj mukach mwa in Yuda. Kwinyim kwa mivu kanang, chitwishikin piswimp mu muvu wa 58 C.C., kwading kwiwejin kwa in kwitiyij a in Michid ‘tunan tuvud twa in Yuda.’—Midimu 21:20.
8. Rusangu ruwamp rikwet usu ik pad antu?
8 Ap anch rapor wa uvud wa antu iwejinaku kud in Kristu mu mivu chitot ya kusambish udi usangareshina, kitufanyidinap kuvuramen anch uvud winou udi chakin wa antu asadila. Uruu wa Bibil wateshau wadinga wa usu. (Hebereu 4:12) Wakarumuna nakash mwom wa antu awitiyija. Antu ikala nich mwom wishitwila, amudjala muntu musu, ni ovijana ni Nzamb. (Efes 4:22, 23) Mwamu chidia kand ilel. Ni antu itiyijina rusangu ruwamp awonsu akwet ruchingej ripandikena kuwap ra mwom wa chikupu.—Yohan 3:16.
Ambay a Mudimu a Nzamb
9. Dilau ni chisend ik yajinguninau in Kristu a kusambish anch yawiy yadingau nich?
9 In Kristu a kusambish kadingap nikulond anch yom yashikena awiy ayiwanyisha. Itiyija anch mudimu wau wa kulejan ading ni kuusal nich ukwash wa “ukash wa [s]piritu [u]tumbila.” (Rom 15:13, 19) Yehova ndiy wadinga mwin kukudish muspiritu. Pa chisu chawiy chimwing, in Kristu inay ijika anch adinga nich dilau ni chisend cha kwikal “in mudimu nend Nzamb.” (1 Korint 3:6-9) Mud chibudikin, mu kwambatan nich chiyul cha Yesu, awiy ipana ayinau nich usu mu mudimu wayinkishau kusal.—Luka 13:24.
10. Usu ik wasalau in Kristu amwing a kusambish chakwel kupan uman kud antu a michid yawonsu?
10 Chadingay “mupostol wa in michid,” Paul wenda tunan twa akilometre kwi mpat ni mu karung, wasambisha kutek yikumangen mwi ngand ya Rom mu Aziy ni mu Grek. (Rom 11:13) Waya kand ku Rom ni chimeken kand anch waya mu Espagne. Pa chisu chawiy chimwing, kambuy Pita, ndiy wadinga nich chisend cha kulejan “rusangu ruwamp kudi ayila ku mukand,” waya ku mutambu ukwau kusadil mu Babilon, kwi ndond kwadinga kusadikina nakash difukwil dia in Yuda pa chisu chinicha. (Galatia 2:7-9; 1 Pita 5:13) Mukach mwa antu akwau asala mudimu wa Nsalejetu mwadinga amband mud Trifen ni Trifoz. Mband mukwau, dijin diend Persis, amwisambidin kusal “mudimu ukash wa Mwant.”—Rom 16:12.
11. Mutapu ik wayukishay Yehova usu wa in kwilej?
11 Yehova wayukisha nakash usu wa antu inay ni akwau in kusal mudimu nich mushiku. Kwinyim kwa mivu 30 ni kusut kupwa kwa Yesu kubwak anch kukez kwikal uman ku michid yawonsu, Paul wafunda anch “Antu a mangand mawonsu ayirumburidil kal rusangu ruwamp.” (Kolosay 1:23) Ov, nsudiel yeza? Mwi njil yimwing, mwawiy. Nsudiel yeza ku ditenchik dia yom dia in Yuda mu muvu wa 70 C.C. pezau amasalay in Rom kushesh Yerusalem pamwing ni tempel. Chikwau kand, Yehova wakwata kal mupak anch uman ujim aupana kurutu aleta nsudiel ku ditenchik diawonsu dia yom dia Satan.
Uman Upaninau Ilel
12. Mutapu ik washikenau kutesh in Kwilej Bibil mbil ya kulejan?
12 Pa chirung cha nsudiel cha chitot cha 19, kupwa kwa chirung chilemp kudiosh pasambishina kubwambwil kwa chirelijon, difukwil dishitwila diachirika kakwau. In Kwilej Bibil, mud mwijikanau Atuman a Yehova, ova kurumburik kwa mbil ya kwikadish in kwilej pa divu diawonsu. (Mateu 28:19, 20) Mu muvu wa 1914, kwadinga piswimp antu 5100 asala nich usu mujikit wa kulejan, ni rusangu ruwamp radinga rashikin kal mu jingand 68. Pakwez, In Kwilej Bibil inay a kusambish kateshap kwau nawamp kurumburik kwa Mateu 24:14. Kushik kwisudiel kwa chitot cha 19, Bibil, mudia rusangu ruwamp, ap anch evanjil, amukarumuna ni amuchapa kud ma sosait ma Bibil mu jindim jivud ni amwangana mu mangand mawonsu. Chawiy, mu makum ma mivu, in Kwilej Bibil atonga anch uman ku michid yawonsu aupana kal.
