Ukutwish Kushakam Chikupu

ANTU avud in ritiy adia mu mangand ma marelijon akatin ruchingej ra mwom wa chikupu mu mutapu umwing ap ukwau. Pakwez kudi tuyom tukemp-tukemp tushalijadina pakach pa relijon ni relijon, pakwez ruchingej ridi rawiy rimwing—kushakam mu mwikadil umwing wa musangar wakad rufu. Pamwing ap chawiy usotina niyey? Ov, mutapu ik ukutwishau kurumburil kuyip kwa yitiyij yiney? Ov, ruchingej ra mwom wa chikupu kirikezap kuwanyin?

Bibil ulejen anch Sakatang wateka impu ya mwom wa chikupu mu muchim wa muntu kudiosh kamu kwisambishil, kudiosh kamu pa chisu chayitangay antu aad a kusambish. Bibil ulondil anch: “[Nzamb] wateka mivu ni minang mu muchim wau.”—Mulej 3:11, Les Saintes Écritures — Traduction du monde nouveau.

Pakwez, chakwel anch awanyisha impu yiney ya kushakam chikupu, chayifanyina antu aad a kusambish kwitiyij ulabu wa Nzamb wa kukwat mupak wa chidia chiwamp ni chiyimp. Anch mwamu mwasalau, ing Yehova wayimana anch afanyidin mwom wa “mivu ni minang” mwi ndond yayirijekinay, mu chir cha Eden.—Disambishil 2:8; 3:22.

Mwom wa Chikupu Washadika

Rusangu ra Bibil rilejen anch Nzamb waminyisha mu chir cha eden “mutond . . . wa ronganyin ra kuwap ni kuyip,” wayijidika Adam ni Eve kudia dibuj dia mutond winou, chamwamu akufa. (Disambishil 2:9, 17) Kulik kwa Adam ni Eve kudia dibuj dia mutond winou kwela kumulej Nzamb anch itiyijin ulabu wend. Pakwez, kudia ku mutond winou, kwela kumekesh anch alikin kwau ulabu wa Nzamb. Adam ni Eve abwambwila ku yany ya Yehova ni inunga pamwing ni Satan, chitang cha mu spiritu chabwambwila ku ulabu wa Nzamb. Mudi chibudikin, Nzamb wamana nich kutentam anch Adam ni Eve kafanyidinap kushakam aom chikupu.—Disambishil 3:1-6.

Chom chayinkishau kudi Nzamb chadinga mwom bil anch rufu, kwikalaku bil anch kulik kwikalaku. Chibudikin cha kubwambwil chadinga ching kusu rufu ni kujiy shitit kwa kwikalaku kwau. Chatwishikap kand kudi Adam ni Eve ap kudi umwing wa anau kudandamen kushakam chikupu kusutil ku kuna chom kanang chikweta usu wa yip ap ku kwikal nich mupim wakad kufang.a

An awonsu a Adam asambisha kuman mar mulong wa kubwambwil kwend. Yibudikin ayirumburil kudi kambuy Paul. Ndiy wafunda anch: “Chitil chandama mu mangand mulong wa muntu umwing, ni rufu randama mulong wa chitil, chawiy rufu rashika kudi antu awonsu mulong antu awonsu asala chitil.”—Rome 5:12.

Kutan Kand Mwom wa Chikupu

Kambuy Paul wilikeja mwikadil wa an a Adam paufanikeshay nich mwikadil wa muswik pa chirung cha mivu chitot ya kusambish. Mulong wa chitil cha kuswan, an a Adam ni Eve avadika “aswik a yitil,” uswik ushikijina ku rufu. (Rome 5:12; 6:16, 17, Manswik Masu ) Chela kwikal chikash kudi an a Adam ni Eve anch Yehova walika kutenchik mulong wa kuyikol aswik inay. Paul warumburila anch: “Mudi kurumburish kweza kudi antu awonsu ku kufa nich kwau, mulong wa tuyimp twa muntu umwing [Adam], chawiy kupand kweza kudi antu awonsu ku kwiyingish mulong wa kutentam kwa muntu umwing.” “Kwiyingish” kwinoku kudiokil ku chakupesh cha Yesu chapeshay mwom wend wa ukauntu uwanyidina mulong wa ‘kwipan amwinend kuyikol awonsu.’ Yehova wajingunina kufanyin kwa chakupesh mulong wa kuyikol antu ku “kurumburish” kwa “kufish nich.”—Rome 5:16, 18, 19; 1 Timoteu 2:5, 6.

Chawiy lel in siyans kakezap kujingunin mutapu wa kupwish rufu mwi mbil ya uswan yidia mu mujimbu wa muntu—mutapu wa kupwish udi kwindjing. Kukwatijan ni yilondilay Bibil, musul wa rufu ra an a antu ukwatin ku ngikadil ni kutentam, kiukwatinap kwau ku mujimbu. Njil kusu ya kuchirish mwom wa chikupu—chakupesh cha difut dia Yesu—chawiy chambatena ni mbil. Difut didi kand uman wa kutentam ni rukat ridimukina ra Nzamb. Ov, anany kand, akeza kutaninamu mu difut ni kutambul mwom wa chikupu?

