Kupalangesh Kwa Rusangu Ruwamp Kujim Mu Andes

KWADINGA, antu 18 a pakach petu, alel pansh pikisina. Twazala mashik pa ndond twadinga tulela, twatesha mutapu ruvul mujim mwabulangay pa malat ma chikumbu chetu. Pa kushinshikin mwikadil uyimp wa ka chikumbu kinak, twatongina anch yetu antu a kusambish kwandamamu.

Ov, mulong wak antu 18 eza mu mwab winou? Chakul chengamidin pa maku metu ma kusal kwambatan nich mbil ya Yesu ya kulejan rusangu ruwamp “ni kwisudiel kwa mangand.” (Mid. 1:8; Mat. 24:14) Twadinga mu weny wa kuya kulejan ku teritwar wa kulemp udia mu Andes mu Bolivie.

Pa Kushik Kwinikwa

Chikokujol cha kusambish chadinga mutapu wa kushik kwinikwa. Atuleja anch kwikiling program muwamp wijikena wa motak kuya kwinikwa mulong kulepin. Motak wetu paweza, twaumana anch wadinga ukemp kupandakanamu mutwadinga ni kuutongin, chawiy amwing etu aburena ndond ja kushakam. Pakwez etu awonsu twaya kwin twasota kuya kwa.

Rutong retu radinga ra kushik ku mal ma kulemp ma mu Andes mu Bolivie. Chawiy kupwa kwa weny ni motak, antu adinga mu chirund chetu, asenda yakudia yivud, alondulijana mu mulong ni kwend pakemp-pakemp mu kukaninik ku mukandu.

Ap anch mal mading mameken makemp-makemp, yikumbu yadinga palemp-palemp, chawiy chasenda asaa avud pa kuunyingumuk ul ni ul wawonsu. Chikalap nchik weny ulemp utwenda, kwamekana kand chikumbu chikwau mu ka chitampu. Chisu ni chisu twashadoka mu kanrumbangesh ka jinjil jivud jisutila mu masuku.

“Ov, Mulong wak Kiwasambedilanyap Kwez?”

Mband umwing wakashimuka nakash pa kutesh weny ulemp twenda kal, watwinkisha mbil ya kusadil mpish yend ni nkuny chakwel twisuka yakudia yetu ya midi. Pateshay yilondila Bibil piur pa ngikadil ya afu, ikundj umwing wipula anch, “Ov, mulong wak kiwasambedilanyap kwez?” Wasangara nakash ni pa chisu twadiokala mu ul wau, watushindikija mulong wa kutwipul yipul yikwau mwi njil. Ikundj mukwau wadinga kandikal ateshangap ya Atuman a Yehova ni wasangera nakash mikand yetu. Watujikitisha nakash-nakash mulong wa kwez kwetu ni watwinkisha anfungul a ku chikumbu kutukutwisha kulal.

Uchuku umwing, kwajala nakash bwi ni pakad kwijik, twajika antent etu pa chizaz chijim cha anziu. Asambisha swa-swa kutusum. Twadinga tuziyin nakash ni kitwatwishap kushemunikin kwidjing, ni pakad kulab anziu atudiula mudi kitudiakwap.

Pa kusambish nyim ni mbavu jetu jatuswana mulong twading tulel pansh, pakwez pa uchuku twijidina. Ni kuswan ni kusansan kwawonsu twakuvuramena pamanch pitwamana jinwengil ja ufun ni pa kuman madj manyingumokin lel pakemp-pakemp ku tubet twau ni kulemp kwa nej muwamp udia pa misong ya mikandu. Kwadinga ching kusu masok ma mpol ya kawit ni miminy ya atujil.

Kupwa kwa kwowal mu kawit, twashinshikina etu awonsu pamwing mufund wa Bibil, twadia chakudia cha pamanch, ni twasambisha kukaninik pakemp-pakemp ku mukandu kuya ku mal makwau. Chita usu pa kukaninik ku mukandu. Twamusankana ipal a mband umwing wadila pateshay anch dijin dia Nzamb, Yehova, didi mu Bibil. Wakwachika nich yovil yikash. Katat ukat kumujimbul Nzamb pa dijin diend mu malembil mend!

