Yiziyilany Atufung In Rukat Nich Kwitudish
“Yiziyilany awiy adia in kutakel en ni kwitudish.”—HEBREU 13:17.
1, 2. Maverse ik malejena anch Yehova ni Yesu adi Atufung in rukat?
YEHOVA NZAMB ni Mwanend, Yesu Kristu, adi Atufung in rukat. Isay wabwaka anch: “Talany, Nsalejetu [Yehova] ukat kwez amwinend mudi chifuvu, ni chikas chend chikez kuyikel mulong wendendiy. . . . Ndiy ukulam yivam yend mudi kafung. Ukez kasend an a amikoku mwi nkond yend. Ukez kayendish pakemp amaku akweta an akata kwamu.”—Isay 40:10, 11.
2 Uprofet wa kuchirish kwa muchid wawanyina kapamp ka kusambish chisu chachirikau in Yuda ashalaku mu Yuda mu muvu wa 537 kurutu kwa chirung chetu. (2 Jinsangu 36:22, 23) Weza kuwanyin kand chisu chayikulau atushal azizidilau many kudiokal mu “Babilon mujim” mu muvu wa 1919 kudiay Sirus Mujim, Yesu Kristu. (Kuburik 18:2; Isay 44:28) Yesu udi “chikas” cha Yehova cha kuyikel nich, kukumangej nich pamwing amikoku ni kuyilam nawamp. Yesu amwinend walonda anch: “Am yam kafung muwamp; am nij aam, ni yau aam angij kal am.”—Yohan 10:14.
3. Mutapu ik ukatay Yehova kumekesh rukat ra ranaken mu mutapu ukatay kuyisadil amikoku end?
3 Uprofet wa Isay 40:10, 11 ukasikeshidin ranaken risadidilay Yehova mu kuyilam antu end. (Kuseng 23:1-6) Pasalay mujikit wend wa pansh, Yesu niyend wamekesha ranaken mulong wa in kwilej end ni mulong wa antu awonsu. (Mateu 11:28-30; Mako 6:34) Yehova ni Yesu ayikisa nakash atufung, ap anch antakel, a Isarel akad ranaken, mulong ayidiula ni kuyibuu amikoku au wakad usany. (Ezekiel 34:2-10; Mateu 23:3, 4, 15) Yehova washilamu anch: “Am nikez kuyipandish amikoku am, kinikwitiyap en uyizengolany kand. Nikez kuyirumburish amikoku am ni kuyauril amikoku awamp ni amikoku ayimp. Nikez kuyinkish mwin kuyitakel mudi kashalapol wam David, ndiy ukeza kwikal kafung wau, umwing mwin kuyilam.” (Ezekiel 34:22, 23) Pa chisu chinech cha nsudiel, Yesu Kristu, David Mujim, udi “kafung” watondau kudi Yehova piur pa atushalapol End adia pa divu, in Kristu azizidilau many ni “amikoku akwau.”—Yohan 10:16.
Yipan ya Mwiur Yipaninau ku Chikumangen
4, 5. (a) Chipan ik chipandikena kuwap chapanay Yehova kudi antu end adia pa divu? (b) Chipan ik chapanay Yesu ku chikumangen chend?
4 Pamutekay Yesu Kristu “kafung” pa atushalapol End adia pa divu, Yehova wapana chipan chiwamp ku chikumangen cha Ukristu. Chipan chinech cha Ntakel wa mwiur asambela kuchisambin mu Isay 55:4 anch: “Yam namuteka ndiy kwikal mwin kutakel ni kalam wa michid chad namekesha ukash wam mwi ndiy.” In Kristu azizidilau many pamwing ni yid ya “chisak chipandikena kujimb” ayikumangejin kudiokal mu michid yawonsu, tubil, antu, ni jindim. (Kuburik 5:9, 10; 7:9) Asadin chikumangen cha pa mangand mawonsu, “diyind dimwing,” mwishin mwa umutakel wa “kafung umwing,” Kristu Yesu.
5 Yesu niyend, wapana kal yipan yiwamp ku chikumangen chend chidia pa divu. Wapana atufung a mwishin ashinshamena akata, mu kumwimburij Yehova ni Yesu, kulam amikoku ni ranaken. Kambuy Paul wisambina chipan chinech cha rukat mu mukand wend wayifundilay in Kristu a ku Efesus. Ndiy wafunda anch: “Chakandamay piur watakela chisak cha antu akwatau avud, Wapana aruu [yipan] kudi antu. . . . Wayinka amwing kwikal apostol, akwau aprofet, akwau atufung, akwau apaster ni alej, mulong wa kuwanyish in Kristu ayisadil akwau mudimu wa kuyikwash kutung chikumbu cha mujimbu wa Kristu.”—Efesus 4:8, 11, 12.
