Kushilamu kwa Usey

NASHILAMU kushilamu kwa usey. El nirumburil chanshikija am, maku changadim wa mu Espagne, nishilamu kushilamu kwinoku.

Kwol kwetu kwadinga kuburedin chisambu ni kwovijan. Dijuku dietu dikala dia kanrumbangesh kakash pafay mwancham ikundj rufu rimwing rikash mu chak padingay ni mivu yinying. Chikwau, yisal yiyimp ya tatuku yasala anch chimukasikena maku ikal nich musangar mu uruw. Pakwez, mar minam, mamukangeshap kumulej yayam ikundj ni am amwinam malejan ma usey ma mashakamin.

Mu kusut kwa chisu, yayam watana, ni yam nachika. Kachisu kakemp kwinyim kwa pinipa, makwam amuleja anch ukwet kanser, kupwa wamushikija ku rufu. Pakwez, kurutu kwa kufa kwend, watwinkisha dipit dia usey.

Muntu umwing wadinga wijikenay nend wamuleja ya ruchingej ra disanguk ridia mu Bibil, ni makwam witiyija kwilej Bibil. Pa chisu cha nsudiel cha mwom wend, uruu wa ruchingej ridia mu Bibil wamwinkisha chom cha usey cha mwom wend ni wamukwasha kutan chisambu.

Pitwamana yibudikin yiwamp ya uruu wa Bibil padi ndiy, yayam ni am twasambisha kwilej Dizu dia Nzamb. Ambabatisha mudi umwing wa Atuman a Yehova ngond umwing kurutu kwa kuvadik kwa mwanam wa kaad, mwan mband muwamp utwapila dijin dia Lucía.

Dichuku diambabatishau diadinga dijim kudi am. Diyingish dimwing diadinga anch katat nikal kal wa Yehova, nipana amwinam kudi ndiy mulong nimusadila chikupu. Diyingish dikwau diadinga anch nikutwish kumulej mwanam ikundj ni wa mband ritiy ram.

Diyingish dined dia kaad dikala musul wa musangar wam adikaturija ngwa. Pawanyishay Lucía mivu yinying, ditont diasambisha kumusansan nakash. Kupwa kwa kumupim tupamp tuvud, mwin kupim waturumburila anch ku michim yend yitok kwadinga chom mudi dibuj dia dilal. Dokiter warumburila anch Lucía uyedin musong wa kanser wa kusapurik kwa maselil. Mwamu mwasambisha njit ja Lucía ja kura nich kanser padingay ni mivu musamban, chawiy chasala ashakama machuku mavud mu rupital.

Spiritu wa Kwipan

Pa mivu yiney ya mar, Lucía wakasikeshanga nich kwimbwikat kwa chirungil ni kwisus kwa kwingongoj. Mutapu wadingay ni kujijamen mayej kwayishimokishisha in kusal mudimu a rupital. Wadinga ni kwovijan nawamp ni amingang, wayikwasha kwangan yakudia ya mayel (yaourt), mem ma mabuj, ni yom yikwau kudi adinga mu rupital mu malal madia piswimp nend. Pa yisu yimwing amingang adinga ni kumudjik Lucía kabwik mutok ni badj yadinga ni kumwijikish mudi “nkwash wa mwingang.”

Muntu wasalanga mudimu walonda anch: “Lucía wangovisha ushon nakash. Wadinga mwan muwamp, mwin kuyitongin akwau, ni wakatanga kufwatul yipich. Wadinga mwin kusangaresh ni upamina, upamina kamu nakash.”

Lucía watana usu ni kwisikan kwend mu Dizu dia Nzamb. (Heb. 4:12) Wadinga witiyijin anch mu mangand masu “kukez kikalip kand rufu; ap kukez kikalip kand madil, ap kushikok kudil, ap kusansan, kwamwamu kand,” mudi mushidilamu Dizu dia Nzamb. (Kubur. 21:4) Kuyisanger antu akwau, wasadila chisu chadingay nich mulong wa kuyilej uruu wa Bibil. Ruchingej rikash radingay nich Lucía mu disanguk ramukwasha alama kwisikan kwa yovil yend ni musangar ap anch kadingap nich ruchingej ra kupand ku mayej mend. (Is. 25:8) Walama ngikadil yiney djat ni pa dichuku kanser wasenda mwom wend.

