Lejanany Chifundishinay Chakin Kamu Bibil
“Yangany kwen ku michid yawonsu uyikadishany in kwilej, . . . wend uyilejany.”—MATEU 28:19, 20.
1. Chom ik tukutwisha kulond piur pa kupalangan kwa Bibil?
DIZU DIA YEHOVA, Bibil Utumbila, udi umwing wa mabuku makur mapalangeshinau nakash mu mangand. Amukarumwin kal yikunku piswimp mu jindim 2 300. Piswimp antu 90 pa chitot ashicha pa mangand amukwet mu ridim rau.
2, 3. (a) Ov, mulong wak kudi kanvundangesh pa malejan ma Bibil? (b) Yipul ik tukushinshikina?
2 Mamiliyon ma antu akat kutang chikunku cha Bibil dichuku ni dichuku. Amwing amutangin kal mwawonsu tupamp tuvud. Tunan twa yirund ya marelijon tufil mu kan anch malejan mau mimedin pa Bibil, pakwez kitiyijinap yikatay kulejan. Ku kanvundangesh kinak kwiwejidin kand kupwitijan kwa yid ya relijon umwing. Amwing akat kwidjidjek piur pa Bibil, kudiokilay ni usey ukwetay. Avud amwitiyijin anch udi buku utumbila mulong kusu wa kumusadil mu misambu pa kuchip machip ap kuchip mulong wa kulond uyakin mu matribinal.
3 Chakin kamu, mu Bibil mudi dizu dia Nzamb dikweta usu ukash, ap uruu, mulong wa antu awonsu. (Hebreu 4:12) Chitudia Atuman a Yehova, tusotil anch antu ileja chifundishinay Bibil. Tukweting musangar wa kuwanyish mudimu wapanay Yesu Kristu kudi in kwilej end palonday anch: “Yangany . . . ku michid yawonsu uyikadishany in kwilej . . . wend uyilejany.” (Mateu 28:19, 20) Pakwez, mu mudimu wetu wa patok, tukat kuyitan antu akweta michim yitok akata kwinan mulong wa kanvundangesh ka relijon kapalangena mu mangand mawonsu. Asotil kwijik uyakin piur pa Sakatang wetu ni kwijik chilondinay Bibil piur pa kurumburik kwa mwom. Tushinshikinany katat yipul yisatu yiyakamishina antu avud. Mu chipul chimwing ni chimwing, tukushinshikin mutapu ufundishinau antakel a relijon yom ya makasu, ni kupwa tukushinshikin chifundishinay chakin kamu Bibil. Yipul yawiy ey: (1) Ov, Nzamb ukat kutubangin? (2) Ov, mulong wak tudiaku? (3) Chom ik chikata kutushiken pitukata kufang?
Ov, Nzamb Ukat Kutubangin?
4, 5. Ov, mulong wak utonginingau antu anch Nzamb kakatap kutubangin?
4 Tusambisha katat nich chipul chilondila anch, Ov, Nzamb ukat kutubangin? Cha ushon chidi anch, antu avud atongining anch Nzamb kakatap kutubangin. Ov, mulong wak utonginingau mwamu? Diyingish dimwing didi anch mulong ashich mu mangand mizwila too rukis, njit, ni mar. Atongining anch: ‘Ang chakin kamu Nzamb ukat kutubangin, ing welang kukangesh yom mudi yiney ya mar kangal yasadik.’
5 Diyingish dikwau dikata kuyibachik antu kutong anch Nzamb kakatap kutubangin didi anch mwamu muyilejiningau kudi antakel a marelijon. Yom ik yilondiningau amakurump a yikumbu ya nzamb pakata kwez mar? Pafishay mband umwing anend aad ku akisidan wa motak, ntakel wend wa relijon walonda anch: “Ridi rusot ra Nzamb. Nzamb wadi usotil angel akwau aad.” Chisu chilondiningau amakurump a yikumbu ya nzamb mazu mudi minam, chakin kamu amufishining nich Nzamb mulong wa yom yiyimp yikata kushiken. Pakwez, mwin kwilej Yakob wafunda anch: “Muntu anch amwoz, kangal wakalond anch angozil kudi Nzamb; mulong Nzamb kakwozanangip nich kuyip, ni mwinend kakumwozangip muntu.” (Yakob 1:13) Yehova Nzamb kakatap kulet yom yiyimp. Chakin, “Nzamb udi kulemp ni kuyip.”—Yob 34:10.
