Twikalany Nich Chitongijok Cha Mifund Pa Ukash Wa Mujimbu

“Ukamukata Mwant Nzamb wey nich muchim wey wawonsu, nich mupim wey wawonsu, nich manangu mey mawonsu, nich usu wey wawonsu.” —MAR. 12:30.

1. Kwisambishil rutong ra Nzamb mulong wa antu radinga nchik?

MU RUTONG ra kusambish ra Yehova Nzamb kimwadingap anch antu ayela mayej ni afa. Adam ni Eve ayiteka mu chir cha Eden, ap anch paradis wa musangar, “mulong wa kuchidim, ni mulong wa kuchilam,” kichadingap kusu mu mivu 70 ap 80, pakwez chadinga mulong wa mivu ni minang. (Dis. 2:8, 15; Kus. 90:10) Anch antu inay aad a kusambish ashala ashinshamena kudiay Yehova ni anch aziyila nich rukat ku ukaleng wend, ing kelap kuyel, kwikal nich ubid, ni kufa.

2, 3. (a) Buku wa Mulej urumburil upal nchik? (b) Ov, nany ukweta chisend cha rufu ridiokila kudiay Adam, ni mutapu ik ukezau kupwish yibudikin ya chitil?

² Mulej shapitre wa 12 wisambidin nawamp win kamu piur pa “machuku mayimp” mezininga pamwing nich upal kudiau antu akad kuwanyin. (Tang Mulej 12:1-7.) Nswich jitok ajifanikeshin nich chisu chiukata kubudish yisalamb ‘mutond mudi wa kalifur.’ Mend ayifanikeshin mudi ‘amakundj ayilabu’ aziya kal ni asambisha kal kuzal. Ayangadim akata kutadil pa kapend chakwel amana chitokish pakwez amen ching kusu mididim ayifanikeshin kamu nich kukep kwa usu wa kuman kwa mes. Mudi mazeu mamwing mapalok kal, ‘ayangadim akata kutwa alik kal kusal mudimu mulong akep kal.’

³ Mend yizadila, kukep kwa usu wa kuman, ni kupalok mazeu, chakin kamu kiyawiyap yom yayitonginau antu kudi Nzamb pa kusambish. Chikwau, rufu ritwaswana kudiay Adam ridi chimwing cha “mudimu wa Satan” yikezay kushesh Mwan a Nzamb kusutil ku Want wend wa Umesia. Kambuy Yohan wafunda anch: “Pa chinech Mwan a Nzamb weza, chakwel ndiy ukutwish kushesh mudimu wa Satan.”—1 Yoh. 3:8.

Chidi cha Chivadik Kwibangin Muchifanyidina

4. Ov, mulong wak ukatau atushalapol a Yehova kubangin nich kwisikan piur pa ukash wau wa mujimbu, pakwez chom ik chijau?

⁴ Pa chisu chinech, atushalapol amwing a Yehova arishin nich yikokujol ya kuyelol ku mujimbu ni ya upal yiyikwatina antu in awonsu aka yitil. Kubangin kwisikena piur pa ukash wa mujimbu wetu mu mikadil yimwing kwoviken kwau ni kudi kwa ukwash. Ov, kitusotilap tumusadila Yehova ‘nich usu wetu wawonsu’? (Mar. 12:30) Pakwez, pa chisu tusotila twikal isikena piur pa mulong wa ukash wa mujimbu, tufanyidin twikala nich manangu mawamp anch tukwet yikemp kusu yitukutwisha kusal mulong wa kukepish kwez kwa upal ap kusot kwiyep mayej.

5. Ov, chom ik tukutwisha kwilejin kudiau atushalapol ashinshamena a Nzamb arisha nich mayej?

⁵ Atushalapol avud ashinshamena a Yehova arisha nich yikokujol ya ukash wa mujimbu. Epafrodit wadinga umwing wau. (Filip. 2:25-27) Timote, mbay mwin kushinshaman wenday Paul wadinga ni kuyelol ditont, chawiy Paul wamuyula ang asambishang kunangaku “tuviny tukemp.” (1 Tim. 5:23) Paul amwinend warisha nich “muy mu mujimbu wa mbij,” pamwingap madinga mayej ma mes ap mayej mindjing madinga mamukwatina ku mujimbu makad kutwish kwok mwi njil ya chimwingang pa chisu chinicha. (2 Kor. 12:7; Gal. 4:15; 6:11) Paul wamulembila Yehova piur pa “muy mu mujimbu wa mbij” jend. (Tang 2 Korint 12:8-10.) Nzamb kasalap chilay mulong wa kumudiosh Paul “muy mu mujimbu wa mbij.” Pakwez, Nzamb wamukasikesha chakwel aujijamena. Chawiy usu wa Yehova wamekana mu kuziy kwa Paul. Ov, kudi chom tukutwisha kwilejin ku rusangu riner?

