Mutapu wa Kumusejin “Ukata Kutesh Kulembil”

‘Antu a mbij jawonsu akez kwez kud ey ukata kutesh kulembil.’—KUSENG 65:2.

1. Chom ik chiyikadishina antu ashalijana ni yitang yikwau yidia pa divu, ni chom chinech chiyinkishin antu mutapu wa kusal ik?

MU YITANG yawonsu yikweta mwom yidia pa divu, ching kusu antu awiy akweta ukaliweny wa kumwifukwil Sakatang. Ching kusu antu awiy ija anch akwet maswir ma muspiritu ni aswiridin kumawanyish. Chawiy chitwinkishina mutapu uwamp wa muntu ni muntu kuta urund ni Tatukwetu wa mwiur.

2. Chitil chadinga ni chibudikin ik chiyimp pa urund wa muntu ni Sakatang wend?

² Nzamb Sakatang wayitanga antu ni wayinkisha ukaliweny wa kumusejin. Adam ni Eve ayitanga akad chitil. Chawiy lel, chikalau ni want ipau wa kumusejin Nzamb mud mwisambiningay mwan ni tatukwend. Pakwez, chitil cheza kushadish dilau dijim dined. Adam ni Eve amubwambwila Nzamb ni ashadisha urund wa piswimp ni Nzamb. (Disambishil 3:8-13, 17-24) Ov, chinech chirumburikin anch an akayitil a Adam kakutwishap kwisamb ni Nzamb? Bwat, ni katat Yehova uyinkishin mutapu wa kumusejin pakwez ching anch awanyish yom kanang yitinau ya pa dishin. Yom ik yiney yitinau?

Yitinau Mulong wa Kumusejin Nzamb

3. Mutapu ik ukutwishau antu akayitil kumusejin Nzamb, ni chilakej ik tukweta pa mulong winou?

³ Chishiken chimwing chiyikwatina an amakundj aad a Adam chitukwashin kutesh yitinay Nzamb kud muntu win mwawonsu mukayitil usotila kumusejin. Kain ni Abel awonsu aad asala usu wa kumusejin Nzamb kusutil ku kumulambul milambu. Mulambu wa Abel awiyitiyija, pakwez wa Kain aulika. (Disambishil 4:3-5) Kushalijan kwadinga pisu? Hebreu 11:4 ulondil anch: “Ku ritiy Abel wamulambula Nzamb yakupesh yiwamp kupandakanamu ya Kain. Ku ritiy ra Abel kwawiy kwamwedilau kudi Nzamb anch: ‘Ey udi muntu utentamina.’ ” Choviken patok anch, ritiy ridi ra kusambish chakwel kutwish kumusejin Nzamb. Chom chikwau chitinau chimekedin mu mazu ma Yehova mamulejay Kain anch: “Anch ey watongang kusal nawamp ing kakukutambulap?” Mwawiy, Nzamb wela kwitiyij anch Kain amusejin ching anch ndiy wakarumuka chakwel kusal yom yiwamp. (Disambishil 4:7-12) Chawiy, kudiosh kamu kwisambishin kwa rusangu ra muntu, usey wa kumusejin Nzamb kusutil ku ritiy ni ku kusal yom yiwamp aukasikeshina.

4. Chom ik tufanyidina kujingunin piur pa kumusejin Nzamb?

⁴ Kwitiyij mwikadil wetu wa chitil kudi kwa usey anch tusotil kumusejin Nzamb. Antu awonsu adi akayitil, ni chitil chidi chikangesh chijim ku kumusejin Nzamb. Muprofet Yeremiy wafunda piur pa Isarel anch: “Twasadil kal chitil . . . Madj ma ujim wey makangeshin kulembil kwetu.” (Kudil kwa Jeremiy 3:42, 44) Ap mwamu, mu rusangu rawonsu ra muntu, Nzamb wimekesha amwinend anch udi tayad kwitiyij malembil ma antu amusejidina mu ritiy ni muchim utok, alamina yijil yend. (Kuseng 119:145) Anany adinga amwing a antu inay, ni chom ik tukutwisha kwilejin ku malembil mau?