6. Ov, nany udia kwinyim kwa tuyimp ni mar madia mu mangand minam?
6 Ov, mulong wak kudi tuyimp tuvud mwamu ni mar? Diyingish dimwing didi anch antu avud amulikin Nzamb kwikal Nyikel wau, alikining kwau kuziyil ku yijil ni yany yend yitentamina. Antu amuziyidil pakad kwijik Satan, Mukankuny wa Nzamb, mulong “ngand ya kabuj yidi mu chikas cha Satan.” (1 Yohan 5:19) Kwijik uyakin winou kukat kuswapesh kutesh mulong wak kudia mikadil yiyimp mwamu. Satan udi muyimp, mwin rikis, mukamakasu, ni mwin chisum. Chawiy tufanyidin kuchingejin anch mangand mamekesha untu wa Satan. Kwikalaku kwa uyimp uvud mutapu winou kudiap kwa kushimok!
7. Misu mayingish mamwing ma mar tumena?
7 Kuburen kuwanyin didi diyingish dikwau dia mar mitumena. Antu akayitil arishining mulong wa kuyikel, ni chinech chikat yisu yivu kulet njit, riyind ni mar. Mulej 8:9 ulondin uyakin anch: ‘Muntu ukat kumuyikel muntu mulong wa kumumesh mar.’ Diyingish dikwau dia mar didi anch ‘chisu cha mar chakad kuchingejin chikat kushiken.’ (Mulej 9:11) Chisu chivud antu amening mar mulong ading pa ndond yiyimp mu chisu chiyimp.
8, 9. Ov, mutapu ik twija chakin kamu anch Yehova utubangidin?
8 Chikasikeshin kwijik anch Yehova kakatap kulet mar. Ov, chakin kamu Nzamb ubangidin yom yisadikina mu mwom wetu? Chakul chisangareshina muchim chidi anch inge! Twij anch Yehova ubangidin mwom wetu mulong Dizu diend diapepilay ditulejin mulong wak uyilikidinay antu amana mar. Mu mayingish ma Nzamb mudi milong yaad: ukaleng wend ni kushinshaman kwa muntu. Mulong ndiy Sakatang mwin dikand diawonsu, Yehova kadiap ushindidilau kutulej mulong wak ulikidinay mar. Pakwez, utulejin mulong utubangidin.
9 Tushinshikin uman ukwau ulejena anch Nzamb utubangidin. Ndiy “wova ushon mu muchim wend” chisu uyimp wizwila too mu mangand pa machuku ma Noa. (Disambishil 6:5, 6) Ov, Nzamb wovil mutapu windjing ilel? Bwat, mulong kakatap kukarumuk. (Malakiy 3:6) Ndiy ukisin kuburen kutentam ni ukisin kuyiman antu akat kuman mar. Bibil ulejen anch piswimp kamu ap Nzamb ukez kudiosh uyimp wawonsu udiokila ku winyikel wa muntu ni ku usu wa Djabul. Ov, winou udiap uman wa kashinsh anch Nzamb utubangidin?
10. Mutapu ik wovilingay Yehova piur pa mar mamenau antu?
10 Antakel a marelijon ni alej akat kumumekesh Nzamb nayimp pakatau kulond anch mar tumena ridi rusot rend. Pakwez, Yehova usotil kamu nakash kupwish mar. 1 Pita 5:7 ulondil anch: “Ndiy ukat kukulamany en.” Chawiy chinech chifundishinay chakin kamu Bibil!
Ov, Mulong wak Tudiaku?
