Yehova Uteshin Kudil Kwetu Mulong Atukwasha
“Mes ma [Yehova] madi padi in kutentam, ni matu mend manzurikidin ku kudil kwau.”—KUS. 34:15.
1, 2. (a) Mutapu ik wovilau antu avud ilel? (b) Ov, mulong wak tuyikashimukinap?
OV, UMEN mar? Anch inge, udiap kwey amwiney. Mamiliyon ma antu akwau marishin nich yikokujol ya mwom pichuku-pichuku mu ditenchik dined diyimp dia yom. Kudi amwing, chimeken anch chidi chikash kuyijijamen. Iyovil kamu nakash mudi mwovay nfund a kuseng David, muntu wafunda anch: “Kinikwet kand usu, nalimin kal nakash, nikat kukimuk mulong wa kwakam mu muchim wam. Muchim wam ukat kutabamijan mwivumu, usu wam wampwa, mulong chimunyik cha mes mam ni chawiy chandiokil kal.”—Kus. 38:8, 10.
2 Mudi in Kristu, tukashimukinap mar ma mwom. Twij anch “mar makash” madi chikunku cha chijingidij cha kwikalaku kwa Yesu. (Mar. 13:8; Mat. 24:3) Dizu dia mu rudim ra kusambish dikarumwinau anch “mar makash” risambidin kusansan kwovilingau pa kuval. Dizu dirumburila nawamp mudi ik kusansan kwa mar mamenau antu mu yisu yiney ‘yikash,’ ap anch yisansena ya ‘mar makash’!—2 Tim. 3:1.
Yehova Uteshin Mar Metu
3. Chom ik chijau antu a Nzamb?
3 Antu a Yehova ij kamu anch kayinginap pantaliken nich mar minam, ni chakin kamu, ngikadil yiney yikudandamen kwikal yiyimp nakash. Kuwejin pa yiyishikedina antu awonsu, mudi atushalapol a Nzamb turil nend kand “mukankuny [netu], Satan,” usotina ching kushesh ritiy retu. (1 Pita 5:8) Chiswapel kwov mudi mwovay David anch: “Kubachok kwajip muchim wam, nidi mu rufu kamu; natadil kudi in kwingovilip riy, pakwez ni awiy kwamwamu kwau, ni kudi in kwingongoj, kinimenip ap kusu umwing”!—Kus. 69:20.
4. Chom ik chikata kutwongoj pitumeninga mar?
4 Ov, David wasota kulond anch kadingap ni ruchingej ap rikemp? Bwat. Tal mazu mend makwau mu kuseng kwinoku: “Mulong [Yehova] ukat kuyitesh atuzwendj, kakuyidiurilangip amayong end.” (Kus. 69:33) Mu kulond mu mutapu ujim, mar metu makutwish pa yisu yimwing kutukwat mudi anch tudi amayong. Chikutwish chamekan mudi antu akwau kateshinap kwau mwikadil wetu—ni pamwing ap kauteshinap kwau. Pakwez mudi David, tukutwish kutan rongoj ang twijik anch Yehova uteshin chakin kamu mar metu.—Kus. 34:15.
5. Ruchingej ra Mwant Salomon radinga ra usey ik?
5 Salomon mwan a David wakasikeshina chom chinech pa chisu chashikijay tempel wa mu Yerusalem. (Tang 2 Jinsangu 6:29-31.) Wamwilembila Yehova chakwel atesha malembil ma muntu win mwawonsu ukweta muchim utentamina umushejidina Ndiy mulong wa ‘chitat chend ni kusansan kwend.’ Ov, mutapu ik welay Nzamb kwitiyij ku malembil ma antu inay anenganena? Salomon wamuchingejina Nzamb anch kakuteshap ching kusu malembil mau pakwez ukusal kand chom kanang mulong wau. Mulong wak? Mulong ndiy wij chakin kamu chidia mu “michim ya antu awonsu.”
6. Mutapu ik tukutwisha kura nich yakamish, ni mulong wak?
6 Tukutwish niyetu kumushejin Yehova mu malembil mulong wa ‘wa chitat chetu ni kusansan kwetu,’ kwiyakamish kwetu. Tufanyidin kwongojiu pa kwijik anch ndiy uteshin minan yetu ni utubangidin. Kambuy Pita waleta kashinsh ka chom chinech palonday anch: “Tekany minan yawonsu padiay ndiy, mulong ndiy ukat kukulamany en.” (1 Pita 5:7) Chakin kamu Yehova ubangidin chom chin chawonsu chikata kutushiken. Yesu wakasikeshina rukat rikatay kutubangin Yehova, palonday anch: “Akat kulandish amiswesu aad ku rufalang rumwing, pakwez kwikil muswesu ukutwisha kuwa pansh wakad Tatukwen kwitiy. Chawiy niyen, Nzamb wachindil kal nswich jawonsu jidia ku mitu yen. Chad en, kangal wovany wom, mulong ukwetany usey uvud kupandakanamu amiswesu avud!”—Mat. 10:29-31, MM.
