Mutapu Ik Tukutwisha Kurish Nau Ayilembil?
“Angel alika kulam want [ndond yau] wau, asha kwol kwau, ndiy wayiteka mu jimbwambu ja chikupu mwishin mwa mididim, ni kushik ku dichuku dijim dia kwimikish milong.”—YUDA 6.
1, 2. Yipul ik yidiaku piur pa Satan Djabul ni ayilembil?
KAMBUY Pita ubabeshin anch: “Babalany; mukankuny nen, Satan kamu, ukat kwonang mudi ntambu, wend uzomb ni kusot uwapidilay kudia.” (1 Pita 5:8) Piur pa ayilembil, kambuy Paul ulondil anch: “Am kinisotilip en wibombany nau ayilembil. Kiukutwishanyip kuna rupas ra Mwant ni kand rupas ra ayilembil. Kiukutwishanyip kudia ku mes ma Mwant ni kand ku mes ma ayilembil.”—1 Korint 10:20, 21.
2 Ov, Satan Djabul ni ayilembil adi anany? Kwisu kwadiokalau? Ov, Nzamb ndiy wayitanga? Usu wa mutapu ik ukwetau padi antu? Diking ik tukweta pantaliken ni Satan Djabul ni ayilembil?
Kwisu Kwadiokalay Satan ni Ayilembil?
3. Mutapu ik washikenay mwangel wa Nzamb ku kwikal Satan Djabul?
3 Kwisambishil kwin kamu kwa rusangu ra muntu, pasambishau antu mu chir cha Eden, mwangel umwing wa Nzamb wikala ntombuj. Ov, mulong wak? Mulong kasangerap ndond yend mu dirijek dia mwiur dia Yehova. Payitangau Adam ni Eve, mwangel winou wamana mutapu wa kupumbul kuziyil kwau ni difukwil diau kuyidiosh kudi Nzamb wakin ni kuyipwitin kudi ndiy. Pamubwambwilay Nzamb ni kuyishikij antu aad a kusambish ku kusal chitil, mwangel winou wiyikadisha Satan Djabul. Mu kusut kwa chisu, angel akwau andama mu wintombuj wend. Ov, mutapu ik?—Disambishil 3:1-6; Rome 5:12; Kuburik 12:9.
4. Chom ik chasalau angel amwing antombuj kurutu kwa Mabeb pa chirung cha Nowa?
4 Mifund yitumbila yitulejin anch kurutu kwa Mabeb ma pa chirung cha Nowa, angel amwing asambisha kuyisanger amband adinga pa divu mu mutapu wakad kufanyin. Mulong wa yitong yiyimp, Bibil ulondil anch: “An amakundj [a mwiur] a Nzamb ayimana an amband au antu anch akwet yifu ya ufun. Chad an amakundj a Nzamb ayatola an amband a antu akatau.” Kwatijan kwinoku kwadinga kuyimp, ni avala an adia oku antu oku angel ijikana anch Ayifuvu. (Disambishil 6:2-4) Yitang ya mu spiritu yamubwambwila Nzamb, yinunga ni Satan mu kumubwambwil Yehova.
5. Chom ik chayishikena antombuj chisu chaletay Yehova disheshik dia Mabeb?
5 Yehova paletay Mabeb pa mangand, Ayifuvu ni amakwau a chiuntu afa. Angel antombuj akarumuna kand mijimbu yau ni achirikina mwiur. Pakwez, katwishap kand kuchirikin “kwol kwau” kudi Nzamb. Pakwez, ayidjibwila “mwishin mwa mididim” bwi ya mu spiritu, yijimbwilingau anch Tartar.—Yuda 6; 2 Pita 2:4.
6. Ayilembil ayidimbining antu mutapu ik?
6 Kudiosh pashadishinau angel ayimp “kwol kwau,” awiy ikala ayilembil, ambay a Satan ni asambisha kusadil yisakin yend yiyimp. Kudiosh kamu pinipa, ayilembil kakwetingap kand usu wa kwikarumun mijimbu yau chakwel ikala kand antu. Pakwez, akutwish kuyibachik amakundj ni amband kusal yisal kushalijan yijondila ya masandj. Ayilembil ayidimbin kand antu kusutil ku ritiyij ra aspiritu ayimp, mudia yom mudi yip, vodu, ni utuk. (Kuvurik Yijil 18:10-13; 2 Jinsangu 33:6) Dikez dia angel ayimp didi dia chilik chimwing ni dia Djabul—disheshik dia chikupu. (Mateu 25:41; Kuburik 20:10) Pakwez, pa chisu chawiy chimwing, tufanyidin kwiman dang ni kurish nau. Chidi cha manangu anch tushinshikina mutapu udingay Satan mwin usu ni mutapu tukutwisha kurish nend nawamp ni ayilembil end.