Ipukany Kwiyakamish Nakash Piur pa Ukash wa Mujimbu

6, 7. Ov, mulong wak tufanyidina kwipuk kwiyakamish chipandakenamu mulong wa ukash wa mujimbu wetu?

⁶ Mudi muwijanya, Atuman a Yehova itiyijining ukwash wa chimwingang ni mitapu kushalijan ya kwokan. Chisu ni chisu mu Réveillez-vous ! wetu muding mitu ya milong yisambidininga milong ya ukash wa mujimbu. Pakwez ap anch kitukatap kukasikeshin mulad kanang wa kwokan pakampwil, tukat kusanger nakash ukwash ni kusadil mu kwovijan nau ansil in kwokan. Chakin kamu, ukash wa mujimbu uwanyidina kiutwishikinap. Chawiy lel, twij anch chidi cha manangu anch kangal twiyakamisha chipandakena piur pa ukash wa mujimbu wetu. Manangu metu mafanyidin kushalijan nich ma antu akad “ruchingej,” atongina anch mwom udi ching unou kusu ni akata kusadil mutapu win wawonsu wa kwokan mulong wa kupakish kwok mayej mau. (Efes 2:2, 12) Tukwatin mupak wa kulik kushesh kwitiyik kwetu kudiay Yehova mulong kwau wa kusot kupandish mwom wa katat, mulong twij kamu anch, ang twashinshaman kudiay Nzamb, tukez kulamat ku “kupand kudia kamu kupand kwakin,” wawiy mwom wa chikupu mu ditenchik disu dia yom dia kushilamu.—1 Tim. 6:12, 19; 2 Pita 3:13.

⁷ Tulikining kand kwiyakamish chipandakenamu piur pa ukash wa mujimbu wetu mulong wa diyingishin dikwau. Kwiyakamishang chipandakena piur pa ukash wa mujimbu wetu kukutwish kwatushikij ku kwiyakamishin ching kusu padi etu ayinetu. Paul wababesha pantaliken nich chak chinech payikasikeshay In Filipoi chakwel “kangal umwing ni umwing asotijolang ku yom yend amwinend, pakwez asota kand yom ya akwau.” (Filip. 2:4) Chidi cha manangu kwisikan mu kwiyakamishin padi etu ayinetu, pakwez kuyibangin kwakin akadivar netu kutukuyibangina ni kuyibangin antu tukata kulej “katumb kawamp ka want” kukez kutukoj ku kwiyakamish chipandakenamu pa ukash wa mujimbu wetu.—Mat. 24:14.

8. Kwiyakamish kupandakena piur pa ukash wa mujimbu wetu kukutwish kwatushikij ku kusal ik?

⁸ Chak chidiaku chidi anch mwin Kristu ukutwish walikin yakamish ya ukash wa mujimbu yibachikina ku yisakin ya Want. Kwiyakamish chipandakena mulong wa kwiyokish kukutwish kand kwatushikij ku kupakish kuyishindil antu akwau kuman kwetu piur pa usey wa yakudia yimwing, mulad umwing wa kwokan, kupandakeshaku yakudia. Pa mulong winou, tufanyidin kushinshikin chijidik chidia mu mazu ma Paul anch: “Ukutwishany kujingunin yom yipandakena kuwap. Chad ukez kwikalany antu adia zwang wakad kwez kukufishany nich pa dichuku dikuchirikay Kristu.”—Filip. 1:10, MM.

Chom ik Chipandakena Kuwap?