11. Yom ik yilondininga marelijon ma mangand piur pa mwom wa muntu pa divu?
11 Tushinshikinany katat chipul cha kaad chikatau kwiyipul antu avud anch, Ov, mulong wak tudiaku? Marelijon ma mangand chisu chivud makwiling anch muntu udi pa divu mu kachisu kakemp kusu. Amening divu dietu mudi kwau ndond ya kupimin, ap mudi chimatikin chitwadila ku mwom ndond yindjing. Antakel amwing a chikumbu cha Nzamb akat kulejan makasu anch dichuku dimwing Nzamb ukez kushesh divu dined. Mudi chibudikin cha malejan minam, antu avud ashikedin kal ku kulond anch chiwapidil kwisakin mwom muchifanyidina pakutwishau mulong rufu riyichingedin. Ov, chom ik chakin kamu chifundishinay Bibil mulong wa kwikalaku kwetu?
12-14. Chom ik chifundishinay Bibil piur pa rutong ra Nzamb mulong wa divu ni antu?
12 Nzamb ukwet rutong rimwing ruwamp nakash mulong wa divu ni antu. Ndiy “kamatangap [mangand] kwikal ndond yamwamu” pakwez “wamatanga chakwel antu ashakamamu.” (Isay 45:18) Chikwau kand, Yehova “wasa rubumbu ra divu chakwel kidikushemunikip chikupu ni chikupu.” (Kuseng 104:5) Kwijik yom yiney piur pa rutong ra Nzamb mulong wa divu ni antu kukutwish kutukwash kutesh mulong wak tudiaku.
13 Disambishil shapitre wa 1 ni wa 2 ulejen anch Yehova wabangina nakash patangay divu mulong muntu ashakamap. Kwisudiel kwa chirung cha kutang diur ni divu dietu, yom yawonsu yadinga “yiwamp.” (Disambishil 1:31) Nzamb wamuteka ikundj ni mband a kusambish, Adam ni Eve, mu chir chimwing chiwamp cha Eden ni wayinkisha yakudia yiwamp yivud. Ndiy wayileja antu aad a kusambish anch: “Valijanany, vulijanany, shakamany, izwishany ngand ni kuyiziyish.” Afanyidina kuval an awanyidina, kutanduril mipak ya chir chau mwadia mushichau pa mangand mawonsu, ni kuyiyikel annam awonsu nich rukat.—Disambishil 1:26-28.
14 Rutong ra Yehova ridi ra kwikal nich dijuku dia antu awanyidina ashicha pa divu chikupu. Dizu dia Nzamb dilondil anch: “Mwin kutentam ukez kaswan ngand, ukez kashakamamu chikupu.” (Kuseng 37:29) Chakin, ayitanga antu chakwel ashakama chikupu pa divu. Rawiy rutong ra Nzamb, ni chawiy chifundishinay chakin kamu Bibil!
Chom ik Chikata Kutushiken Pitukata Kufang?
15. Chom ik chilejeninga marelijon mavud piur pa chikata kutushikenang pitukata kufang?
15 Katat twisambina chipul cha kasatu chiyikwatina antu avud: Chom ik chikata kutushiken pitukata kufang? Marelijon mavud ma mangand malejening anch mu muntu, muding chom chimwing chikata kudandamen nich mwom anch mujimbu wafa. Yirund yimwing ya marelijon yidandamedin kwitiyij anch Nzamb ukat kuyipupin antu ayimp mu mar ma chikupu mu karung ka misiny. Ov, chitiyij chinech chidi chakin? Ov, chom ik chakin kamu chifundishinay Bibil piur pa rufu?
16, 17. Kukwatijan nich Bibil, afu adi mu mwikadil ik?
16 Dizu dia Nzamb dilondil anch: “Antu aom ij anch, kwisudiel tukez kafa, pakwez antu afu kijap chom, awiy kakwetap kand difut.” Mulong afu “kijap chom,” awiy kakutwishap kutesh, kuman, kulond, kwov ap kutong. Kakwetap kand difut ap dimwing. Adi lel mu mwikadil ik? Kakutwishap kusal mudimu ap umwing! Chikwau kand, “rukat rau, ni kukis kwau, ni maku mau, yawonsu yafil kal nau pamwing,” mulong kakutwishap kand kumekesh chovil ap chimwing.—Mulej 9:5, 6, 10.