5, 6. Chom ik tukutwisha kwilejin ku mutapu wasejay Aburaham kudiay Nzamb?

⁵ Umwing wa antu inay wadinga Aburaham. Nzamb wamwitiyija pamusejinay, mulong Nzamb wamutazuka Aburaham anch “murund nam.” (Isay 41:8) Chom ik tukutwisha kwilej kusutil ku mutapu wamusejinay Nzamb? Nshakur winou mwin ritiy wamwita Yehova amwinkisha nswan, ndiy walonda anch: “Yom ik ukeza kwinginkish am?” (Disambishil 15:2, 3; 17:18) Dichuku dikwau, walondina pa milong yend amwinend piur pa nany ukeza kupand pakezay Nzamb kulet dirumburish diend padi antu ayimp adinga mu Sodom ni Gomora. (Disambishil 18:23-33) Aburaham walembila kand mulong wa antu akwau. (Disambishil 20:7, 17) Ni mud mu chilakej cha Abel, Aburaham wamusejina Nzamb Yehova pa chisu chamulambulay.—Disambishil 22:9-14.

⁶ Mu yilakej yiney yawonsu, Aburaham wiyova anch udi nich want ipend wa kwisamb ni Yehova. Pakwez, want ipend winou wa kulond wadinga nich chitongijok cha kwishikumwish kwa mwikadil wend kurutu kwa Sakatang wend. Shinshikinany mazu mend ma kalimish, madia mu Disambishil 18:27: “Namanang kal muten wa kulond kudi Mwant wam, am nidi kwam rufunfut ni maut.” Mwikadil wa manangu uwamp mudi ik wa kwimburij!

7. Anshakur amuleja Yehova yom ik mu malembil?

⁷ Anshakur akwau alembila piur pa milong kushalijan, ni Yehova wayitesha kamu. Yakob walembila mu mutapu wa kuchip machip. Kupwa kwa kwit ukwash wa Nzamb, washilamu nich machip anch: “Yom yawonsu yiukeza kwinginkish am, nikez kupan kudi ey chadikum cham.” (Disambishil 28:20-22) Kupwa, padingay piswimp ni kusankanijan ni yayend, Yakob wamulembila Yehova chakwel amulama, walond anch: “Ez winkamunina mu makas ma mwanamakwam Esau, mulong nimwovil ndiy wom.” (Disambishil 32:9-12) Nshakur Yob wamusejina Yehova mulong wa dijuku diend, walambula milambu mulong wa dijuku diend. Kupwa, pasalau arund nend asatu chitil mu kulond kwau, Yob walembila mulong wa awiy, ni Yehova “witiya kulembil kwa [Yob].” (Yob 1:5; 42:7-9) Jinsangu jinej jitukwashin kujingunin milong yitufanyidina kumulej Yehova mu malembil. Tumen kand anch Yehova udi tayad kwitiyij malembil ma antu akata kumusejin mu mutapu uwamp.

Mutapu Wamusejinau Yehova pa Chirung cha Manswik ma Chijil

8. Mu manswik ma Chijil, mutapu ik wamulejangau Yehova milong ya antu?

⁸ Kwinyim kwa Yehova kukol muchid wa in Isarel kudiokal mu Idjibit, wayinkisha manswik ma Chijil. Chijil chatenchika mutapu wa kumusejin Nzamb kusutil kudi in kupesh atondau. In Levi amwing ayita kusal mudimu wa win kupesh mulong wa antu. Piyalanka milong yikash ya muchid, ntimesh wa antu—yisu yimwing wadinga mwant ap muprofet—wamulejanga Nzamb mulong kusutil mu malembil. (1 Samwel 8:21, 22; 14:36-41; Yeremiy 42:1-3) Chilakej, pa chisu cha kushikij tempel, Mwant Salomon wamusejina Yehova mu malembil madiokila ku muchim. Ni Yehova niyend, watesha malembil ma Salomon ni wizwisha tempel nich uyaj Wend ni kulond anch: “Matu mam makutesh kulembil kukulembidilau mwi ndond yiney.”—2 Jinsangu 6:12–7:3, 15.

