Usu Ukwetau Angel Padi Antu

“Kwinyim kwa yom yiney naman mwangel mukwau ushirikin mwiur, ukwet usu ujim nakash . . . Ndiy watoya ni dizu dikash, walond anch: Wawa, wawa, Babilon mujim!’”—KUBURIK 18:1, 2.

1, 2. Chom ik chimekeshina anch Yehova ukat kuyisadil angel mulong wa kuwanish rusot rend?

PADINGAY pa ditung dia Patimos, ipal a kambuy Yohan wamana yishimushimu ya uprofet. Wamana yishiken yamushena padingay “mu [s]piritu” pa “dichuku dia Mwant.” Dichuku dined diasambisha pamudishau Yesu Kristu Want mu muvu wa 1914 ni diyil djat ni kwisudiel kwa Winyikel wend wa Mivu Kanan.—Kuburik 1:10.

² Yehova Nzamb kamwinkishap kapamp kamwing Yohan kuburik kwinoku. Wasadila njil kanang. Kuburik 1:1 ulondil anch: “Kuburik kwa Yesu Kristu kwamwinkay Nzamb kumekesh kudi atushalapol end yom yisotila kwez kumekan swa; ndiy wamutuma mwangel wend wachimekesha kudi kashalapol wend Yohan.” Yehova, kusutil kudi Yesu, wamusadila mwangel chakwel amwijikisha Yohan yom yamushena ya pa “dichuku dia Mwant.” Kupwa, Yohan ‘wamana kand mwangel mukwau ushirikin mwiur, ukwet usu ujim nakash.’ Mudimu ik wadingay nich mwangel winou? “Ndiy watoya ni dizu dikash, walond anch: ‘Wawa, wawa, Babilon Mujim waumbwok.’” (Kuburik 18:1, 2) Mwangel winou ukweta usu ujim nakash wadinga ni chisend cha kwijikish kuwa kwa Babilon Mujim, want wa mangand mawonsu wa yikumbu ya nzamb ya makasu. Chawiy lel, kwikil kwidjidjek anch Yehova ukat kuyisadil angel mu mutapu ujim mulong wa kuwanish rusot rend. Kurutu kwa kushinshikin kachom ni kachom ka mudimu wa angel mu rutong ra Nzamb ni usu ukwetau padi etu, el tushinshikinany musul wa yitang yiney ya mu spiritu.

Mutapu ik Angel Washikenau Kwikalaku?

3. Chitongijok ik chiyimp chikwetingau antu avud piur pa angel?

³ Tutikit twa antu ilel itiyijin anch angel adingaku. Pakwez antu avud akwet yitongijok yiyimp piur pau ni pa musul wau. Chilakej, antu amwing a yikumbu ya nzamb atongining anch, ang mukatish nau wafa, muntu winou amutazukin kudi Nzamb ni ukwikal mwangel. Ov, mwamu mufundishina Dizu dia Nzamb piur pa uumb, kwikalaku, ni rutong ra angel?

4. Bibil utulejin ik piur pa musul wa angel?

⁴ Mwangel wa kusambish ku usu ni ulabu—mwant wa angel—amutazukining anch mwangel mujim Mikael. (Yuda 9) Ndiy kamu Yesu Kristu. (1 Tesalonika 4:16) Pasutil kal mivu yivud, pasotay Yehova kwikal Sakatang, chitang cha kusambish chatangay wadinga Mwan ikundj winou mwangel. (Kuburik 3:14) Kupwa, kusutil kudi Mwan ikundj winou wa kusambish, Yehova watanga yitang yikwau yawonsu ya mu spiritu. (Kolosai 1:15-17) Pisambinay piur pa yitang yiney ya angel mudi anend, Yehova wamwipula nshakur Yob anch: “Kwisu kuwadinga panatanga divu? Nleja, anch wij. . . . Nany wateka diyal dia kusambish pa dikonk diau, pasangarau atutumbu a pamanch pamwing, ni an amakundj awonsu a Nzamb azangama mazang?” (Yob 38:4, 6, 7, NW) Choviken patok anch angel adi yitang ya Nzamb ni eza kwikalaku mivu yivud kurutu kwa antu.

5. Ov, mutapu ik uyitenchikinau angel?

⁵ Mukand wa kusambish wa Korint 14:33, (Manswik Masu) ulondil anch: “Nzamb kadiap Nzamb wa kanvundangesh, pakwez udi Nzamb wa chisambu.” Chawiy, Yehova wayitenchika an end amakundj a mu spiritu mu yisak yisatu yijim: (1) aserafin, asadilinga mudi atushalapol a ditand dia Nzamb, akat kulejan kutumb kwend, ni akat kuyilam antu end ishitwila mu spiritu; (2) asherub, akata kuchidij ukaleng wa Yehova; ni (3) angel akwau asadila rusot rend. (Kuseng 103:20; Isay 6:1-3; Ezekiel 10:3-5; Daniel 7:10) Mu mitapu ik yimwing yitang yiney ya mu spiritu yikweta usu padi antu?—Kuburik 5:11.