Kungamen pa Ukwash wa Yehova
7. Tukwet kashinsh ka ukwash ik?
7 Tukutwish chakin kamu kwikal nich kashinsh anch Yehova usotil ni ukutwish kutukwash pitwifitina nich minam. “Nzamb ndiy kwikang kwetu ni usu wetu, nkwash wetu udi piswimp mu yakamish.” (Kus. 34:15-18; 46:1) Nzamb utukwashining mutapu ik? Tushinshikinany yilondilay 1 Korint 10:13: “Nzamb udi wakin, ndiy kakwitiyip en anozany kusut usu wen; pakwez yoziu anch yez, ndiy ukunilejany njil ya kukwasinik, chakwel ukwikalany ni usu wa kupandakan.” Yehova ukutwish kusadish yom chakwel amudiosha mukankuny netu, ap ukutwish kutwinkish usu utuswiridina mulong wa kujijaman. Yehova ukutukwash.
8. Tukwisakin mutapu ik ukwash wa Nzamb?
8 Tukwisakin mutapu ik ukwash winou? Tushinshikinany chiyul chitwinkishinau: ‘Letany yakamish yen yawonsu kudi ndiy.’ Chom chinech chirumburikin anch tumwinkishin Yehova mu chifanikesh chisend cha milong ni yakamish yetu yawonsu. Tukat kupakish kulik kwiyakamish ni tushimpishin ni kumuchingejin atuwanyishina maswir metu. (Mat. 6:25-32) Ruchingej riner ritining kwitudish, kangal twachingejin pa usu ni manangu metu ayinetu. Kusutil ku kuziyil kwetu “mwishin mwa chikas cha usu wa Nzamb,” kumekeshin anch twij ndond yetu ya pansh. (Tang 1 Pita 5:6.) Pa chinech, ukwash winou utukwashin kujijaman mikadil yilikidinay Nzamb. Tukutwish twaswiriken atupandish kamu kapamp kamwing, pakwez tuchingejin anch Yehova wij kamu chisu ni mutapu wa kusal mulong wetwetu.—Kus. 54:7; Is. 41:10.
9. Difund dia mutapu ik diaswiridinay David kuditek padi Yehova?
9 Vurikany mazu ma David madia mu Kuseng 55:22: “Tek chisend chey kudi Nzamb, Ndiy ukukutuliku; Ndiy kakumulikip mwin kutentam kushemunik, ap pakemp kusu.” Pafunday David mazu minam, wadinga wiyakamishin nakash. (Kus. 55:4) Choviken anch kuseng kwinoku akufunda pa chisu mwanend Absalom pamupunganay amutambul want. Akitofel, mwin kumuyul mujim wachingejinay David, winunga mwi mpung yiney. David wakaba mau wadiokal mu Yerusalem mulong wa mwom wend. (2 Sam. 15:12-14, NW) Ap padingay mu mikadil yiney ya yakamish yikash, David wadandamena kumuchingejin Nzamb, ni kovap usany.
10. Chom ik tufanyidina kusal piturishina nich yakamish?
10 Chidi chijim anch etu, mudi David, tumushejina Yehova mu malembil piur pa yakamish yin yawonsu yikutwisha kututan. El tushinshikinany yitukasikeshidinay kambuy Paul kusal pa mulong winou. (Tang Filipoi 4:6, 7.) Kukwikal chibudikin ik ku malembil minam mawonsu? “Chisambu cha Nzamb chisutila ronganyin rawonsu chikwez kulam michim yen ni yitongijok yen mu Yesu Kristu.”
11. Ov, “chisambu cha Nzamb” chilamining michim yetu ni usu wa manangu metu mutapu ik?
11 Ov, malembil makutwish kukushikij ku kukarumun mwikadil wey? Inge. Tufanyidin kwijik anch Yehova kakatap yisu yawonsu kwakul ku malembil metu mu mutapu utusotila. Chikalap nchik mwamu, malembil makutukwash twisikan mu manangu metu, chakwel anch yakamish yetu yitulimidinap nakash. “Chisambu cha Nzamb” chikutwish kututudish pitukwachikina nakash nich yovil yitwakamishina. Mudi chisak cha amasalay itinau kulam musumb pataliken nau amasalay akankuny ezinaku, “chisambu cha Nzamb” chikez kuyilam michim yetu ni usu wa manangu metu. Chikez kututwishish kand tudiosha kwidjidjek kwetu, wom wetu, ni yitongijok yetu yiyimp ni kutukangesh kukwatang mipak yakad manangu swaswa.—Kus. 145:18.
