Mutekany Yehova Machuku Mawonsu Kurutu Kwa Mes Men

“Nikat kutal kudi [Yehova] udia kurutu kwam.”—KUS. 16:8.

1. Ov, jinsangu ja Bibil jikutwish kwikal ni usu ik padi etu?

DIZU diafundau dia Yehova dikwet rusangu ripandakena kuwap ra mutapu wa kushakam wa Nzamb ni antu. Dijimbwil antu avud adinga mu kusadik kwa rutong ra Nzamb. Chakin kamu, mazu ni yisal yau yidiap mu Bibil mudi jinsangu ja chamwamu mulong wa kutusangaresh. Pakwez, jinsangu jinej jikutwish kutupwitin piswimp nakash ni Nzamb.—Yak. 4:8.

2, 3. Mutapu ik tufanyidina kutesh mazu ma Kuseng 16:8?

² Etu awonsu tukutwish kwilej yom yivud kusutil ku yom yashikena ya antu ijikena nawamp mu Bibil—Aburaham, Sara, Moses, Rut, David, Ester, kambuy Paul, ni antu akwau. Pakwez, jinsangu ja antu akad kwijikan nakash jikutwish kand kutukwash etu. Kutongijokin pa jinsangu ja Bibil kukutwish kutukwash kusal yom kwambatan nich yalonday nfund a Kuseng anch: “Nikat kutal kudi [ Yehova] udia kurutu kwam, ni udi kand ku chikas cham cha katatuku, kinikez kashemunikip.” (Kus. 16:8) Mutapu ik tukutesha kurumburik kwa mazu minam?

³ Isalay wading ni kusadinang mukwal wend nich chikas chend cha katatuku, ni kushang mutambu winou wakad kuking nich rikibu rend rikwatinay ku chikas chend cha kamaku. Chikwau kand, wading ni kwiking anch murund urishina piswimp nend udi ku mutambu wend wa katatuku. Anch twadandamen kumulam Yehova mu manangu ni twasal rusot rend, ndiy ukez kutuking. Chawiy lel, talany amboku mutapu jinsangu ja Bibil jikutwish kukasikesh ritiy retu chakwel tudandamena ‘kutal kudi [ Yehova] udia kurutu [kwetu].’

Yehova Uteshin Malembil Metu

4. Pan chilakej cha Bibil chilejena anch Nzamb ukat kwakulang ku malembil.

⁴ Anch twamutek Yehova machuku mawonsu kurutu kwa mes metu, ndiy ukutesh malembil metu. (Kus. 65:2; 66:19) Tukwet uman pa chinech kusutil ku yamushikena kashalapol mukur wa Aburaham, pamwing ap Eliyezer. Aburaham wamutuma kumukimbin Isak mband umwakamina Nzamb. Eliyezer walembila chakwel Nzamb amutakela ni wajingunina ukwash wa Nzamb chisu chayinishay Rebeka ayimbur end mem. Mulong wipana mu malembil, Eliyezer watana mband wikala mukajend a Isak. (Dis. 24:12-14, 67) Chakin kamu, kashalapol wa Aburaham wading mu mudimu wa pakampwil. Pakwez tufanyidinap kwikal nich ruchingej anch Yehova uteshin malembil metu?

5. Mulong wak tukutwish twalond anch ap malembil miswimp, ma mu muchim Yehova ukutwish kumatesh?

⁵ Yisu yivud, tukutwish kuswir kulembil swa chakwel Nzamb atukwasha. Dichuku dimwing, Mwant wa in Peris Aritaserisis wamana anch nfansey wend Nehemi ukwet ushon. Mwant wamwipula anch: “Ov, chom ik uswiridina?” “[Nehemi] wamulembila Nzamb wa mwiur.” Nehemi walonda mu wiswimp mu malembil minam ma mu muchim. Pakwez, Nzamb watesha malembil minam, Mwant wamukwasha Nehemi kutungiril mbumbu ja Yerusalem. (Tang Nehemi 2:1-8.) Mwawiy, ap malembil miswimp, ma mu muchim akutwish kumatesh.