6. Mutapu ik uyilejenau atulam azizidilau many adia mu yisak ya amakurump mu Kuburik 1:16, 20, ni chom ik tukutwisha kulond piur pa amakurump atondinau adia a mu chisak cha amikoku akwau?
6 ‘Yipan yiney ya antu’ yidi atulam, ap anch amakurump, atondau kudi Yehova ni Mwanend, kusutil ku mwiku utumbila, kuyilam amikoku ni ranaken. (Midimu 20:28, 29) Kwisambishil, atulam awonsu adinga amakundj azizidilau many. Atulam inay adinga ni kusadil mu yisak ya amakurump mu chikumangen chizizidilau many chifanikeshinau mu Kuburik 1:16, 20 nich “atutumbu” ap anch “angel” adia mu chikas cha katatuku cha Kristu, charumburik anch, mwishin mwa umutakel wend. Pakwez, pa chisu chinech cha nsudiel, nich kukep nakash kwa atulam azizidilau many adia pa divu, amakurump avud in Kristu adia mu yikumangen adi a mu chisak cha amikoku akwau. Mulong amakurump inay ayitonda kudi antimesh a Chisak Chitakedila mwishin mwa umutakel wa mwiku utumbila, niyawiy akutwish kuyisambin anch adi mu chikas cha katatuku (ap, mwishin mwa umutakel) cha Kafung Muwamp, Yesu Kristu. (Isay 61:5, 6) Mulong amakurump adia mu yikumangen yetu aziyidil kudi Kristu, Mutu wa chikumangen, tufanyidin kusal nau mu kwovijan.—Kolosai 1:18.
Kuziyil ni Kwitudish
7. Chiyul ik chapanay kambuy Paul piur pa manangu mitufanyidina kwikal nich mulong wa atuman in Kristu?
7 Atufung etu a mwiur, Yehova Nzamb ni Yesu Kristu, achingejin anch tuyiziyila ni kwitudish kudi atufung a mwishin inkishau kal yisend mu chikumangen. (1 Pita 5:5) Ku ukash wa mwiku utumbila, kambuy Paul wafunda anch: “Yivurikany awiy adia in kutakel en, antu akata kunilejany dizu dia Nzamb; yitongijokany yom yikata kusalau, ilikejany ritiy rau. Yiziyilany awiy adia in kutakel en ni kwitudish kudi awiy, mulong adi in kulam a mipim yen ni pakez kapanau kuchind; asala yom yiney nich musangar, kangal nich ushon, mulong mwamu kichikunikwashanyip en.”—Hebreu 13:7, 17.
8. Chom ik chitwitinay Paul ‘kutongijokin,’ ni mutapu ik tufanyidina ‘kuziyil’?
8 Shinshikin anch Paul utwitin ‘kuyitongijokin,’ ap anch kushinshikin nawamp, nsudiel ya ritiy ra amakurump ni kulondul yilakej yiney ya ritiy. Chikwau kand, Paul utuyudil kuziyil ni kwitudish ku umutakel wa amakundj inay atondau. Mwin kwilej Bibil R. T. France urumburil anch mu Ugrek wa kusambish, dizu diakarumunau anch “kuziyil” didiap “dizu din kamu dirumburikina kuziyil, pakwez dirumburikin anch ‘witiyijishinau,’ ditin kwikal tayad kwitiyij umutakel.” Tukat kuyiziyil amakurump mulong mwamu mutwitina Dizu dia Nzamb ni mulong tukwet kashinsh anch amakurump akat kubangin yisakin ya Want ni kuwap kwetu mu spiritu ni ku mujimbu. Tukez chakin kamu kusangar anch twitiyij cha kwisotil umutakel wau.
9. Ov, mulong wak chidia cha usey kudi etu ‘kwikal itudishina’ kuwejin pa kuziyil?
9 Ov, chikwikal nchik, anch mu chilik kanang twitiyijinap anch umutakel wa amakurump wawiy mutapu uwamp wa kusal yom? Pawiy pitininga kwitudish. Chiswapeling kuziyil anch yom yawonsu yoviken patok zwang ni tuyitiyijin, pakwez tukez kumekesh anch chakin kamu twitudishin anch twitiyij ap anch tuteshinap kurumburik kwa umutakel uletinau. Pita, weza kwikal kambuy, wamekesha kwitudish kwa mulad winou.—Luka 5:4, 5.
Mayingish Manying ma Kusadil Pamwing mu Kwovijan
10, 11. Mutapu ik wadingau atulam ‘kuyilej ambay nau in Kristu dizu dia Nzamb’ mu mivu chitot ya kusambish ni ilel?
