Asongina Mabuj Ni Mu Upal Wau

“Ayikuna [mu] chikumbu cha [Yehova] . . . [Akez] kasong mabuj ni mu upal wau.”—KUSENG 92:13, 14.

1, 2. (a) Mutapu ik urumburilau upal? (b) Bibil ushidilamu ik piur pa yibudikin ya chitil cha Adam?

UPAL—dizu dined dirumburikin ik mu manangu mey? Chikit cha mikany? Kujik matu? Kuziy kwa makas ni mend? Ap chom chikwau cha “machuku mayimp” marumburilau kamwing ku kamwing mu Mulej 12:1-7? Anch inge, chidi cha usey kwijik anch yirumburil yiney yidia mu Mulej shapitre wa 12 yisambidin upal, chidiap mudi mwasotay kwisambishil Sakatang, Yehova Nzamb, pakwez mudi chibudikin pa mujimbu wa muntu mulong wa chitil chasalay Adam.—Rom 5:12.

² Upal awinau udiap mashing, mulong kudandamen kwikalaku kwitin kusut kwa mivu. Chakin kamu, kupam ni kukul yidi yiswiridinau kudi awonsu akweta mwom. Disheshik dia mivu tunan musamban twa chitil ni kuburen kuwanyin yitwombilamu bwalikan yikwikal piswimp ap kamu yom ya pasak, ni antu awonsu aziyidila akusanger mwom mudi mwautonginau kwikal, pakad mar ma upal ni rufu. (Disambishil 1:28; Kuburik 21:4, 5) Pa chisu chinicha, “kwikil muntu ap umwing ukeza kulond anch: ‘Niyedil.’” (Isay 33:24, NW) Amapal akez kuchirik ku machuku ma “usu [wa] usand” wau, ni mijimbu yau yikez kikal “sinin mudi mu usand.” (Yob 33:25) Pakwez katat, antu in awonsu afanyidin kura tutaku nich chitil chaswanau kudi Adam. Pakwez, atushalapol a Yehova ayiyukishin mu jinjil ja pakampwil payilau mu kunanap.

3. Mutapu ik ukutwishau in Kristu “[kusong] mabuj ni mu upal wau”?

³ Dizu dia Nzamb ditushinshikidin anch: “[Akuninau mu] chikumbu cha [Yehova] . . . [akez] kasong mabuj ni mu upal wau.” (Kuseng 92:13, 14) Mu kulond kwa chishimu, nfund-a-kuseng walonda patok uyakin wa pa dishin anch atushalapol ashinshamena a Nzamb akudandamen kuya kurutu, kubudish yisalamb, ni kubikit mu spiritu, ap anch akat kusheshik ku mujimbu. Ansil a Bibil avud ilel ni yilakej ya katat amekeshin uyakin wa dizu dined.

“Kadiokalap mu Tempel”

4. Mutapu ik wamekeshay Ana muprofet mband kwipan kwend kudi Nzamb, ni mutapu ik wamufutau?

⁴ Tushinshikinany chilakej cha Ana muprofet mband wa mu mivu chitot ya kusambish. Pikalay nich mivu 84, ndiy “kadiokalap mu tempel, wading ni kwifukwil ni kujil ni kulembil uchuku ni muten.” Mband winou tatukwend wadinga wa “mu dijuku dia asher” kidiadingap dia in Levi, chadinga chimukasikedin Ana kushakam kamu ku tempel. Tongin chamwita kwikal ku tempel dichuku ni dichuku kudiosh pa chisu chisambishina mujikit wa pamanch djat pa chisu cha mujikit wa urel! Pakwez, mulong wa kwipan kwend, Ana amuyukisha nakash. Witapila dilau dia kwikalaku pa chisu chezay Josef ni Mariy kumulet mwan Yesu ku tempel mulong wa kumushikij kudi Yehova mudi mufundilau mu Chijil. Pamumanay Yesu, Ana “wamujikitisha Nzamb, walonda yendendiy kudi awonsu ading ni kuchingil kukol kwa Yerusalem.”—Luka 2:22-24, 36-38; Kuchind Michid 18:6, 7.