12. Let chilakej chilejena mutapu ukutwishay muntu kanang kwikal nich chisambu cha mu manangu.
12 Mutapu ik tukutwisha kwikal nich chisambu mu manangu oku tudi mu yakamish yikash? Tushinshikinany chilakej chimwing chifanikena nich mwikadil wetu mu mitapu kanang. Mwin kusal mudimu ukutwish wasal mudimu ni kapit wa mudimu muyimp. Pakwez, mwin kusal mudimu ukwet mutapu wa kumulej mukurump wend wa mudimu yovil yend piur pa murund muwamp, ikundj umwing wisikena. Mukurump wa mudimu wamulej nich kashinsh anch uteshil mwikadil wend ni wamulej anch akumudioshap kapit wa mudimu pa ndond yend. Chom chinech chikumwovish nchik mwin kusal mudimu? Kwitiyij kashinsh kinak ni kwijik yisotina kusadik kukumukasikesh mu mupak wend wa kudandamen nich mudimu, ap anch chikumwit kura nich yikokujol yikwau kand mu chisu chinicha. Chawiy chimwing, twij anch Yehova uteshil mwikadil wetu, ni utwinkishin kashinsh anch piswimp kamu ap “mwant wa mangand minam akumumwang.” (Yoh. 12:31) Chitwongojin mudi ik!
13. Kuwejin pa malembil, chom ik chikwau tufanyidina kusal?
13 Ov, chiwanyidin kusu kwau, kudi etu kumulej Yehova milong yetu mu malembil? Bwat. Kudi yivud ya kusal. Tuswiridin kusal kwambatan nich malembil metu. Chisu Mwant Saul chayitumay amakundj ku chikumbu cha David akamujipa, David walembila anch: “A Nzamb wam, nkamunina kudi akankuny nam, nlama kudi awiy anlankina. Nkamunina kudi in kusal nayimp, mpandisha kudi antu asotila mash.” (Kus. 59:1, 2) Kuwejin pa malembil, David watesha dizu dia mukajend ni wasala chadinga chifanyidinay kusal wachin. (1 Sam. 19:11, 12) Chawiy chimwing, tukutwish twalembil mulong wa kutan manangu makutukwasha kura nich ni pamwing ap kukepishaku mikadil yetu yitunenganeshina.—Yak. 1:5.
Mutapu Tukutwisha Kutan Usu wa Kujijaman
14. Chom ik chikutukwasha kujijaman piturishina nich yakamish?
14 Yakamish yetu yikutwishap yapwa swa. Yikutwish yadandamen mu kachisu. Anch mwamu chidia, chom ik chikeza kutukwash tujijamana? Cha kusambish, vurikany anch pitudandamedina kumusadil Yehova nich kushinshaman chikalap nchik yikokujol, tumumekeshin anch tumukatin. (Mid. 14:22) Vurikany kushitak kwamushitakau Yob kudi Satan anch: “Ov, komb Job umwovil Nzamb wom chamwamu? Bwat, mulong ey umuchidijin, ni dijuku diend, ni yom yend yawonsu, ni yivam yend yavulijadil kal mwi ngand. Pakwez katat tandjek bil chikas chey, umusheshil mapit mend, chakin kamu, ching wez wakuchin patok!” (Yob 1:9-11) Kusutil ku kushinshaman kwend, Yob wamekesha anch kumushitak kwinoku kudi kwa makasu. Kusutil ku kujijaman kwetu mwishin mwa mikadil yikash, niyetu tukumumekesh Satan kwikal mukamakasu. Pa chinech, kujijaman kwetu kukasikeshining ruchingej ni kashinsh ketu.—Yak. 1:4.
15. Yilakej ik yikutwisha kutukasikesh?
15 Cha kaad, ijikany anch “mawiy mar mamwing masutila kudi akadivar mu mangand mawonsu.” (1 Pita 5:9) Inge, “yoziu yikata kushik kudi en, yawiy kand yikata kushik kudi antu awonsu.” (1 Kor. 10:13, MM) Chawiy lel ukutwish kutan usu ni kukapuk kusutil ku kutongijokin pa yilakej ya antu akwau kupandakanamu kutongijokinang ching pa yikokujol yey. (1 Tes. 1:5-7; Heb. 12:1) Itekinany chisu cha kutongijokin pa chilakej cha antu wijanya ajijamena nich kushinshaman kwikalap nchik kwiwejinaku kwa yakamish. Ov, wakimbijola kal mu jinsangu ja mwom japalangeshau, kutal jinsangu jidiamu ja antu adinga mu mwikadil mudi weyey? Ukujitan kwikal ja ukwash kudi ey.
