Kukumangej Yitang ya Mwiur ni ya Pansh

‘Chidi kulondulijan nich chiyul chend chiwamp . . . kukumangej pamwing mu Kristu, yitang yawonsu ya mwiur ni ya pansh.’—EFES 1:9, 10, MM.

1. Chisu ‘chiyul chiwamp’ cha Yehova mulong wa diur ni divu?

CHISAMBU pa mangand! Mwamu mudia rusot ritumbila ra Yehova, “Nzamb wa chisambu.” (Hebereu 13:20) Ndiy wamupepila kambuy Paul kufund anch ‘chiyul Chend chiwamp’ chidi ‘kukumangej mu Kristu, yitang yawonsu ya mwiur ni ya pansh.’ (Efes 1:9, 10) Dizu dikarumwinau anch ‘kukumangej pamwing’ mu verse winou dirumburikin ik? Ngang a Bibil J. B. Lightfoot ulondil anch: “Dizu disambidin uumwing wa mangand, wakad kwez kwikal nich kushalijan ni kupwitijan kwa yitang, pakwez uumwing wa yitang ukeza kwikal nich mufulandal pa moj wa uumwing mu Kristu. Chitil ni rufu, runeng, kukangany ni mar, yikez kupwa.”

‘Yitang ya . . . Mwiur’

2. Anany adia ‘yitang ya mwiur’ yiswiridikina kukumangej?

² Kambuy Pita walonda mu wiswimp ya ruchingej ramushena ra in Kristu akin pafunday anch: “Etu tutadil ku maur masu ni ngand yisu, mudi mulondila kushilimu kwend, kukusokau in kutentam.” (2 Pita 3:13) “Ngand yisu” yashilaumu pinap yisambidin ulabu utakedila usu, Want wa Umesia. ‘Yitang ya mwiur’ yajimbulay Paul mu mukand wend wayifundilay in Efes akuyikumangejin pamwing “mu Kristu.” Udi uvud wijikena wa antu atonday chakwel kuyikel pamwing ni Kristu mwiur. (1 Pita 1:3, 4) In Kristu inay 144000 azizidilau many ‘ayilanda kudiokal pansh,’ ‘ayilanda mukach mwa antu,’ chakwel kuyinung pamwing ni Kristu mu Want wend wa mwiur.—Kujingunik 5:9, 10; 14:3, 4; 2 Korint 1:21; Efes 1:11; 3:6.

3. Chitwishikin nchik kulond anch antu amwing ‘ashich mu jindond ja mwiur’ ap pachidau pansh?

³ In Kristu azizidilau many ayiletin kand, ap anch akat kuvadik kapamp ka kaad, kusutil ku spiritu utumbila kwikal an a muspiritu a Yehova. (Yohan 1:12, 13; 3:5-7) Yehova ukat kuyiswan mud “an,” chakwel ikala akadivar a Yesu. (Rom 8:15; Efes 1:5) Mud an, ap pachidiau pa divu, akat kuyilond kwikal ‘avumbwilau ni kuyishichik pamwing mu jindond ja mwiur mu uumwing nenday Kristu Yesu.’ (Efes 1:3; 2:6) Awiy akwet ndond yiney yizambukina muspiritu mulong ‘atambula chijingidij cha [s]piritu [u]tumbila wa kushilimu, udi chizu cha uswan [wau].’ (Efes 1:13, 14; Kolosay 1:5) Inay niyawiy, adi ‘yitang ya mwiur,’ uvud way asambela kal kuujimbul kud Yehova ni yiswiridin kuyikumangejin pamwing.

Kusambish Kukumangej

4. Chisu ik ni mutapu ik kwasambisha kukumangej kwa ‘yitang ya mwiur’?

⁴ Kukwatijan nich “umutakel” wa Yehova, ap anch mutapu wa kutenchik yom, kukumangej kwa ‘yitang ya mwiur’ kwasambisha “mu kuwanyin kwa muten.” (Efes 1:10) Kuwanyin kwa muten kwinoku kwashikena pa Pentekot 33 C.C. Pa dichuku dined, spiritu utumbila amwichila padiau atwimbuy ni chirund cha in kwilej, amakundj ni amband. (Midimu 1:13-15; 2:1-4) Chom chinech chaleta uman anch manswik masu masambishil kal kusal, chikala chijingidij cha kuvadik kwa chikumangen cha Ukristu ni kwa muchid usu wa Isarel wa muspiritu, “Isarel wa Nzamb.”—Galatia 6:16; Hebereu 9:15; 12:23, 24.

