Mwimburijany Mwin Kwikadish In Kwilej Mujim
“Babalany mudi uteshilanya.”—LUKA 8:18.
1, 2. Ov, mulong wak ufanyidina kuta muchim pa mutapu wayisadilay Yesu antu pa chirung cha mujikit wend?
YESU KRISTU wadinga uwanyishin mwaz wend mudi Mulej Mujin ni Mwin Kuyikadish in Kwilej payilejay in kwilejend anch: “Babalany mudi uteshilanya.” (Luka 8:16-18) Chijil chinech chisadila kand ku mujikit wey chiudia mwin Kristu. Anch wata muchim ku malejan ma mu spiritu, ukusal kwambatan nich ni kwikal katwambil chifuvu wa Want. Chakin kamu, ilel ukutwishap kutesh dizu dia Yesu, pakwez ukutwish kutang yalonday ni yasalay, mudi muyifundilau mu Bibil. Yom yiney yilejen ik piur pa mutapu Yesu wayisadilay antu padingay ni kusal mujikit wend?
2 Yesu wadinga katwambil muwamp wa rusangu ruwamp ni mulej mujim wa uyakin udia mu Bibil. (Luka 8:1; Yohan 8:28) Mu mudimu wa kuyikadish in kwilej mudi diyiy ni kulejan, pakwez in Kristu amwing adia in kulejan ayifuvu amen anch chidi chikash kuyilej antu muchifanyidina. Oku mu kulejan mudi kwijikish patok uruu, kuyilej antu piur pa Yehova ni ntong jend kwitining anch mwin kwikadish in kwilej ikal murund nau. (Mateu 28:19, 20) Chom chinech chitwishikin ching kusu ku kumwimburij Yesu Kristu, Mulej Mujim ni Mwin Kwikadish in Kwilej.—Yohan 13:13.
3. Kumwimburij Yesu kukwet usu ik pa usu wey wa kuyikadish in kwilej?
3 Anch wimburij nkeu ja Yesu ja kulejan nich, ukusadil chiyul cha kambuy Paul chalonday anch: “Endilany mu chiyul kudi awiy adia pol, lamany yisu ya muten. Lik kulond kwen kwikala ni ranaken machuku mawonsu, kutadila mudi mungu, chakwel wijikany mwa kwakwil nawamp kudi muntu ni mukwau.” (Kolosay 4:5, 6) Kumwimburij Yesu mu mudimu wa kuyikadish in kwilej kwitin usu, pakwez kukez kusal malejan mey mikal masongina mulong ku kukukwash wijika “mwa kwakwil nawamp kudi muntu ni mukwau” kukwatijan nich yiswiridinay.
Yesu Wayikasikesha Antu Alonda
4. Mulong wak chitwishikin kulond anch Yesu wadinga mwin kutesh muwamp?
4 Kudiosh pa wanikanch wend djat ni papamay, Yesu wadinga ni chaku cha kuyitesh antu ni wayikasikesha alonda yitonginau. Chilakej, pikalay nich mivu 12, anvajend amutana ushich mukach mwa alej mu tempel, ni “kuyitesh ni kuyipol yom.” (Luka 2:46) Yesu kayap ku tempel mulong wa kuyikwatish alej usany nich ronganyin rend. Waya mulong wa kutesh, ap anch wayipula yipul. Ngikadil yend ya kwikal mwin kutesh muwamp chimeken yadinga yimwing ya ngikadil yamukwasha kwitapil dilau kudi Nzamb ni kudi antu.—Luka 2:52.
5, 6. Mutapu ik twija anch Yesu watesha yalondau antu alejay?
5 Kupwa kwa kubabatishiu kwend ni kuziziu many mudi Mesia, Yesu walama ngikadil yend ya kuyitesh antu. Kakwatikanap nich yom yadinga yilejenay mu chilik cha kuyivuramen antu adinga kwez ni kutesh yadingay ni kulond. Chisu ni chisu, wadinga ni kwikuchik, wayipul alonda yitonginau, ni watesh yakul yau. (Mateu 16:13-15) Chilakej, kwinyim kwa rufu ra Lazar, mwanamakwend a Mart, Yesu wamuleja anch: ‘Ni [mwawonsu udia] mwom ni ukwingitiyija am kakez kafap.’ Kupwa wamwipula anch: “Ey witiyij kal mwamu?” Chakin kamu Yesu wamutesha Mart pamwakulay anch: “Mwaning Mwant; am nitiya kal anch ey udi Kristu, Mwan a Nzamb.” (Yohan 11:26, 27) Chamusangaresha mudi ik pakumutesh Mart walond patok ya ritiy rend mu mutapu winou!
