Yom Yikutwisha Kukukwash Kwambamb ni Mwin Nkwey

‘KINAFANYINANGAP kulond mwamu.’ ‘Kinalondangap patok.’ Ov, wiyovap kal mwamu kupwa kwa kwambamb ni mwin nkwey? Kwambamb udi ukaliweny ufanyidinau kukudish. Mud kamu ukaliweny wawonsu, chimekening kwikal chiswapela kud amwing kwambamb nawamp, Pakwez, chikasiken kud akwau. Ap anch udi pakach pa antu akad kutwish kwambamb nawamp, chitwishikin kwilej mutapu wa kusamburish yitongijok yey mu mutapu usangareshina, chakwel kwambamb nawamp.

Yisu yimwing, yishankur yikat kuyibachik antu mu jinjil jimwing pa mulong wa kwambamb ni ambay nau a uruw. Amakundj avud ayileja kal kwambatan nich yishankur anch: ‘Chakwel kwikal ikundj,’ ‘chifanyidinap kulond nakash.’ Amakundj alondininga nakash akutwish kuyiman mud antu akad usey. Bibil ulondin chakin anch: “Muntu wawonsu atesha swa, alonda pakemp-pakemp.” (Yakob 1:19) Pakwez, chiyul chinech chiyitadil amband ni amakundj, ni chimekeshin anch kwambamb kwitin yivud kusut kulond kusu. Antu aad akutwish kulond umwing ni mukwau chisu chilemp, pakwez chikwikal nchik anch kwovijadinap umwing ni mukwau? Mwamu, akuburen kwambamb kwakin. Chom chijim chikutwishisha kuyikwash kwambamb nawamp mud muchilejenau mu verse twajimbulang kwiur oku, chidi ukaliweny wa kutesh.

Kwambamb Pakad Kulond

Mu yisak yimwing ya antu, amband kakweta mbil ya kumekesh yitongijok ni yovil yau. Amakundj kasotiningap kushakam pamwing chakwel kubangin milong ya mu dijuku. Mu mwikadil wa mutapu winou, ikundj ni mukajend kakatap kwijik ayinau chisotinay mu yisu kanang umwing ni mukwau. Amband amwing ashikedin ku kwikal nich ukaliweny wa kujingunin nawamp maswir ma anfumwau ni kusal swa chakwel kumawanyish. Pa chinech, kwambamb pakad kulond kukat kudandamen pakach pa ikundj ni mband. Pakwez, chisu chivud, kwambamb kwa mutapu winou, kuding kwau ku mutambu umwing. Chisu chisadinay mband usu wa kujingunin yitonginay ni yovilay nfumwend, ikundj kakwetap chisu cha kukudish ukaliweny wa chilik chimwing ni kujingunin yovilay mukajend.

Chakin kamu, mu yishankur ya antu akwau, amakundj akat kushinshikin yovil ya akajau ni kupakish kuyiwanyish. Pakwez, ap mu yishankur mud yiney, uruw uvud ukutan ukwash udiokila ku kwambamb kuwamp.

Kwambamb Kudi Kwa Usey Nakash

Kwambamb kwa kashinsh kukutwish kukoj ku kuburen kwovijan ni kutesh nayimp. Pasak mu jinsang ja in Isarel, muchid wa in Ruben, wa in Gad, ni chikunku cha muchid wa in Manase adinga kwingangel kwa Kawit Yordan atunga “chintamb chijim nakash” ku chikum cha kawit Yordan. Michid yikwau mu Isarel yaburena kwov kurumburik kwa yisalijok yau. Atonga anch akadivar nau auka Yordan asala yisalijok ya kupumbwok, chawiy lel michid ya kurand yirijeka mulong wa kurish njit ni “antombuj”. Kurutu kwa kwas njit, atuma antu mulong wa kwambamb ni michid ya kwingangel. Chading chisal cha manangu mud ik! Ajingunina anch chintamb kichadingap mulong wa yakupesh ya kwosh ni milambu yakad kwambatan nich chijil. Pakwez, michid ya kwingangel yading yovil wom anch mu machuku ma kurutu, michid yikwau yikez kuyilej anch: “kiukwetanyap uswan ap kusu umwing kud Yehova.” Chintamb chela kwikal uman wa kumekesh anch ni yawiy adinga in kumwifukwil Yehova. (Joshua 22:10-29) Chintamb chinicha achipila anch Uman, mulong chading uman wakwel anch kud awiy Yehova wading Nzamb wakin. —Joshua 22:34.