5. Mulong wak Yehova watanga “muchid” usu ukuswinkana Isarel ku mujimbu?

⁵ Manswik ma Chijil masukay ni Isarel ku mujimbu makanganya kubudish “want wa in kupesh ni muchid utumbila” ukeza kusadil chikupu mwiur. (Kubudik 19:5, 6) Yesu wayela antakel a relijon in Yuda anch: “Want wa Nzamb akez kaudiosh kudi en, akez kaupan kudi muchid ukata kusong mabuj mau.” (Mateu 21:43) Muchid winou, Isarel wa muspiritu, ausadil kud in Kristu azizidilau many andjikau mu manswik masu. Kambuy Pita wayifundina, antu inay anch: “En udiany a kumutambu utondilau, in kupesh a Mwant, muchid utumbila, antu a Nzamb amwinend atondilau, chakwel ukutwishany kumekesh kuwap kwendendiy wanitazuka kunidiosh ku mididim, ni kuniletany ku kutok kwend kwa kushimok. Pa muten wa pasak kiwadinganyap mudi chisak, pakwez katat udiany antu a Nzamb.” (1 Pita 2:9, 10) In Isarel wa ku mujimbu kikalap kand antu a manswik a Yehova. (Hebereu 8:7-13) Mud mwalonday Yesu, dilau dia kwikal chikunku cha Want wa Umesia ayitambulad ni adipana kud yid 144 000 ya Isarel wa muspiritu.—Kujingunik 7:4-8.

Ayandjika mu Manswik ma Want

6, 7. Manswik ik ma pakampwil masalay Yesu nau anamakwend a muspiritu, ni chirumburikin ik kud awiy?

⁶ Pa uchuku wasambishay Yesu Chivurikish cha rufu rend, ndiy wayela atwimbuy end ashinshamena anch: “En udiany in kudandamen nam mu yoziu yam; chawiy am [nasuk kal manswik nen, mud kamu mwasukay Tatuku manswik nam, mulong wa] want, chakwel en ukudiany ni kunany ku mes mamam mu want wam; en ukez kashakamany mu jinkwas ni kurumburish michid ya Isarel dikum ni yaad.” (Luka 22:28-30) Pinap Yesu wisambina manswik ma pakampwil masalay nau anamakwend a muspiritu 144 000, akeza kushal ‘ajijamena kushik ni ku rufu’ ni kwimekesh ayinau ‘in kupandikan.’—Kujingunik 2:10; 3:21.

⁷ Antu a ka chirund kinak kakemp alika yawonsu ya ruchingej ra kushakam chikupu pa divu mud antu a mbij ni mash. Awiy akez kuyikel pamwing ni Kristu mwiur, ashich pa jinkwas mulong wa kuyirumburish antu. (Kujingunik 20:4, 6) Katat tushinshikinany mifund yikwau yisadikina ching kusu ku antu inay azizidilau many ni yilejena mulong wak “amikoku akwau” alikin kudia ni kuna yifanikesh ya Chivurikish.—Yohan 10:16.

8. Chom ik chilejenau azizidilau many ku kudia kwau dibot? (Tal mushet udia pa paj wa 15.)

⁸ Azizidilau many akez kaman mar mud chamanay Kristu ni adi tayad kufa rufu mud rafay Kristu. Paul walonda mud umwing wa mu chirund chinech anch, amutenchika kusal chom ap chisu chakwel ukutwish “kumwisak Kristu, chakwel nikumwijik ndiy, ni usu wa disanguk diend, mwin kuman nend mar.” Mwaning, Paul wadinga tayad kwikal “mudi ndiy mu rufu rend.” (Filip 3:8, 10) In Kristu azizidilau many avud ajijamen kal mu mijimbu yau “ubaj wa rufu mudi mwafay Yesu.”—2 Korint 4:10, MM.

