Ashinshamena Kudi Kristu Ni Kudi Kashalapol Wend Ushinshamena

“Mwant wend . . . ukez kamutek piur pa yom yend yawonsu yikwetay.”—MATEU 24:45-47.

1, 2. (a) Bibil utulejin anch nany Ntakel wetu? (b) Chom ik chimekeshina anch Kristu ndiy utakedila chikumangen cha Ukristu?

“KICHIFANYIDINAP kukutazukany en anch ‘Mwin kutakel,’—mulong ukwetany Mwin kutakel ching kusu umwing, ndiy kamu Kristu.” (Mateu 23:10, Manswik Masu) Ku mazu minam Yesu wayileja kamu zwang in kwilej end anch kwikil muntu panap pansh ukutwisha kwikal ntakel wau. Ntakel wau umwing ukwikal mwiur—ching Yesu Kristu amwinend. Nzamb ndiy wamutonda Yesu kwikal ntakel. Yehova “[wamulangwisha] mu rufu, ni . . . [wamuteka] pa mutu pa yom yawonsu ku chikumbu cha Nzamb, chawiy mujimbu wend kamu.”—Efesus 1:20-23.

² Chidiay Kristu “mutu pa yom yawonsu” yitadila chikumangen cha Ukristu, ndiy usadidil ulabu wend piur pa yom yawonsu yisadikina mu chikumangen. Kwikil chom ap chimwing chisadikina mu chikumangen chakadiay kwijik. Ukat kushinshikin nakash mwikadil wa mu spiritu wa chirund ni chirund, ap anch chikumangen ni chikumangen cha in Kristu. Chom chinech achilejen patok mu Kuburik kwamwinkishau kambuy Yohan kwisudiel kwa mivu chitot ya kusambish pa chirung chetu. Tupamp tutan, Yesu wayileja yikumangen sambwad anch wadinga wij yisal yau, yisal yau yiwamp ni kuziy kwau, ni wayikinsha yiyul ni dikasikesh yikwatijadina nich. (Kuburik 2:2, 9, 13, 19; 3:1,8,15) Tukutwish chakin kamu kwitiyij anch Kristu wadinga wij nawamp win kamu mwikadil wa yikumangen yikwau ya mu Aziy Mukemp, ya mu Palestine, ya mu Siria, ya mu Babilon, ya mu Gres, ya mu Itali, ni mu jindond jikwau. (Midimu 1:8) Ov, chidi nchik ilel?

Kashalapol Ushinshamena

3. Ov, mulong wak chifanyidin kumufanikesh Kristu mudi mutu ni chikumangen mudi mujimbu?

³ Kwinyim kwa kuvumbuk kwend ni chisu chikemp kurutu kwa kukandam mwiur kuya kudi Tatukwend, Yesu wayileja in kwilej end anch: “Anginkish kal ulabu wawonsu wa mwiur ni wa pansh.” Kupwa wawejinaku kand anch: “Chawiy am nikez kwikal ni yenen machuku mawonsu, djat ni kwisudiel kwa mangand.” (Mateu 28:18-20, MM) Ndiy ukudandamen kwikal nau pamwing mudi Mutu wau. Mu mikand yayifundilay in Kristu a ku Efesus ni a Kolosai, kambuy Paul wafanikesha chikumangen cha Ukristu ni “mujimbu,” ukweta Mutu wau Kristu. (Efesus 1:22, 23; Kolosai 1:18) Buku umwing (The Cambridge Bible for Schools and Colleges) ulondil anch chifanikesh chinech “chiletinap kusu chitongijok cha uumwing wa usey nich Mutu, pakwez chiletin yitongijok ya kwel anch yid yawonsu yisadil rusot ra Mutu. Yid yiney yidi yom Yend ya mudimu.” Ov, chirund ik chikatay kusadil Kristu kudiosh pamwinkishinau ulabu wa Want mu muvu wa 1914?—Daniel 7:13, 14.