Kurumburil kwau kwadinga kuwanyidina chakwel kuyishikij michid yikwau ku kwitiy, yakarumuna chitongijok cha kurish njit ni michid yaad ni chikunku ya kwingangel. Chakin kamu, kwambamb kwakin ni kwa patok kwasala anch alika kurish njit. Kwinyim, chisu chabwambwilay Isarel ku mes kwa Yehova Nzamb, nfumwend mu chifanikesh, ndiy walonda kud awiy anch: ‘ukez kulond ku michim yau’, ni ranaken. (Ozey 2:14) Chilakej chimwing chiwamp mud ik kud antu atena! Chakin kamu, sal usu wa kushik ku muchim wa mbay ney a uruw chakwel mukajey ap nfumwey atwisha kutesh yovil yey. Chinech chidi cha usey, nakash kamu anch ambay a uruw ambambina akwet yovil yikash ya rukat. Kabamb a nsangu umwing wa mu Etat–Unis utazukinau anch Pattie Mihalik walonda anch: “Antu amwing akat kulondang anch chiswapel kulond, pakwez mazu makutwish kwikal nich usey upandakena kujimb. Ni pakatau kukangany antu akwau kulond yikatau kwov, yibudikin ya kwambamb kwa kashinsh yikutwish kusut usey wa nfalang mu bank.”

Kukudish Ukaliweny wa Kwambamb

Antu amwing akutwish kulond anch: ‘Uruw wetu wading ufila kwinsambishil.’ Pakwez antu akwau akutwish kulond anch: ‘uruw winou utwishikinap kupand.’ Ambay a uruw amwing akutwish kutong anch chikasiken kukudish ukaliweny wau wa kwambamb, kupwa kwa dichuku dia musambu wa uruw. Chikwau kand, tongijokin bil piur pa antu ashicha mu yisak mukatau kurijek uruw kud anvaj. Avud mu yisak yiney akat kushiken ku kutwish kwambamb mu uruw wau.

Ambay a uruw amwing a mwi ngand ya kwingangel atijana mu uruw wa kwovijan kwa anvaj. Atuma kashalapol umwing chakwel aya kulemp kumukimbin Isak mband wa kwat. Ambay a uruw inay, ashakama pasutin kal mivu piswimp 4000, amekesha ukaliweny upandakena nakash wa kwambamb. Isak wamusankana kashalapol watumau ni changadim ukwatay mu chir. Kashalapol winou watumau waya “kumulej Isak milong yawonsu yasalay.” Jinsangu ja Bibil jidandamedin kulejan piur pa uruw winou anch: “Chad Isak wamusenda [Rebeka] wakamwandjik mu mwinkand wa makwend Sara [chisal chimekeshina anch atijan kal ku mes ma antu awonsu]. Isak wamusenda Rebeka, wamwat wikala mukajend, ndiy wamukata.”—Disambishil 24:62- 67.

Shinshikin anch, Isak wasambela bil kwov rusangu ni ‘kupwa’ wamusenda Rebeka wikala mukajend. Ntimesh winou wading kashalapol wakashinsh mwin kwipan kud Yehova Nzamb, Nzamb wa Isak. Isak wading ni diyingish diwamp dia kumuchingejin muntu winou. Kupwa, Isak “wamukata” Rebeka, ni wamwata.

Ov, Isak ni Rebeka akudisha ukaliweny uwamp wa kwambamb? Kupwa kwa mwanau Esau kwat ayangadim aad in Het, mulong ukash wasambisha mu dijuku dined. Rebeka “wamwela” Isak anch : “Champwish kal am usu, mulong wa ayangadim a in Het. Jakob niyend anch wat kand changadim mwin Het . . . , ov, mwamu am nishakamin kand ik mwom?” (Disambishil 26:34; 27:46) Rebeka wamuleja patok yom yadinga yiswiridinay, kasadinap mazu makad kwovikan.

Isak wamuleja Yakob, mwanamakwend a Esau chakwel kangal wa kat mband pakach pa ayangadim a mu kanan. (Disambishil 28:1, 2) Rebeka waleta chitongijok chend. Ambay a uruw inay aad, atwisha kwambamb nawamp piur pa milong yikash mu dijuku, ni kutwinkishin chilakej chiwamp nlel unou. Chikwikal nchik anch antu atijadina katwishinap kwovijan pa mulong kanang? Chom ik chikutwishau kusal?

Mutapu wa Kupwish Kuburen Kwovijan

Anch ey ni mwin nkwey wovijadinanyap, kangal wamusal mwin nkwey yom ya pansh-pansh. Chinech chikez kusamburish patok chitongijok chakwel anch: Ukwetap musangar, ni usotin anch mwin nkwey aburena ni ndiy musangar. Chikwau kand, mwin nkwey kakutwishap kwijik yawonsu usotina ni wovina ku muchim. Ey ni mukajey uswiridinany kwambamb patok milong yen. Anch mulong ukutwish kumovish mbay a uruw mukwau ujim, chikutwishap kuswapal kushakam mu chisambu. Anvaj a Isak, Aburaham, ni Sara, arisha nich mwikadil ukash. Mulong wadinga mumb, Sara wasadina chishankur cha pa chirungu chinicha, wamwinkisha Aburaham changadim mwilomb wend, Agar, mud mband wa kuns chakwel amuletina mbut. Hagar wamuvadina Aburaham mwan ikundj, Ismael. Pakwez, kwinyim kwa machuku, Sara wikala ni madikaj ni wamuvadina Aburaham mwan ikundj, Isak. Pakulay Isak ni kusumuk ku mayel, Sara wamana anch Ismael wading ni kusengan ni mwanend. Kupwa kwa kushinshikin piur pa ubaj mulong wa mwanend, Sara, wamuleja Aburaham kumwopat changadim winou mwilomb pamwing ni Ismael. Chakin kamu, Sara wamuleja nfumwend patok yadinga ku muchim wend. Pakwez, chom chamwitay chamunenganesha Aburaham.

