Kudishany Ngikadil Yikutwisha Kukutwishishany Kwikadish In Kwilej
“Yangany kwen ku michid yawonsu uyikadishany in kwilej.”—MATEU 28:19.
1. Nkeu ik ni ngikadil ik yadinga yiswiridinau atushapol amwing a Nzamb a pasak?
ATUSHALAPOL a Yehova afanyidin yisu yimwing kukudish nkeu ni ngikadil yikuyitwishisha kusal rusot rend. Chilakej, kwi mbil ya Nzamb, Abraham ni Sara adiokala mu musumb wa Ur wa mapit ni chakin kamu aswirikena ngikadil ni nkeu yadinga yitiyikina mulong wa kushakam mu antent. (Hebreu 11:8, 9, 15) Kuyitakel in Isarel mwi Ngand ya Kushilamu kwamwita Yoshua ikal ukapukina, amuchingejina Yehova, ni kwijik Chijil chend. (Yoshua 1:7-9) Chikalap nchik nkeu yadingay nich Besalel ni Ohiliab chayita kuyiwapish ap kuyikudish nakash kudi spiritu wa Nzamb chakwel anch amakundj inay apandikana mu kwimanyin ni kutakel rutung ra mwinkand ni mudimu wawonsu.—Kubudik 31:1-11.
2. Yipul ik tukushinshikina kukwatijan nich mudimu wa kwikadish in kwilej?
2 Kupwa kwa yitot ya mivu, Yesu Kristu wayinkisha in kumulondul end mbil anch: “Yangany kwen ku michid yawonsu uyikadishany in kwilej, . . . wend uyilejany kusal yom yawonsu yinakulejanya en.” (Mateu 28:19, 20) Wadinga kandikal ayinkishap antu kusal mudimu mudi winou ku mivu ya pasak. Ngikadil ik yiswiridikina chakwel kusal mudimu wa kwikadish in kwilej? Mutapu ik tukutwisha kukudish ngikadil yiney?
Mukata Nzamb Nakash
3. Mbil ya kuyikadish in kwilej yitwinkishin chisend ik?
3 Kuyisejin antu ni kusal usu wa kuyitiyijish amwifukwila Nzamb wakin kwitin anch tumukata nakash Yehova. In Isarel ading afayidin kumekesh kumukat kwau Nzamb ku kuziyil nich muchim wawonsu ku yijil yend, kumupesh yakupesh yitiyijinay, ni kumushiman nich musangar mu muminy. (Kuvurik Yijil 10:12, 13; 30:19, 20; Kuseng 21:13; 96:1, 2; 138:5) Mudi in kuyikadish in kwilej, niyetu tuswiridin kulam yijil ya Nzamb, pakwez tukumekesh kand anch tumukatin Yehova ku kuyilej antu piur pendendiy ni ntong jend. Tuswiridin kulond nich kwitiyikish, kutond mazu mafanyidina mulong wa kulejan yovil ya muchim wetu mulong wa Nzamb wetu utwinkishina ruchingej.—1 Tesalonik 1:5; Pita 3:15.
4. Ov, mulong wak Yesu wasangera kuyilej antu piur pa Yehova?
4 Mulong Yesu wamukata nakash Yehova, chawiy chasangeray nakash kwisambin ntong ja Nzamb, Want, ni difukwil diakin. (Luka 8:1; Yohan 4:23, 24, 31) Chakin, Yesu walonda anch: “Yakudia yam yidi kusal rusot rendendiy wantuma am, ni kupwish mudimu wend.” (Yohan 4:34) Mazu manam ma nfund a kuseng malonday anch: “Nasangar kusadil rusot rey, A Nzamb wam, mwawiy, yijil yey yidikal mu muchim wam. Nalejan kal rusangu ra musangar wa kutentam mu kukumangan kujim, kinikez kayikojip milamu yam, A [Yehova], Ey wij kal kwey” mawanyidin padiay Yesu—Kuseng 40:8, 9; Hebreu 10:7-10.
5, 6. Ngikadil ik ya usey ujim yiswiridinau in kuyikadish in kwilej?