4. Kwambatan nich uprofet wa Malakiy, chom ik chatanau Yehova ni Kristu Yesu pezau kusop tempel wa mu spiritu?

⁴ Uprofet wa Malakiy wasambela kulond anch Yehova, “Mwant wakin,” pamwing ni “muruu wa manswik,” Mwanend wadishau kal want, Kristu Yesu, ukez kwez kurumburish ni kusop “tempel” Wend, ap chikumbu cha mu spiritu cha kwifukwil. “Muten” wa ‘kurumburish chikumbu cha Nzamb’ wasambisha chakin kamu mu muvu wa 1918.a (Malakiy 3:1; 1 Pita 4:17) In kufa mu kan anch adi antimesh a Nzamb ni difukwil diend diakin pa divu akez kuyishinshikin kamu muchifanyidina. Yikumbu ya winzamb ya makasu, yikata kulejan mu kusut kwa yitot ya mivu malejan mamupipeshina Nzamb ni yiyandjika nakash mu kujipan mwi Njit ja Kusambish ja Mangand, akez kuyidjibwil kwa. Kashal ushinshamena wa in Kristu azizidilau many mu spiritu ayipaka, ayitokish mudi ni kasu, ni ayitiyija, ikal kudi Yehova antu “akez kamuletin . . ., milambu ya mitapu yiwamp.”—Malakiy 3:3.

5. Kukwatijan nich uprofet wa Yesu piur pa “kwikalaku” kwend, nany weza kumekan kwikal “kashalapol” ushinshamena?

⁵ Kukwatijan nich uprofet wa Malakiy, mu chijingidij cha yikunku yivud chayilejay Yesu in kwilej end chakwel kuyikwash kwijik chisu cha ‘kwez kwend ni cha nsudiel ya mangand’ mudi ni mutapu wa kujingunin chisak cha “kashalapol.” Yesu walonda anch: “Ov, nany kashalapol wakin ukweta manangu? Ndiy kamu ukwinkishau mudimu wa kulam atushalapol akwau ni kuyangen yakudia pa chisu chiwanyidina. Wayuk kwend kashalapol [winou] pakuchirikay mwant wend, anch wamutan ukat kusal mudimu winou! Nakulejany chakin kamu, mwant ukumwinkish kashalapol winou ukurump wa kulam yom yend yawonsu.” (Mateu 24:3, 45-47, MM) ‘Pachirikay’ kwez kumusop “kashalapol” mu muvu wa 1918, Kristu watana kashal wa in kwilej ashinshamena azizidilau many mu spiritu adinga ni kusadil kudiosh kamu mu muvu wa 1879, Chinong cha Kalam ni mikand yikwau yimedina pa Bibil mulong wa kwangan “yakudia [ya mu spiritu] pa chisu chiwanyidina.” Yesu wayitiyija mudi chisak chend chisadidilay, ap anch “kashalapol,” ni mu muvu wa 1919 wayinkisha ukurump wa kulam yom yend yawonsu yidia pa divu.

Kulam Yom ya Kristu Yidia pa Divu

6, 7. (a) Mutapu ik ukwau walonday Yesu ya “kashalapol” wend ushinshamena? (b) Dizu diasadilay Yesu anch “mwin kulam” dirumburikin ik?

⁶ Angond akemp kurutu Yesu alonda uprofet wend wa chijingidij cha kwikalaku kwend, pamwing ni kwikalaku kwa “kashalapol” udia ntimesh wend pa divu, Yesu walonda ya “kashalapol” winou mu mutapu ushalijadinaku pakemp ulejena yisend ya kashalapol. Yesu walonda anch: “Nany lel ushishamena ni mwin kulam yom ubabela, ukez katekau piur pa chikumbu kudi nsalejend, ni kupan yakudia kudi akwau pa chisu chau? Nakulejany chakin kamu, ndiy ukez kamutek piur pa yawonsu yikwetay.”—Luka 12:42, 44.