9. Ov, chisu chimwing cha yom yipandakena kuwap yitukutwishap kulik kuvuramen, ni mulong wak?

⁹ Anch twatwish kujingunin yom yipandakena kuwap, tukwikal in mushiku mu mudimu wa kwokan muspiritu. Usadikina kusutil ku kukun ni ku kulejan Dizu dia Nzamb. Mudimu winou uletina musangar utukwashin etu pamwing ni antu tukata kulej. (Jinsw. 17:22; 1 Tim. 4:15, 16) Magazet Chinong cha Kalam ni Réveillez-vous ! makweting pa chipatu mitu ya milong yisambidina piur pa akadivar ni anambaz netu a muspiritu adinga nich misong ya mayej makash. Yisu yimwing, jinsangu jinej jikat kurumburil antu inay ara nich yikokujol yau ap pa chisu chikemp ayivuramena mulong wa kusot kukimb kuyikwash antu akwau ashikena ku kumwijik Yehova ni yakushilamu yend yamushena.a

10. Ov, mulong wak kutond kwetu mutapu wa kutwok kudi kwa usey?

¹⁰ Chisu chirishinay nich chikokujol cha ukash wa mujimbu, mwin Kristu umwing ni umwing wakudila kal ufanyidin kusend “chisend chend amwinend” cha kutond mutapu wa kumwok nich. (Gal. 6:5) Pakwez, tufanyidin kuvurik anch kutond kwetu piur pa mutapu wa kutwok kumukwatin ni Yehova. Mudi mudinga kulimish yijil ya Bibil kukat kutubachik ku “kulik . . . mash,” chawiy kand kalimish ketu kakurikina mulong wa Dizu dia Nzamb kafanyidin kutubachik tulika kwitiyij mutapu wa kwokan ukutwisha kutushesh muspiritu ap kwikal nich chibudikin chiyimp pa urund wend ni Yehova. (Mid. 15:20) Milad yimwing ya kwokan nich ayisadil nich usu wa dibil. Yehova wayidjibwila kwa in Isarel in kupumbwok itiyija “usu wa dibil,” ap yisal ya kwisamb ni aspiritu ayimp. Ndiy walonda anch: “Kangal wanletilany kand milambu yitakanena. Yawiy kamu ya diseng dia malash. Kinikatilap misambu yen ya kwarik kwa ngond, ap ya machuku ma kwiswedish kand kubombakesh kuyip [usu wa dibil, NW] pamwing ni kukumangan kuwamp.” (Isay 1:13) Chisu cha mayej kichidiap chisu cha kusal chom chikutwisha kukangesh malembil metu kuya ni kushesh urund wetu ni Nzamb.—Kud. 3:44.

“Michim Yitudila” Yidi ya Usey

11, 12. Ov, kwikal nich “michim yitudila” kukwet usey ik pa chisu tutondina mutapu wa kusot ukash wa mujimbu?

¹¹ Pa chisu tuyedila, kitufanyidinap kuchingejin anch Yehova ukusal chilay mulong wa kutwok, pakwez tukutwish twamwilembil atwinkisha manangu pa mulong wa kutond mutapu wa kutwok. Tukutwish twamwilembil chakwel atutakela piur pa kutond kwetu kukwatijan nich yijil yidia mu Mifund ni manangu mawamp. Anch mulong udi ukash, chikutwish chikal cha usey tuyendila ansil avud anch chitwishikin, kukwatijan nich chitongijok chidia mu Jinswir 15:22, chilondina anch: “Kwakad chiyul kutenchik kukat kuwa, pakwez in chiyul avud kutenchik kukat kujamish.” Kambuy Paul wayikasikesha ambay nend akaritiy chakwel ashakama “ni michim yitudila ni yitentamina ni yiwapila mu mangand minam.”—Titus 2:12.

¹² Antu ading mu mwikadil ufanikena nich wa mband muyej wadingaku pa chirung cha Yesu. Mu Marko 5:25, 26, tutangin anch: “Mband umwing wakweting musongu wa rilong ra mash mivu dikum ni yaad, wamana mar ma yom yivud kudi angang avud, wamwanga yawonsu yakwetingay, kuyerikang kwamwamu, pakwez chaswej lel kamu kuyip.” Yesu wamwoka mband winou ni wamusadila nich riy. (Mar. 5:27-34) Mulong wa kwiyakamish chipandakena, in Kristu amwing ashikena ku kutond mitapu yimwing ya kwokan nich yidia yijirila yijidik ya difukwil dishitwila.