6, 7. (a) Piur pa malembil, ov, Epafras washa chilakej ik? (b) Mulong wak tufanyidina kulembil mulong wa antu akwau?

⁶ Atukasikeshin kulembil mulong wa “muntu ni mukwau,” ap anch tukwetap uman wa kwel anch malembil minam akez kumatesh. (Yak. 5:16) Epafras, “ushinshamena mu mudimu wa Kristu,” walembila nakash mulong wa ambay nend mu ritiy. Pafundinay ku Rom, Paul walonda anch: “Epafras, wa pakach pen [in Kolosay], kashalapol wa Yesu Kristu, wakulangwishany, ndiy ukat kunivurikany mu kulembil kwend, chakwel ukwimanany awanyidina ni kwizwish ruchingej mu rusot rawonsu ra Nzamb. Mulong am nidi kaman wend anch ukat kukusadilany en, ni awiy adia mu Laodikea ni mu Hirapolis.”—Kol. 1:7; 4:12, 13.

⁷ Kolosay, Laodikea, ni Hirapolis yading misumb yadinga mwin ndond yimwing ya Aziy Mukemp. In Kristu a ku Hirapolis ading pakach pa in kwifukwil a nzamb Cybèle, in Laodikea ading mu chak cha kusot mapit ma ku mujimbu, ni in Kolosay ading mu chak cha manangu ma mangand. (Kol. 2:8) Choviken anch Epafras wadinga wa ku Kolosay, ‘wipana amwinend mu kulembil’ mulong wa in kwitiy adinga mu musumb! Bibil kalejenap mutapu wamateshau malembil ma Epafras, pakwez kalikap kulembil mulong wa ambay nend mu ritiy; kitufanyidinap niyetu kulik kulembil mulong wa ambay netu mu ritiy. Ap anch ‘twiyandjikinap mu milong ya antu akwau,’ pamwing ap twij anch yid ya dijuku ap murund umen yoziu yikash ya ritiy. (1 Pita 4:15) Chikwikal cha usey mudi ik anch twalembil pa ayinetu mulong wendendiy! Paul amukwasha kusutil ku malembil ma antu akwau, ni malembil metu makutwish chilik chimwing kusal yom yiwamp yivud.—2 Kor. 1:10, 11.

8. (a) Ov, mutapu ik twija anch amakurump a ku Efes asangera usey wa malembil? (b) Mulong wak tufanyidin kwikal mudi amakurump in Kristu a ku Efes?

⁸ Ov, antu akwau ij anch etu tudi amakundj ni amband a malembil? Kupwa kwa Paul kutanijan ni amakurump a ku Efes, “wazengama pansh ni kulembil nau awonsu.” Chawiy lel “awiy awonsu adil nakash, amubwikat Paul mwi nshing amususu, ushon wayikwata awonsu palonday anch, kiukez kumananyip kand mpal yam kakwau.” (Mid. 20:36-38) Twijap majin ma amakurump inay awonsu, pakwez chimeken anch asangera usey wa malembil. Chakin kamu tufanyidin kusanger chisend cha kumulembil Nzamb ni tufanyidin ‘kuzambul makas mashinshamena’ nich ritiy anch Tatukwetu wa mwiur ukututesh.—1 Tim. 2:8.

Muziyila Nzamb Nich Muchim Wakabuj

9, 10. (a) Ov, chilakej ik chashau kudi an amband a Selofedak? (b) Mutapu ik kuziyil kwa an amband a Selofedak kukwikal nich usu kudi in Kristu akad kwatan atongina kwatijan?

⁹ Kwikal ni Yehova mu manangu chisu chawonsu kukutukwash kumuziyil ndiy, ni tukutambul yiyukish mudi chibudikin. (Kuv. 28:13; 1 Sam. 15:22) Chinech chitin kwikal nich mwikadil wa muchim wa kuziyil. Shinshikin mwikadil wa anambaz atan a ku mujimbu, ayangadim a Selofedak, washakama pa chirung cha Moses. Pakach pa in Isarel, kwambatan nich chishankur an amakundj awiy adinga ni kutambul uswan kudi atatukwau. Ikundj Selofedak wafa pakad an amakundj, ni Yehova watakela anch an amband inay atambula uswan wawonsu—ching awanyish chom chimwing chitinau. Afanyidina kuyatol kudi an a Manase chakwel uswan ushala mu muchid umwing.—Kuch. 27:1-8; 36:6-8.

