‘Mwijikishany Nzamb Yom Yawonsu Yiusotilany’
“Lembilany mu yom yawonsu, ni kujikitish ni kumwijikish Nzamb yom yawonsu yiusotilany.”—FILIPOI 4:6.
1. Tukwet dilau dia kwisamb ni nany, ni mulong wak chishimokishin?
ANCH wit chakwel wisamba ni nyikel wa ngand yen, chakul ik chikukwinkishau? Antu akatay kusal nend akutwish kukwakul nich kalimish, pakwez chikutwish chakasikan kukwinkish mbil ya kwisamb ni nyikel amwinend. Pakwez, chishalijadin ku mutambu wa Nyikel mujim uyipandikenamu awonsu, Yehova Nzamb, Mukaleng wa mangand. Tukutwish kumusejin pa ndond yin yawonsu yitudia ni pa chisu chin chawonsu tusotila. Malembil mitiyikina makushik ching kud ndiy. (Jinswir 15:29) Chakin kamu chidi chom chiwamp nakash! Ov, kujikitish mulong wa dilau dined kutubachikinap kumulembil chisu chawonsu Muntu ujimbwilau chakin kamu anch “ukat kutesh kulembil”?—Kuseng 65:2.
2. Chom ik chidia cha usey chakwel anch Nzamb itiyij malembil?
2 Pakwez, muntu kanang ukutwih wipul anch, ‘malembil ik makatay kutesh Nzamb?’ Bibil urumburil chom chimwing chidia cha usey chakwel anch malembil mitiyika pa chisu chimalondilau: “[P]akad ritiy muntu kakutwishap kumusangarish Nzamb, mulong muntu mwawonsu ukuseja piswimp kudi Nzamb ufanyidin kwitiy anch, Nzamb udiaku, ndiy ukat kufutan kuwap kudi antu awonsu akata kumusurab.” (Hebreu 11:6, MM) Mud mwachirumburilangau mu mutu wa mulong wasambelang ou, chom cha usey mu kumusejin Nzamb chidi ritiy. Nzamb udi tayad kwitiyij malembil ma antu akata kumusejin, pakwez mwamu mufanyidinau kusal mu ritiy ni midimu yiwamp pamwing ni win yakin ni muchim utok.
3. (a) Mud muchamekana mu malembil ma atushalapol ashinshamena a pakur, mazu ma mutapu ik mafanyidina kwikal mu malembil metu? (b) Malembil metu makutwish kwikal ma milad ik?
3 Kambuy Paul wayikasikesha in Kristu a pa chirung chend anch: “Kangal wanenganany; pakwez lembilany mu yom yawonsu, ni kujikitish ni kumwijikish Nzamb yom yawonsu yiusotilany.” (Filipoi 4:6, 7) Mu Bibil mudi yilakej yivud ya antu amwijikisha Nzamb yom yadinga yisotilau mu malembil. Mu antu inay mudi Hana, Elija, Ezekias, ni Daniel. (1 Samwel 2:1-10; 1 Ant 18:36, 37; 2 Ant 19:15-19; Daniel 9:3-21) Tufanyidin kulondul chilakej chau. Shinshikin kand anch, mazu ma Paul malejen anch malembil metu makutwish kwikal ma milad kushalijan. Ndiy wajimbula kujikitish, mawiy, madi malembil matukata kumujikitish Nzamb mulong wa yom yitusadidilay. Kujikitish kwinoku kukwikal nich kushiman. Kulembil kwisambidin kwit kwa kashinsh, kwa kwitudish. Ni tukutwish kwijikish yom yawonsu yitusotila, ap kwit chom kanang. (Luka 11:2, 3) Tatukwetu wa mwiur usangaredin anch etu twambamba nend mu jinjil jinej jawonsu.