6 Chisu in kwilej avud alika kumulondul Yesu, ndiy wasota kutesh chitonginau atwimbuy end. Chawiy chipulay anch: “Ni yen kand usotilany kuya?” Simon Pita wamwakula anch: “Mwant, tukuya kudi nany? Ey yey ukweta mazu ma mwom wa chikupu; ni yetu twitiya kal twij anch ey yey Umwing Utumbila wa Nzamb.” (Yohan 6:66-69) Mazu minam mamusangaresha Yesu mudi ik! Mwin kwilej Bibil ukulonda niyend patok ya ritiy rend mwamu ukukusangaresh nakash.
Yesu Watesha Nich Kalimish
7. Ov, mulong wak in Samaria avud amwitiyija Yesu?
7 Diyingish dikwau diamwikadisha Yesu mwin kuyikadish in kwilej chifuvu didi anch mulong wadinga ni kuyibangin antu ni kuyitesh nich kalimish. Chilakej, dichuku dimwing, Yesu wamuleja mband mwin Samaria uman piswimp ni dijiy dia Yakob dia ku Sikar. Pa chisu cha minsamb yiney, Yesu kalondap ndiy amwinend kusu; pakwez watesha yadingay mband ni kulond. Padingay ni kumutesh, Yesu wamana kusanger kwend mu difukwil ni wamuleja anch Nzamb wading uyikimbin antu akutwisha kumwifukwil Ndiy mu spiritu ni mu uyakin. Yesu wamekesha kalimish ni kumubangin mband winou, chawiy chayay kapamp kamwing kuyilej antu akwau mulong wa Yesu, ni “In Samaria avud a mu ul winiwa amwitiyija mulong wa dizu dia mband.”—Yohan 4:5-29, 39-42.
8. Mutapu ik yikutwisha ngikadil ya antu ya kusot kulond yitonginau kukukwash kusambish minsamb mu mujikit wa kulejan?
8 Antu asangaredining chisu chivud kulond yitonginau. Chilakej, antu adinga mu Aten wa pasak asangera kulond yitongijok yau ni kutesh chom chisu. Chawiy chinech chamushikija Paul asala diskur diend dikash ku Aropagus mu musumb winou. (Midimu 17:18-34) Pa chisu cha kusambish minsamb ni mwin chikumbu mu mujikit wey ilel, ukutwish kulond anch: “Nikwendidil mulong nisangaredin yiukulonda piur pa [jimbul mutu wa mulong wa minsamb].” Tesh yikulonday, ni wejinap yirumburil yikwau, ap ipul chipul chambaten nich. Nich kalimish muleja yilondila Bibil pa mulong winou.
Yesu Wading Wij Chikulonday
9. Chom ik chasalay bil Yesu kurutu kwa ‘kumurumburil patok mukand wa Nzamb’ Kleopas ni mbay nend?
9 Yesu kadingap ni kuburen yakulond. Kuwejin pa kwikal kwend mwin kutesh muwamp, wadinga chisu chivud wij yitonginingau antu, ni chawiy wijika chom ik chifanyidinay kulond. (Mateu 9:4; 12:22-30; Luka 9:46, 47) Chilakej: Chisu chikemp kwinyim kwa Yesu kuvumbuk, in kwilejend aad adinga adiokil ku Yerusalem ayil ku Emaus. Rusangu ra Evanjil rilondil anch: “Pachadingau ni kwinan ni kwipulijan pamwing, Yesu amwinend waseja piswimp, waya nau. Pakwez mes mau mading rid [mudi mibwikin, MM], awiy kamwijikap. Ndiy wayilej anch: Yom ik yiney yiukwinananany ayinen oku wend uyany? Awiy imana, ading ni ushon. Umwing wau, dijin diend Kleopas, wamwakul wamwel anch: Komb ey ushicha mu Yerusalem ukalika kwijik yom yeza kwinikwa mu machuku minam? Ndiy wayipul anch: Yom ik?” Mulej Mujim wayitesha parumburilau anch Yesu wa ku Nazaret wadinga ni kuyilej antu, wasala yilay, amujipin. Katat antu amwing alondil anch wavumbukin kal kudiokal ku afu. Yesu wamulika Kleopas ni mbay nend alonda yijau. Kupwa Yesu wayirumburila chadinga chiswiridinau kwijik, ‘wayirumburil patok mukand wa Nzamb.’—Luka 24:13-27, 32.