10 Mu Hebreu 13:7, 17, utwajimbulang kwiur oku, kambuy Paul uletin mayingish manying malejena mulong wak tufanyidina kuziyil ni kwitudish kudi atulam in Kristu. Diyingish dia kusambish didi anch awiy “akata [kutulej] dizu dia Nzamb.” Vurik anch “[yipan ya] antu” yapanay Yesu ku chikumangen yadinga mulong wa “kuwanyish in Kristu.” (Efesus 4:11, 12) Ndiy watenchika yitongijok ni ngikadil ya in Kristu a mu mivu chitot ya kusambish kusutil kudiau atufung a mwishin ashinshamena, amwing au afundila yikumangen mikand ku ukash wa mwiku utumbila. Ndiy wayisadila atuman inay atondau nich mwiku utumbila mulong wa kuyitakel ni kuyikasikesh in Kristu a kusambish.—1 Korint 16:15-18; 2 Timoteu 2:2; Titus 1:5.
11 Ilel, Yesu ututakedil kusutil kudiay “kashalapol ushishamena ni kubabal,” ni Chisak Chitakedila udi ntimesh wend ni amakurump atondinau kal. (Mateu 24:45) Mulong wa kumulimish “Mwant wa Atufung,” Yesu Kristu, tukat kulondul chiyul cha Paul anch: “Uyilimishany akata kusal mudimu pakach pen, ni adia piur pen mu Mwant akata kukukandany.”—1 Pita 5:4; 1 Tesalonika 5:12; 1 Timoteu 5:17.
12. Mutapu ik ukatau atulam ‘kulam mipim yetu’?
12 Diyingish dia kaad dia kusadil mu kwovijan nau atulam in Kristu didi anch “adi in kulam a mipim [yetu].” Anch aman kachom ap kamwing mu mwikadil wetu ap mu chaku chetu chikutwisha kutek mu chak mwom wetu mu spiritu, ezining swa ni kutwinkish yiyul yiswirikedina nich rutong ra kutukwash. (Galatia 6:1) Dizu dia Ugrek diakarumunau anch “kulam” dirumburikin anch “kuker tul.” Kwambatan ni mwin kwilej Bibil umwing, dirumburikin “kafung ukerina tul.” Chikwau kand piur pa kuker kwau mu spiritu, chisu chivud amakurump akat kuker tul mulong wa kubangin ukash wetu wa mu spiritu. Ov, kitufanyidinap kwikal tayad kusal mu kwovijan pamwing ni atufung inay, asadila usu wau wawonsu mulong wa kwimburij ranaken ra Yesu Kristu, “kafung mujim wa amikoku”?—Hebreu 13:20.
13. Kudi nany kukezau kupan kuchind in Kristu awonsu ni mutapu ik ukezau kupan kuchind?
13 Diyingish dia kasatu mulong wa kusot kwetu kusal mu kwovijan ni atulam didi anch mulong akat kutulam mudi antu akeza kupan “kuchind.” Atulam ijing anch adi atulam a mwishin, asadidil mwishin mwa Atufung a mwiur, Yehova Nzamb ni Yesu Kristu. (Ezekiel 34:22-24) Yehova ndiy Mwin amikoku, ndiy wayilanda “nich mash [ma Mwanend],” ni Ndiy ukez kuyit kuchind atulam atonday mulong wa mutapu ukatau kuyisadil amikoku End, chifanyidin kuyisadil ‘nich riy.’ (Midimu 20:28, 29) Chawiy lel, Yehova ukez kuturumburish etu awonsu piur pa mutapu tukata kuziyil ap bwat ku umutakel wend. (Rome 14:10-12) Kuyiziyil kwetu amakurump atondau ni kwawiy udi uman wa kwitudish kwetu kudi Kristu, Mutu wa chikumangen.—Kolosai 2:19.
14. Chom ik chikutwisha kuyishikij atulam in Kristu ku kupan kuchind “nich ushon,” ni chikutwish chalet yom ik?
14 Paul waleta diyingish dia kanying dilejena mulong wak tufanyidina kuyiziyil nich kwikepish atulam in Kristu. Ndiy wafunda anch: “Pakez kapanau kuchind, asala yom yiney nich musangar, kangal nich ushon, mulong mwamu kichikunikwashanyip en.” (Hebreu 13:17) Nich yisend yau yijim ya kulejan, kulam, kutakel mu mudimu wa kulejan, kulam majuku mau, ni kupwish milong ya mu chikumangen, amakurump in Kristu akwet chisend chijim. (2 Korint 11:28, 29) Anch twakangany kusadil nau mu kwovijan, tukat kuwejin kulim ku chisend chau. Chom chinech chikez kuyovish ushon ni runeng. Kulik kwetu kumekesh spiritu wa kusadil pamwing mu kwovijan kukat kumukisish Yehova ni kukutwish kutuletin chak. Pakwez, pitukata kumekesh kalimish kafanyidina ni kusadil pamwing mu kwovijan, amakurump akutwish kuwanyish yisend yau nich musangar, ni chinech chiletining uumwing ni kusal mudimu wa kulejan Want nich musangar.—Rome 15:5, 6.