5 Kumukat Nzamb kwayibachika, antu asu ileja uyakin wa Bibil yisu yimwing alonda piur pa Yehova ni piur pa Want nich ritiy rimwing mu chilik cha kuyitiyijish antu akwau kushinshikin Bibil. (Yohan 1:41) Kumukat Nzamb ridi rufungul rikata kutubachik tusala mudimu wa kuyikadish in kwilej. Tudandamenany kamu kulam rukat kusutil ku kutang chisu ni chisu ni kutongijokin Dizu diend.—1 Timote 4:6, 15; Kuburik 2:4.
6 Pakad kwidjidjek, kumukat Yehova kwamukwasha Yesu Kristu ikal mulej mwin mushiku. Pakwez kidadingap diyingish dimwing kusu diakwikadil kwend katwambil wa Want mwin kusong mabuj. Ov, ngikadil ik yikwau yamwikadisha Yesu mwin kwikadish in kwilej mukash?
Yibanginany Antu Nich Rukat
7, 8. Yesu wayimana nchik antu?
7 Yesu wadinga ni kuyibangin antu ni wayisangera kamu chakin. Ap padingay “mwant a mudimu wa Nzamb,” kandikal avadik mudi muntu, wakata nakash yom yadinga pamwing ni antu. (Jinswir 8:30, 31) Pikalay muntu pansh, Yesu wayovila antu riy, wayiswedisha in eza kudi ndiy. (Mateu 11:28-30) Yesu wamekesha rukat ni riy ra Yehova, ni chawiy chayipwita antu amwifukwila Nzamb umwing kusu wakin. Antu a milad yawonsu amutesha Yesu mulong wadinga ni kuyibangin nich rukat ni kubangin mikadil yau.—Luka 7:36-50; 18:15-17; 19:1-10.
8 Chisu chamwipulau kudi ikundj umwing chading chiswiridinay kusal chakwel eza aswana mwom wa chikupu, “Yesu wamutala wamukat.” (Marko 10:17-21) Piur pa antu amwing alejau kudi Yesu ku Betania, tutangin anch: “Yesu wading ukatil Mart ni mwanamakwend mband ni Lazar.” (Yohan 11:1, 5) Yesu wayibangina nakash antu mu chilik cha kulik kupim kwend mulong wa kuyilej. (Marko 6:30-34) Rukat riner rikash ni kuyibangin ambay nend antu kwamwikadisha Yesu mukash kuyipandakanamu antu awonsu mu kuyipwitin antu ku difukwil diakin.
9. Ngikadil ik yadingay nich Paul mudi mwin kwikadish in kwilej?
9 Kambuy Paul niyend wayibangina nakash antu alejay dizu. Chilakej, wayileja antu ikala in Kristu mu Tesalonik anch: “Chawiy kand twanikata en, twading ni musangar wa kupan kudi en, ridap kusu rusangu ruwamp ra Nzamb, pakwez ni kupand kwetu kand, mulong en wikadilany kal akwetu akarukat kamu.” Mudi chibudikin cha usu wa rukat ra Paul, amwing adinga mu Tesalonik ‘akarumuka kudiokal ku akish au chakwel amusadil Nzamb wakin mwom.’ (1 Tesalonik 1:9; 2:8) Anch twayibangidin chakin antu, mudi mwasalay Yesu ni Paul, niyetu tukutan musangar wa kuman mutapu rusangu ruwamp rishikina mu michim ya antu adia “mu mwikadil ufanyidina kutambul mwom wa chikupu.”—Midimu 13:48.
Mekesh Spiritu wa Kwipan
10, 11. Ov, mulong wak spiritu wa kwipan uswiridikin pitusadina usu wa kuyikadish in kwilej?