Ipal a ikundj umwing walonda anch Nzamb ufanyidin kwez kumuvurik, ni wawanga, muminy wadinga ulondila anch angel awiy atutumang. Ikundj mukwau, muyej nakash wakad kutwish kutumbuk ku chikumbu chend, watuleja anch kwikil muntu ap umwing wa mu ul wau ukata kusal usu wa kwez kumwendil. Washimoka nakash pa kutesh anch twadiokala ku La Paz. Ikundj mukwau kand washimoka nakash pa kuyiman Atuman a Yehova ayil ku yikumbu ya antu, oku marelijon makwau mayitazukining nich jimpwambu ja ma egliz.

Kwikil chikumbu ap chimwing cha mwab winou chikweta kasu ka nzembu, chawiy antu ayiling ni kulal anch kamu kwajal ni akat kuchingel ching muten chad alanka lel. Chawiy lel, chakwel kuyitan antu kwol kwau, chatufanyidina kusambish kulejan pa saa wa musamban pamanch. Chamwamu tukuyitan antu avud ayawolang kal kwau mu yir. Kwinyim, antu adinga asadina mudimu asota kwiman chakwel atesha uruu udiokila mu Dizu dia Nzamb, pamwing ap nich kumupimishaku ngomb wau wadia upwitina chikasu. Antu avud twatana ku yikumbu atwadila yikit ya amikoku pansh tushakamap ni ayitazuka yid yawonsu ya dijuku yeza yitesha. Anfayingand amwing atwinkisha twimpay tujim twa kabak mulong wa mikand yengamidin pa Bibil yitwayinkisha.

“Kiwavuramedinanyap”

Inge, chakwel antu aya kurutu mu ronganyin ra Bibil, aswiridin yom yivud kupandanamu kuyendil kapamp kamwing kusu. Antu atwita tuchirik kand tuyileja yom yivud. Mulong wa chinech, twaya maweny mavud ku mwab winou wa Bolivie.

Pa weny wa nsudiel, mband ipal wasangara pa kutesh anch twez kal, walond anch: “Udiany mudi an am. Kiwavuramedinanyap.” Ikundj umwing watujikitisha mulong wa mudimu wetu ni watuladikija anch piukwezanya kand ukushakamany kwol kwam. Pamwingap difut dijim dia usu wetu diadinga dia kutesh anch mband utwisamba nend pa weny wetu umwing, wayil kal kushakam mu musumb ni ulejen katat rusangu ruwamp.

Pa dichuku diansudiel dia weny wetu wa kusambish, twaburena many ma kwakish nich mbwabul wetu wa nzembu ni twadinga piswimp twapwish kal yakudia yetu yawonsu. Twakumangeja nkuny jivud mulong wa kwakish nich kasu, twisuka yakudia ya nsudiel yitwashala nich, ni tusambisha kuchirik ra pansh. Twadinga kulemp ni musumb mutukutwisha kukandamin motak. Chakin kamu twashika uchuku bwi.

Kuchirik Kwol Kwetu

Weny wa kuchirik niwawiy wadinga ni milong yau mulong motak wafa. Pa chisu, twatwisha kukandam kwinyim mu chilangumun mwadinga mwizwila too runtu. Chinech chatwinkisha mutapu wa kuyilej in kwendangan mudi etu asota kwijik chitweza kusal kwinikwa. Ap anch chivadik chau antu inay in usany, chisu chivud adinga azangurokina ni arund.

Kwinyim kwa asaa chinan mu chilangumun chinech, twashika kwol kwetu—twatalala nakash ni twaumidina ni mashik. Pakwez, weny winou kiwadingap wa chamwamu. Pitwadinga mwi njil, twatwisha kutenchik dilejan dia Bibil ni mband umwing ushichinga netu mu musumb.

Chakin kamu chadinga kwitapil dilau kuyilej antu inay ashichinga ku miab ya kulemp rusangu ruwamp. Twalejana mu misumb yinying ni mu tumal tuvud. Kitwatwishap kuvuramen kutongijokin mazu minam: “Chidi chom chiwamp nakash kumuman muruu ukat kwez, usutidil pa mikandu. Uletil rusangu ruwamp, rawiy kamu rusangu ra chisambu! Ulondil ya dipandish.”—Is. 52:7; Rome 10:15.

[Chipich chidia pa paj wa 17]

Adi tayad kulejan rusangu ruwamp