9. Chom ik chitau chakwel kumusejin nawamp Yehova mu tempel?

⁹ Mu Chijil chamwinkishau Isarel, Yehova watekamu chitinay mulong wa kusejin mu mutapu witiyijinay mu tempel. Chadinga chom ik? Pamanch pawonsu ni urel wawonsu, kuwejin ku mulambu wa yakupesh ya annam, mwin kupesh mujim amwita kwosh mananash ma madjimb mawamp kurutu kwa Yehova. Kupwa, in kupesh asadila mwishin mwa mwin kupesh mujim asala mudimu winou, kudioshaku Dichuku dia Kuchakwish. Anch in kupesh alik kupan kalimish kinak, Yehova kadingap ni kusanger mujikit wau.—Kubudik 30:7, 8; 2 Jinsangu 13:11.

10, 11. Uman ik tukweta ulejena anch Yehova witiyija malembil ma muntu ni muntu ipend?

¹⁰ Mu Isarel wa pasak, ov, chadinga anch chifanyidin kumusejin Nzamb ching kusutil kudiau antimesh end? Bwat, Bibil ulejen anch Yehova wasangera kutesh malembil ma muntu ni muntu ipend. Mu malembil ma Salomon ma kushikij tempel, ndiy wamwita Yehova, walond anch: “Chad anch muntu umwing, ap antwey awonsu in Isarel alembil, ni kwit, . . . ni kutandjek makas mend ku chikumbu chinech, chad ey ushicha mwiur, mutesha.” (2 Jinsangu 6:29, 30) Rusangu rafunday Luka ritulejin anch pa chisu chadinga Zakariy, tatukwend a Yohan Mubabatish, ni kwosh diseng dia mananash mu tempel, kwadinga chisak cha antu akad kwikal in kupesh adinga ni “kulembil pol.” Chimeken anch, chadinga chaku cha antu kukumangan pol pa tempel mu kulembil padingau ni kwosh diseng dia mananash kurutu kwa Yehova pa chintamb cha or.—Luka 1:8-10.

¹¹ Chawiy, padingau ni kumusejin Yehova mu mutapu uwamp, wasangara kutesh yom yawonsu yasotau antu adinga antimesh a muchid wawonsu ni ya antu umwing ni umwing asota kumusejin Yehova ayinau. Pakwez, ilel tudiap kand mwishin mwa manswik ma Chijil. Ap mwamu, tukutwish twilej malejan mamwing ma usey nakash piur pa malembil mu mutapu wadingau in Isarel ni kumusejin Nzamb.

Pa Chirung cha Ditenchik dia Ukristu

12. Ditenchik ik didiaku chakwel in Kristu atwisha kumusejin Yehova?

¹² Katat tudi mu ditenchik dia Ukristu. Kwikiling kand tempel mukutwishau in kupesh kwikal antimesh a antu awonsu a Nzamb ap ku tukutwisha kukarumukin pitukata kulembil kudi Nzamb. Ap mwamu, Yehova wasala kal ditenchik dikwau mulong wetwetu kumusejin. Ditenchik ik dined? Pamuzizilau Kristu many mu muvu wa 29 pa chirung chetu ni kumutond mudi Mwin Kupesh Mujim, tempel wa muspiritu wasambisha kusal.a Tempel winou wa muspiritu wadinga ditenchik disu mulong wa kumusejin Yehova mu kumwifukwil pa dishin dia mulambu wa kuchakwish wapanay Yesu Kristu.—Hebreu 9:11, 12.