10. Mutapu ik ukutwisha kujingunin yitongijok ya chirelijon ya muntu utanijadina nend mu mujikit wey?
10 Ukutwishap chisu chimwing wijik chom kanang piur pa relijon wa mwin chikumbu. Chakwel uchijika, ufanyidin kulond anch usangaredin kutesh chitonginau antu piur pa malembil. Kupwa ukutwish kumwipul anch: “Ov, utongin chakin anch kudi kamu muntu uteshininga malembil?” Chakul chikutwish kusal anch ujingunina yom yivud piur pa yitonginay muntu ni kwijik relijon wend. Anch udi mwin kwifukwil, ukutwish kwijik yitongijok yend yivud kusutil ku kumwipul anch, “Ov, utongin anch Nzamb uteshining malembil min mawonsu, ap anch kudi malembil malikiningay kutesh?” Yipul mudi yiney yikutwish kushikij ku minsamb yimwing yiwamp. Anch chitwishikin kutang yilondilay Bibil, ukutwish kusal mwamu nich nkeu, kangal kupwitijan nich yitiyijinay muntu. Anch wasanger kukutesh, ukusangar kand anch umuchirikina. Pakwez, chikwikal nchik anch wakwipul chipul chawakad kutwish kwakul? Ukutwish kukimbijol, kwirijek ni kumuchirikin mulong ‘ukamuleja diyingishin dia yiuchingejina, pakwez nich kwitudish ni kalimish.’—1 Pita 3:15.
Yesu Wayileja Antu Afanyidina
11. Chom ik chikutwisha kukukwash kuyitan antu ufanyidina kulej?
11 Yesu ikundj uwanyidina wadinga nich njingunin yadinga ni kumutwishish kuyijingunin antu adinga afanyidinay kulej. Chitukasikedining etu kuyijingunin antu adia “mu mwikadil ufanyidina kutambul mwom wa chikupu.” (Midimu 13:48) Mwamu mwasalau atwimbuy isamba ni Yesu anch: “Mu musumb ap ul wawonsu ukwandamany, sotany antu awamp adiamu.” (Mateu 10:11) Mudi atwimbuy a Yesu, ufanyidinany kuyikimb antu asotila chakin kamu kutesh ni asotila kwilej uyakin wa Bibil. Ukutwish kuyitanany antu adia mu mwikadil ufanyidina umwing ni mukwau, nich kufund ngikadil ya muntu ni muntu.
12. Mutapu ik ukutwisha kudandamen kumukwash muntu usangaredina?
12 Kupwa kwa kumusha muntu wasangerang uruu wa Want, ukusal nawamp anch wadandamen kutongijokin pa maswir mend ma mu spiritu. Anch wafund yiwajingunina kupwa kwa kwisamb ni muntu piur pa rusangu ruwamp, chikez kukukwash kumukwash muntu winou mu spiritu. Pa kumwendil kand, uswiridin kumutesh nawamp anch usotil wijika yom yivud piur pa yitiyij, yitongijok, ap mikadil yend.
13. Chom ik chikutwisha kukukwash kujingunin yovil ya muntu piur pa Bibil?
13 Mutapu ik ukutwisha kuyikasikesh antu akuleja yitonginau piur pa Dizu dia Nzamb? Mu jindond jimwing, chiwapidil kwipul anch: “Ov, Bibil ukukasikedining kutesh?” Chakul chikukwinkishay ku chipul chinech chisu chivud chilejening ngikadil ya muntu piur pa milong ya mu spiritu. Mutapu ukwau wa kusadil udi kutang verse kupwa kwipul anch: “Ov, wovil chirumburikinay verse winou?” Mudi Yesu, ukutwish kusal yom yivud mu mujikit wey kusutil ku kusadil yipul yifanyidina. Pakwez, chiwapidil kusadil dizu nich kubabal.
Yesu Wasadila Nawamp Yipul
14. Pakad kuyipulijol yipul, mutapu ik ukutwisha kumekesh kusanger kwey pa yitongijok yau?
14 Sanger yitongijok ya antu akwau pakad kuyovish usany. Londul nkeu ja Yesu. Kadingap mwin kwipulijol yipul yakad kushinshikin, pakwez wadinga ni kusadil yipul yitina yitongijok. Yesu wadinga kand mwin kutesh muwamp wayitudisha antu akashinsh amutesha ni kuyovish nawamp. (Mateu 11:28) Antu a milad yin yawonsu iyova nich want ipau wa kumusejin ni amuleja milong yau. (Marko 1:40; 5:35, 36; 10:13, 17, 46, 47) Anch antu iyovil nawamp chakwel kukulej yitonginau piur pa Bibil ni malejan madiamu, ufanyidin kwipuk kuyipol yipul.
15, 16. Mutapu ik ukutwisha kuyipwitin antu mu minsamb piur pa milong ya chirelijon?
15 Kuwejin ku kusadil yipul yifanyidina, ukutwish kukasikeshin minsamb kusutil ku kulond chom kanang chisangareshina ni kuchingel utesha chakul. Chilakej, Yesu wamuleja Nikodem anch: “Chakin chakin nakulej anch, ching muntu wavadik musu, chamwamu kakutwiship kuman want wa Nzamb.” (Yohan 3:3) Mazu minam mamukashimwisha nakash Nikodem mu chilik chakwel anch katwishap kunenet wakad kumwakul ni kumutesh Yesu. (Yohan 3:4-20) Ukutwish niyey kuyipwitin antu mu minsamb mwi njil yawiy yimwing.