Pa dichuku dinidia pawiy nashilamu kushilamu kwa usey nakash. Lucía katwishap kuburil nawamp mes mend. Tatukwend wamulama ku chikas chimwing niyamiy nalama chikwau. Nilondila amwinam anch: “Kangal wiyakamish, nikukushap. Pim kwey pakemp-pakemp. Piukulanka ukwiyov nawamp. Kiukezap kwov kusansan kand, ni nikez kwikal pamwing ney.”

Katat nifanyidin kulam kushilamu kwinoku. Nij kal anch chisu cha kuchingel chikwikalap chiswapela. Pakwez nij kand anch, ang namuchingejin Yehova nich kushimpish ni kulam kushinsham kwam kudi ndiy, nikez kwikalaku pakezay kuchirik mu disanguk.

Uswan Watushilay Lucía

Chilakej cha kukapuk kwa Lucía, pamwing nich ukwash wamushena wa chikumangen, yamukwata nakash nfumwam ku muchim, wadinga ulikina ritiy ram. Dichuku diafay Lucía, wanleja anch ukushinshikin yitongijok yend. Kupwa kwa mbing jikemp, wamwita mukurump umwing wa mu chikumangen ileja nend Bibil. Nfumwam wasambisha kapamp kamwing kukumangan ku yikumangan. Nich ukwash wa Yehova walika kuna ruwand, chom chadingay ukangeny kulik kurutu.

Runeng rinova mulong wa kufa kwa Lucía kirapwap rawonsu, pakwez nimujikitishin nakash Yehova mulong wa uswan washay Lucía. Twiyongoja ni nfumwam umwing ni mukwau nich ruchingej ramushena ra disanguk, ni kutongijokin chisu chitukeza kumuman kand Lucía—maswimbu mend, mes mend ma kabuj ni nfot pa matam mend pasipinay.

Yom yikash yamushikena changadim wam yamukwata pakampwil nsulangen netu ku muchim. Diampos dimwing dianaka ruvul pamanch, mband umwing wadinga ni mwanend ikundj wayanga ku shikol yimwing ni Lucía, weza kwol kwetu. Wafisha mwanend ikundj mukwau, wa mivu 11, mu mayej mawiy mamwing. Pateshay yamushikena Lucía, mband wakimba kwi ndond tushichinga ni weza kutwendil. Wasota kwijik mutapu nara ni rufu ra Lucía ni wayula anch tusala kachirund ka kuyongoj amaku akwau adia mu mikadil mudi yiney.

Namurumburila anch natanin kal amwinam rongoj ridia mu kushilamu kumwing kudia mu Bibil, kupandakenamu nakash yawonsu yikutwishau kulet antu. Mes mend masangara pinadinga nitangin mazu ma Yesu mafundilau mu Yohan 5:28, 29. Witiyija kwilej Bibil ni kapamp kamwing wasambisha kamu kwov “chisambu cha Nzamb chisutila ronganyin rawonsu.” (Filip. 4:7) Chisu chivud pitukata kwilej Bibil pamwing, tukat kwimik ni twitongijikin ayinetu mudi tudi mu mangand masu, tuyakin akatish netu afa asangukina.

Inge, mwom wiswimp wa Lucía watushila uswan wa chikupu. Ritiy rend ratukwasha kunung mu uumwing dijuku diend mu kumusadil Nzamb, ni rakasikesha mupak wam wa kushal dang mu ritiy. Pakad kwidjidjek, etu awonsu twashadisha kal akatish netu akutwisha kusanguk tufanyidin kushilamu kushilamu kumwing kwa usey.

[Chipich chidia pa paj wa 20]

Paradis wafatulay Lucía