Mar Mawonsu Makupwa Katat Kamu Ak!

“Ndiy udi diyal, mudimu wend uwanyidin”—KUVURIK YIJIL 32:4.

1, 2. (a) Ov, mulong wak witiyijin nich usey ruchingej ra kushakam chikupu? (b) Yom ik yiyikangeshina antu avud kumwitiyij Nzamb ukanina yom yiwamp mulong wa machuku ma kurutu?

OV, UKATINING kutongin mutapu ukeza kwikal mwom mu Paradis? Pamwing wimen amwiney mutapu utentishina mangand ni kwilej piur pa milad kushalijan ya yitang yikweta mwom. Ap pamwing utongidin pa musangar ukeza kwikal nich piukeza kusal ni antu akwau mulong wa kulam divu ni kukwash kudikarumun dikal dia ufun pa mangand mawonsu. Ap ukutwish kutongin pa nkeu jiukeza kukudish mu ukaliweny, mu kutung, mu kuwang, ap mu yom yikwau yiwakada kutwish kusal ilel mulong wa kuburen chisu mu mwom wa katat ukash. Oku, ukwet ruchingej ra mwom ritazukinay Bibil anch “kupand kwakin”—mwom mudi muukatilay Yehova anch twikala nich, nich chitong cha uchikupu.—1 Timote 6:19.

² Chidi cha musangar ni chisend chamushena kuyilej antu akwau ruchingej riner rimedina pa Bibil, ov, kimwawiyap? Pakwez, antu avud, alikin kwitiyij ruchingej riner. Alondining anch ridi kwau chitong cha mwamu, chilat chakad kutwish kusadik chikwetau ayisup. Chikat kuyikasiken kand kumwitiyij Nzamb ukanina mwom wa chikupu mu Paradis. Ov, mulong wak? Chikata kuyikangesh amwing kwitiyij udi mulong wa kwikalaku kwa uyimp. Alondining anch, anch Nzamb udiaku, udi mwin dikand diawonsu ni mwin rukat, chitwishikinap kurumburil kwikalaku kwa uyimp ni mar mu mangand. Alondining kand anch, chitwishikinap kwikala Nzamb witiyijina uyimp—anch udiaku, komb kadiap mwin dikand diawonsu ap kakatap kutubangin. Kudi antu amwing, yitongijok yiney yiding yovikena nawamp ni yakin. Satan ukwet chakin kamu nkeu ja kupuputish manangu ma antu.—2 Korint 4:4.

3. Chipul ik chikash tukutwisha kuyikwash antu kwakul, ni mulong wak yetu kusu tukutwisha kuyikwash?

³ Chitudia Atuman a Yehova, tukwet chisend cha pakampwil cha kuyikwash antu adimbinau kudi Satan ni ku manangu ma mangand minam. (1 Korint 1:20; 3:19) Twij mulong wak ulikinau antu avud kwitiyij kushilamu kudia mu Bibil. Mulong kamwijap kwau Yehova. Pamwing ap kijap dijin diend ni chidirumburikina, ap ij yom yikemp ap kijap chom ap chimwing piur pa ngikadil yend ap piur pa rusangu rend ra kuwanyish yom yashilayimu. Etu tuyukin kwijik yom yiney. Chisu ni chisu, chiwapin anch tushinshikina mutapu tukutwisha kuyikwash antu akweta “ronganyin ra mididim” chakwel atana chakul ku chimwing cha yipul yikash yikatau antu kwiyipul, “Mulong wak ulikidinay Nzamb uyimp ni mar?” (Efes 4:18) Cha kusambish tukushinshikin mutapu uwamp wa kutan chakul. Kupwa tukwisambin mutapu umekena ngikadil ya Yehova mu mutapu wapwishay mulong wa uyimp.

Mutapu Uwamp wa Kwakul ku Chipul Chinech

4, 5. Chom ik tuswiridina kusambel kusal ang muntu wipul chipul anch mulong wak ulikidinay Nzamb mar? Rumburil.