5, 6. Mutapu ik umekeshinau amapal avud ilel spiritu mudi wa Ana?

⁵ Amapal avud adia mukach mwetu ilel adi mudi Ana mu kukumangan kwau ku yikumangan, malembil mau ma kashinsh mulong wa kuya kurutu kwa difukwil diakin, ni impu yau yikash ya kulejan rusangu ruwamp. Mukadivar umwing wadinga nich mivu 80 ni kusut ukata kukumangan ku yikumangan ya Ukristu pakad kujing pamwing ni mukajend walonda anch: “Twakudisha chaku cha kuyang ku yikumangan. Kitukatiningap kwikalang kwindjing. Kwawiy kwinoku tukata kwiyovang mu diking.” Chidi chilakej chiyikasikeshina antu awonsu mudi ik!—Hebreu 10:24, 25.

⁶ “Anch kudi chom chikwatina ku difukwil diakin nikutwisha kusalaku, nikatining kuchisal.” Minam madi mazu ma Jean, mband mufir mwin Kristu ukweta mivu 80 ni kusut. Kupwa wadandamena anch: “Mwawiy, nikweting yisu ya ushon, pakwez, mulong wak lel ufanyidinay muntu win mwawonsu ova ushon pinidia am mu ushon?” Nich mes makweta musangar, wamekesha musangar wa kuya kutal ngand jikwau pa yisu yimwing yitungina mu spiritu. Mu weny wend wa katat, wayileja ambay nend anch: “Nisotilap kand kutal yom yiyisangareshina in kutal; pakwez nisotil kuya mu mujikit wa chingand!” Ap anch kadingap wija rudim ra kwinikwa, Jean watwisha kulangwish maku ma antu chakwel asangera uruu wa Bibil. Chikwau kand, mu mivu kanang, wasadila mu chikumangen chadinga chiswiridina ukwash, ap anch chamwita kwilej rudim risu ni kuya chintampu cha saa umwing chisu chawonsu chadingay ni kuya ku yikumangan.

Lamany Manangu Masadila

7. Mu upal wend, mutapu ik wamekeshay Moses impu ya kusot kukul mu urund wend pamwing ni Nzamb?

⁷ Ronganyin ra mwom rezining mu kusut kwa chisu. (Yob 12:12) Ku mutambu umwing, kuya kurutu mu spiritu, kukatap kwez mulong wa kuvul kwa mivu. Chawiy lel, pa ndond pa kuchingejin ronganyin rakau pasak, atushalapol ashinshamena a Nzamb asadining usu wa “[kuwejaku] manangu” mudi muyila mivu ni kuvul. (Jinswir 9:9) Moses wadinga nich mivu 80, pamwinkishau mudimu wa kusal kudi Yehova. (Kubudik 7:7) Pa chirung chinicha, chadinga chikasiken kusal mivu yiney, chawiy chafunday anch: “Mivu ya kupand kwetu yidi mivu makum sambwad; ap anch usu uwanyin makum chinan.” (Kuseng 90:10) Ap mwamu, Moses kiyovap anch wananapin kal mu chilik cha kukangany kwilej. Kupwa kwa makum ma mivu ya kumusadil Nzamb, wikala ni mitapu ya kampwil ya kumusadil Yehova, ni wadinga nich yisend yijim, Moses wilemba kudi Yehova anch: “Nlejap jinjil jey chakwel nikwijika ey.” (Kubudik 33:13) Moses kiyovap anch wananapin kal mu chilik cha kulik urund wend ni Yehova.

8. Mutapu ik wasalay Daniel chakwel manangu mend madandamena kusal padingay nich mivu 90 ni kusut, ni kwadinga chibudikin ik?