17 Chilondilay Bibil pa mulong winou chiswapel kutesh ni choviken—afu kakatap kudandamen kwikal aom kwi ndond kanang. Kwikiling chom chidiokilinga mu mujimbu wetu ku rufu ni kudandamen kwikal nich mwom ap anch kuvadikin kand mu mujimbu windjing, mudi mulondiningau antu itiyijina kuvadirik mu mujimbu ukwau ap mu mulad ukwau wa mwom. Tukutwish twalet chilakej ech: Mwom utukweta udi mudi kasu ka buji. Anch muzuzu wajim, uyilingap kwi ndond ap yimwing. Wajim kal kwau.
18. Anch mwin kwilej wilej anch afu kijap chom ap chimwing, yom ik yikutwishay kulond?
18 Tongin bil pa uyakin winou uswapela pakwez ukweta usu. Mwin kwilej Bibil anch wilej anch afu kijap kwau chom, ukutwish kulond anch, rikalap nchik rukis radingau nich angakend afa kal padingau achidi aom, kakutwishap kumusal chom ap chiyimp. Ufanyidin kand kutesh swa anch akatish end afa kal kakutwishap kand kutesh, kuman, kulond, kwov ap kutong. Chawiy lel, kovilap runeng anch adi ayinau mwi ndond ya afu (purgatoire) ap kuman mar ma chikupu mu ruteng ra kasu. Pakwez, Bibil ufundishin anch afu adia mu manangu ma Nzamb akez kuyivumbul. Ridi ruchingej ruwamp nakash!—Yohan 5:28, 29.
Buku Musu Tukusadila
19, 20. Chitudia in Kristu, chisend ik tukweta, ni ukwash ik wa kwilej nich Bibil waturijekidinau mulong wa kuusadin mu mujikit wetu?
19 Twisambin kal yipul yisatu kusu yikatau kwiyipul antu avud. Mu chipul chimwing ni chimwing, yifundishinay Bibil yoviken kamu zwang ni yikasikeshin. Chidi cha musangar kuyirumburil antu asotila kwijik chifundishinay Bibil uyakin winou! Pakwez kudi yipul yikwau yivud ya usey yiswiridinau antu akweta michim yitentamina kutesh yakul. Chitudia in Kristu, tukwet chisend cha kuyikwash kutan yakul ku yipul yiney.
20 Chiding chikash kulejan uyakin wa Bibil mu mutapu umwing wovikena ni upukwina ku muchim. Chakwel kutukwash kupandakan chikangesh chinech, “kashalapol wakin ukweta manangu” warijekin buku umwing wa pakampwil tukusadina mu mujikit wetu wa Ukristu. (Mateu 24:45-47) Buku winou wa mapaj 224 ukwet mutu wa mulong: Chom ik Chakin Kamu Chifundishinay Bibil?
21, 22. Yom ik yimwing ya usey yidia mu buku Chom ik Chakin Kamu Chifundishinay Bibil?
21 Buku winou wapalangeshau ku Chitentam cha Distrik “Kumuziyil Nzamb” cha Atuman a Yehova cha muvu wa 2005-2006, ukwet jinsangu jivud ja usey. Chilakej, ukwet mapaj matan ma kusambish nich madia ma ukwash nakash mulong wa kusambish nich malejan ma Bibil ma ku chikumbu. Ukez kuman anch chiswapel kwisambin yipich ni maverse madia pa mapaj minam. Ukutwish kusadil yom yidia mu chikunku chinech chakwel kuyilej in kwilej mutapu wa kukimb mashapitre ni maverse mu Bibil.