Mutapu ik Udingay Satan Mwin Usu?
7. Usu ik ukwetay Satan piur pa mangand?
7 Satan ukat kumutwambilang Yehova kudiosh kamu pasak. (Jinswir 27:11) Ni ukwet usu padi antu avud. Yohan wa kusambish 5:19 ulondil anch: “Ngand ya kabuj yidi mu chikas cha Satan.” Chawiy chatwishay Djabul kumwoz Yesu nich kumwinkish ulabu ni uyaj wa “mant mawonsu ma mangand.” (Luka 4:5-7) Kambuy Paul ulondil piur pa Satan anch: “Pakwez anch Rusangu Ruwamp ritulejena arubwikin nich chitambal, arubwikin ching kusu kudi antu adia mwi njil ya kujiy. Antu inay kakat kwitiyijap mulong manangu mau amabwikin kal kudi Sakudimban [Satan], ndiy kamu [nzamb] uyikedila mangand minam. Ndiy uyikangeshina kuman chimunyik cha Rusangu Ruwamp ra uyaj wa Kristu, ndiy kamu ufanakena nend Nzamb.” (2 Korint 4:3, 4, MM) Satan udi “mukamakasu, ni samakasu mwin” pakwez ukat kwimekeshang mudi “mwangel wa kutok.” (Yohan 8:44; 2 Korint 11:14) Ndiy ukwet usu ni nkeu jiswirikina mulong wa kuyibwik anyikel a mangand ni antu au manangu. Nich jinsangu ja makasu ni ngany ni makasu ma relijon, wayidimbin kal antu.
8. Bibil ulejen ik piur pa usu wa Satan?
8 Usu ukwetay Satan wamekana patok pa chisu cha muprofet Daniel, mivu yitot yitan kurutu kwa Chirung Chetu. Yehova wamutuma mwangel umwing kulejan uruu wa kumukasikesh nich Daniel, mwangel winou amurishisha kudi “Muruu wa mwiur, mwin kulam want wa in Peris.” Mwangel ushinshamena amukangesha kuya machuku 21 chad “Mikayel, ndiy kamu mukurump wa aruu awonsu a mwiur,” weza kumukwash. Rusangu riner risambidin kand “muruu wa mwiur [chilembil] ulamina want wa in Grek.” (Daniel 10:12, 13, 20) Kuburik 13:1, 2 umulejen Satan mudi “nnak mujim” umwinkishina nnam wa chidiany wa chipolitik “usu, ni nkwas, ni mpak ya kuziyish [ulabu ujim].”
9. In Kristu akat kurish ni nany?
9 Chidiap cha kushimok anch kambuy Paul wafunda anch: “Kurish kwetu kikudip kwa mbij ni mash, pakwez kudi kwa kurish ni mant ni mausu, ni ant a mangand ma mididim, tukat kurish ni mizwizwimb yiyimp ya mu jindond ja mwiur.” (Efesus 6:12) Djat ni ilel, usu wa ayilembil adia mwishin mwa ulabu wa Satan Djabul ukatap kumekan ku mes, pakwez akat kuusadil padi anyikel a chiuntu ni padi antu avud, end ayibachik kusal yisal ya kujipijan kwa yisak, kwovishan mwong, ni kujipan. Tushinshikinany katat mutapu tukutwisha kurishish nawamp mausu minam makash ma mu spiritu.
Diking ik Tukweta?
10, 11. Mutapu ik tukutwisha kumurishish Satan ni angel end ayimp?
10 Tukutwishap kumurishish Satan ni angel ayimp nich usu wetu ayinetu, wikala wa ku mujimbu ap wa mu manangu. Paul utuyudil anch: “Ikalany akash mu Mwant, ni mu usu wa dikand diend.” Tufanyidin kuchinin kudi Nzamb chakwel atukinga. Paul uwejidinaku kand anch: “Djalany yom ya njit yawonsu ya Nzamb, chakwel ukutwishany kwiman kurutu kwa yoziu ya Satan . . . Djalany yom yawonsu ya njit ya Nzamb, chakwel ukutwish kwimanany mu dichuku diyimp, ni anch wapwishilany kal yawonsu chad kwiman.”—Efesus 6:10, 11, 13.
11 Tupamp twaad, Paul wayikasikesha ambay nend in Kristu kudjal “yom yawonsu ya njit ya Nzamb.” Dizu “yawonsu” dirumburikin anch kwikil ukweta michim yaad ukutwisha kurish nich kusalakat kwa ayilembil. Chawiy lel, yisu yom ya njit ya mu spiritu yiyikasikeshinau in Kristu ilel kwikal nich mulong wa kuyirishish ayilembil?