⁸ Muprofet Daniel, padingay nich mivu 90 ni kusut, wadinga uchidandamedin mu kutongijokin pa mifund yitumbila. Chom chajinguninay mu kushinshikin kwend “mikand yitumbila”—chimeken mu mikand yiney yitumbila mwadinga In Levi, Isay, Yeremiy, Ozey, ni Amos—chamubachika kumukimb Yehova mu malembil makin. (Daniel 9:1, 2) Malembil minam amakula nich rusangu rapepilau piur pa kwez kwa Mesia ni dikez dia difukwil diakin.—Daniel 9:20-27.

9, 10. Chom ik chasalau amwing mulong wa kulam manangu mau masadila?

⁹ Mudi Moses ni Daniel, tukutwish kulam manangu metu masadila kusutil ku kushinshikin pa milong ya mu spiritu mu mwom wetu wawonsu. Mwamu musadiningau antu avud. Worth, mwin Kristu ipal ukweta mivu 80 ni kusut, wasalanga usu wa kudia yakudia yisu ya mu spiritu yiletinay “kashalapol wakin ukweta manangu.” (Mateu 24:45) Ndiy ulondil anch: “Nikatil chakin kamu uyakin, nikwet musangar wa kuman mutapu chitokish cha uyakin muchiyila ni kumunyik ni kuzaz jinsis.” (Jinswir 4:18) Chawiy chimwing, Fred, wasutisha mivu 60 ni kusut mu mudimu wa chisu chawonsu, wamana anch chikasikeshin mu spiritu kwisambin Bibil pamwing ni ambay akaritiy. Ndiy ulondil anch: “Nifanyidin kulam Bibil mwom mu manangu mam. Anch ukutwish kulam Bibil mwom—mutesha chirumburikinay—ni anch ukutwish kwambatanish yiwilejina nich ‘chilik cha mazu makin,’ kupwa kangal wasakunon rusangu mu tuyikunku. Ukutwish kuman mutapu chikunku ni chikunku chandamina pa ndond yach.”—2 Timote 1:13.

¹⁰ Kunanap kukatap kamu kukangesh kwilej yom yisu ni yikash. Antu akweta mivu 60, 70 ni ap 80 ni kusut ileja kutang ni kufund ap ileja jindim jisu. Atuma a Yehova amwing mwamu mwasalau nich rutong ra kuyilej antu a michid yikwau rusangu ruwamp. (Marko 13:10) Harry ni mukajend adinga piswimp ni kuwanyish mivu 70 pakwatau mupak wa kukwash mu chingand chilondilau mputu (portige). Harry ulondil anch: “Chakin kamu, mudimu win wawonsu ukasikening anch mivu yavul.” Ap mwamu, nich usu ni kudandamen, atwisha kutakel malejan ma Bibil mwi mputu. Katat pasutil kal mivu yivud, Harry wasala ni madiskur ku chitentam cha distrik mu rudim risu.

11. Ov, mulong wak chiwapin kushinshikin yasalau amapal ashinshamena?

¹¹ Chakin, kadiap muntu win mwawonsu ukweta ukash wa mujimbu ap mikadil ya kwitiyij kusal mwamu. Ov, mulong wak lel kushinshikin yom yasalau antu akwau? Chidi chakin kulond anch antu in awonsu kakutwishap kusal yom yimwing-yimwing. Pakwez, chidi mudi mwayifundinau in Kristu in Hebreu kudiay kambuy Paul piur pa amakurump ashinshamena a chikumangen: “Yitongijokany yom yikata kusalau, ilikejany ritiy rau.” (Hebreu 13:7) Pitukata kushinshikin yilakej yiney ya mushiku, tukutwish kwikasikesh kwimburij ritiy rikash riyibachikina amapal inay kusal mujikit wa Nzamb. Parumburilay yamubachika, Harry, ukweta katat mivu 87, ulondil anch: “Nasota kusadil mivu ya mwom wam yishadilaku cha manangu ni kusadil mudi muchitwishikina mu mujikit wa Yehova.” Fred, utwisambinang kwiur oku, watana musangar ujim mu kusal mudimu wa Bethel. Ulondil anch: “Ukutwish kujingunin mutapu upandikena kuwap wa kudandamen kumusadil Yehova.”