Chipan cha Mwom Wakad Kufang

Yehova Nzamb udingaku “kudiok chikupu ni chikupu.” Ndiy udi wakad kufang. (Kuseng 90:2) Muntu wa kusambish winkishau chipan cha mwom wakad kufang kudi Yehova udi Yesu Kristu. Kambuy Paul warumburila anch: “Twij anch Kristu chavumbukay kal ku rufu kakufap kand; ni rufu kirikuswanip kand padiay ndiy.” (Rome 6:9) Chakin kamu, palejanay kushalijan kudia pakach pa Yesu wavumbulau ni anyikel a pa divu, Paul wamurumburila mudi ndiy kusu umwing udia wakad kufang. Yesu “ushiching chikupu.” Mwom wend udi “wakad kujiy.”—Hebreu 7:15-17, 23-25; 1 Timoteu 6:15, 16.

Yesu kadiap ndiy kusu umwing ukutambula chipan chinech. In Kristu azizidilau many atondau mulong wa kwikal ant mu uyaj wa mwiur niyawiy ayivumbwil mutapu umwing mudi chavumbukay Yesu. (Rome 6:5) Kambuy Yohan ulejen anch chipan chinech achipanin kudi antu 144 000. (Kuburik 14:1) Niyawiy atambwil mwom wakad kufang. Piur pa divumbuk diau, Paul ulondil anch: “Mbij ni mash kiyikutwiship kuswan want wa Nzamb . . . Mpuny yikez kadjim, ni afu akez kayilangwishin mu mijimbu yakad kuvund, akez katukarumun. Mulong mijimbu yikata kuvund ey, awapidil kuyitek mu mijimbu yakad kuvund; ni yom ya rufu ey, awapidil kuyitek mu yom ya mwom yakad kufa.” Rufu rikwetap kand usu padi antu inay avumbukina mwamu.—1 Korint 15:50-53; Kuburik 20:6.

Chakin kamu, kuburik kwinoku kudiokila kudi Nzamb kudi kujim. Ap angel kayitangap nich mwom wakad kufang, ikalap nchik yitang ya mu spiritu. Chom chinech chimekedin ku mulong wa kwel anch yitang ya mu spiritu yinunga mu wibwambwol wa Satan akez kuyijip. (Mateu 25:41) Oku kand, ant pamwing ni Yesu, atambwil chipan cha mwom wakad kufang, umekeshina anch Yehova uyichengijin pakad kwidjidjek mu kushinshaman kwau.

Ov, chom chinech chilejen anch ching kusu antu 144 000, kachirund kakemp anch twayilikej ni mamiliyon ma antu adiaku, awiy kusu akeza kushakam chikupu? Bwat kwau. El tutal mulong wak.

Mwom wa Chikupu mu Paradis pa Divu

Buku wa Kuburik udia mu Bibil ulejen chipich chimwing cha ufun cha runtu rakad kutwish kuchind inkinau mwom wa chikupu mu paradis pa divu. Pamwing nau awiy kudi antu asambela kufa pakwez ayivumbula ni kuyichirish ku ukash ni usu wa winsand. (Kuburik 7:9; 20:12, 13; 21:3, 4) Ayitwadin ku “wit wa mem ma kupand, matokil mudi chintadil, udiokil mwishin mwa nkwas ya Nzamb.” Ushad ni ushad kudi “[mitond ya] kupand . . . ni mayij ma [mitond yiney] makat kuyok antu a michid.” Yehova Nzamb upanin diladikij diwamp anch: “Ni yend ukweta impu, mulikany eza. Ni wawonsu usotila, mulikany atambul mem ma kupand makad usey.”—Kuburik 22:1, 2, 17.

Mitond yiney ni mem minam yidiap mon ya mwom ap musul wa winsand yikatau kukimb mu kusut kwa yitot ya mivu kudiau in siyans atongining kukarumun yikung kwikal or ap kudi in kukimbijol. Pakwez, yifanikeshin yitenchik ya Nzamb kusutil kudiay Yesu Kristu mulong wa kuyichirish antu mu mwikadil wa kuwanyin wadingaku kwisambishil.

Rutong ra kusambish ra Nzamb ra kuyinkish antu amuziyidina mwom wa chikupu panap pa divu kand kal rikarumuk. Rutong riner rikez kuwanyin, mulong Yehova ushinshamen. Kuseng 37:29 ulondil anch: “Mwin kutentam ukez kaswan ngand, ukez kashakamamu chikupu.” Kushilamu kwinoku kutubachikining kulond, pamwing ni antu inkinshinau mwom wakad kufang mwiur, anch: “Midimu yey yipandiken ni ya kushimokish, [Yehova Nzamb mwin Dikand Diawonsu] Jinjil jey jitentamin ni ja kashinsh, Yey mwant wa michid yawonsu. Nany wakad kukwov ey wom, A [Yehova] Mwant, Ni kutumbish dijin diey? Mulong yey kusu utumbila.”—Kuburik 15:3, 4.

Ov, usotil chipan chipandikena kuwap cha mwom wa chikupu? Anch inge, ufanyidin kwikal ushinshamena ni kumuziyil “Mwant wa chikupu.” Ufanyidin kwilej piur pa Yehova ni Yesu Kristu, mulong mwom utwishikin kusutil kudi ndiy. Kudi antu in awonsu adia tayad kwitiyij yany ya Nzamb piur pa chidia chiwamp ni chiyimp akez kayinkish chipan cha “mwom wa chikupu.”—Yohan 17:3, MM.

[Mazu madia kwishin kwa paj]