13. Jimbul yom yifanikena pakach pa tempel wadinga mu Yerusalem ni tempel wa muspiritu piur pa malembil.

¹³ Yom yivud ya tempel wadinga mu Yerusalem yafanikesha kamu nawamp yitenchik ya tempel wa muspiritu, pamwing ni yikwatina ku malembil. (Hebreu 9:1-10) Chilakej, diseng diadingau ni kwoshin pa chintamb cha diseng pamanch ni urel mu kapalakany Katumbila ka tempel, difanikeshin ik? Kukwatijan ni buku wa Kuburik, “mananash, yawiy kamu kulembil kwa antu a Nzamb.” (Kuburik 5:8; 8:3, 4) Spiritu wa Nzamb wamubachika David kufund anch: “Lik kulembil kwam kushik kudi Ey mudi mananash ma res ruwamp.” (Kuseng 141:2) Chawiy, mu ditenchik dia Ukristu mananash ma res ruwamp mafanikeshin malembil mitiyikina ni kumushiman Yehova.—1 Tesalonika 3:10; 1 Pita 2:20, 21.

14, 15. Chom ik tukutwisha kulond piur pa kumusejin Yehova kudi in Kristu (a) azizidilau many? (b) “amikoku akwau”?

¹⁴ Ov, nany kusu ufanyidina kumusejin Nzamb mu tempel winou wa muspiritu? Mu tempel wadinga umekena ni mes, in kupesh ni in Levi itapila dilau dia kusadil mu dibur dia mukach, pakwez ching in kupesh awiy adinga ni kwandam mwi ndond Yitumbila. In Kristu azizidilau many akweta ruchingej ra kuya mwiur itapidil dilau dimwing dia pakampwil dia muspiritu diafanikeshau nich dibur dia mukach ni ndond Yitumbila, kwawiy kuyitwishishina kumulembil ni kumushiman Nzamb.

¹⁵ Ov, chidi nchik ku mutambu wa antu akweta ruchingej ra kushakam pansh, “amikoku akwau”? (Yohan 10:16) Muprofet Isay walejana anch antu a michid yivud akez kwez kumwifukwil Yehova “mu chikunku cha nsudiel cha machuku.” (Isay 2:2, 3, NW) Wafunda kand anch “angez” akez kibomb ayinau ni Yehova. Chakwel kumekesh anch udi tayad kuyitiyij anch amusejina, Nzamb walonda anch: “Nikez kakwinkishany musangar mu chikumbu cham cha kulembidil.” (Isay 56:6, 7) Kuburik 7:9-15 utulejin jinsangu jikwau, wisambidin “chisak chipandiken kujimb” chidiokila mu “michid yawonsu” chibombakena pamwing mulong wa kumwifukwil ni kumulembil Nzamb “muten ni uchuku” chiminya mu dibur dia pol dia tempel wa muspiritu. Chidi chitongijok chongojina mud ik anch atushalapol a Nzamb ilel awonsu akutwish kumusejin Nzamb ni want ipau ni ruchingej rikash anch ndiy ukat kuyitesh!

Malembil ik Mitiyinau?

16. Chom ik tukutwisha kwilejin ku malembil ma in Kristu a kusambish?

¹⁶ In Kristu a kusambish adinga antu in kulembil nakash. Adinga ni kulembil mulong wa yom ik? Amakurump in Kristu adinga ni kwit umutakel pa kuyitond amakundj akusenda yisend ya mu dirijek. (Midimu 1:24, 25; 6:5, 6) Epafras walembila mulong wa ambay nend akaritiy. (Kolosai 4:12) Yid ya chikumangen yadinga mu Yerusalem yalembila mulong wa Pita pamutekau mu rukan. (Midimu 12:5) In Kristu a kusambish amwita Nzamb kuyinkish kujijaman mulong wa rupompat, palondau anch: “[Yehova] tal pa kupup kwau, iyinkisha atushalapol ey mwakulondil dizu diey nich kujijaman kwawonsu.” (Midimu 4:23-30) Mwin kwilej Yakob wayikasikesha in Kristu kumulembil Nzamb chakwel ayinkisha manangu pa chisu chikwikalau mu choziu. (Yakob 1:5) Ov, ukat kutek milong yiney mu yom yawonsu yiukata kumwit Yehova?