13, 14. Chovu ik chidia zwang cha rusot ni rutong ra Nzamb chalejanau mu nimero wa Chinong cha Kalang cha Inglish cha mu muvu wa 1928?
13 Pakemp-pakemp, Yehova wayinkisha antwend chovu chiwamp cha kutesh rusot ni rutong rend. (Jinswir 4:18) Chinong cha Kalam cha Inglish cha Kachirikin 1, 1928, chalonda anch: “Ov, tukutwish kulond anch kwangan kwa Bibil kwawanyisha kulejan kwa rusangu ruwamp kwa want kwasambelau kulond? Chakin kamu bwat! Chikalap nchik kwangan kwa Bibil chichidi cha usey ku ka chirund kakemp ka atuman a Nzamb adia pa divu kuchap mikand yirumburila [rutong ra ] Nzamb ni kuya ku yikumbu kwapanau ma Bibil minam. Chamwamu antu ela kushal mu kujilijil piur pa kudishiwu Want wa Umesia pa dichuku dietu.”
14 Nimero winou wa Chinong cha Kalam cha Inglish wawejina kand anch: “Mu muvu wa 1920, . . . In Kwilej Bibil ashikena ku chovu chidia zwang cha uprofet wa Nsalejetu udia mu Mateu 24:14. Ajingunina kand anch ‘uruu winou’ wading ufanyidinau kulejan mu mangand mawonsu mud uman kud akad kwikal in Yuda ap anch in michid awonsu, wadingap uruu wa kwez kwa want pakwez uruu wa kulejan anch Want wa Umesia wasambishin kal kuyikel pa divu diawonsu.”
15. Mudimu wa kulejan aujimbishin kushik mu chilik ik kudiosh mu muvu wa 1920
15 “Ka chirund kinak kakemp ka atuman” ka mu mivu 1920 kashalap kakemp bwat. Mu makum ma mivu ya kurutu, “chisak chipandiken[a] kujimb” cha “amikoku akwau” achijingunina ni asambisha kuchikumangej. (Kujingunik 7:9; Yohan 10:16) Ilel unou, ikadil kal 6613829 twa in kulejan rusangu ruwamp mu jingand 235 pa divu. Kuwanyin kwa uprofet kwamushena mud ik! Kandikal ‘rusangu ruwamp riner ra want’ arilejana mu chilik chijim mud chinech. Kandikal kwikalap atushalapol avud ashinshamena a Yehova pa divu mud ilel.
16. Chom ik chawanyishau mu muvu wa mudimu wasutila ou? (Tal mushet udia pa paj wa 23-26.)
16 Pamwing, chisak chijim chinech cha Atuman akwatiken mu chirung cha muvu wa mudimu wa 2005. Asutisha asaa miliyar umwing ni kusut mu kulejan rusangu ruwamp mu jingand 235. Asala mamiliyon ma kuchirikinamu kusu, ni atakedin mamiliyon ma malejan ma Bibil. Mudimu winou ausadil kud Atuman a Yehova, antu apanina kwa kwisotil chisu chau ni mapit mau mulong wa kuyilej antu akwau Dizu dia Nzamb. (Mateu 10:8) Kusutil ku usu wa spiritu wend utumbila, Yehova udandamedin kuyinkish usu atushalapol end chakwel awanyish rusot rend.—Zakariy 4:6.
Sal Mudimu Nich Mushiku Chakwel Kupan Uman
17. Mutapu ik witiyijinau antu a Yehova ku mazu ma Yesu piur pa kulejan rusangu ruwamp?
17 Ap anch pasutil kal piswimp mivu 2000 kudiosh palondilay Yesu anch rusangu ruwamp akez kurilejan, mushiku ukwetau antu a Nzamb mulong wa kusal mudimu ukepinap bwat. Twij anch kusutil ku kujijaman kwetu mu kusal yom yiwamp, tukat kumunyik ngikadil ya Yehova, ya rukat, ranaken, ni kushimpish muchim. Mud Yehova, kitusotilap anch muntu ap umwing asheshika pakwez tusotil anch antu akarumuk ni ovijana nend Yehova. (2 Korint 5:18-20; 2 Pita 3:9) Chidiau amunyikinau nich spiritu wa Nzamb, Atuman a Yehova adandamedin nich mushiku kulejan rusangu ruwamp djat ni kwisudiel kwa divu. (Rom 12:11) Mud chibudikin, antu kwawonsu kudiau itiyijin uyakin ni aziyidil ku umutakel wa rukat wa Yehova. Shinshikin yilakej yikemp kusu.