¹⁰ An amband a Selofedak ading ni ritiy anch yom yikusadik nawamp anch amuziyil Nzamb. Bibil ulondin anch: “An amband a Selofedak asala mud mwalonday [ Yehova] kud Moses. Chad Makala, ni Tiris, ni Hogila, ni Milika, ni Nowa ayatola kud an amakundj a amantwau. Awiy ayata mu majuku ma an amakundj a Manase, mwan ikundj wa Josef, ni uswan washala mu muchid wa dijuku dia tatukwau.” (Kuch. 36:10-12) Amband inay in kuziyil asala yayilejau kudi Yehova. (Yos. 17:3, 4) Nich ritiy ra chilik chimwing, in Kristu akad kwatan akudila mu spiritu aziyidil kudi Nzamb mu kwatijan “ching mu Mwant.”—1 Kor. 7:39.

11, 12. Mutapu ik wamekeshay Kaleb anch wading umuchingejin Nzamb?

¹¹ Tufanyidin kumuziyil Yehova ni muchim wakabuj, mudi mwasalay Kaleb mwin Isarel. (Kuv. 1:36) Kupwa kwa kuyikol in Isarel mu Idjibit mu chitot cha mivu cha 16 K.C.C., Moses wayituma amakundj 12 aya kutentish Kanan, pakwez ching kusu in kutentish 2—Kaleb ni Yoshua—ayikasikesha antu chakwel amuchingejina rawonsu Nzamb ni kwandam mwi ngand. (Kuch. 14:6-9) Pasuta piswimp mivu makum manying, Yoshua ni Kaleb ading achidi aom ni akat kumulondul Yehova ni muchim wa kabuj, ni Nzamb wamusadila Yoshua chakwel ayitakel in Isarel mwi Ngand ya Kushilamu. Pakwez, in kutentish dikum akad ritiy chimeken afa mu weny wa mivu 40 wasalau in Isarel mwi mpay.—Kuch. 14:31-34.

¹² Mudi mukurump wakolika ku yayishikena in Isarel mwi mpay, Kaleb watwisha kwiman kurutu kwa Yoshua ni walond anch: “Am nasala mudi mwading rusot ra [ Yehova] Nzamb wam.” (Tang Yoshua 14:6-9.) Padingay ni mivu makum chinan ni yitan Kaleb wita anch amwinkisha ngand ya mikandu yamukanau kudi Nzamb, ap anch mwading akankuny ashicha mu misumb yau yijim yadinga ni usu.—Yos. 14:10-15.

13. Chikalap nchik yoziu yitushikedina, akutuyukish anch twasal chom ik?

¹³ Mudi Kaleb mwin kushinshaman ni kuziyil, tukwikal ni ukwash wa Nzamb, anch ‘twamulondul Yehova nich muchim wa kabuj.’ Anch turishin nich milong yikash, akutuyukish anch ‘tumulondwil Yehova nich muchim wa kabuj.’ Pakwez kusal mwamu mu mwom wetu wa kabuj, mudi mwasalay Kaleb, kukutwish kukasikan. Ap anch Mwant Solomon wasambisha nawamp, akajend akarumuna muchim wend chakwel asadila anzamb a makasu ku upal wend, ni “kamulondulap Yehova nich muchim wa kabuj mudi tatukwend David.” (1 Ant 11:4-6, Les Saintes Écritures — Traduction du monde nouveau) Chikalap nchik yoziu tufanyidina kurish nich, tumuziyilany Nzamb chisu chawonsu nich muchim wa kabuj ni tumutekany kurutu kwetu chisu chawonsu.

Muchingejina Yehova Chisu Chawonsu

14, 15. Kusutil ku yamushikena Naomi, wilej kal chom ik piur pa kuswir kwa kumuchingejin Nzamb?