⁷ Mu maverse minam kashalapol amutazukin anch mwin kulam, dizu dia Ugrek dikarumwinau dikwet chitongijok cha “mukurump mwin kulam [kutakel] chikumbu ap chikunku cha ngand.” Chisak cha mwin kulam chidiap kusu chisak cha antu ileja nakash akata kurumburil milong yisangareshina ya Bibil. Kuwejin pa kwangan yakudia yital ya mu spiritu “pa chisu chiwanyidina,” ‘mwin kulam ushinshamena’ amuteka piur pa atushalapol awonsu in Kristu ni kumwinkish mudimu wa kulam yom yawonsu ya Kristu yidia pa divu, “yom yend yawonsu.” Yom yiney yom ik?

8, 9. Kashalapol watondau ulamin “yom” ik?

⁸ Mu yisend ya kashalapol mudi kulam yikumbu yisadidilau in kwilej a Kristu mulong wa kuwanyish mijikit yau ya Ukristu, mudi mitiy ya pa mangand mawonsu ni mabiro ma mitiy ma Atuman a Yehova, ni ndond jau ja kwifukwidil—Yot ya Want ni Yot ya Yitentam—mu mangand mawonsu. Chijim nakash, kashalapol utadil kand maprogram ma kwilej Bibil makasikeshina ritiy mu spiritu ku yikumangan ya rubing ni rubing ni ku yitentam yikata kusadik. Ku yikumangan yiney, kwawiy kulejeningau jinsangu jisu piur pa kuwanyin kwa uprofet wa Bibil, ni umutakel wa pa chisu chiwanyidina piur pa mutapu wa kusadil yijil ya Bibil mu mwom wa pichuku-pichuku.

⁹ Mu yisend ya mwin kulam mudi kand kutal mudimu ujim wa kulejan ‘rusangu ruwamp ra Want’ ni kuyikadish ‘antu a michid yawonsu in kwilej.’ Mudi kuyilej antu kusal yom yawonsu yalonday Kristu, Mutu wa chikumangen anch yisadika mu chisu chinech cha nsudiel. (Mateu 24:14; 28:19, 20; Kuburik 12:17) Mudimu wa kukun mbut ya dizu dia Nzamb ni wa kulejan wasongin kal “chisak chipandikena kujimb” cha ambay ajijamena a kashal uzizidilau many. Chakin kamu anch “mapit” minam ma “michid yawonsu” akat kumachindin mu “yom” ya Kristu yilaminay kashalapol ushinshamena.—Kuburik 7:9; Hagai 2:7.

Chisak Chitakedila Chidi Ntimesh wa Kashalapol

10. Mu mivu chitot ya kusambish chisak ik chadinga ni kukwat mipak, ni yadinga nich chibudikin ik pa yikumangen?

¹⁰ Mu yisend yijim ya kashalapol ushinshamena mudi kukwat mipak yivud yijim. Mu chikumangen cha Ukristu cha kusambish, atwimbuy ni amakurump adinga mu Yerusalem adinga antimesh, adinga ni kukwat mipak mulong wa chikumangen chawonsu cha kabuj. (Midimu 15:1, 2) Mipak ya chisak chitakedila chinech cha mu mivu chitot ya kusambish adinga ni kuyitum ku yikumangen kusutil mu mikand ni kudi antimesh in kwendangan. In Kristu a kusambish asangara pa kutambul umutakel winou wovikena zwang, ni kusadil kwau mu kwovijan ni chisak chitakedila kwaleta chisambu ni uumwing mukach mwau.—Midimu 15:22-31; 16:4, 5; Filipoi 2:2.

11. Nany usadidilay Kristu mulong wa kutakel chikumangen chend, ni mutapu ik tufanyidina kuman chirund chinech cha in Kristu azizidilau many?