Kwipan Kwikalap Nchik Kukarumuk kwa Mikadil

12, 13. Mutapu ik wamekeshay Barizilay kwipan kudi Nzamb chikalap nchik kuswimp kwa mikadil?

¹² Chiding chikash kwitiyij yikarumuk ni yikokujol ya ku mujimbu. Pakwez chitwishikin kwipan kudi Nzamb chikalap nchik ngikadil yiney. Barizilay mwin Galad udi chilakej chiwamp pa mulong winou. Pikalay nich mivu 80, wamwaka nawamp David ni amasalay end, wayinkisha yakudia ni wayinkisha ndond ya kushakam chisu chabwambwilay Abisalom. Chisu chachirikay David mu Yerusalem, Barizilay wayitwala djat ku Wit wa Yordan. David wamwikadisha Barizilay umwing wa mu chipang chend cha want. Barizilay wakula nchik? Ndiy wakula anch: “Nikwet mivu makum chinan. Ov, am kashalapol wey nikutwish kwov kutal kwa yinidila ap yininina, ap anch nikutwish kutesh mazu ma in kuwang ansand ni ayangadim? . . . Tal kashalapol wey Kimiham. Likany ndiy aya pamwing ni nsalejam mwant; ni umusadilany yawonsu yiwapina ku mes kwen kusal.”—2 Samwel 17:27-29; 19:31-40.

¹³ Chikalap nchik kukarumuk kwa mikadil, Barizilay wasala yawonsu yatwishay mulong wa kumukwash mwant watonday Yehova. Ap anch wajingunina anch chid chend cha kwov nich kutal ni kutesh yadingap kand mudi muyadinga, kovap kuyip. Pakwez, pakad choy wamupana Kimiham chakwel atambula yom yamwinkishau, Barizilay wamekesha untu wadingay ku muchim. Mudi Barizilay, amapal avud ilel amekeshining spiritu wakad choy ni akwet muchim wa kupan. Asadining yawonsu yikutwishau kusal mulong wa kukwash difukwil diakin, ij anch “yakupesh yiniya yawiy yikata kumusangaresh Nzamb.” Chidi chiyukish chijim kwikal ni antu ashinshamena pakach petu!—Hebreu 13:16.

14. Upal wa David uwejidin nchik ku kurumburik kwa mazu mafundau mu Kuseng 37:23-25?

¹⁴ Ap anch mikadil ya David yaswimpa chisu ni chisu mu kusut kwa mivu, ndiy witiyija anch diking dia Yehova mulong wa atushalapol end ashinshamena kidikatap kuswimp. Piswimp ni kwisudiel kwa mwom wend, David wawanga muminy wijikena ilel mudi Kuseng 37. Tongin bil David ushich ni ukat kutong, oku wabul lel kadiad ni uwangin mazu minam anch: “[Yehova] ukat kukasikesh kwend kwa muntu muwamp ni kumulej njil yend. Anch wipwakalip nchik kakuwap pansh, mulong [Yehova] ukat kumulam ni chikas chend. Nading nsand, katat nananap kal, pakwez kand kal nimumanangip mwin kutentam amulikil, ap anend aswadil yakudia.” (Kuseng 37:23-25) Yehova wamana anch chiwapidil kwisambin ni pa upal wa David mu kuseng winou utumbila. Yovil yikurikina mudi ik yiwejidinaku ku mazu minam madiokila ku muchim!

15. Ov, Yohan washa mutapu ik chilakej chiwamp cha kushinshaman kwikalap nchik kukarumuk kwa mikadil ni upal?

¹⁵ Kambuy Yohan udi chilakej chikwau chiwamp cha kushinshaman kwikalap nchik kukarumuk kwa mikadil ni upal. Kupwa kwa kumusadil Nzamb piswimp mivu 70, Yohan amutwala mu uyong pa ditung dia Patimos “mulong wa dizu dia Nzamb ni uman wa Yesu.” (Kuburik 1:9) Pakwez, mudimu wend wapwap. Chakin, yom yawonsu yafunday Yohan mu Bibil wayifunda mu mivu ya nsudiel ya mwom wend. Padingay pa Patimos, wamana chishimushimu chamushena cha Kuburik, chawiy chafunday. (Kubudik 1:1, 2) Atongining anch amulikishaku kudiokal mu uyong pa Winyikel wa Nerva, Mwant mwin Rom. Chawiy lel, piswimp mu muvu wa 98 pa chirung chetu, padingay nich mivu piswimp 90 ap 100, Yohan wafunda Rusangu Ruwamp ni mikand yisatu yipidilau dijin diend.