¹⁴ Tufanyidin kumuchingejin Nzamb pakampwil anch tukwet yakamish mulong wa kuburen kuchingejin machuku metu ma kurutu. Shinshikinany ipal Naomi, wafisha mfumwend ni anend aad kudi mukankuny rufu. Pachirikay ku musumb wa Yuda kudiokal ku Moab, ndiy wadila anch: “Kangal wantazukany am anch Naomi. [“Misangar yam”.] Ntazukany Mara [“Uridila,”], mulong Mwin dikand diawonsu wasala anch yikala yiridina kudi am. Nading nizwila pinayila, ni Yehova wanchirisha makas makas. Mulong wak ukwintanzukany am anch Naomi, mulong Yehova wanshikumwisha am ni Mwin-dikand-diawonsu wanletina mar makash?”—Rut 1:20, 21.

¹⁵ Ap anch Naomi wading mu mar, kutang kuwamp kwa mukand wa Rut kumekeshin anch ndiy wadandamena kumukungamen Yehova. Ni mwikadil wend waswimp mudi ik! Mufiil wa Naomi mawenend Rut wikala mukajend a Boaz ni wavala mwan. Naomi wasambisha kwamush mwan, ni Bibil ulondin anch: “Amband atej amupila dijin, ni kumwel anch: ‘Naomi wavadil kal mwan.’ Ni asambisha kumupil dijin anch Obed. Ndiy tatukwend a Yese, tatukwend a David.” (Rut 4:14-17) Pakezay Naomi kuvumbuk chakwel ashakama pa divu, ukwilej anch Rut uwikala ni ndiy pinipa, wikala ngakend a Yesu, Mesia (Mat. 1:5, 6, 16) Mudi Naomi, tukutwishap kwikal nich kashinsh piur pa mutapu mikadil yiyimp yikutwisha kukarumuk. Pakwez, tumuchingejinany Nzamb chisu chawonsu, mudi mutulejinau mu Jinswir 3:5, 6 anch: “Mukungamena [ Yehova] ni muchim wey wawonsu. Kangal wachingej ronganyin rey amwiney. Mu jinjil jey jawonsu itiyij kudi Ndiy, ni Ndiy ukez katenchik jinjil jey.”

Muchingejina Spiritu Utumbila

16. Mutapu ik spiritu utumbila wayikwasha amakurump amwing mu Isarel wa pasak?

¹⁶ Anch twamutek Yehova machuku mawonsu kurutu kwa mes metu, ndiy ukututakel kusutil ku spiritu wend utumbila. (Gal. 5:16-18) Spiritu wa Nzamb wading pa antu amakurump 70 atondau mulong wa kumukwash Moses “kuyilam antu” mu Isarel. Ching Elidad ni Medad ajimbwilau pa majin, pakwez spiritu wayikwasha kuwanyish yisend yau. (Kuch. 11:13-29) Pakad kwidjidjek, ading ni ukaliweny, amwovila Nzamb wom, a kuchingejin, ni a kashinsh mu atondau pakusambish. (Kub. 18:21) Mikadil yiney ayimekeshin kudi amakurump in Kristu nlel unou.

17. Ov, spiritu utumbila wa Yehova wading ni mudimu ik mu rutung ra dizang?

¹⁷ Spiritu utumbila wa Yehova wasala mudimu ukash mu rutung ra dizang mwi mpay. Yehova wamutonda Beselel mudi nkaliweny wa kusambish ni mwin kutung dizang, ni washilamu anch “[kumwizwish] ni Mwiku wa Nzamb, ni ronganyin, ni manangu, ni kwijik winkalaweny wa mitapu yawonsu ya midimu” (Kub. 31:3-5) “Antu [a] ronganyin” asala pamwing ni Beselel ni nkwash wend Oholiab mulong wa kuwanyish mudimu winou wamushena. Chikwau kand, spiritu wa Yehova wayibachika antu apana milambu nich muchim wa kupan. (Kub. 31:6; 35:5, 30-34) Spiritu winou uyibachikin kand atushalapol a Nzamb a katat chakwel yawonsu yikutwishau kusal mulong wa kutwal kurutu yisakin ya Want. (Mat. 6:33) Tukutwish kwikal nich ukaliweny kanang, pakwez tufanyidin kulembil mulong wa spiritu utumbila ni kulik atutakela anch tusadil mudimu wa Yehova wayinkishay antwend mu chirung chetu.—Luka 11:13.