10 In kwikadish in kwilej akash akweting spiritu wa kwipan. Kameningap kwikal nich dipit divud mudi chom chipandikena usey nakash. Chakin kamu, Yesu wayileja in kwilej end anch: “Chikasiken kamu kudi ampich kwandam mu want wa Nzamb!” In kwilej ashimoka pa kutesh dizu dined, pakwez Yesu wawejinaku anch: “Anam, komb chiyikasikedil kudi akata kukungamen mu rupit pa kwandam mu want wa Nzamb! Chipipel kwau kudi kamel kusutil mu dis dia katumu [ndong], chikasiken kudiay mpich kwandam mu want wa Nzamb.” (Marko 10:23-25) Yesu wayisotila in kumulondul end mwom uswapela chakwel atwisha kwasin pa kuyikadish in kwilej. (Mateu 6:22-24, 33) Ov, mulong wak spiritu wa kwipan utukwashin kwikadish in kwilej?
11 Kulejan yom yawonsu yalejanay Yesu kwitining usu. Mwin kwikadish in kwilej chisu chivud usadining usu chakwel kutakel dilejan dia Bibil ni muntu usangaredina rubing ni rubing. Chakwel kuvudish mitapu ya kuyitan antu akin, atutwambil amwing a Want alika kusal midimu ya ku mujimbu ya chisu chawonsu asal ya chisu chikemp. Tunan twa in Kristu ilejin kal rundim rindjing chakwel atwisha kuyilej yisak ya antu atubil tukwau adia mu teritwar wau. In kwikadish in kwilej akwau adiokala kwol kwau ni aya ku teritwar ap mwi ngand yikwau mulong wa kusal nakash mudimu wa kwakungul. (Mateu 9:37, 38) Yiney yawonsu yitin spiritu wa kwipan. Pakwez kudi yom yivud yiswiridikina chakwel kwikal chifuvu mu kwikadish in kwilej.
Shimpish Kangal Washesh Chisu
12, 13. Ov, mulong wak kushimpish muchim kudi kwa usey nakash mu kuyikadish in kwilej?
12 Kushimpish yidi ngikadil yikwau yitukwashina kwikadish in kwilej. Uruu wetu wa Ukristu witin kusal swa-swa, pakwez kuyikadish in kwilej chisu ni chisu kwitining chisu chijim ni kushimpish. (1 Korint 7:29) Yesu kaburenap kushimpish pantaliken nend mwanamakwend Yakob. Ap anch Yakob wamekana mudi wadinga wij nawamp mijikit ya kulejan ya Yesu, pa chisu chimwing kwadinga chom chamuchirisha kwinyim cha mukangesha kwikal pinipa mwin kwilej. (Yohan 7:5) Pakwez, mu kachisu kakemp kurutu kwa rufu ra Kristu ni Pentakot mu muvu wa 33 C.C., chakin Yakob wikala mwin kwilej, mulong Bibil ulejen anch wakumangana mulong wa kulembil pamwing ni makwend, ni anamakwend, ni atwimbuy. (Midimu 1:13, 14) Yakob waya kurutu nawamp mu spiritu, kupwa weza kwikal nich yisend yijim mu chikumangen cha Ukristu.—Midimu 15:13; 1 Korint 15:7.
13 Mudi in kudim, in Kristu akunin chisu ni chisu yom yipamininga pakemp-pakemp—chovu cha Dizu dia Nzamb, kumukat Yehova, ni spiritu mudi wa Kristu. Yom yiney yitining kushimpish. Yakob wafunda anch: “Akadivar, shimpishany michim ni pakwezilay Mwant. Talany, ndim ukat kuchingil pa kupol kwa mabuj makunay mu divu, ndiy ukat kuchingil ni pakunaka ruvul pansh, wa kusambish ni wa kwinyim. Ni yenen kand shimpishany michim, jamishany michim yen; mulong kwez kwa Mwant kudi kal piswimp.” (Yakob 5:7, 8) Yakob wading kuyikasikesh ambay nend akaritiy ‘ashimpisha michim djat ni pakwezilay Mwant.’ Ap anch in kwilej kateshangap kurumburik kwa chom kanang, Yesu wayirumburilanga nich kushimpish muchim ap kuyilejach mu chishimu. (Mateu 13:10-23; Luka 19:11; 21:7; Midimu 1:6-8) Katat Mwant udikwaku, kudi kuswir kwa chilik chimwing kwa kushimpish muchim mudi mutusadila usu wa kuyikadish in kwilej. Antu ikadila kal in kumulondul Yesu mu chirung chetu chitin kuyilej nich kushimpish.—Yohan 14:9.