13, 14. (a) Ov, mutapu ik ukutwishay Satan kusadil kutond kwetu mitapu ya kwiyokish nich mulong wa kushesh kushinshaman kwetu? (b) Ov, mulong wak tufanyidina kuchinyin kulemp nich chom chawonsu chikwatina ku kubauk?

¹³ Satan ukutwish wasadil mitapu yawonsu yikutwishay mulong wa kutupumbul ku difukwil diakin. Mudi mukatay kusadil masandj ni kusot mapit ma ku mujimbu mulong wa kuyiwish antu amwing, usadiling kand usu wa kushesh kushinshaman kwa antu akwau kusutil ku mitapu ya kwokan nich yiyimp yikata kusadil usu wa dibil ni kwisambin ni aspiritu ayimp. Tukat kumwilembil Yehova chakwel atukola ku “kuyip” ni ku “kuyip kwawonsu.” Chawiy kitufanyidinap kusengen mu chikas cha Satan kusutil ku kwitek kwetu ku chom chin chawonsu chikwatina ku kwisambin ni aspiritu ayimp ni ku difukwil dia akish.—Mat. 6:13; Titus 2:14, MM.

¹⁴ Yehova wayijidika in Isarel anch kangal kupong ni kubauk. (Kuv. 18:10-12) Paul ujimbwil “kubauk” pamwing nich “midimu ya mbij.” (Gal. 5:19, 20) Chikwau, “in yipong” kakezap kwandam mu ditenchik disu dia yom dia Yehova. (Kubur. 21:8) Choviken komb patok, anch, chom chin chawonsu chikwatina ku kubauk chijondil kudiay Yehova.

“Ranaken Ren Rijiken Kudi Antu Awonsu”

15, 16. Ov, mulong wak tuswiridina manangu pa mulong wa kutond mutapu wa kwiyokish nich, ni chiyul cha manangu chaleta chisak chitakedila cha mu mivu chitot ya kusambish?

¹⁵ Mulong wa yom yiney yawonsu twisamba kal ey, anch twidjidjek piur pa mutapu kanang wa kwokan nich, tukusal nich manangu anch twaulik. Chakin kamu, kulond kwau kusu anch etu ayinetu kitutwishinap kurumburil mutapu usadininga mutapu kanang wa kulet ukash wa mujimbu kichirumburikinap anch ukwatiken ku kubauk. Kwikal nich chitong cha Mifund piur pa ukwash wa mujimbu kwitin manangu ma Nzamb ni kwitin anch twikala nich njingunin yiwamp. Mu Jinswir shapitre wa 3, tutaninamu dibabesh dined: “Mukungamena [Yehova, NW] ni muchim wey wawonsu. Kangal wachingej ronganyin rey amwiney. Mu jinjil jey jawonsu itiyij kudi Ndiy, ni Ndiy ukez katenchik jinjil jey. . . . lam manangu makin ni kalimish. Kangal yidiokal ku mes kwey, ni yawiy yikez kwikal mwom wa mupim wey.”—Jinsw. 3:5, 6, 21, 22.

¹⁶ Pitusadila usu wa kwikal nich ukash wa mujimbu utukweta ou mudi muchitwishikina, tufanyidin kudimuk anch kangal Nzamb atulika piturishina nich mayej ap nich kunanap kwezina. Pa mulong wa ukash wa mujimbu, mudi ni mu milong yikwau, tufanyidin kusal anch ‘ranaken retu rijikana kudi antu awonsu’ kusutil ku kushakam kukwatijan nich yijidik yidia mu Bibil. (Filip. 4:5) Mu mukand umwing wa usey nakash, chisak chitakedila chadingaku mu mivu chitot ya kusambish chayifundina in Kristu chakwel alika difukwil dia akish, mash, ni masandj. Mu mukand winou mwadinga kashinsh kinak: “Anch en wilamany ayinen ku yom yiney chikwikal chiwamp kudi en.” (Mid. 15:28, 29) Mu mutapu ik?