Mutapu ik Tukutwisha ‘Kwiman Dang’?
12. Mutapu ik udjitiningau in Kristu uyakin mu jimbund jau?
12 Paul urumburil anch: “Chawiy imanany dang. Ikasany uyakin mwi mbund kwikal mudi nshipu. Djalany kutentam kwikal mudi rukibu rikasinau pa ntul.” (Efesus 6:14, MM) Yom yaad ya njit yijimbwilau mu verse winou yidi nshipu, ap anch mukab, ni rukibu. Isalay ufanyidin kukas mukab wend fwe mulong wa kulam mbund yend (mwivumu, parutu, ni mwishin mwa divumu) ni kusend mpak yend ya musamun yilimina. Chilik chimwing, tufanyidin kwikas fwe uyakin wa Bibil, mudi mukab, chakwel tushakama kwambatan nich. Ov, tukweting program wa kutang Bibil pichuku-pichuku? Ov, dijuku diawonsu dikweting program winou? Ov, tukweting chaku cha kushinshikin mufund wa dichuku mu dijuku? Chikwau kand, ov, twij yirumburil ya katat yidia mu mikand ya “Kashalapol ushinshamena ni kubabal”? (Mateu 24:45) Ang mwamu tusadila, tukat kwikasikesh kusadil chiyul cha Paul. Tukwet kand maband video ni ma DVD makutwisha kutwinkish umutakel wa Bibil. Kudandamen mu uyakin kukutwish kutukwash kukwat yiyul ya manangu ni kutuking ku kulondul njil yiyimp.
13. Mutapu ik tukutwisha kuchidij rudung retu ra chifanikesh?
13 Rikibu radinga mulong wa kulam ntul, rudung, ni yid yikwau ya usey nakash ya isalay. Mwin Kristu ukutwish kuchidij rudung rend ra chifanikesh—chidiay mu muchim wend—anch wakat nakash kutentam kwa Nzamb ni kulamat ba ku yijil yitentamina ya Yehova. Rikibu ra chifanikesh rikat kutuking ku kupipesh Dizu dia Nzamb. Anch twakis “yom yiyimp, [ni kukat] yom yitentamina”, tukulam mend yetu “ku jinjil jawonsu jiyimp.”—Amos 5:15; Kuseng 119:101.
14. Kudjal “yisapat ya kwirijek kwa kulejan rusangu ruwamp ra chisambu ku mend yen” kurumburikin ik?
14 Mend ya amasalay a in Rome yadinga mu yisapat yiwamp mulong wa kuya maweny malemp pamwing ap yitot ya makilometre ma jinjil jadinga jinyingumukina jingand jadinga mu winyikel wa in Rome. Ov, mazu “djalany yisapat ya kwirijek kwa kulejan rusangu ruwamp ra chisambu ku mend yen” marumburikin ik kudi in Kristu? (Efesus 6:15) Marumburikin anch tudi irijekina mulong wa kusal. Tudi tayad kulejan rusangu ruwamp ra Want wa Nzamb chisu chin chawonsu chifanyidina. (Rome 10:13-15) Kusal kwetu nich mushiku mujikit wa Ukristu kudi diking ku “yoziu” ya Satan—Efesus 6:11.
15. (a) Chom ik chilejena anch rikibu rijim ra ritiy ridi ra usey nakash? (b) ‘Jinseu jikweta kasu’ jikutwish kwikal nich usu ik wa kushesh ritiy retu?
15 Paul udandamedin anch: “Piur pa yom yawonsu, tambulany kand rikibu ra ritiy, chakwel ukez kwakany nich jinseu jiyimp ja Satan jikweta kasu kakasidilauku.” (Efesus 6:16) Chiyul cha kutambul rikibu rijim ra ritiy chisambishin nich mazu “piur pa yom yawonsu,” mulong wa kulejan anch chom chinech cha njit chidi cha usey nakash. Ritiy retu rifanyidinap kukepaku. Mudi rikibu rijim, ritiy retu rikat kutuchidij ku “jinseu . . . ja Satan jikweta kasu.” Jinseu jinej jifanikeshin ik ilel? Jikutwish kwikal masal masansena, makasu, ni kudimban kwa akankuny ni antombuj asotina kuziyish ritiy retu. “Jinseu” jinej jikutwish kand kwikal yoziu ya kusot kwikal nich mapit mavud, yom yikutwisha kutushikij ku kwikal akwatikena nakash nich kulandol yom yivud ni kutushikij ap ku kwimburij antu awidila kal mu mwom wa kusot kwimekesh kudi antu. Pamwing ap atunga kal yikumbu yijim-yijim ya ufun ni kuland motak ap kudjal yileng ya usey nakash ni kudjal masun ma milad ya katat. Yikalap nchik yisadinau antu akwau, tufanyidin kwikal nich ritiy rikash ra kwiyep “jinseu . . . jikweta kasu.” Mutapu ik tukata kukudish ni kulam ritiy rikash?—1 Pita 3:3-5; 1 Yohan 2:15-17.