4. Ap anch Yehova wijing maswir metu, ov, mulong wak tufanyidina kumwitam mu malembil?
4 Antu amwing akutwish kwipul anch, ‘Ov, Yehova kijingap kurutu kwa chisu maswir metu mawonsu?’ Inge, wijing. (Mateu 6:8, 32) Ov, mulong wak lel, usotilingay anch twisamba nend mu malembil? Tal bil chilakej chinech: Mwin makashing ukutwish kuyinkish antu akata kumuland yom chipan kanang. Pakwez, pakwel anch achitambula, in kuland afanyidin kwez kudiay mwin makashing ni kumwitach. Antu akulika kusal usu wa kumwit akumekesh chakin kamu anch kachisangeridinap kwau. Chawiy chimwing, kupipesh kwit kwetu mu malembil kukutwish kumekesh kuburen kwa kujikitish mulong wa yom yipaninay Yehova. Yesu walonda anch: “Itany, ukez kutambulany.” (Yohan 16:24) Mu mutapu winou, tumekeshin anch tumuchingejin Nzamb.
Mutapu ik Tufanyidina Kwambamb ni Nzamb?
5. Ov, mulong wak tuswiridin kulembil mu dijin dia Yesu?
5 Yehova katekinap yany yivud yikash-yikash pa mutapu tufanyidina kulembil. Ap mwamu, tufanyidin kwilej mutapu uwamp wa kwambamb ni Nzamb, urumburilau mu Bibil. Chilakej, Yesu wayileja in kwilej end anch: “Anch en wez witany chom kudi Tatuku, ndiy ukez kakwinkishanyich mu dijin diam.” (Yohan 16:23) Chawiy lel, tufanyidin kulembil mu dijin dia Yesu, kumwitiyij Yesu mudi yawiy njil yimwing yikutwishinau antu awonsu kutambul yiyukish ya Nzamb.
6. Mwikadil ik tufanyidina kukwat, pitulembidila?
6 Ov, tufanyidin kwiman, kushakam, kulal, kwas manungun . . . pitukata kulembil? Kwikil mwikadil wa pakampwil wisambidinau mu Bibil chakwel anch malembil metu amitiy. (1 Ant 8:22; Nehemi 8:6; Mako 11:25; Luka 22:41) Chidia cha usey chidi kumulembil Nzamb mu win yakin ni muchim utok.—Yowel 2:12, 13.
7. (a) Dizu “amen” dirumburikin ik? (b) Mutapu ik uwamp ukatau kudisadil mu malembil?
7 Ov, chirumburikin ik kulond anch “amen” mu malembil metu? Bibil ulejen anch wawiy mutapu uwamp nakash wa kupwish malembil metu, pakampwil pitukata kulembil mulong wa antu avud. (Kuseng 72:19; 89:52) Dizu dia Hebreu ʼa·menʹ dirumburikin cha kusambish anch “mwawiy kamu.” McClintock ni Strong’s Cyclopedia urumburil anch kurumburik kwa kulond anch “Amen” kwisudiel kwa malembil kudi “kukasikeshin mazu masambelang, ni kuletin chitongijok cha kuwanyin kwa mazu minam.” Chawiy, kusutil ku kupwish nich “Amen” wakin, muntu ulembidila umekeshin yovil yend ya kashinsh piur pa yom yalonday kal. Anch mwin Kristu ulembidila mulong wa chikumangen chawonsu wapwishin nich kulond anch “Amen”, in kutesh niyawiy akutwish kwakul anch “Amen” mu michim yau ap ni dizu diovikena mulong wa kumekesh nakash kwitiyij kwau kwa yom yalondau kal.—1 Korint 14:16.
8. Malembil metu makutwish kufanikan mutapu ik ni malembil ma Yakob ap ma Aburaham, ni chom chinech chikumekesh ik ku mutambu wetu?
8 Kudi yisu yikatay Nzamb kutulikin chisu cha kumekesh nakash kubangin kwetu piur pa yom yitulembidila. Tufanyidin kwikal mud Yakob wa pakur, wara tutaku uchuku wawonsu ni mwangel chakwel amuyukish. (Disambishil 32:24-26) Ap ngikadil yimwing yikutwish kwit anch twikala mud Aburaham, wamwilembila Yehova tupamp tuvud mulong wa Lot ni mulong wa muntu win mwawonsu utentamina wadinga mu Sodom. (Disambishil 18:22-33) Chawiy chimwing tufanyidina kumulembil Yehova piur pa yom yidia ya usey kud etu, kumulembil mulong wa kutentam kwend, rukat rend, ni ranaken rend.