9. Mujimbu ik ufanikeshinau nich dibot dia Chivurikish?

⁹ Yesu walonda pasambishay Yakudia ya Urel ya Nsalejetu anch: “wawiy mujimbu wam.” (Marko 14:22) Ndiy wisambina mujimbu wend wa mbij, wadia usotinau kubul ni kusunzish nich mash. Dibot diakad chivish diadinga chifanikesh chakin cha mujimbu winou. Mulong wak? Mulong mu Bibil, chivish chikutwish kurumburik chitil ap kuziy. (Mateu 16:4, 11, 12; 1 Korint 5:6-8) Yesu wadinga uwanyidina, ni mujimbu wend wa chiuntu wadinga wakad chitil. Ndiy watwisha kupesh mujimbu winou uwanyidina mud chakupesh cha dilikishin. (Hebereu 7:26; 1 Yohan 2:2) Kusal kwend mwamu kukez kuyisakin in Kristu awonsu ashinshamena, ap anch achingejin kushakam mwiur ap achingejin mwom wa chikupu mu paradis pa divu.—Yohan 6:51.

10. Mwi njil ik yikatau antu anina nviny ya Chivurikish ‘kubombakan pamwing ni mash ma Kristu’?

¹⁰ Paul wafunda piur pa nviny uniningau in Kristu azizidilau many pa Chivurikish, anch: “Rupas ra chiyukish tuyukila kudiap kubombakan pamwing ni mash ma Kristu?” (1 Korint 10:16) Mu mutapu ik ukatau in anininga nviny ‘kubombakan pamwing ni mash ma Kristu’? Chakin kamu kakatap kubombakan pamwing mu kulet chakupesh cha difut, mulong niyawiy aswiridin dipandish. Kusutil ku ritiy rau mu usu wa dipandish dia mash ma Kristu, ayilikishina kal yitil yau ni akat kuyitazuk anch atentamina mulong wa mwom wa mwiur. (Rom 5:8, 9; Titus 3:4-7) Chidi kusutil ku mash michilay Kristu kwawiy ant answan 144000 a Kristu adi ‘ishitwila kal,’ ayaurila, ayitokisha ku chitil ikala “Antu atumbila.” (Hebereu 10:29; Daniel 7:18, 27; Efes 2:19) Chakin, kudi kusutil ku mash mend michika kawiy Kristu “Wayikwolap antu amwing a michid yawonsu, ni antu a jindim jawonsu, ni a majuku mawonsu, ni a mangand mawonsu. Ndiy wayikadish kwikal want wa in kupesh mulong wa kumusadil Nzamb, chad awiy akez kuyikel pa mangand.”—Kujingunik 5:9, 10, MM.

11. Chom ik chilejenay muntu wazizidilau many ku kuna nviny ya Chivurikish?

¹¹ Pasambishay Yesu Chivurikish cha rufu rend, wayinkisha atwimbuy end ashinshamena rupas ni nviny ni walonda anch: ‘Nangany en awonsu; mulong minam madi mash mam ma manswik mayichilau avud mulong wa kuyilikishin yitil.’ (Mateu 26:27, 28) Mud kamu mash ma amakwal a angomb ni ampemb mimika dang manswik ma Chijil pakach pa Nzamb ni muchid wa Isarel, mash ma Yesu mimika dang manswik masu masukay Yehova ni Isarel wa muspiritu, kudiosh kamu pa Pentekot 33 C.C. (Kubudik 24:5-8; Luka 22:20; Hebereu 9:14, 15) Ku kuna nviny yifanikeshina “mash ma manswik,” azizidilau many alejen anch ayandjikin kal mu manswik masu ni kwisakinam.

