Kulejan Mu Chiku

PADINGAY kambuy Paul mu musumb wa Aten, wadinga dichuku ni dichuku ni kuya kulejan rusangu ruwamp ra Yesu mu chiku. (Mid. 17:17) Paul watonda kuyang mu chiku mulong yawiy ndond yadingau ni kuya antu avud a mu Aten.

Kupwa kwa kusut kwa mivu 2 000, antu a Yehova niyawiy ayiling mu yiku mulong wa kulejan uruu wa Want wa Nzamb. Mulong wak? Mulong chitwishikin kuyitan antu avud kwinikwa. Ilel, chiku chikutwish chikal mwab ujim wa wingend-a-mushing. Atuman amwing akat kutekang ka kapalakany mudia tebur mulong wa kwalap mikand yirumburila Bibil, anch mwin makashing wayinkish mbil.

Chilakej, mu makashing mamwing majim ma New Jersey, États-Unis, kulejan kwa mukand wadinga nich mutu ulondil anch, “Chitwishikin Nchik Kulam Usey wa Dijuku?” kwayipwita antu nakash. Kwadinga chibudikin ik? Mu dichuku dimwing kusu, mikand 153, ya mu jindim musamban ayisenda kudi antu.

Mband umwing washejina ku kapalakany mudia tebur wa mikand watesha nawamp yirumburil yaletay umwing wa Atuman. Mband witiyija anch chidi cha usey ujim kwikal ni Nzamb mu mwom wetu ni mu dijuku dietu. Watambula mikand yiney: Ilejina Kudiay Mulej Mujim, Le secret du bonheur familial, ni Les jeunes s’interrogent — Réponses pratiques.

Pa kusambish kwa urel, ikundj umwing wasutila piswimp ni kapalakany mudia tebur wa mikand padingay usotil andama mu makashing madinga piswimp. Mes mend mamana buku Les jeunes s’interrogent. Nambaz wadinga wiminya mu ka kapalakany wamumana anch kudi chisangaredinay. Nambaz wamwipula anch, “Ov, waman kal mukand ukusangareshina?” Witiyija ni mutu ni wilika muny pa buku Les jeunes s’interrogent. Nambaz wamwinkisha buku, ni ikundj winou wamutambula. Ndiy walonda anch ukwet an asatu. Mudi mwadingau ni kudandamen nich mambamb, walonda anch ukat kwisambang nau kapamp kamwing pa rubing. Anend aad a kusambish ikadil kal ni dikum dia mivu. Padiay ni kutalijol mu buku, ndiy walonda anch ukutwish wamusadil nawamp win kamu mudi ukwash mulong wa minsamb yau yimwing mu dijuku. Mwin kulejan wapwitina kand manangu mend pa buku Le secret du bonheur familial, ni wamuleja nich kashinsh anch ndiy pamwing ni mukajend akutwish atanamu yiyul yimwing ya usey pa chisu cha kukwat mipak ya mu dijuku. Ikundj winou wasangara nakash pa kutesh chiyul chinech, wapana mulambu wend, ni witiyija anch muntu kanang asambish kumwendil.

Mutapu ik wiyovau Atuman pa dichuku dialejanau mu mwab ujim wa wingend-a-mushing? Nambaz umwing walonda anch: “Nasangaredin nakash mutapu winou wa kulejan. Udi uman wa pakampwil kudi am!” Nambaz mukwau walonda anch: “Yehova ulondil anch chifanyidin kulejan rusangu ruwamp djat ni ku misong ya divu. Ilel, mu Paramus, New Jersey, rusangu ruwamp riner riyikwatin antu alondila jindim kushalijan. Chansangareshin nakash kwikal mu ditenchik dined. Muntu ni muntu wasadila mwamu wasangara. Kwikil muntu ap umwing wa pakach petu wasota kuchirik kwol kwend kwisudiel kwa dichuku.”

Ov, ukutwish watandurilany mutapu ukata kulejanang rusangu ruwamp? Mutapu wetu wa kusambish wa kulejan udi wa kuya ku chikumbu ni chikumbu. (Mid. 20:20) Ov, ukutwish washinshikinany kand piur pa kulejan mu yiku ap mu mwab ujim wa wingend-a-mushing?