Chom ik Tukutwisha Kwit?
9. Yom ik yitufanyidina kubangin cha kusambish mu malembil metu?
9 Vurik yalonday Paul: “Lembilany mu yom yawonsu . . . ni kumwijikish Nzamb yom yawonsu yiusotilany.” (Filipoi 4:6) Chawiy lel, mu malembil ma muntu ipend mukutwish kwikal yom yawonsu ya mwom. Pakwez, chom cha kusambish kubangin mu malembil metu chifanyidin kwikal yisakin ya Yehova. Daniel watushila chilakej chiwamp pa mulong winou. Payipupau in Isarel mulong wa yitil yau, Daniel wamwilembila Yehova mulong ayovil riy, palonday anch: “Kangal walabish, chakwel antu awonsu ijika anch yey Nzamb! Musumb winou ni antu inay adi eyey.” (Daniel 9:15-19) Ov, malembil metu ni mawiy mafanyidin kulejan anch kutumb kwa dijin dia Yehova ni kusadik kwa rusot rend yawiy yitubangidina cha kusambish?
10. Ov, mutapu ik twija anch chiwapidil kulembil piur pa milong ya muntu ipend?
10 Ap mwamu, chiwapidil kulembil piur pa milong yetu ayinetu. Chilakej, mud nfund-a-kuseng, tukutwish kulembil mulong wa kwak chovu cha muspiritu chikurikina. Walonda anch: “Nginka ronganyin, chawiy nikulam yijil yey, nikuyisadil ni muchim wam wawonsu.” (Kuseng 119:33, 34; Kolosai 1:9, 10) Yesu “wapana kulembil ni kujikitish, ni kudil kukash ni mansoj ku mes, kudiay ndiy ukwet usu wa kumupandish ku rufu.” (Hebreu 5:7) Pasalay mwamu, wamekesha anch chiwapidil nakash kukimb usu piturishina nich yak ap yoziu. Payilejay in kwilej end malembil ma sampul, Yesu watekamu milong ya muntu ipend, mud kulikishin kurumbuk ni kutan yakudia ya pichuku-pichuku.
11. Malembil makutwish kutukangesh nchik kuwil mu yoziu?
11 Mu malembil minam ma sampul, Yesu wita anch: “Kangal watutwal ku yoziu, pakwez tukol ku kuyip.” (Mateu 6:9-13) Kupwa waleta chiyul chinech: “Lamany ni kulembil, chakwel kangal wandamany mu yoziu.” (Mateu 26:41) Malembil madi ma usey piturishina nich yoziu. Tukutwish kupakish kuvuramen yijil ya Bibil pa ndond ya mudimu ap ku shikol. Antu akad kwikal Atuman akutwish atuladikij kwinung nau mu mijikit yakad kwitiyik kud in Kristu. Akutwish atwit kusal chom chijirila yijil yitentamina. Pa yisu yiney, tukusal nawamp anch twalondul chiyul cha Yesu cha kulembil—kurutu kwa chisu ni pa chisu turishina chakin nich choziu—kumwit Nzamb chakwel kangal atulika tuwila mu choziu.
12. Misul ik ya yakamish yikutwisha kutushikij ku kulembil, ni yom ik tufanyidina kumuchingejin Yehova?
12 Yipwichik ni yakamish kushalijan yikat kulank mu mwom wa atushalapol a Nzamb ilel unou. Mayej ni minan ya mu manangu yidi misul yijim ya yakamish ya antu avud. Ngikadil ya chisum yitwombilamu yisadil anch mwom wikala wa mar nakash. Kukasikan kwa kuman nfalang kusadil anch chikasikana kukumangej yom yikwatikeshina mwom. Chongojin mud ik kwijik anch Yehova ukat kuyitesh atushalapol end akata kumutudil milong yau! Kuseng 102:17 ulondil piur pa Yehova anch: “Ukutesh kand kulembil kwa antany, kakudiurilip kulembil kwau.”