Mutapu ik wapwishau mulong winou? Rusangu ra Bibil rilejen anch: “Nzamb wamwela Aburaham anch: ‘Kangal wiswil kwey mulong wa mwan winou, ni mwilomb wey Hagar. Tesh kwey yom yawonsu yikukulejau kudi Sara uyisadila, mulong majuku mey akez kumatazukin ku Isak.’” Aburaham watesha chiyul cha Yehova Nzamb ni wasala mwamulejau. —Disambishil 16:1-4; 21:1-14.

Ukutwish kulond anch: ‘Mwawiy,’ ‘anch twatesh dizu dia Nzamb amwinend ukat kulond mwiur tukutwish kwitiyij!’ Chinech chitutwadil ku kushinshikin chiyul chikwau chikutukwasha kupwish matend mu uruw. Antu atijadina akutwish kumutesh Nzamb. Mutapu ik? Mu kutang pamwing Dizu dia Nzamb ni kwitiyij yidilondila mud umutakel wa Nzamb.—1 Tesalonika 2:13.

Mband umwing ukweta ukaliweny ukash walonda anch: “Chisu chivud, anch changadim wez kud am mulong wa kumwinkish chiyul piur pa uruw wend, nikat kumwipul anch ndiy ni nfumwend akat kutang Bibil pamwing. Antu avud akweta milong mu uruw wau, kakwetap chaku cha kutang Bibil pamwing.” (Titus 2:3-5) Kushinshikin kwend kukutwish kutukwash etu awonsu. Tangany Bibil dichuku ni dichuku pamwing ni mwin nkwey. Mu kusal mwamu, ukez “kateshany” dizu dia Nzamb mud dikat kukutakelany mu mutapu wen wa kushakam dichuku ni dichuku. (Isay 30:21) Pakwez babal: Kangal wasadin Bibil ikala mud mutond wa kumubul nich mwin nkwey, ap kudandamen kusadin mifund ya Bibil umena anch mwin nkwey ukangeny kuyisadil. Pakwez, pakish kuman mutapu ik ukutwishanya en awonsu aad kusadil yiukata kutangany mu Bibil.

Anch ukat kupakish kupwish mulong ukash, chom ik chikukukangesha kukimb mu Indexa wa mikand ya Watch Tower piur pa milong kanang yikutadina? Palemp ap ukat kuyilam anvaj ananapina, ni chinech chiletin kupwitijan mu uruw wey. Pa ndond pa kusambish kupwitijan ni mwin nkwey, piur pa yifanyidinay kusal ap bwat, shakamany pamwing ni kimbany mu Index. Chakusambish, talany pa mutu wa mulong ujim “Anvaj.” Ukutwishany kutal ma referans mwishin mwa mitu ya milong mud “kulam anvaj ananapina kal.” Tangany pamwing malejan madiokila mu mikand ya atuman a Yehova. Ukutwish kushimokany mutapu ey ni mwin nkwey ukutwishany kutan ukwash udiokila mu mikand yimedina pa jinsang ja Bibil, mikand ya yikwasha in Kristu akin avud.

Anch wasambishany kukimb pamwing mareferans minam ni kumatang, makukukwashany chakwel wikalany nich yitongijok yiwamp pa milong yen. Ukutanany maverse madiokila mu Bibil makeza kukwinkishany yitongijok ya Nzamb. Kimbany maverse minam mu Bibil, ni kumatang pamwing. Chawiy lel, ukuteshany yilondinay Nzamb pa milong urishinanya nich!  

Lam Kwambamb Kuwamp

Ov, wapakishinap kal kwazuril chis cha sadina kal machuku mavud pakad kuchazuril? Mulong chakwatin kal ankal, chikat kwazurik pakemp-pakemp nich masok. Pakwez, chikwikal nchik anch chis chinech ading ni kuchisadin dichuku ni dichuku, ni kuchitek many? Chikwikal chiswapela kwazuril. Chidi chilik chimwing ni mambamb. Anch wasal usu wa kwambamb ni kusadil many ap rukat ra win Kristu, ukutwish kusamburish yitongijok yey nawamp ap anch wovijadinanap pa mulong kanang wa usey nakash. Pakusambish chikutwish kukukasiken. Ap anch kwambamb kukutwish kwit usu ukash, sal usu wa kwambamb nawamp. Chawiy lel, ukutwishany kusanger urund uwamp ni mwin nkwey, ni kushiken mu kwovijan machuku mawonsu.

[Mazu madia kwishin kwa paj]

[Chipich chidia pa paj wa 7]

Ov, ulondwil umutakel wa Nzamb piukata kurish nich kuburen kwovijan?