Mudimu ik Usadiningau Angel?

6. Mutapu ik Yehova wayisadila asherub mu chir cha Eden?

⁶ Verse wa kusambish wisambidina yitang yiney ya mu spiritu udi Disambishil 3:24, mututangina anch: “Nzamb wamwopata ikundj, chad wateka [asherub] ku mutambu wa kwingangel, [ kwa chir Eden] ni mpak ya musamun ya mizwizu ya kasu yend yipay mulong wa kulam njil ya mutond wa mwom.” Asherub inay amukangesha Adam ni Eve kwandam kand mu chir mwadingau. Chom chinech chasadika kwisambishil kwa rusangu ra muntu. Mudimu ik usadiningau angel kudiosh kamu pinipa?

7. Kurumburik kwa mazu ma jindim ja kusambish mulong wa dizu “mwangel” kulejen ik piur pa mudimu usadiningau angel?

⁷ Bibil uyijimbwil angel piswimp tupamp 400. Mazu ma Hebreu ni Grek mulong wa “mwangel” akutwish kumakarumun anch “muruu.” Angel adinga ni kuyisadil mudi njil ya Nzamb ya kwisamb ni antu. Mudi muchilejenau mu mapagraf maad ma kwisambishil kwa rusangu riner, Yehova wamusadila mwangel mulong wa kumwinkish kambuy Yohan uruu.

8, 9. (a) Ov, mutapu ik kwadinga nich usu kuyendil kwayendilau Manowa ni mukajend kudi mwangel? (b) Chom ik chifanyidinau anvaj kwilejin ku rusangu ra Manowa ni mwangel wa Nzamb?

⁸ Angel akat kuyisadil kand mulong wa kuyikwash ni kuyikasikesh atushalapol a Nzamb adia pa divu. Chilakej, pa chirung cha Ankalansambu mu Isarel, Manowa ni mukajend mumb asota nakash kwikal ni mwan. Yehova wamutuma mwangel wend kumulej mukajend a Manowa anch ukumuval mwan ikundj. Rusangu ritulejin anch: “Tal, ukwimish, ni chakin kamu ukez kumuval mwan ikundj, ni diyemb kidikezap kusut pa mutu wend, mulong mwan udi Waurilau wa Nzamb kudiokal pakezay kubudik mwivumu; ni ndiy ukez kikal ntakel wa kumupandish Isarel mu chikas cha in Filistin.”—Ankalansambu 13:1-5, NW.

⁹ Chakin kamu mukajend a Manowa wavala mwan ikundj, Samuson, muntu wijikana nakash mu rusangu ra Bibil. (Ankalansambu 13:24, NW) Kurutu kwa mwan kuvadik, Manowa wita chakwel mwangel achirik kand chakwel eza kuyilej yifanyidinau kusal mulong wa kumulil mwan winou. Manowa wipula anch: “Mwom wa mwan ukez kwikal wa mutapu ik, ni mudimu ik ukezay kusal?” Mwangel wa Yehova wachirikina kand malejan mamulejay mukajend a Manowa. (Ankalansambu 13:6-14) Manowa wova kamu usu! Ilel unou angel kakatap kand kuyendil antu mu mutapu winou, pakwez, mudi Manowa, anvaj akutwish kukimb malejan ma Yehova mulong wa kuyilil anau.—Efesus 6:4.

10, 11. (a) Mutapu ik wiyovay Elisha ni kashalapol wend payombau bwalikan kudi amasalay in Siria? (b) Kushinshikin kwetu chishiken chinech kutukwash nchik?

¹⁰ Kwadinga chilakej cha usu nakash cha ukwash wa angel pa machuku ma muprofet Elisha. Elisha wading ni kushakam mu Dotan, ul wa mu Isarel. Dichuku dimwing kashalapol wa Elisha wabudika pa budid ni watala pol, wamana anch ul wawonsu awombilamu bwalikan nich atubar ni matemb ma njit. Mwant wa in Siria wayituma amasalay akash kwez ni kumukwat Elisha. Mutapu ik wasalay nkwash a Elisha? Wom wamukwata, wazala dak-dak-dak, watoya anch: “A, mwant wam! Tukusal nchik?” Ndiy wamana anch kwapwa kal. Pakwez Elisha wamwakula anch: “Kangal wov wom, mulong adia netu adi avud kuyipandakanamu adia pamwing nau.” Chom ik chasotay kulond?—2 Ant 6:11-16, NW.