⁴ Anch muntu wipul anch, mulong wak ulikidinay Nzamb mar, mutapu ik tukumwakula? Tukutwish kwikal nich chaku cha kumwinkish kapamp kamwing yirumburil, kusambish nich yom yasadika mu chir cha Eden. Yisu yimwing, chiding chiwamp kusal mwamu. Pakwez, chidi cha usey kusadil dizu dia manangu. Chitwishikin pamwing ap kutek mufulandal wa mambamb. (Jinswir 25:11; Kolosay 4:6) Tushinshikinany manans masatu makutwisha kutukwash kurutu kwa kwakul ku chipul.

⁵ Dia kusambish, anch muntu manangu mamurumbangen mulong wa kuvulijan kwa uyimp mu mangand, chitwishikin pamwing ap uyimp umukwatin ap uyikwatin akatish nend. Chawiy, chikutwish kwikal cha manangu, kumumekeshin riy rakin ni kwitek pa ndond yend. Kambuy Paul wayiyula in Kristu anch: “Dilany nau akudila.” (Rom 12:15) Kumekesh riy, ap anch “kwitek pa ndond yend,” kukutwish kumubachik muntu. (1 Pita 3:8) Ang waman anch tumubangidin, chakin kamu ukuta matu ku yitulondila.

6, 7. Ov, mulong wak tufanyidina kumujikitish muntu wakin wipwila chipul chikash cha mu spiritu?

⁶ Dia kaad, tukutwish kumujikitish muntu mulong wa uyakin wend wa kwipul chipul chinech. Antu amwing alondining anch mulong akat kurish nich yipul yiney, chawiy kakwetap ritiy ap alikin kumulimish Nzamb. Pamwing ap akutwish kwikal antu alejau nakash kudi amakurump a marelijon. Pakwez, kwipul yipul yiney kudingap chisu chawonsu uman wa kuburen ritiy. Oku, ap antu ashinshamena a pa chirung chafundau Bibil ipula yipul mudi yiney. Chilakej, nfund a kuseng David wipula anch: “A [Yehova], mulong ik wiminy kulemp? Mulong ik ukajingama mu yisu ya milong?” (Kuseng 10:1) Chawiy chimwing, muprofet Abakuk niyend wipula anch: “A! [Yehova], nikat kukutazuk mulong wa kutukwash, pakwez ey winteshilap. Ov, chisu ik chiukutupandisha mu mar ma chisum? Ov, mulong ik witiyina am kuman mar mudi minam? Ov, chisu ik chiukulika kuman yisalijok yiyimp?”—Abakuk 1:2, 3.

⁷ Inay awiy adinga antu ashinshamena adinga amulimishina Nzamb nakash. Ov, ayifunyina pipulau yipul yiney yikash? Kayifunyinap bwat, pakwez Yehova wamana anch chiwapin kufund yipul yau mu Dizu diend. Ilel, muntu umena mar mulong wa kuvulijan kwa uyimp ukutwish chakin kamu kwikal nich nzal ya mu spiritu—uswiridin nakash yakul yiletininga ching kusu Bibil. Vurikany anch, Yesu wayilondina nawamp antu afila nzal mu spiritu, ap anch antu ija anch ‘akwet maswir ma yom ya Nzamb.’ (Mateu 5:3) Chidi chisend chiwamp mudi ik cha kuyikwash antu mudi inay kutan musangar washilayimu Yesu!

8. Malejan ik ma kanvundangesh mayishikijina kal antu ku kwitiyij anch Nzamb ndiy musul wa mar, ni mutapu ik tukutwisha kuyikwash?

⁸ Dia kasatu, tuswiridin kumukwash muntu kwijik anch Nzamb kadiap musul wa uyimp wizwila mu mangand. Antu avud ayilejin anch Nzamb ndiy uyikedila mangand minam tushicha, anch Nzamb wasambela kutenchik kachom ni kachom katushikedina kurutu kwa chisu, ni anch ukwet mayingish makash kurumburil, chawiy chikatay kuyimesh antu mar. Malejan minam madi ma makasu. Mamulimishinap Nzamb ni mamumekeshin kwikal musul wa uyimp ni mar madia mu mangand. Chawiy tufanyidin kusadil Dizu dia Nzamb mulong wa kwonan milong yiney. (2 Timote 3:16) Yehova kadiap nyikel wa ditenchik dined diyimp dia yom; Satan Djabul ndiy nyikel wa mangand minam. (1 Yohan 5:19) Yehova kakatap kusambel kuyitenchikin yitang yend yikweta manangu yom; uchinkishin chitang chimwing ni chimwing want ipau ni mitapu ya kutond pakach pa kuwap ni kuyip, pakach pa kutentam ni kurumbuk. (Kuvurik Yijil 30:19) Ni Yehova kadiap musul wa uyimp; ndiy ukisin uyimp ni uyibangidin antu amena mar mulong wa kuburen kutentam.—Yob 34:10; Jinswir 6:16-19; 1 Pita 5:7.