18, 19. Uman ik ukutwisha kushimunin wa antu amwing itiyija nawamp ku rusangu ruwamp?
18 Charles wadinga ndim kwingangel kwa Kenya. Mu muvu wa 1998 walandisha makilogram 18000 ma ruwand ni amwinkisha seritifika wamwijikisha kwikal Ndim Muwamp wa Ruwand. Pa chisu chinech, ndiy wasambisha kwilej Bibil. Wajingunina swa anch muntu wiyandjikina mu kusongish ruwand ukat kujiril chijil cha Yesu cha kumukat mukwau. (Mateu 22:39) Washikena ku kutong anch ‘ndim muwamp wa ruwand’ wadinga chakin kamu ‘mpongarik mukash,’ Charles washesha ruwand wend nich kwichilap ulemb. Waya kurutu djat ku kwipan ni kubabatishiu ni udi katat chibol wa rawonsu ni nkwash wa mudimu.
19 Kwikil kwidjidjek anch Yehova ukat kunyikesh michid kusutil ku uman upaninau pa mangand mawonsu, ni yom yiswiridikina—antu—akat kwez. (Agay 2:7) Pedro, ushichinga mu Portugal, wandama ku seminer padingay ni mivu 13. Rutong rend radinga ra kwikal mishoner ni kulejan Bibil. Pakwez, kwinyim kwa kachisu kakemp, wadiokala ku seminer mulong adinga ni kwilej pakemp nakash piur pa Bibil mu malejan mau. Kusut kwa mivu musamban wadinga wilejin pisikoloji (psychologie) ku iniversite wa mu Lisbon. Washakama ni makwend mwanikanch, umwing wa Atuman a Yehova, wamukasikesha kwilej Bibil. Pa chinech, Pedro kadingap witiyijina anch Nzamb udingaku, ni katwishap kukwat mupak wa kwilej Bibil ap bwat. Wamuleja mulej wend wa psikoloji piur pa kwidjidjek kwend pa kukwat mupak. Mulej walonda anch dilejan dimwing dia psikoloji dilondil anch antu akad kutwish kukwat mipak akat kwishesh ayinau. Pa kutesh mwamu, Pedro wakwata mupak wa kwilej Bibil. Amubabatishin katat kamu ak ni ukat katat kutakel amwinend malejan ma Bibil.
20. Ov, mulong wak tufanyidin kusanger anch kupan uman ku michid akupanin mu chilik chimwing chijim?
20 Kitwijap mu chilik chikeza kushiken kujimb kwa uman upaninau ku michid, ap kitwijap dichuku ni chisu piyikeza kwez nsudiel. Twij ching kusu anch yikez kwez piswimpap. Tusanger anch kulejan kwa rusangu ruwamp mu chilik chinech chijim chidi chimwing cha yijingidij yivud yimekeshina anch chisu chidi piswimp chakwel Want wa Nzamb uswinkana maguvernema ma antu. (Daniel 2:44) Mu muvu ni muvu ukata kusut, mamiliyon ma antu ayinkishin mutapu wa kwitiyij rusangu ruwamp, ni chinech chikat kumushiman Nzamb wetu, Yehova. El wikala mupak wetu wa kushal ushinshamena ni pamwing ni akadivar ney mu mangand mawonsu kudandamen kwikal ukwatikena mu mudimu wa kutwal uman ku michid yawonsu. Kusutil ku kusal mwamu, tukez kwipandish ayinetu ni in akata kututesh.—1 Timote 4:16.
Ov, Uvurikin?
• Ov, mulong wak Mateu 24:14 udi uprofet umwing ujim?
• Usu ik wasalau in Kristu a kusambish mu kulejan, ni kwikala yibudikin ik?
• Ov, mutapu ik washikenau In Kwilej Bibil ku kutesh kuswir kwa kutwal uman ku michid yawonsu?
• Mu kushinshikin mujikit wa muvu wa mudimu wasutila wa antu a Yehova, chom ik chikusangareshina?
[Chipich chidia pa paj wa 20]
Yehova wamutakela Pita kupan uman kudiay Korney ni dijuku diend
[Chipich chidia pa paj wa 21]
Paul wenda tunan twa akilometre kwimpat ni mu karung mulong wa kulejan rusangu ruwamp