¹¹ Elisha wadinga wij anch yisak ya angel yadingaku mulong wa kumulam. Pakwez, kashalapol wend kamanap chom. Chawiy “Elisha wasambisha kulembil ni kulond anch: ‘A Yehova, muburilap amboku mes, chakwel amana.’ Kapamp kamwing Yehova waburila mes ma kashalapol, chad wamana; ni tal! mutambu wawonsu wa mikandu wadinga wizwil bwafu nich atubar ni matemb ma njit ma kasu mamwombinamu Elisha.” (2 Ant 6:17) Kashalapol watwisha kuyiman yisak ya angel. Nich kuman kwa mu spiritu, niyetu tukutwish kuyiman angel, awonsu mwishin mwa umutakel wa Yehova ni Kristu, akat kuyikwash ni kuyilam antu a Yehova.

Ukwash wa Angel pa Chisu cha Kristu

12. Mwangel Gabriel wamukwasha nchik Mariy?

¹² Tushinshikinany ukwash watambulay mujik mwin Yuda Mariy pateshay uruu anch: “Ey ukez kimish, mwivumu mwey mukez kabudik mwan, akumupil dijin anch Yesu.” Kurutu kamu kwa kupan uruu winou ushimokishina, mwangel Gabriel, watumau kudi Nzamb, wamwela anch: “Kangal wov wom Mariy; mulong ey watap kal nend Nzamb dilau.” (Luka 1:26, 27, 30, 31) Mazu minam ma kwitiyik kudi Nzamb mamujamisha ni kumukasikesh Mariy!

13. Angel amukwasha Yesu mutapu ik?

¹³ Chilakej chikwau cha ukwash wa angel chashikena kupwa kwa Yesu kujijaman mu yoziu yisatu yasotay Satan kumwoz mwi mpay. Rusangu ritulejin anch kwisudiel kwa kupakiu, “Satan wamusha; kukashimuk angel eza amukwash.” (Mateu 4:1-11) Chom mudi chinech chashikena kand uchuku wa dichuku diafay Yesu. Mu runeng rikash, Yesu wasa manungun ni wasambisha kulembil, wend walond anch: “‘Tatuku, anch ey wakat ridiosha rupas riner kudi am; pakwez achisala mudi muukatila ey kangal munikatila am.’ Kudiay ndiy kwamekana mwangel wadioka mwiur, wend umukasikesh.” (Luka 22:42, 43) Pakwez, ukwash wa mutapu ik wa angel tukweta ilel?

Ukwash wa Angel mu Yisu ya Katat

14. Kuzengol ik kwajijamenau Atuman a Yehova mu yisu ya katat, ni yom ik yabudikinaku?

¹⁴ Anch twashinshikin rusangu ra katat ra mudimu wa kulejan wa Atuman a Yehova, ov, tumenap ukwash wa angel? Chilakej, antu a Yehova atwisha kujijaman ku kuzengol kukash kwa in Nazi mu Allemagne ni mwi Mputu wa Kurand kurutu ni kupwa kwa Njit ja Mangand ja 2 (1939-1945). Mu winyikel wa ant in kumeshan mar wa in Katolik (Fascisme Catholique) mu Italie, mu Espagne, ni mu Portugal, chayifanyidina kujijaman chisu chilemp mulong wa kuzengol. Ni mu kusut kwa makum ma mivu, ajijamana mu kuzengol mwi ngand yadinga pasak Union Soviétique ni mwi ngand jadinga ku mutambu wa Union Soviétique. Chilakej chikwau chakad kutwish kuvuramen chidi cha kuzengol kwayizengolau Atuman mwi ngand jimwing ja mu Afrik.a Mu yisu ya katat, atushalapol a Yehova ayizengodil nakash mwi ngand ya Georgie. Satan wasadil yawonsu yikutwishay mulong wa kunongish mujikit wa Atuman a Yehova. Pakwez, atuman chisadinau ditenchik, apanda ku rupompat riner ni aya kal kurutu. Chidi mwamu mulong wa angel atulamin.—Kuseng 34:7; Daniel 3:28; 6:22.

15, 16. Ukwash ik wa angel utambwilingau Atuman a Yehova mu mujikit wau wa pa mangand mawonsu?

¹⁵ Atuman a Yehova ij anch mudimu wau udi wa kulejan rusangu ruwamp ra Want wa Nzamb pa mangand mawonsu ni kuyikadish in kwilej kusutil ku kuyifundish antu asangaredina uyakin wa Bibil kwawonsu-kwawonsu kudiau. (Mateu 28:19, 20) Pakwez, ij kamu nawamp anch kakutwishap kusal mudimu winou pakad ukwash wa angel. Chawiy lel, yilondilau mu Kuburik 14:6, 7 yikadil kal musul wa dikasikesh. Tupatangin anch: “Namumana [kambuy Yohan] mwangel mukwau ukat kutwik pakach pa diur, ukwet rusangu ruwamp ra chikupu rayilejay asokilinga pansh, ni kudi michid yawonsu, ni majuku, ni jindim, ni antu. Ndiy walonda ni dizu dikash anch: ‘Mwovany Nzamb wom, umwinkany uyaj; mulong muten wa kwimikish kwend wez kal. Mwifukwilany ndiy watanga diur ni divu ni karung, ni misul ya mem.’”