Mwifukwila Chisu Chawonsu Yehova Mwin Dikand

18, 19. (a) Ov, spiritu wa Nzamb usongin mwikadil ik mudi etu? (b) Ov, Yik wilejina kusutil ku chilakej cha Simeon ni Ana?

¹⁸ Spiritu utumbila usongishin mudi etu mwikadil wa kwifukwil umutekina Yehova kurutu kwetu chisu chawonsu. Ayileja antu a pasak a Nzamb anch: “[Yehova] Mwin Dikand, yam nitumbila.” (Is. 8:13) Amakurump aad a kalimish a mu mivu chitot ya kusambish mu Yerusalem ading Simeon ni Ana. (Tang Luka 2:25-38.) Simeon witiyija uprofet wa Mesia ni wading ni kuchingel “kwongoj kwa Isarel.” Nzamb wamuzizila Simeon spiritu utumbila ni wamwinkisha ruchingej anch ukwez kushakam chakwel amumana Mesia. Chawiy chashikena. Dichuku dimwing mu muvu wa 2 K.C.C., amutwala Yesu ku tempel kudi Mariy ni Josef, makwend ni tatuku wamulama. Pamubachikay kudi spiritu utumbila, Simeon walond mazu ma uprofet piur pa Mesia ni watakela kulejan mar ma Mariy, wova runeng chisu chamupampau Yesu pa mutond wa mar. Pakwez shinshikin musangar ujim wamanay Simeon pamusenday mu makas mend “Kristu Mwant”! Ni chidi chilakej chiwamp mudi ik cha kalimish chashay Simeon kudi atushalapol a Nzamb nlel unou!

¹⁹ Mufiil wa kalimish wa mivu 84 Ana “kadiokalap mu tempel.” Wadinga usadila mudimu utumbila uchuku ni muten “ni kujil ni kulembil.” Ana wadingaku ni ndiy pamutwalau mwanikanch Yesu ku tempel. Ndiy wasangera mudi ik pakumuman ukwikala Mesia! Chikwau kand, ndiy “wamujikitish Nzamb, walonda yendendiy kudi awonsu ading ni kuchingil kukol kwa Yerusalem.” Ana walejana ni ndiy rusang riner riwamp kudi akwau! Mudi Simeon ni Ana, amakurump in Kristu nlel unou akwet musangar ukash wa kwijik anch ap amapal akutwish kumusadil Yehova mudi Atuman end.

20. Chikalap nchik mivu tukweta, yik tufanyidina kusal, ni mulong wak?

²⁰ Chikalap nchik uvud wa mivu tukweta, tufanyidin kumutal Yehova kurutu kwetu chisu chawonsu. Chawiy lel ukuyukish usu tusadina mulong wa kuyilej antu akwau piur pa want wend ni yisal yend yamushena. (Kus. 71:17, 18; 145:10-13) Chakwel tumulimisha Yehova, tufanyidin kumekesh mikadil ya Nzamb. Ov, chom ik tukutwisha kwilej piur pa mikadil yiney kusutil ku kushinshikin jinsangu jikwau ja Bibil?

Ov, Ukwakul Nchik?

• Mutapu ik twija anch Yehova uteshin malembil?

• Mulong wak tufanyidin kumuziyil Nzamb nich muchim wa kabuj?

• Ap anch tumen mar, mulong wak tufanyidin kumuchingejin Yehova chisu chawonsu?

• Mutapu ik spiritu utumbila uyikwashin antwend?

[Chipich chidia pa paj wa 4]

Malembil ma Nehemi madinga nich usu

[Chipich chidia pa paj wa 5]

Kuvurik mutapu yom yakarumuka kudi Naomi kukutukwash kumuchingejin Yehova