12. Mutapu ik muyibabatishinau azizidilau many mu rufu ra Kristu?

¹² Akat kuyivurish kand azizidilau many chom chikwau. Yesu wayela in kwilejend ashinshamena anch: “Rupas rinikuna am ukez karinany, nich dibabatish diambabatishau, ni yen diawiy dikunibabatishanyau nich.” (Marko 10:38, 39) Kwinyim kambuy Paul walonda ya in Kristu ‘ababatishau mu rufu [ra Kristu].’ (Rom 6:3) Azizidilau many ashiching mu mwom wa kwipan. Rufu rau ridi ra kwipan charumburik anch awiy atunin ruchingej ap risu ra mwom wa chikupu pa divu. Dibabatish dia in Kristu inay azizidilau many mu rufu ra Kristu dikat kuwanyin kwinyim kwa kufa ashinshamena awiy akat kuyisangul mud yitang ya muspiritu chakwel ‘kuyikel pamwing mud ant’ pamwing ni Kristu mwiur.—2 Timote 2:10-12; Rom 6:5; 1 Korint 15:42-44, 50.

Kudia ni Kuna Yifanikesh

13. Ov, mulong wak antu akweta ruchingej ra pansh kakatap kudia ni kuna yifanikesh ya Chivurikish, chad mulong wak ukatau kukumangan ku Chivurikish?

¹³ Mulong kudia dibot ni kuna nviny yikatau kusutish pa Chivurikish kukwatijadin ni yom yiney yawonsu, chikez kwikal chakad kufanyin kud antu akweta ruchingej ra pansh kudia ni kuna. Antu akweta ruchingej ra pansh ajingunin ayinau anch kadiap yid yizizidilau many ya mujimbu wa Kristu, ni kadiap mu manswik masu masukay Yehova pamwing ni antu akeza kuyikel pamwing ni Yesu Kristu. Mulong “rupas” rifanikeshin manswik masu, ching kusu in adia mu manswik masu awiy adilinga ni kuna yifanikesh. Antu achingejina kushakam chikupu mud antu awanyidina pa divu mwishin mwa Want kakatap kuyibabatish mu rufu ra Yesu ap kuyiladikij kuyikel pamwing nend mwiur. Anch adia ni kuna yifanikesh, chikez kurumburik chom chimwing chakad kwikal chakin ku mutambu wau. Mwamu, kakatap kudia ni kuna, pakwez akat kukumangan ku Chivurikish mud in kutal in kalimish. Awiy adi in kujikitish mulong wa yawonsu yayisadilau kud Yehova kusutil kud Mwanend, pamwing ni dilikishin dimedina pa mash michika ma Kristu.

14. Mutapu ik uyikasikeshinau muspiritu azizidilau many kusutil ku kudia dibot ni kuna nviny?

¹⁴ Kutek chijingidij kwa nsudiel pad in Kristu akemp aladikijau kuyikel pamwing ni Kristu mwiur kwashej kal piswimp. Djat ni kwisudiel kwa mwom wau wa kwipan pa divu, azizidilau many ayikasikeshin muspiritu kusutil ku kudia ni kuna yifanikesh ya Chivurikish. Akat kwiyov kwikal mu uumwing nau akadivar ni anambaz akwau azizidilau many mud yid ya mujimbu wa Kristu. Kudia ni kuna kwau kwa dibot ni nviny ya chifanikesh kukat kuyivurish chisend chau cha kushal ashinshamena djat ni ku rufu.—2 Pita 1:10, 11.

Kukumangej ‘Yitang ya Pansh’

15. Anany akumangejinau ku tubet twa in Kristu azizidilau many?

¹⁵ Kudiosh mukach mwa mivu ya 1930, uvud upandakena wa “amikoku akwau,” akad kwikal a “chisak chikemp” ni akweta ruchingej ra mwom wa chikupu pa divu, inunga ku mutambu wa azizidilau many. (Yohan 10:16; Luka 12:32; Zakariy 8:23) Awiy ikala ambay ashinshamena a akadivar a Kristu, kuyikwash muchifanyidina mu kulejan kwa “katumb kawamp ka want” mulong wa uman ku michid yawonsu. (Mateu 24:14; 25:40) Kusalang mwamu, itekin ayinau mu mulong wa dirumburish diwamp kud Kristu mud “amikoku” end, atekinay ku “chikas chend cha katatuku” cha kwitiyik pakezay kwez kuyirumburish michid. (Mateu 25:33-36, 46) Kusutil ku ritiy mu mash ma Kristu, akez kusal “chisak chipandikena kujimb,” chikeza kupand ku “mar makash.”—Kujingunik 7:9-14.

