“Nakutesh kal Mulong wa Mwan ou wa Mivu Chidivu”

PA CHISU chadingau ni kwez Atuman a Yehova kwol kwend, Wiesława, ushiching kurul kwa Pologne, wadinga ni kuyijikitish ni kalimish ni kupwa walik kwisamb nau. Chawiy, dichuku dimwing, Samuel udia ni mivu chidivu weza ni makwend kwenday Wiesława. Kapamp kinak Wiesława witiyija kutesh uruu ni watambula gazet umwing wading wisambidina paradis wa pansh.

Muchadinga Chivurikish cha rufu ra Yesu Kristu piswimp, Samuel wamuladikija Wiesława ku chinship chinech cha pakampwil. Chawiy, pamwing ni makwend, mwan ikundj winou waya kand ni kumutal, kapamp kinak nich dipaper dia diladikij. Pamanay anch mwan ikundj wadinga udjit nawamp, Wiesława wayela anch nchingelanyaku pakemp ni wachirik mu chikumbu wadjal niyend nawamp. Pabudikay, wamutesha Samuel, witiyija diladikij, ni wipula anch: “Ov, nifanyidin kwez amwinam bil anch ni nfumwam?” Kupwa wawejinaku kand anch: “Ap anch nfumwam kezinap, am nikwez. Nikwez mulong weyey, Samuel.” Mulong wa musangar wa Samuel, Wiesława wasala yalonday.

Pa chisu cha diskur dia Chivurikish, Samuel washakama pamwing ni Wiesława ni wamuleja maverse madingau ni kwisambin. Chom chinech chamushimokisha nakash. Wasangera Chivurikish ni wasangera yitongijok yikurikina yarumburilau mu mazu maswapela kutesh. Wasangara kand mutapu wamwakau ni chisambu ni rukat ramekesha mu chikumangen. Kudiosh pinipa kamu, Wiesława wasangara nakash mulong wa yom ya muspiritu ni wasambisha kubombakan nau Atuman a Yehova pakad kujing. Walondil katat ak anch: “Novil usany mulong kwisambishil nalikanga kukuteshany pawadinganya ni kwez kwol kwam. Ni katat nij anch natesha uruu wen mulong wa mwan ikundj winou wa mivu chidivu, Samuel.”

Mud Samuel udia mu Pologne, ansand avud Atuman a Yehova akat kumushiman Nzamb ku kulond, ku kudjal kwau kuwamp ni ku chaku chau chiwamp. Anch udi nsand, niyey ukutwish kuyikwash antu akweta michim yitok kusanger usey ujim wa yom ya muspiritu.