¹¹ Mudi muchadinga kwisambishil kwa Ukristu, kachisak kakemp ka atuman azizidilau many asadil Chisak Chitakedila cha in kwilej a Kristu adia pa divu ilel. Kusutil ku “chikas chend cha katatuku” cha ulabu, Kristu, Mutu wa chikumangen, uyitakedil amakundj inay ashinshamena patakedilau mudimu wa Want. (Kuburik 1:16, 20) Mu rusangu ra mwom wend, Albert Schroeder, umwing wa mu Chisak Chitakedila wasadila mivu yivud ni wafila katat kamu ak, wafunda anch: “Chisak Chitakedila chikat kukumangan Diakasatu diawonsu pa rubing, chikat kusambish chikumangan nich malembil ni kwit umutakel wa mwiku utumbila wa Yehova. Asadining usu nakash chakwel kushinshikin anch mulong wawonsu wisambidinau ni mupak win wawonsu ukwatinau wambatanijadin nich Bibil, Dizu dia Nzamb.”b Tukutwish kuyichingejin in Kristu inay ashinshamena azizidilau many. Piur pa Chisak Chitakedila, tufanyidin kutesh chiyul cha kambuy Paul anch: “Yiziyilany awiy adia in kutakel en ni kwitudish kudi awiy, mulong adi in kulam a mipim yen.”—Hebreu 13:17.

Kumulimish Kashalapol Ushinshamena Muchifanyidina

12, 13. Mayingish ik ma Bibil mitufanyidina kulimishin chisak cha kashalapol muchifanyidina?

¹² Diyingish dijim dia kulimishin chisak cha kashalapol ushinshamena muchifanyidina, chidi mulong anch twamulimish, chakin kamu tumulimishin Nsalejend, Yesu Kristu. Paul wafunda piur pa antu azizidilau many anch: “Watazukau padingay pa wan udi muswik wa Kristu. En akulandany nich usey ukash.” (1 Korint 7:22, 23; Efesus 6:6) Chawiy lel, pitukata kuziyil mu kushinshaman ku umutakel wa kashalapol ushinshamena ni ku Chisak chend Chitakedila, tukat kumuziyil Kristu, Nsalejend a kashalapol. Kumulimish kwetu muchifanyidina kashalapol usadidilay Kristu mulong wa kulam yom yend yidia pa divu udi mulad wetwetu kwitiyij anch: “Yesu ndiy Mwant, ku uyaj wa Nzamb Tatuku.”—Filipoi 2:11.

¹³ Diyingish dikwau dia Bibil dia kumulimishin kashalapol ushinshimena didi anch in Kristu azizidilau many adia pa divu afanikeshin mu kulond kwa Bibil “tempel” mushichay Yehova mu ‘spiritu.’ Chidiau mwamu, awiy adi ‘atumbila.’ (1 Korint 3:16, 17; Efesus 2:19-22) Yesu wapana yom yend yawonsu yidia pa divu kudi chisak chinech cha tempel utumbila, charumburik anch mbil ni yisend kanang mu chikumangen cha Ukristu yidi ching kusu ya chisak cha kashalapol winou. Pa chinech, awonsu mu chikumangen amening anch chidi chisend chau chitumbila cha kulondul ni kukwash umutakel wa kashalapol ushinshamena ni Chisak chend Chitakedila. Chakin, “amikoku akwau” achimening anch didi dilau dijim kukwash chisak cha kashalapol mu kulam yom ya Nsalejau.—Yohan 10:16.

Kuyikwash Nich Kushinshaman

14. Mudi mwalonday Isay, mutapu ik ulondwilau amikoku akwau panyim chisak cha kashalapol uzizidilau many ni kusadil mudi ‘in mudimu akad kutambul difut’?

¹⁴ Kuziyil nich kwitudish kwa amikoku akwau kudi yid yizizidilau many ya Isarel wa mu spiritu asambela kukwisambin mu uprofet wa Isay anch: “[ Yehova] uyilejin in Isarel anch: ‘Mapit ma in Idjibit, ni ma in Etiopi makez kikal menen. Antu alemp a ku Saba akez kikal aswik en, ukez kayikasany mu jimbwambu. Awiy akez kakwasinany manungun pansh ni kwitiyil anch: “Komb Nzamb udi ni yenen, ndiy kwend Nzamb, kwikil kand mukwau.”’” (Isay 45:14) Mu chifanikesh, ilel amikoku akwau akat kulondul panyim chisak cha kashalapol uzizidilau many ni Chisak chend Chitakedila, end alondul umutakel wend. Mudi ‘in mudimu akad kutambul difut,’ amikoku akwau akat kusadil usu wau cha kwikatil ni mapit mau mulong wa kukwash mudimu wa kulejan pa mangand mawonsu, mudimu wapanay Kristu kudi in kwilej end azizidilau many adia pa divu.—Midimu 1:8; Kuburik 12:17.