16. Anany akeza kwikal mu ‘yitang ya pansh’, ni mutapu ik ukezau inay awonsu kwikal “an a Nzamb”?

¹⁶ Kutek chijingidij kwa nsudiel kwa 144 000 kukez kwanzurul njil mulong wa kulikishaku “rinkind” wa disheshik dia ditenchik dia yom diyimp dia Satan pa divu. (Kujingunik 7:1-4) Pa chirung cha Winyikel wa Mivu Kanan wa Kristu ni ambay nend ant ni in kupesh, chisak chipandikena kujimb chikez kubombakan nich uvud wakad kwijikan wa antu akeza kusanguk. (Kujingunik 20:12, 13) Antu inay akez kwikal nich mutapu wa kwikal in kushakam chikupu a pansh a Mwant wa Umesia, Kristu Yesu. Kupwa kwa Winyikel wa Mivu Kanan, ‘yitang yiney yawonsu ya pansh’ akez kuyipak ku choziu cha nsudiel. Antu akeza kwimekesh ashinshamena akez kuyitiyij mud “an a Nzamb” a pansh—Efes 1:10; Rom 8:21; Kujingunik 20:7, 8.

17. Mutapu ik ukeza kuwanyin rutong ra Yehova?

¹⁷ Mwamu, kusutil ku “wintakel” wend wa manangu mapandakena kujimb, ap mutapu wend wa kutenchik yom, Yehova ukez kuwanyish kushilamu kwend kwa ‘kukumangejin pamwing yom yawonsu mu Kristu, yom ya mwiur ni yom ya pansh.’ Yitang yawonsu ya manangu ya mwiur ni ya pansh akez kuyikumangejin pamwing mu chisambu cha pa mangand mawonsu, yikuziyil nich musangar ku ukaleng utentamina wa mwin Rutong Rijim, Yehova.

18. Mutapu ik ukezau kwisakin azizidilau many pamwing ni ambay nau ku kukumangan ku Chivurikish?

¹⁸ Chikez kwikal chikasikeshina ritiy mud ik kud antu akemp azizidilau many ni kud ambay nau mamiliyon ma amikoku akwau kukumangan pa Ndol 12, 2006! Akez kusal Chivurikish cha rufu ra Kristu, mud mwalonday Yesu anch: “Ukez kusalangany mwamu mulong wa kwinvurik am.” (Luka 22:19) In kukumangan awonsu afanyidin kuvurikang chayisadilay Yehova kusutil kud Mwanend mukatish, Kristu Yesu.

Ya Kuchirikin

• Risu rusot ra Yehova mulong wa yitang ya mwiur ni ya pansh?

• Anany adia “yitang ya mwiur,” ni mutapu ik wayikumangejau?

• Anany adia “yitang ya pansh,” ni ruchingej ik rikwetau?

[Kamushet kadia pa paj wa 15]

“Mujimbu wa Kristu”

Mu 1 Korint 10:16, 17, Paul, pisambidinay piur pa usey wa pakampwil wa dibot mulong wa azizidilau many akadivar a Kristu, ajimbwilau anch “mujimbu” mu mutapu wa pakampwil. Ndiy walonda anch: “Dibot ditukata kuumbol kidilikenip mumwing mu mujimbu wa Kristu? Talany, etu tuvudil tudil dibot dimwing, mujimbu umwing; mulong etu awonsu tudi yikunku ya dibot dimwing.” Pakatau kudia in Kristu azizidilau many dibot dia Chivurikish, akat kulejan uumwing wau mu chikumangen cha antu azizidilau many, chidia mud mujimbu ni Kristu mud Mutu.—Mateu 23:10; 1 Korint 12:12, 13, 18

[Chipich chidia pa paj wa 15]

Ov, mulong wak ching kusu azizidilau many awiy akata kudia dibot ni kuna nviny?

[Chipich chidia pa paj wa 17]

Kusutil ku wintakel wa Yehova, yitang yawonsu ya mwiur ni ya pansh yikez kwikal mu uumwing