9. Yom ik yimwing ya mudimu yitenchikinay “kashalapol ushishamena ni kubabal” mulong wa kuyikwash antu kutesh chilikidinay Yehova Nzamb mar?

⁹ Anch watek mufulandal winou, ukuman anch mwin kukutesh wey ukwikal tayad kusot kwijik mulong wak ulikidinay Nzamb mar madandamena. Chakwel kukukwash, “kashalapol ushishamena ni kubabal” waletin kal yom ya mudimu yivud ya kusadil. (Mateu 24:45-47) Chilakej, ku Chitentam cha Distrik cha muvu wa 2005 ni 2006 “Muziyilany Nzamb”, apalangeshaku trakt ukweta mutu wa mulong: Mar Mawonsu Makupwa Katat Kamu Ak! Anch umukwetany trakt winou mu rudim ren, salany usu wa kwijik yidiamu. Chilik chimwing kand, mu buku Chom Ik Chakin Kamu Chifundishinay Bibil?, udiaku katat mu jindim 157, mudi shapitre umwing wisambidina chipul chinech. Sadil nawamp yom yiney ya mudimu. Yirumburil nawamp diyingish dia Bibil dia mulong wa ukaleng wa mangand mawonsu walanka mu Eden ni mulong wak Yehova wasala mudi mwasalay. Ijik kand anch, piwisambidina mutu wa mulong winou, ukat kumwinkish mwin kukutesh ronganyin rimwing rijim ridiaku. Ridi ronganyin ra Yehova ni ngikadil yend yamushena.

Kasikeshin Ngikadil ya Yehova

10. Ov, mulong wak chiyikasikedin antu avud kutesh mulong wak ulikidinay Nzamb mar, ni ronganyin ik rikutwisha kuyikwash?

¹⁰ Piukwashina antu kutesh mulong wak Yehova uyilikidin antu iyendila ayinau mwishin mwa usu wa Satan, pakish kupwitin manangu pa ngikadil yamushena ya Yehova. Antu avud ij anch Nzamb udi mwin dikand; tukat kuyiteshang amutazuk lel anch Nzamb Mwin Dikand Diawonsu. Pakwez, chiyikasikedin kutesh mulong wak Nzamb ulikin kusadil usu wend ukash mulong wa kupwish kuburen kutentam ni mar kapamp kamwing. Chimeken anch aburedin kutesh kurumburik kwa ngikadil yikwau ya Yehova, mudi kutumb kwend, kutentam, manangu ni rukat rend. Yehova umekeshin ngikadil yiney mu mutapu umwing uwanyidina ni wisikena. Chawiy Bibil ulondil anch: “Mudimu wend uwanyidin.” (Kuvurik Yijil 32:4) Mutapu ik ukutwisha kukasikeshin ngikadil yiney piwakwila ku yipul ya mutapu winou? Tushinshikinany yilakej yimwing.

11, 12. (a) Ov, mulong wak kwadingap mutapu wa kuyilikishin Adam ni Eve pasalau chitil? (b) Mulong wak Yehova kakezap kulikin chitil chikupu?

¹¹ Ov, Yehova kelap kusu kumulikishin Adam ni Eve? Kwadingap dilikishin pa mulong winou. Chadingau antu akad yitil, Adam ni Eve itondina kwa kukat kulik ukaleng wa Yehova ni itiyija umutakel wa Satan. Kwikil cha kukashimuk, antombuj inay kitap dilikishin ap pakemp. Pakwez, pipwilingau antu ya dilikishin pa mulong winou, akat kutongang anch, mulong wak Yehova walika kuziyishaku yijil yend ni kwitiyij chitil ni wintombuj. Chakul chikwatin ku ngikadil yimwing ya usey ya untu wa Yehova—kutumb kwend.—Kubudik 28:36; 39:30.