15. Uprofet wa Isay 61:5, 6 wasambela kwisambin mutapu ik urund ukwikala pakach pa amikoku akwau ni Isarel wa mu spiritu?

¹⁵ Amikoku akwau asanger ni kujikitish mulong wa kumusadil Yehova mwishin mwa umutakel wa chisak cha kashalapol ni Chisak chend Chitakedila. Ij anch azizidilau many adi yid ya ‘Isarel wa Nzamb.’ (Galatia 6:16) Mu chifanikesh adi mudi “aeny” ni ‘angez’ asadila pamwing ni Isarel wa mu spiritu, nich musangar asadidil mudi in “kudim yir” ni in kudim ‘mitond ya nviny’ mwishin mwa umutakel wa azizidilau many, “in kupesh a [Yehova]” ni “atushalapol a Nzamb.” (Isay 61:5, 6) Akat kulejan nich mushiku rusangu ruwamp ra Want ni kwikadish antu a michid yawonsu in kwilej. Akat kukwash nich muchim wawonsu chisak cha kashalapol mu kufung ni kuyilam antu asu adia mudi amikoku.

16. Chom ik chikata kuyibachik amikoku akwau kumukwash nich kujijaman kashalapol ushinshamena ni kubabal?

¹⁶ Amikoku akwau ij anch atanyidinamu nakash mu usu usadilay kashalapol ushinshamena mulong wa kuyinkish yakudia ya mu spiritu pa chisu chiwanyidina. Nich kwikepish ij anch pakad kashalapol ushinshamena ni kubabal, kelap kwijik chom ap chimwing piur pa uyakin upandakena kuwap udia mu Bibil, mudi ukaleng wa Yehova, kutumb kwa dijin diend, Want wend, maur masu ni mangand masu, mupim, mwikadil wa afu, ni kumwijik nawamp Yehova, Mwanend, ni mwiku utumbila. Nich kujikitish ni kushinshaman, amikoku akwau ayikwashin “akadivar” a Kristu adia pa divu nich rukat mu chirung chinech cha nsudiel.—Mateu 25:40.

17. Chom ik chimena Chisak Chitakedila anch chidi cha usey kusal, ni yom ik tukushinshikina mu rusangu rambakedinap?

¹⁷ Chidiau akemp, in Kristu azizidilau kakutwishap kwikal mu yikumangen yawonsu mulong wa kutal mutapu ulaminau yom ya Kristu. Chawiy lel, Chisak Chitakedila chikat kuyitond amakundj mukach mwa amikoku akwau ni kuyitek atulam a mabiro ma mitiy, a madistrik, a minyimuku, ni a yikumangen ya Atuman a Yehova. Ov, mwikadil wetu pantaliken ni atufung inay asadina mwishin mwa Kristu ukwet usu pa kushinshaman kwetu kudi Kristu ni kudi kashalapol wend ushinshamena? Yawiy tukwisambina mu mutu wa mulong wambakedinap.

[Mazu madia kwishin kwa paj]

Kuchirikinamu

• Nany Ntakel wetu, ni yom ik yimekeshina anch wij yom yawonsu yisadikina mu yikumangen?

• Pa kusop “tempel”, ov, anany atanau asadila mudi kashalapol ushinshamena, ni yom ik yayinkishau?

• Mayingish ik ma Bibil madiaku ma kumukwashin kashalapol ushinshamena?

[Chipich chidia pa paj wa 25]

Mu “yom” yilaminay “mwin kulam” mudi yom ya mu spiritu, maprogram ma mu spiritu, ni mujikit wa kulejan

[Chipich chidia pa paj wa 26]

Amikoku akwau akwashin chisak cha kashalapol ushinshamena mu kulejan kwau nich mushiku