16. Mutapu ik ukatay Nzamb kutukasikesh piturishininga nich yoziu kushalijan?
16 Cha kasatu, vurikany anch Yehova udi “Tatuku wa riy ni Nzamb wa kwongoj kwawonsu; Ukat kutwongoj mu mar metu mawonsu, chakwel ni etu tukutwish kuyongoj ni yau adia mu mar nich kwongoj kwatwongojau nich etu kudi Nzamb.” (2 Kor. 1:3, 4) Chidi mudi anch Nzamb udi ku tubet twetu mulong wa kutukasikesh ni kutwinkish usu, kichidiap kusu mu riyind retu ra katat pakwez mu “mar metu mawonsu.” Chawiy chikata kututwishish kuyongoj antu akwau ‘mu mar min mawonsu.’ Paul amwinend wimena uyakin wa mazu minam.—2 Kor. 4:8, 9; 11:23-27.
17. Ov, mutapu ik ukutwishay Bibil kutukwash kura nich yakamish ya mwom?
17 Cha kanying, tukwet Dizu dia Nzamb, Bibil, dikutwisha “kuyilej antu kuyibabesh ni kuyitenchik, ni kuyilej kwirijek mu kutentam, chakwel muntu wa Nzamb ukwikal uwanyidina mu kusal mudimu wawonsu uwamp.” (2 Tim. 3:16, 17) Dizu dia Nzamb kidikatap kusu kutwikadish “uwanyidina” ni kwikal nich ukash wa “kusal mudimu wawonsu uwamp.” Dikat kand kututwishish kura nich yakamish ya mwom. Dikat kutwikadish ‘awanyidina kamu’ ni ‘akash kamu.’ Dizu dia rudim ra kusambish rakarumunau anch ‘kwikal nich ukash’ dirumburikin “kwikal utenchikinau nawamp.” Pasak adisadilinga dizu dined pantaliken nich wat utenchikinau nawamp nich kachom ni kachom kaswiridinau mulong wa weny ap chamu chadinga tayad chitenchikinau nawamp mulong wa mudimu wawonsu wadinga uchingejinau. Chawiy chimwing, Yehova kusutil ku Dizu diend utwinkishin yawonsu yituswiridina chakwel tutwisha kupandakan chom chitukutwisha kutanijan nich. Kwambatan nich, tukutwish kulond anch, “Anch Nzamb walikidil chakamish kanang, nikuchijijamen nich ukwash wend.”
Kukolik ku Yakamish Yetu Yawonsu
18. Ov, kushinshikin pa chom ik kukeza kutukwash kujijamen nich kushinshaman?
18 Dinans dia katan didi, shinshikin chisu chawonsu uyakin wamushena anch Yehova ukuyikol antu awonsu piswimp ap ku yakamish yawonsu. (Kus. 34:19; 37:9-11; 2 Pita 2:9) Anch kwawanyin, kutupandish kwetu kudi Nzamb kurumburikinap ching kusu kupand ku yakamish ya katat pakwez kand kuman mutapu wa kutambul mwom wa chikupu, chikala mwiur pamwing ni Yesu ap mu paradis panap pansh.
19. Chitwishikin nchik kujijaman nich kushinshaman?
19 Djat ni pa chisu chinech, tuchiril nich mikadil ya mar ya mangand minam mayimp. Tuswiridin mudi ik chisu chimakeza kupwa! (Kus. 55:6-8) El tuvurikany anch kujijaman kwetu kushinshamena kumekeshin makasu ma Djabul. El twakany usu kusutil ku malembil metu ni ku ukadivar wa Ukristu, nich kulam mu manangu anch akadivar niyawiy amen yoziu mudi yetwetu. Dandamen kwikal utenchikinau nawamp kusutil ku kusadil nawamp Dizu dia Nzamb. Kangal walik kumuchingejin kwey Yehova mulong wa ku kumbangin nich rukat ra “Nzamb wa kwongoj kwawonsu” chakwel tulika kunyikek. Vurikany anch “mes ma [Yehova] madi padi in kutentam, ni matu mend manzurikidin ku kudil kwau.”—Kus. 34:15.
Ov, Ukutwish Kwakul?
• Mutapu ik wiyovay David mulong wa mar maray nich?
• Ruchingej ik ramekeshay Mwant Salomon?
• Chom ik chikutwisha kutukwash kujijamen mikadil yilikidinay Yehova?
[Chipich chidia pa paj wa 13]
Salomon wamuchingejina Yehova anch ukusal chom kanang mulong wa antu End amena mar
[Chipich chidia pa paj wa 15]
David wamutekina Yehova chisend chend mu malembil ni wasala kwambatan nich malembil mend