14. Ap anch tushimpishin michim, mutapu ik tukutwisha kusadil chisu chetu nich manangu mudi in kwikadish in kwilej?
14 Ap anch tushimpishin, mangand kimasongishinap dibuj mu antu avud tusambishina kwilej nau Bibil. (Mateu 13:18-23) Kupwa kwa kusal usu wakashinsh mulong wa kuyikwash, chawiy lel, nich manangu twalika kushesh chisu chamwamu ni antu amutapu winou ni twasambisha kuyikimb antu asotila chakin kamu uyakin wa usey wa Bibil. (Mulej 3:1, 6) Chakin kamu, ap antu asangaredina akutwish kuswiriken kutanduril ukwash mulong wa kukarumun yitongijon yau, manangu mau, ni yom yitekinau pa ndond ya kusambish mu mwom wau. Chawiy tushimpishina michim, mudi mwashimpishay Yesu pantaliken nau in kwilej end adinga arishina nich ngikadil yiwamp.—Marko 9:33-37; 10:35-45.
Kudish Ukaliweny wa Kulejan Nich
15, 16. Ov, mulong wak kulond kuswapela ni kwirijek kuwamp kudi kwa usey nakash pituyikadishina in kwilej?
15 Kumukat Nzamb, kuyimbangin antu, spiritu wa kwipan, ni kushimpish muchim yidi yom ya usey chakwel kutwish mu mudimu wa kwikadish in kwilej. Chiswiriken kand kukudish nkeu ja kulejan nich, mulong jikat kututwishish kurumburil yom mu mutapu wovikena, mu mutapu uswapela. Chilakej, mazu mavud ma Mulej Mujim, Yesu Kristu, madinga nich usu nakash mulong mading maswapel. Chakin kamu, pamwing ap uvurikin mazu ma Yesu malonday anch: “Jindjikany yipau yen mwiur.” “Kangal wapanany chom chitumbila kudi atubu.” “Chiyul chikat kwiyingish ku yisalijok yau.” “[Panany] kudi Kaisar yom ya Kaisar, ni kudi Nzamb yom yidia ya Nzamb.” (Mateu 6:20; 7:6; 11:19; 22:21) Chakin, Yesu kalondangap kusu mazu miswimp. Walejana yom yovikena patok ni wayirumburila pa chisu chadinga chifanyidin kuyirumburil. Ov, mutapu ik ukutwisha kumwimburij Yesu mu mutapu wend wa kulejan?
16 Kwirijek nawamp kudi kwa usey chakwel kuswapal ni kulond patok. Kashalapol wakad kwirijek ukat kusot kulond yom yivud. Ukutwish chakin kamu kushadish manans majim mulong wa kusot kulond yom yivud, kulond yom yawonsu yijay pa rusangu riner. Chinyim ni chinech, kashalapol wirijekina nawamp utongidin piur pa muntu ukulejay, ukutongin pa mutu wa mulong, ni ukulejan nawamp ching kusu yiswiridikina. (Jinswir 15:28; 1 Korint 2:1, 2) Ukutongijokin pa yom yijay mwin kwilej pa mulong winou ni manans ik mafanyidinay kukasikeshin pa chisu cha kwilej. Kashalapol ukutwish kwijik yom yivud yisangareshina piur pa mulong winou, pakwez kulond patok kudiokiling ku kudioshaku jinsangu ja chamwamu.
17. Mutapu ik tukutwisha kuyikwash antu atongijokina pa Bibil?
17 Yesu wayikwasha kand antu kutong, pa ndond pa kuyilej ching kusu yom yasadika. Chilakej, dichuku dimwing, ndiy wipula anch: “Ey utongil nchik Simon? Ant a pansh akat kwakang milambu kudi anany? Kudi anau akuval anch kudi aeny?” (Mateu 17:25) Tukutwish kusanger kurumburil Bibil nakash mu chilik cha kwikal iyijidishina kushimpish muchim chakwel kumutwishish mwin kwilej alonda ap arumburila mulong ushinshikidinau pilejinau Bibil. Chakin, tufanyidinap kuyikadikesh antu nich yipul. Pakwez, nich kudimuk, yishimu yiwamp, ni yipul yilangwishina yitongijok, tukutwish kuyikwash asangera manans ma Bibil malejenau mu buku wilejinau nich Bibil.