16 Ilel, kwikalaku kwa marelijon mavud masu akusangaredin mudi mu jindond ja mu Afrik, Mwimput wa Kwingangel, ni mu Amerik Latine. Mu jindond mudi jinej, ukutwish chisu chivud kusambish minsamb nich kulond anch: “Niyakamishin anch kwikal kal marelijon mavud. Pakwez nichingejin kusu piswimp ap kamu kuyiman antu a michid yawonsu ikal mu difukwil dimwing. Ov, chawiy niyey uchingejina?” Kusutil ku kulond chom kanang chikashimwishina piur pa ruchingej rey, ukutwish kuyishikij antu alonda yitonginau. Ni yipul yiswapeling kuyakul anch kutwishikin kwikalaku yakul yaad. (Mateu 17:25) Anch mwin chikumbu wapwish kwakul ku chipul chey, akul niyey ku chipul chinech nich verse umwing ap maad. (Isay 11:9; Sofoniy 3:9) Kusutil ku kutesh nawamp ni kutesh chakul cha muntu, ukutwish kujingunin chom cha kwisambin chisu ukweza kand.
Yesu Wadinga ni Kuyitesh An
17. Chom ik chilejena anch Yesu wayisangera an?
17 Yesu wayisangera amakurump ni anikanch kumwing. Yesu wadinga wij masengan madingau ni kusengan anikanch ni yom yadingau ni kulond. Chisu chimwing wadinga ni kuyitazuk an eza kudi ndiy. (Luka 7:31, 32; 18:15-17) An avud adinga mukach mwa antu amutesha Yesu. Chisu chatoyau ansangarum mulong wa kumutumbish Mesia, Yesu watesha ni walejana anch Bibil wasambela kulond mwamu. (Mateu 14:21; 15:38; 21:15, 16) Ilel, an avud akat kwikal in kwilej a Yesu. Chadi mutapu ik lel ukutwisha kuyikwash?
18, 19. Mutapu ik ukutwisha kumukwash mwaney mu spiritu?
18 Chakwel kumukwash mwaney mu spiritu, ufanyidinany kumutesh. Uswiridin kutesh yitongijok yikwetay yikutwisha kwambatan nich yitongijok ya Yehova. Chikalap nchik yilondinay mwaney, chidi cha manangu kumwakul bil mu mutapu uwamp. Kupwa ukutwish kusadil maverse ma Bibil mafanyidina chakwel kumukwash mwan kutesh chitongijok cha Yehova piur pa milong yend.
19 Yipul yikwet mudimu way. Pakwez an kakatap kusanger kuyipul yipul yivud mudi amakurump. Pa ndond pa kumwipul mwaney yipul yikash kwakul, ov, ulikidin ik kulond yom mu wiswimp yikutadila amwiney? Kwambatan nich milong wisambidina, ukutwish kulond anch woviling mutapu windjing ni kumurumburil mulong wak. Kupwa ukutwish kumwipul anch: “Ov, mwamu wovilinga niyey?” chakul cha mwaney chikutwish kukutakel nawamp chakwel kusadil mambamb ma Bibil ma ukwash ni makasikeshina.
Dandamenany Kumwimburij Mwin Kuyikadish in Kwilej Mujim
20, 21. Ov, mulong wak ufanyidina kwikal mwin kutesh muwamp mu mudimu wey wa kwikadish in kwilej?
20 Ap anch wambambidin pa mutu wa mulong kanang ni mwaney ap muntu windjing kutesh kuwamp kudi kwa usey. Chakin, kudi kumekesh rukat. Kusutil ku kutesh, ukusal mwi njil yimwing ya kwikepish, ni ulondila akutwish amulimishin ni kumukat. Chakin kamu, kutesh kwitin anch uta matu ku yilondilay muntu.
21 Piusadila mu mujikit wa Ukristu, dandamen kuyitesh nawamp in yikumbu. Anch wata matu ku yilondilau, ukutwish kujingunin nawap uyakin wa Bibil ukutwisha kuyisangaresh pakampwil. Kupwa sal usu wa kuyikwash kusutil ku kusadil nkeu kushalijan ja kulejan nich ja Yesu. Anch wasal mwamu, ukez kutaninamu musangar ni mazang mulong umwimburijin Mwin Kwikadish in Kwilej Mujim.
Mutapu ik Ukwakula?
• Yesu wayikasikesha nchik antu akwau alonda yitonginau?
• Mulong wak Yesu wayitesha antu alejay?
• Mutapu ik ukutwisha kusadil yipul mu mujikit wey?
• Ik ufanyidina kusal mulong wa kuyikwash an mu spiritu?
[Chipich chidia pa paj wa 26]
Piulejena, shinshikin anch uteshin nawamp