¹⁶ Mazu minam movikena patok malejen anch mudimu ujim wa Atuman a Yehova wa kulejan pa mangand mawonsu ukwet ukwash wa angel ni akat kuutakel. Yehova ukat kuyisadil angel end mulong wa kuyitakel antu akin kudi Atuman end. Angel ayitakela kal Atuman kudi antu afanyidina. Chinech chawiy chimekeshina mulong wak chisadikininga mwamu yisu yivud—mudi mu kutanijan kusu— Kaman wa Yehova ukutwish wasankanijan ni muntu pa chisu chin kamu chidiay mu mwikadil ukash ni paswiridinay ukwash wa mu spiritu.

Mudimu Ujim Nakash Ukusalau mu Machuku Madia Kurutu

17. Chom ik chayishekena in Asiria payandaminau kudi mwangel umwing kusu?

¹⁷ Kuwejin pa kusadil kwau mudi aruu ni in kupan ukwash wa kuyikasikesh in kumwifukwil Yehova, angel akat kuwanyish kand rutong rikwau. Pasak, angel adinga ni kulejan mazu ma dirumburish ma Nzamb. Chilakej, mu chitot cha chinan K.C.C., antu adinga mu Yerusalem ayikwatisha mwong kudi yisak ya amasalay a in Asiria. Mutapu ik wasalay Yehova? Ndiy walonda anch: “Chakin kamu nikuuchidij musumb winou mulong wa kuupandish mulong wamam amwinam ni mulong wa David kashalapol wam.” Rusangu ra Bibil ritulejin chashikena anch: “Pa uchuku winiwa mwangel wa Yehova wabudika ni wayijipa antu tunan chitot ni makun chinan ni atan mu chibeng cha in Asiria. Palankau antu pamanch nakash, kutal, awiy awonsu adinga yital ya afu.” (2 Ant 19:34, 35, NW) Amasalay a antu kakwetap usu anch twayisikej nich usu wa mwangel umwing kusu!

18, 19. Mudimu ik ujim ukezau kusal angel ku machuku ma kurutu madia piswimp ap, ni ukez kwikal nich chibudikin ik padi antu?

¹⁸ Angel akez kushikij dirumburish dia Nzamb ku machuku ma kurutu madia piswimp ap. Piswimp kamu ap, Yesu ukwez “ni angel end a usu mu mizwizu ya kasu.” Mudimu wau ukez kwikal wa kulet “[ kufundakesh] kudi awiy akad kumwijik Nzamb, ni kudi awiy akad kuziyil katumb kawamp ka Nsalejetu Yesu.” (2 Tesalonika 1:7, 8) Chisal chinech chikez kwikal nich usu padi antu! Antu alikina kwitiyij rusangu ruwamp ra Want wa Nzamb rilejenau katat pa mangand mawonsu akez kusheshik. Ching kusu antu amukimbina Yehova, akimbina kutentam, ni kwikepish awiy akeza ‘kukwasinik ku kadimu pa dichuku dia ujim wa Yehova’ ni akezau kuchidij.—Sofoniy 2:3.

¹⁹ Tukutwish kujikitish anch Yehova ukat kuyisadil angel end akweta usu ujim mulong wa kuyikwash ni kuyikasikesh in kumwifukwil end adia pa divu. Kutesh kwetu mudimu usadilau angel mu rutong ra Nzamb kukat kulet rongoj pakampwil, mulong kudi angel amubwambwila Yehova ni atakedinau kudi Satan. Mutu wa mulong wambakedinap ou ukez kwisambin chikutwishau kusal in Kristu akin mulong wa kwichidij ayinau pantaliken nich usu ukash wa Satan Djabul ni ayilembil end.

[Mazu madia kwishin kwa paj]

Yom ik Wilejang?

• Mutapu ik washikenau angel kwikalaku?

• Mutapu ik wayisadilau angel pa chisu chafundau Bibil?

• Kuburik 14:6, 7 ujingunin chom ik piur pa mujikit wa angel ilel?

• Mudimu ik ujim ukusalau angel mu machuku ma kurutu madia piswimp ap?

[Chipich chidia pa paj wa 13]

Manowa ni mukajend ayikasikesha kudi mwangel

[Chipich chidia pa paj wa 15]

“Adia netu adi avud kuyipandakanamu adia pamwing nau”