13. (a) Yom ik yifanyidinay muntu kutek mu malembil mend amwinend? (b) Shimunin chilakej cha malembil minam.
13 Chakin, mulong win wawonsu ukwatina ku mujikit wetu tumusadidila Yehova ap ku urund wetu ni ndiy ukutwish kwikal ufanyidina kutek mu malembil. (1 Yohan 5:14) Anch uswiridin kukwat mipak piur pa uruw ap pa mudimu ap piur pa kutanduril mujikit wey, ikal ni want ipey wa kumulej Nzamb, mwita umutakel wend. Chilakej, changadim umwing wa mu Philippines, wasota kusal mujikit wa chisu chawonsu. Pakwez, kadingap ni mudimu wa kwikwash nich. Ulondil anch: “Dichuku dimwing Diampos, namulembila Yehova pakampwil piur pa kusal mudimu wa uchibol. Urel wa dichuku didia kamu, padingay mu mudimu wa kulejan, wamwinkisha changadim umwing buku. Pakad kuchingejin, changadim walonda anch: ‘Diakaj kamu pamanch ufanyidin kuya ku shikol yam kurutu kwa kusal chom chin chawonsu.’ Namwipula anch, ‘Kusal ik?’ Wanleja anch kudi ndond ya mudimu yiburedina muntu yitina anch pikala muntu swa. Naya, ni angandjika kapamp kamwing pa mudimu. Yom yiney yawonsu yasadika swa.” Atuman avud mu mangand omu amana kal yom mud yiney. Chawiy lel, kangal widjidjek kumulej Nzamb yom yawonsu yidia mu muchim wey mu malembil!
Chikwikal Nchik Anch Twasadil Chitil?
14, 15. (a) Ov, mulong wak muntu kafanyidinap kulik kulembil anch wasadil chitil? (b) Kuwejin pa malembil, chom ik chikwau chikumukwasha muntu alanka kudiokal ku yitil yend?
14 Malembil makumukwash nchik muntu wasadila chitil? Mulong wa usany, antu amwing asala yitil alika kulembil. Chidiap cha manangu kusal mwamu. Chilakej: In kwendish kajil wa yikung ijing anch, anch ashadik, chiyifanyidin kwisamb ni in kushinshikin kajil wa yikung uyila chakwel ayikwasha. Ov, chikwikal nchik, anch mwin kwendish kajil wa yikung ushadikina widjidjek kwisamb nau in kushinshikin kajil wa yikung kuyilay mulong anch wovil usany wa kulond anch washadikang kal? Chikutwish kumushikij ku kujiy! Chawiy chimwing, muntu wasadila chitil wovila usany wa kumulembil Nzamb ukutwish wawil mu yak yikwau. Usany wa yitil kiufanyidinap kumukangesh muntu kwambamb ni Yehova. Chakin kamu, Nzamb uyitin antu asala uyimp ujim kumulembil. Muprofet Isay wayikasikesha in kusal yitil a pa chirung chend kukarumukin kud Yehova mulong ndiy “ukuyilikishin swa.” (Isay 55:6, 7) Mwawiy, muntu ukutwish wasot ‘kutudish mpal ya Yehova’ cha kusambish anch watudish muchim wend amwinend, walik kusal yitil, ni wakarumuk chakin.—Kuseng 119:58; Daniel 9:13.
15 Pikudia chitil, malembil mading ma usey ujim mulong wa diyingish dikwau. Kambuy Yakob walonda piur pa muntu usotina ukwash wa muspiritu anch: “Lik ayitazuk amakurump a chikumbu cha Nzamb, awiy alembil padiay ndiy, . . . ni Mwant ukez kamulangwish ndiy.” (Yakob 5:14, 15) Mwaning, chimufanyidin muntu amwinend kwit dilikishin dia yitil yend kud Yehova mu malembil, pakwez ukutwish kand kuyit amakurump alembila mulong wendendiy. Chawiy chikeza kumukwash kulank muspiritu.
Yakul ku Malembil
16, 17. (a) Mutapu ik wakwilingay Yehova ku malembil? (b) Uman ik ulejena anch malembil ni mudimu wa kulejan yiyiling pamwing?