¹² Bibil ukasikeshidin tupamp yitot ni yitot kutumb kwa Yehova. Pakwez, cha ushon, antu akemp kusu mu mangand minam mijondila awiy ateshila ngikadil yiney. Yehova udi wishitwila, zwang, ni wakad chitil. (Isay 6:3; 59:2) Pa mulong utadila chitil, ndiy watenchika mutapu wa kuchakwish mulong wa chitil, ni kuchidiosh, kakezap kuchilik chishala chikupu. Anch Yehova wading usotil kulikin chitil chikupu, ing kwikil ruchingej ra kurutu ap rikemp rin. (Jinswir 14:12) Pa chisu chend chatenchikay kal, Yehova ukez kuyichirish yitang yawonsu mu mwikadil wa kutumb. Chom chinech chidi chakin, mulong ridi rutong ra Utumbila.

13, 14. Ov, mulong wak Yehova kayijipap antombuj mu Eden?

¹³ Ov, Yehova wading ufanyidin kuyijip antombuj mu Eden ni kupwa kutang antu indjing? Chakin kamu Yehova wadinga nich usu wa kusal mwamu; piswimp ap kamu ukusadil usu winou mulong wa kushesh uyimp wawonsu. Antu amwing akutwish kulond anch, ‘Ov, mulong wak walikay kusal mwamu pakwadinga kuchidi antombuj asatu kwau mu mangand? Ov, kupalangan kwa chitil—ni mar mawonsu mitumena mu mangand—kwelap kupwa kapamp kamwing?’ Ov, mulong wak Yehova kasalap mwamu? Kuvurik Yijil 32:4 ulondil anch: “Jinjil jend jawonsu jidi jakin.” Yehova usotiling nakash kutentam. Chakin kamu, Yehova “ukatil kutentam.” (Kuseng 37:28) Mulong wa kukat kwend kutentam, Yehova wipwita walik kuyijip antombuj mu Eden. Ov, mulong wak?

¹⁴ Wintombuj wa Satan walangwisha chipul chikwatina ku kutentam kwa ukaleng wa Nzamb. Chovil chikash cha Yehova piur pa kutentam chita anch disarumun dia Satan adiakula mu mutapu utentamina. Kuyijip kapamp kamwing antombuj, ap anch kwela kwikal kufanyidina, pakwez kwelap kwakul ku chipul chinech. Kwela kulet uman ukwau wa dikand dikash dia Yehova, pakwez, kwadingap kutadikina usu wend. Chikwau kand, Yehova wayileja Adam ni Eve rutong rend. Afanyidina kuval ni kwizwish divu, kudiziyish, ni kuyikel yitang yawonsu yidia pa divu. (Disambishil 1:28) Anch Yehova wayijipa Adam ni Eve, rutong rend ralonday piur pa antu relap kuwanyin. Kutentam kwa Yehova kwelap kusadish chom mudi chinech, mulong rutong rend riwanyidin kamu.—Isay 55:10, 11.

15, 16. Pakatau antu kulet “mitapu yau ya kupwish” nich mulong walanka mu Eden, ov, mutapu ik tukutwisha kuyikwash?

¹⁵ Ov, kudi muntu mu mangand omu ukutwisha kupwish wintombuj nich manangu majim kumupandakanamu Yehova? Antu amwing akutwish kulet “mitapu ya kupwish” nich wintombuj wasadika mu Eden. Pakwez, mu kusal mwamu, ov, chikutwishap kulet chitong anch atongin mu mutapu uwamp wa kupwish mulong? Kakutwishap kusal mwamu nich yitongijok yiyimp, pakwez kakwetap chovu cha Yehova ni kijap kwau manangu mend mamushena. Payifundilay in Kristu in Rom, kambuy Paul wandama mu manangu ma Nzamb, pamwing ni “ujindj” piur pa rutong ra Yehova ra kusadil Want wa Mesia mulong wa kuyikol antu ashinshamena ni kutumbish dijin Diend ditumbila. Mutapu ik wiyovay Paul piur pa manangu ma Nzamb watenchika rutong riner? Kambuy upwishin mukand wend nich mazu am: “Kudi Nzamb umwing wa chiyul wikala uyaj wa chikupu mu Yesu Kristu. Amen.”—Rom 11:25; 16:25-27.