18. Chom ik chidia mu kukudish ukaliweny wa “kulejan” nich?
18 Bibil ulondil piur pa ukaliweny wa “kulejan” nich. (2 Timote 4:2; Titus 1:9) Mu ukaliweny winou wa kulejan nich mudi yom yivud kupandakanamu kwau kumukwash muntu kulam yom mu mutu. Tufanyidin kupakish kumukwash mwin kwilej Bibil chakwel atesha kushalijan kudia pakach pa uyakin ni kurumbuk, pakach pa kuwap ni kuyip, pakach pa manangu ni usup. Anch twasal mwamu ni kusal usu wa kukudish rukat ra Yehova mu muchim wa muntu, ukuman anch ufanyidin kumuziyil Ndiy.
Ikal Nich Mushiku mu Kuyikadish in Kwilej
19. Mutapu ik ukutwishau in Kristu awonsu kusadil mu uumwing mu kuyikadish in kwilej?
19 Chikumangen cha Ukristu chidi dirijek dia in kuyikadish in kwilej. Anch muntu musu wikal mwin kwilej, Kaman wa Yehova wamutana ni wamukwasha ileja yifundishinay Bibil kadiap ndiy kusu umwing ukweta diyingish dia kusangar. Anch antu atenchik chisak mulong wa kumukimb mwan ushadikina, ching muntu umwing kusu udia mu chisak ndiy ukumutana. Pakwez, pakuchirikay mwan kudi anvaj end, antu awonsu ayang mu kumukimb akusangar. (Luka 15:6, 7) Chawiy chimwing, kuyikadish in kwilej udi mudimu wa chisak. In Kristu awonsu asadila mudimu wa kuyikimb antu inay akutwish kwikal in kwilej a Yesu. Ni anch muntu musu wasambish kukumangan ku yikumangan ku Chot cha Want, in Kristu awonsu adiaku akusadil mu uumwing mulong wa kukudish kusanger kwend difukwil diakin. (1 Korint 14:24, 25) Chawiy, in Kristu awonsu akutwish kusangar anch muvu ni muvu kudi in kwilej asu yitot ya tunan.
20. Chom ik ufanyidina kusal anch usotil kuyilej antu akwau uyakin wa Bibil?
20 In Kristu avud ashinshamena akutwish kusanger kumulej muntu kanang piur pa Yehova ni difukwil diakin. Ayinau kakutwishap kusal mwamu, chikalap nchik usu wau ukash usadilau. Anch wawiy mwikadil wey, dandamen kukasikesh kumukat kwey Yehova, yibangina antu, ikal nich spiritu wa kwipan, shimpish muchim, ni sot mutapu wa kuwapish nkeu jey ja kulejan nich. Chipandikenamu, tek mu malembil mey maswir mey ma kulejan uyakin. (Mulej 11:1) Tan rongoj pa kwijik anch yom yawonsu usadila mu mujikit wa Yehova yiwejidin ku mudimu wa kuyikadish in kwilej umutumbishina Nzamb.
Ov, Ukutwish Kurumburil?
• Kuyikadish in kwilej kupakin nchik kumukat kwetu Nzamb?
• Ngikadil ik yiswiridinau in kuyikadish in kwilej?
• Chom ik chidia mwi nkeu ja “kulejan” nich?
[Chipich chidia pa paj wa 20]
Kusutil ku kuyikadish in kwilej, in Kristu amekeshin kumukat kwau nakash Nzamb
[Chipich chidia pa paj wa 22]
Ov, mulong wak ufanyidinau in kuyikadish in kwilej kuyisanger antu akwau?
[Chipich chidia pa paj wa 23]
Ngikadil ik yimwing yiswiridinau in kuyikadish in kwilej?
[Chipich chidia pa paj wa 24]
In Kristu awonsu asangering pa kuman yibudikin yiwamp ya kuyikadish in kwilej