16 Mutapu ik wakwilingau malembil? Mamwing akat kumakul swa ni mu mutapu umekena. (2 Ant 20:1-6) Makwau makat kulabaku, ni yakul yidi yikash kuyijingunin. Mud mwachilejanay Yesu mu chilakej chend cha mwadia-mufu wadinga ni kuya chisu ni chisu kud nkalansambu, kulembil chisu chawonsu kukutwish kwikal kwa usey. (Luka 18:1-8) Pakwez, tufanyidin kwikal nich kashinsh anch, anch twalembil kukwatijan nich rusot ra Nzamb, Yehova kakezap kutwel anch: “Kangal wanswidiosh!”—Luka 11:5-9, MM.
17 Antu a Yehova akwet uman uvud wa mutapu wayakulau ku malembil mau. Chom chinech chikat kumekanang nakash mu mujikit wetu wa patok. Chilakej, anambaz aad in Kristu a mu Philippines adinga ni kwangan mikand yengamidina pa Bibil mu teritwar wa kulemp mwi ngand yau. Pamwinkishau mband umwing trakt, wasangara chipandakena. Walond anch: “Uchuku nadi kamu ni kumwilembil Nzamb chakwel antumina muntu wa kwilej nend Bibil, ni nimen anch chinech chawiy chakul ku malembil mam.” Kupwa kwa chisu kanang, mband wasambisha kuya ku yikumangan ku Chot cha Want. Mwi ndond yikwau ya Aziy wa Kurul ni Kwingangel, mukadivar mwin Kristu wadinga wovil wom wa kulejan ku chikumbu chimwing chijim chadinga chilaminau nakash. Pakwez, wamulembila Yehova, wikasikesha, ni wandama ku chikumbu chinech. Wakokala ku chis cha chikumbu chimwing, ni changadim umwing wabudika. Chisu charumburilay mukadivar diyingish dia kwez kwend, changadim wasambisha kudil. Walonda anch wadi uyikimbin Atuman a Yehova ni walembilang ni kwit ukwash mulong wa kuyiman. Nich musangar mukadivar wamukwasha chakwel inunga pamwing ni chikumangen cha Atuman a Yehova chidia piswimp.
18. (a) Anch akul malembil metu, mutapu ik tufanyidina kusal? (b) Tufanyidin kwikal ni kashinsh ka chom ik anch tukat kulembil pa chisu chin chawonsu?
18 Chakin kamu malembil madi ditenchik dishimokishina. Yehova udi tayad kumatesh ni kumakul. (Isay 30:18, 19) Chikwau kand, tufanyidin kushinshikin mutapu wakwilay Yehova ku malembil metu. Chisu chivud chikutwishap kwikal kamu mu mutapu tuchingejina. Chawiy, anch tusotil umutakel wend, kitufanyidinap kuvuramen kumujikitish ni kumushiman. (1 Tesalonika 5:18) Chikwau kand, vurikany chisu chawonsu chiyul cha kambuy Paul: “Pakwez lembilany mu yom yawonsu, ni kujikitish ni kumwijikish Nzamb yom yawonsu yiusotilany.” Mwawiy, isakina chisu chin chawonsu chakwel wambamba ni Nzamb. Mwi njil yiney, ukez kudandamen kuman kuwanyin kwa yom yalonday Paul piur pa antu akatau kwakul ku malembil mau anch: “Chisambu cha Nzamb chisutila ronganyin rawonsu chikwez kulam michim yen ni yitongijok yen.”—Filipoi 4:6, 7.
Ov, Ukutwish Kwakul?
• Malembil metu makutwish kwikal ma milad ik?
• Mutapu ik tufanyidina kulembil?
• Yom ik tukutwisha kutek mu malembil metu?
• Malembil makwet usey ik anch muntu wasal chitil?
[Chipich pa paj wa 29]
Malembil madiokila ku muchim makat kutukwash kwipuk kuwil mu yoziu
[Chipich pa paj wa 31]
Kusutil ku malembil, kwawiy tukata kumulejin Nzamb kujikitish kwetu, milong yetu, ni yawonsu yitusotila