16. Chom ik chikutwisha kutukwash kukudish ritiy rikash?
16 Tukutwish kumushejin Nzamb kusutil ku kwilej Bibil pakad kujing ni ku malembil makin madiokila ku muchim. Tukutwish kumulembil Yehova chakwel atwinkisha ritiy rikash ni tusala kukwatijan nich malembil metu ni yisal yifanyidina. Chilakej, ov, tukat kwirijek chakin kamu mulong wa Dilejan dia Chinong cha Kalam nich rutong ra kwakul? Ritiy retu rikez kwikal rikash anch twilejin Bibil ni mikand yengamidina pa Bibil.—Hebreu 10:38, 39; 11:6.
17. Mutapu ik tukutwisha kutambul “mpup ya dipandish”?
17 Paul upwishin yirumburil yend piur pa yom ya njit ya mu spiritu nich chiyul chinech anch: “Tambulany mpup ya dipandish ni mpak ya musamun ya [s]piritu, diawiy dizu dia Nzamb.” (Efesus 6:17) Mpup yadinga ni kuchidij mutu ni wong wa isalay, ndond yijim ya kukwatin mipak. Chilik chimwing, ruchingej retu ra Ukristu rikat kuchidij usu wa manangu metu. (1 Tesalonika 5:8) Pa ndond pa kwizwish mu manangu metu ntong ja mangand ni yilat ya mapit, tufanyidin kwasin yitongijok yetu padi Nzamb wetu utwinkishina ruchingej, mudi mwasalay Yesu.—Hebreu 12:2.
18. Ov, mulong wak kitufanyidinap kudiburil program wetu wa kutang Bibil chisu ni chisu?
18 Diking dietu dia nsudiel ku usu wa Satan ni ayilembil end didi Dizu dia Nzamb, ap anch uruu, wafundau mu Bibil. Dined didi diyingishin dikwau dimekeshina mulong wak tufanyidinap kudiburil program wetu wa kutang Bibil chisu ni chisu. Ronganyin rakin ni rijim ra Dizu dia Nzamb rikat kutuchidij ku makasu ma Satan ni ku jinsangu ja makasu ja ayilembil ni mazu mayimp ma in kupumbwok.
“Lembilany Yisu Yawonsu”
19, 20. (a) Chom ik chimuchingedina Satan ni ayilembil end? (b) Chom ik chikutwisha kutukasikesh mu spiritu?
19 Disheshik dia Satan, dia ayilembil end, ni dia mangand mayimp didi piswimp. Satan wij anch kwamushal kal “chisu chikemp kusu.” Wovil ujim nakash ni urishin njit nau antu “akata kulam yijidik ya Nzamb ni kusend uman wa Yesu Kristu.” (Kuburik 12:12, 17) Chidi cha usey anch tumurishisha Satan ni ayilembil end.
20 Tusanger mudi ik mulong wa dibabesh dia kudjal yom yawonsu ya njit ya Nzamb! Paul upwishin minsamb yend ya yom ya njit ya mu spiritu nich chiyul chinech: “Ni kudandamen kulembilang ku tupamp twawonsu mu Spiritu, ni kulam kudandamen ni kuyilembidil in Kristu awonsu.” (Efesus 6:18) Malembil makutwish kutukasikesh mu spiritu ni kutukwash kushal achila ku mes. Tulamany mazu ma Paul mu muchim ni kudandamen kulembil, mulong chinech chawiy chikutukwasha kumurishish Satan ni ayilembil end.
Yom ik Wilejang?
• Kwisu kwadiokalay Satan nau ayilembil end?
• Usu ik Ukwetay Djabul?
• Diking ik tukweta pantaliken nend Satan ni ayilembil end?
• Mutapu ik tukutwisha kudjal yom yawonsu ya njit ya Nzamb?
[Chipich chidia pa paj wa 17]
“An amakundj a Nzamb ayimana an amband au antu”
[Chipich chidia pa paj wa 19]
Ov, ukutwish kujimbul ni kurumburil yom musamban ya njit ya mu spiritu?
[Chipich chidia pa paj wa 21]
Ov, kusal mijikit yiney kuding nchik diking pantaliken nend Satan ni ayilembil end?