Kwiyokish mu Kwitudish Nich Ukash wa Mujimbu Uwanyidina mu Manangu

17. Ov, mutapu ik tutanyidinamu ku mujimbu ku kulamat kwetu ku yijidik yidia mu Bibil?

¹⁷ Muntu ni muntu udia pakach petu ukusal nawamp anch wiyipul anch, ‘Ov, nikat kusanger mutapu natanyidinamu kal mulong wa kulam kwau yijidik yidia mu Bibil pa mulong wa mash ni masandj?’ Tongin kand, pa yitwatanyidinamu mudi chibudikin cha usu utusadila chakwel twitokisha “tuyimp twawonsu twa mujimbu ni muchim.” (2 Kor. 7:1) Kusutil ku kulamat ku yijidik yidia mu Bibil yisambidina piur pa kwinang kwa muntu, tukat kwiyep mayej mavud ma ku mujimbu. Tuding nawamp mulong kuchin kwetu kwijond kwa muchim ni ku mujimbu mudi kuna ruwand ni mon yikwau ya kulewishan. Tushinshikinany kand ukash wa mujimbu udiokilinga ku kwikal wisikena pa mulong wa kudia ni kuna. (Tang Jinswir 23:20; Titus 2:2, 3.) Ap anch yom mudi kupim ni masengan yikutwish yawejinaku ku ukash wetu, chakin kamu tudi pakampwil nawamp ku mujimbu ni muspiritu mulong twitiyija kal umutakel wa Mifund.

18. Ov, chom ik tufanyidina kubangin cha kusambish, ni kuwanyin kwa uprofet wisambidina piur pa ukash wa mujimbu tuchingedina kurutu oku?

¹⁸ Chipandakenamu yawonsu, tufanyidin kulam ukash wetu wa muspiritu ni kukasikesh urund wetu wa usey nakash ni Tatukwetu wa mwiur, Musul wa “mwom udiaku katat ni usotila kwez” mu mangand masu ma kushilamu. (1 Tim. 4:8; Kus. 36:9) Mu mangand masu ma Nzamb, mukez kwikal ukash wawonsu wa mujimbu ni wa muspiritu ukez kusutil ku dilikishin dia yitil pa mufulandal wa difut dia yakupesh ya Yesu. Mwan a Mukoku wa Nzamb, Yesu Kristu, ukez kututwal ku “musul wa dijiy dia mem ma kupand,” ni Nzamb ukez kukusul mansoj mu mes metu. (Kubur. 7:14-17; 22:1, 2) Chad lel, tukez kuman mutapu ukeza kuwanyin uprofet unou usangareshina ulondina anch: “Kwikil muntu ap umwing ukeza kulond anch: ‘Niyedil.’”—Isay 33:24, NW.

19. Pitubangidina nich kwitudish ukash wa mujimbu wetu, ov, tukwet kashinsh ka chom ik?

¹⁹ Tukwet kashinsh anch kupand kwetu kudi piswimp, ni nich impu yikash tuchingedin dichuku dikezay Yehova kuyidioshin antu mayej ni rufu. Mu chisu chawiy chimwing, atwinkishin kashinsh anch Tatukwetu muka rukat ukutukwash chakwel tujijamena kusansan kwa mayej ni minam yetu mulong ‘ndiy ukat kutulam.’ (1 Pita 5:7) Chawiy lel, tubanginany ukash wa mujimbu wetu pakwez chisu chawonsu kukwatijan nich umutakel udia mu Dizu dia Nzamb diapepilay!

Kuchirikinamu

• Ov, nany ukweta chisend cha mayej, ni nany ukeza kutudiosh yibudikin ya chitil?

• Ap anch choviken kwau anch twibangina nakash piur pa ukash wa mujimbu, ov, chom ik tufanyidina kwiyep?

• Ov, mulong wak kutond kwetu mutapu wa kutwok kudi kwa usey ku mes ma Yehova?

• Pa mulong wa ukash wa mujimbu wetu, ov, tukutwish kutaninamu nchik kusutil ku kulamat ku yijidik ya Bibil?

[Mazu madia kwishin kwa paj]

[Chipich chidia pa paj wa 23]

Antu kayitangap chakwel asambish kuyelang ni kunanap

[Chipich chidia pa paj wa 25]

Chikalap nchik yikokujol ya ukash wa mujimbu, antu a Yehova atanin musangar mu mudimu wa kulejan