¹⁶ Paul watesha anch Yehova ndiy ‘mwin chiyul umwing’ kusu—ndiy upandikenamu nakash ku manangu mu mangand. Muntu ik mukayitil ukutwisha kutongin mutapu uwamp wa kupwish mulong ap umwing—wakad ap kwisambin mulong umwing ukash piur pa ukaleng wa Nzamb? Chawiy, tuswiridin, kuyikwash antu chakwel ikala nich wom mudi utwovila mulong wa Nzamb “mwin manangu.” (Yob 9:4) Anch twatesh nawamp manangu ma Yehova, tukez kwikal nich ruchingej rikash anch mutapu wend wa kupwish milong wawiy upandikena kuwap.—Jinswir 3:5, 6.

Tujinguninany Mudimu wa Ngikadil Yipandakena ya Yehova

17. Ov, kutesh nawamp nakash rukat ra Yehova kukutwish nchik kuyikwash antu arumbangena manangu pa mulong ulikidinay Nzamb mar?

¹⁷ “Nzamb udi rukat.” (1 Yohan 4:8) Bibil ulejen ngikadil yijim ya Yehova, nich mazu minam majim, ngikadil yipandikenamu nakash pa yawonsu ni yipandikenamu kuyongoj antu arumbangena manangu mulong wa kuvulijan kwa uyimp. Yehova wamekesha kal rukat mu mitapu kushalijan kusutil ku mutapu wapwishay disheshik dikash dia chitil diayishikena yitang yend. Rukat ramubuchika Yehova kuyinkish an akayitil a Adam ni Eve ruchingej. (Disambishil 3:15) Nzamb watenchika mutapu wa kwel anch amushejin mu malembil ni kutwishish kuta nend urund witiyikina kudi Ndiy. Rukat ramubachika Nzamb kulet difut dikutwisha kwazuril njil ya dilikishin dia yitil ni kuchirish kuwanyin, mwom wa chikupu. (Yohan 3:16) Ni rukat ramubachika kushimpish muchim mulong wa antu, chakwel kuyinkish antu avud mutapu wa kumulik Satan ni kumutond Yehova mudi Mwant wau.—2 Pita 3:9.

18. Tuyukin kwikal nich ronganyin ik, ni chom ik tukeza kwisambin mu mutu wa mulong wambakedinap ou?

¹⁸ Paster umwing payilejay antu adinga akumangena mulong wa kuvurik disheshik diasarumunau in chisum, ndiy walonda anch: “Twijap mulong wak ulikidinay Nzamb uyimp ni mar madandamena.” Cha ushon mudi ik! Ov, tuyukinap kwijik yom pa mulong winou? (Kuvurik Yijil 29:29) Chidiay Yehova mwin manangu, utentamina, ni mwin rukat, twij anch piswimp ap kamu ukupwish mar. Chakin kamu, washilamu kal kusal mwamu. (Kuburik 21:3, 4) Ov, chikwikal nchik lel kudi antu afila kal mu kusut kwa yitot ya mivu yawonsu ey? Ov, mutapu wa Yehova wa kupwish mulong walanka mu Eden wayisha pakad ruchingej? Bwat. Rukat ramubachikin kal kuyitenchikin ni yawiy ruchingej, kusutil ku disanguk. Wawiy mulong tukwisambina mu mutu wa mulong wambakedinap ou.

Ov, Ukwakul Nchik?

• Chom ik tufanyidina kumulej muntu wipwila anch mulong wak ulikidinay Nzamb mar?

• Ov, mutapu ik umekena kutumb ni kutentam kwa Yehova mu mutapu wayisadilay antombuj mu Eden?

• Ov, mulong wak tufanyidina kuyikwash antu kutesh nawamp nakash rukat ra Yehova?

[Chipich chidia pa paj wa 15]

Kimb mutapu wa kuyikwash antu arumbangena manangu mulong wa mar madia mu mangand

[Chipich chidia pa paj wa 17]

David ni Abakuk antu ashinshamena amwipula Nzamb yipul yakin