Rusangu Rakad Kupwa Usey ra Kujijaman

16. Mutapu ik umekeshiningau antu akad kutwish kand kulond nawamp kwipan kwau kudi Yehova?

¹⁶ Yikangesh yikutwish kwez mu jinjil kushalijan ni mu yilik kushalijan. Chilakej, antu amwing, katwishiningap kand kulond nawamp. Pakwez, ni katat achikat kuvurikang rukat ra Nzamb ni ranaken rend. Ap anch ikadil kal ni mimbu mu yikulondau ni kan kau, pakwez mu muchim wau akat kumwel Yehova anch: “A, mudi nikatila yijil yey! Nikat kuyitong mu yisu yawonsu.” (Kuseng 119:97) Yehova niyend ku mutambu wend, uyij antu akata “kutong mulong wa dijin diend,” ni usangaredin mutapu ushalijadinau antu inay ni antu akwau avud, akad kubanginang jinjil jend. (Malakiy 3:16; Kuseng 10:4) Chongojin mudi ik kwijik anch Yehova ukat kusanger mu yitongijok ya muchim wetu!—1 Jinsangu 28:9, NW; Kuseng 19:14.

17. Chom ik cha pakampwil chakin chasalau kal atushalapol a Yehova mu kusut kwa mivu yivud?

¹⁷ Uman wakad kuvuramen udi anch antu amusadila Yehova nich kushinshaman mu makum ma mivu wawanyishin kal chom chimwing cha pakampwil chakin ni chakad kutwishik mwi njil yindjing—rusangu rimwing rakad kutwish kuvuramen ra kujijaman. Yesu walonda anch: “Mu kudandamen kwen mwawiy muukeza kisakilany mipim yen.” (Luka 21:19) Kudandamen kudi kwa usey mulong wa kutambul mwom wa chikupu. Antu adia pakach pen asadila “rusot ra Nzamb” ni kumekesh kushinshaman kwen mu mwom wen akutwish kuchingej “kutambul kushilamu.”—Hebreu 10:36.

18. (a) Chom ik chikatay Yehova kusanger ku mutambu wa amapal? (b) Chom ik tukwileja mu mutu wa mulong wambakedinap ou?

¹⁸ Yehova usangaredin nakash mudimu wa muchim wey wawonsu ukutwisha kusal wikalap ujim ap ukemp. Chikalap nchik chikushikena ku ‘mujimbu’ mudi upal, ‘muntu wa pol’ ukutwish kupizurok pichuku-pichuku. (2 Korint 4:16) Kwikil chinshilend anch Yehova usangaredin yiwasalanya pasak, pakwez choviken patok anch usangaredin kand yiusadilany katat mulong wa dijin diend. (Hebreu 6:10) Mu mutu wa mulong wambakedinap ou, tukez kushinshikin yibudikin yijim ya kushinshaman kwinoku.

Ov, Ukwakul Nchik?

• Ana wayishila in Kristu amapal ilel chilakej ik chiwamp?

• Ov, mulong wak upal udiap chikangesh cha yikutwishay muntu kusal?

• Mutapu ik ukutwishau amapal kudandamen kumekesh kwipan kwau kudi Nzamb?

• Yehova umening nchik mudimu umusadidilau kud amapal?

[Chipich chidia pa paj wa 25]

Amapal avud adi yilakej yiwamp kusutil ku kukumangan kwau ku yikumangan pakad kujing, ku kulejan nich mushiku, ni kukankaman mu kwilej