22 Buku winou amufundin mu mutapu uswapela ni wovikena. Asadil usu mulong wa kushik ku muchim wa mwin kwilej mutapu chitwishikina. Shapitre ni shapitre ukwet yipul ya kusambish nich ni kwisudiel kudi kamushet kalondila anch “Chifundishinay Bibil.” Mu mushet winou mudi yakul ya Maverse ku yipul yidia kwisambishil. Yipich ya ufun ni mazu marumburila yipich pamwing ni yilakej yidia mu buku winou yikez kumukwash mwin kwilej kutesh yitongijok yisu. Ap anch mazu majim ma buku winou maswapel, mudi wenjil ukeza kukukwashany kushinshikin mitu ya milong 14 yijim mu mutapu ujim anch mwin kwilej usotil jinsangu jikwau.
23. Yiyul ik yiletinau piur pa mutapu wa kusadil buku Chifundishinay Bibil ku malejan ma Bibil?
23 Buku Chom ik Chakin Kamu Chifundishinay Bibil? amutenchikin mulong wa kutukwash kuyilej antu a milad kushalijan ni akweta yitiyij ya marelijon kushalijan. Anch mwin kwilej kijap chom ap chimwing piur pa Bibil, chitwishikin kwilej tupamp tuvud shapitre umwing. Kangal wilejany mau-mau, pakwez sal usu wa kupukun ku muchim wa mwin kwilej. Anch kateshinap kurumburik kwa chilakej kanang chisadidilau mu buku, murumburilach ap mwinkisha chilakej chifanikena nich. Irijeka nawamp, sal usu wey wawonsu chakwel usadila mu mutapu uwamp buku winou, ni mulembila Nzamb akukwasha chakwel utwisha ‘kulejan nawamp uyakin.’—2 Timoteu 2:15.
Sanger Chisend Chey cha Usey Nakash
24, 25. Chisend ik chijim chiyinkishinay Yehova antu end?
24 Yehova wayinkishin kal antu end chisend cha usey nakash. Watutwishishin kal kwilej uyakin piur pend amwinend. Kitufanyidinap kuman chisend chinech mudi chamwamu! Chakin, Nzamb wayijindjikina kal in kwitutul ntong jend ni wayijinguninaj antu itudishina. Pa chinech, Yesu walonda anch: “Nakujikitish ey Tatuku, Mwant wa diur ni divu, mulong ey chiwajindjika yom yiney kudiau in kubabal ni in manangu, wayimekesh kwey kudi anikanch.” (Mateu 11:25) Didi dilau mudi ik kwikal uchidindinau pamwing ni antu itudishina amusadidila Mukaleng Mwant, Yehova.
25 Nzamb watwinkishin kal kand chisend cha kuyilej antu akwau piur pend. Vurikany anch akat kumumekesh nayimp kudi antu afundishining makasu piur pend. Chawiy lel, antu avud akweting chitong chiyimp padiay Yehova, atongining anch ndiy kakatap kutubangin ni ukwet muchim ukash. Ov, usotil, kuyikwash kamu, antu avud chakwel atesha uyakin? Ov, usotil anch antu akweta michim yitentamina adia ndond jawonsu ijika uyakin piur pa Nzamb? Chawiy lel muziyila Nzamb mu yawonsu kusutil ku kulejan ni kuyifundish nich mushiku antu akwau yilondilay Bibil pa milong yijim. In kukimb uyakin asotil kwilej chifundishinay chakin kamu Bibil.
Ov, Ukwakul Nchik?
• Ov, mutapu ik twija anch Nzamb utubangidin?
• Ov, mulong wak tudia pa divu?
• Chom ik chikata kutushiken pitukata Kufang?
• Yom ik yidia mu buku Chifundishinay Bibil yikusangareshina?
[Chipich chidia pa paj wa 7]
Bibil ufundishin anch mar makupwa
[Dizu dirumburilas]
Kwiur ku katatuku, changadim: © Bruno Morandi/age fotostock; ku kamaku, mband: AP Photo/Gemunu Amarasinghe; kwishin ku katatuku, in kuchin njit: © Sven Torfinn/Panos Pictures
[Chipich chidia pa paj wa 9]
In kutentam akez kushakam chikupu mu Paradis