Tumekeshany Kwitudish Kwetu
15. Mutapu ik tukutwisha kumekesh kuziyil ni kwitudish kwetu?
15 Kudi jinjil jivud jitukutwisha kusadil pamwing mu kwovijan ni atulam atondinau. Mulong wa kwiyambatanish ku ngikadil yisu ya mu teritwar, ov, amakurump atenchikin machuku ni yisu ya yikumangan ya mudimu wa chingand yitina kuswimp yaku yetu? Tusalany usu wa kusadil pamwing nich yitenchik yisu. Tukutwish kutaninaku yiyukish yakad kuchingejin. Ov, kalam wa mudimu wendidin chirund chetu cha Dilejan dia Buku dia Chikumangen? Tusalany mudimu wa kulejan mudi kamu chitwishikina rubing ritwendidinay. Ov, atwinkishin chikunku cha kusal ku Shikol ya Mudimu wa Uteokras? Tufanyidin kusal usu wa kuchisal ni kuwanyish mujikit wetu. Ov, kalam wa Dilejan dia Buku dia Chikumangen wijikishin anch chidi chisend cha chirund chetu cha kukomb Chot cha Want? Twinungany nend pamwing, kwambatan nich ukash ni usu wa mujimbu wetu. Mu mitapu yiney ni yikwau yivud, tukutwish kumekesh kuziyil kwetu kudi amakundj atondinau kudi Yehova ni Mwanend mulong wa kulam amikoku.
16. Anch mukurump kasadilap yom mudi muyifanyidina kusadik, ov, mulong wak tukwetap diyingish dia kubwambwil?
16 Pa kusut kwa yisu, pamwing ap mukurump kakutwishap wasal yom mudi mulondila chisak cha kashalapol ushinshamena ni kubabal ni Chisak chend Chitakedila. Anch wadandamen kusal mwamu, ukez kupan kuchind kudi Yehova, “kafung ni Mwin kulam wa mipim [yetu].” (1 Pita 2:25) Pakwez kukangany ap kurumbuk kwin kwawonsu kwa amakurump kukutwishap kwikal diyingish dia kulik kuyiziyil. Yehova kakatap kuyukish kubwambwil ni wintombuj.—Kuchind Michid 12:1, 2, 9-11.
Yehova Uyukishin Spiritu wa Kusadil Pamwing mu Kwovijan
17. Mutapu ik tufanyidina kuyiman atulam etu?
17 Yehova Nzamb wij anch amakundj atondinay mudi atulam adi akayitil. Pakwez, ndiy uyisadidil, ni kusutil ku mwiku wend utumbila, ndiy uyilamin antu end adia pa divu. Chidi chakin ku mutambu wa amakurump—ni kudi antu awonsu—anch “usu mwamu ou udiokil kudi Nzamb, kiudiokilip kudi etu.” (2 Korint 4:7) Chawiy lel, tufanyidin kumujikitish Yehova mulong wa yom yisadilay kusutil kudi atulam ashinshamena, ni tufanyidin kwikal tayad kusadil pamwing nau mu kwovijan.
18. Anch twayiziyil atulam etu, chom ik, tusadila chakin kamu?
18 Atulam asadiling usu wau wawonsu chakwel ashakama kwambatan nich yilondilay Yehova piur pa atufung atekinay kulam amikoku end mu machuku minam ma nsudiel, mudi muchilejenau mu Yeremiy 3:15 anch: “Nikez kakwinkishany in kutakel [atufung] akata kwinziyil am. Awiy akez kakutakelany nich ronganyin ni manangu.” Chakin kamu amakurump adia pakach petu asadiling mudimu uwamp wa kulejan ni kuyilam amikoku a Yehova. Tudandamenany kumekesh kujikitish kwetu mulong wa mudimu wau ukash kusutil ku kusadil nau pamwing mu kwovijan, ni ku kuziyil kwetu, ni ku kwitudish kwetu. Anch twasal mwamu, tukez kumekesh kujikitish kwetu kudi Atufung etu a mwiur, Yehova Nzamb ni Yesu Kristu.
Kuchirikinamu
• Mutapu ik wimekeshau Yehova ni Yesu Kristu kwikal Atufung in rukat?
• Kuwejin pa kuziyil, ov, mulong wak kwitudish kuswiridikin?
• Mu jinjil ik mutukutwishina kumekeshin kwitudish kwetu?
[Chipich chidia pa paj wa 29]
Amakurump in Kristu aziyidil ku umutakel wa Kristu
[Chipich chidia pa paj wa 31]
Kudi njil jivud ja kumekeshin kuziyil kwetu atufung
atondinay Yehova