17. Nzamb ukat kwitiyij malembil ma nany?

¹⁷ Nzamb kakatap kwitiyij malembil min mawonsu? Chad, mutapu ik lel tukutwisha kulembil chakwel kwikal nich kashinsh anch malembil metu mitiyikin? Antu ashinshamena ateshau pasak kudi Nzamb, amusejina nich win yakin ni muchim utok. Amekesha kand ritiy kusutil ku midimu yau yiwamp. Tukutwish kwikal nich kashinsh anch Yehova ukuyitesh antu amusejidina mu mutapu winou ilel.

18. Chakwel anch malembil mau mitiyika, chom ik chifanyidinau kusal in Kristu?

¹⁸ Kudi chom chikwau chiyitinau in Kristu. Kambuy Paul warumburila chom chinech, palonday anch: “Mwi ndiy etu twikodidil kal mu Spiritu ou umwing kudi Tatuku.” Nany wading wisambidinay Paul pafunday anch, “mwi ndiy”? Wading umwisambidin Yesu Kristu. (Efesus 2:13, 18) Mwawiy, tukutwish kwikal nich want ipetu wa kumusejin Tatuku ching kusu kusutil kudi Yesu.—Yohan 14:6; 15:16; 16:23, 24.

19. (a) Mulambu wa mananash wikala mudi kufut kuyimp kudi Yehova chisu ik? (b) Mutapu ik tukutwisha kwikal nich kashinsh anch malembil metu madi mudi res riwamp ra mananash kudi Yehova?

¹⁹ Mud mutwisambina kal, mananash madingau ni kwosh in kupesh in Isarel mafanikesha malembil mitiyikina ma atushalapol ashinshamena a Nzamb. Pakwez, pa yisu yimwing, Yehova wadinga ni kukis mananash mapeshau in Isarel. Mwamu chadinga pa chisu chadingau in Isarel ni kwosh mananash mu tempel ni pa chisu chawiy chimwing kuyasin akish manungun. (Ezekiel 8:10, 11) Chilik chimwing ilel, malembil ma antu afilinga mu kan anch tumusadidil Yehova pakwez pa chisu chawiy chimwing kand akat kusal yom yilikishinau mu yijil yend akwikal mudi kufut kuyimp kudi ndiy. (Jinswir 15:8) Tudandamenany kutokish mwom wetu wawonsu chakwel anch malembil metu mikal mudi res riwamp ra mananash kud Nzamb. Yehova ukat kusanger malembil ma antu alondwila jinjil jend jitentamina. (Yohan 9:31) Pakwez, kudi yom yimwing yishadilaku. Mutapu ik tufanyidina kulembil? Tufanyidin kulembil mulong wa yom ik? Ni mutapu ik wakwilingay Nzamb ku malembil metu? Mutu wa mulong wambakedinap ukwakul ku yipul yiney ni yikwau.

[Mazu madia kwishin kwa paj]

Ov, Ukutwish Kurumburil?

• Mutapu ik ukutwishau antu akayitil kumusejin Nzamb mu mutapu witiyikina?

• Mu malembil metu, mutapu ik tukutwisha kuyimburij ashankur?

• Chom ik wilejidina ku malembil ma in Kristu a kusambish?

• Chisu ik chidinga malembil metu mudi res riwamp ra mananash kudi Nzamb?

[Chipich pa paj wa 23]

Ov, mulong wak Nzamb witiyija mulambu wa Abel, ni kulik wa Kain?

[Chipich pa paj wa 25]

“Am nidi kwam rufunfut ni maut”

[Chipich pa paj wa 25]

“Nikez kupan kudi ey chadikum cham”

[Chipich pa paj wa 26]

Ov, malembil mey madi mudi res riwamp ra mananash kudi Yehova?