Ov, Uvurikinany?
Ov, wasanger pawatangina manimero masu ma Chinong cha Kalam? El tutala anch ukutwish wakul ku yipul yilondwilaku ey:
• Mutapu ik tukutwisha kulond nawamp “rudim rishitwila,” uyakin wa Nzamb ni jitong jend? (Sof. 3:9)
Mudi muchidinga nich kulond rudim, chakwel kulond nawamp “rudim rishitwila” tuswiridin kutesh, kuyimburij antu alondininga nawamp, kulam majin ma mabuku ma Bibil ni maverse ma Bibil, kuchirikinang yom yitwilejina, kutang nich dizu piur, kushinshikin gramer ap chilik cha uyakin, kusal usu wa kuya kurutu, kwitekin chisu cha kwilej, ni kwiyijidish “kulond” rudim rishitwila.—15/8, paj wa 21-25.
• Yom ik yikwau yidia mu kusot kwijik chidingay Nzamb?
“[Yehova, NW] diawiy dijin diend,” niyend usotil tumwijika anch diawiy dijin diend. (Kub. 15:3) Udi “Nzamb wa rukat ni chisambu.” (2 Kor. 13:11) Udi “Nzamb wa ronganyin” ni “wa dipandish.” (1 Sam. 2:3, NW; Kus. 25:5) Nzamb ukuyishejin piswimp antu amwija.—1/9, paj wa 4-7, (Français).
• Dizu “moj wa chibab” dirumburikin ik pa mulong wa uruw?
Dizu “moj wa chibab” kudi kulond kwa chifanikesh. (Mul. 4:12) Pakatau kusadil chifanikesh chinech mu uruw, isambidining bil ngatan ni ngachik, mpwambu jaad, apwatidinau ku rupwambu ridia pa muchim, Nzamb. Kwikal mu uumwing ni Nzamb kukat kuyikasikesh ambay atijadina muspiritu chakwel arisha nich milong, ni chakwel ikala nich musangar.— 15/9, paj wa 16.
• Chom ik chadinga chisambidinau mu Hebereu 6:2 piur pa “kwanzuk kwa makas pa mutu”?
Pa ndond pa kwisambin piur pa kuyitond makurump, chimeken patok anch isambidin piur pa kwanzuk makas mulong wa kupan yipan ya spiritu utumbila. (Mid. 8:14-17; 19:6)—15/9, paj wa 32.
• Yom ik yiswiridinau an yijingay tatuku muwamp?
Yom yimwing yiswiridiningau yawiy ey: (1) rukat rend, (2) chilakej chiwamp, (3) kushakam mwi ndond yisangareshina, (4) kuyifumb usey wa yom ya muspiritu, (5) kuyipup, (6) kuyiking.—1/10, paj wa 18-21, (Français).
• Mutapu ukutwishau akadivar akweta yisend kuyilimish antu akwau?
Njil yimwing mukutwishay mukurump kuyimekeshin antu akwau kalimish yidi kulik kuyit asala yom yakadiay ndiy amwinend kusot kusal. Ni ufanyidin kand, kuyimekeshin kalimish kusutil ku kuyilej mayingishin madia kwinyim kwa yom yiyitinay ap ku umutakel uyinkishinay.—15/10, paj wa 22.
• Yom ik yimwing yikutwisha kukasikesh manswik ma uruw?
Kudi yom yaad (1) Tekany uruw wen pa ndond ya kusambish. (2) Kwipuk mitapu yawonsu ya kulik kushinshaman. Uruw wen wikalap nchik ukash, mwin nkwey usotil ijika anch usukinany manswik chakwel uruw wen upandakana; yom yiney yaad yikukukwashany nakash.—1/11, paj wa 18-21, (Français).
• Chom ik chikwilejay mwin Kristu mukurump kusutil ku mutapu wasadilingay mukombu kafung mwin Isarel?
Kafung wadinga ni kusadil mukombu wend mulong wa kuyibing nich amikoku. Padingau amikoku ni kwandam ap ni kubudik mu diyind, wadinga ni kuyisutish ‘mwishin mwa mukombu’ ni chawiy watwisha kuyichind nawamp. (Lev. 27:32) Chawiy chimwing, kafung mwin Kristu uswiridin ijika ni kuyilam nawamp amikoku a Nzamb alaminay.—15/11, paj wa 9.
• Mutapu ik ukumekeshay maku anch umen anch kwinang kudi kwa usey ujim?
Yakudia yikutwish yayip mu mitapu kushalijan, chawiy chimufanyidinay owola ku makas kurutu asambisha kurijek yakudia ni kuyibwik nawamp. Ukukombang mu chikumbu chend chakwel kangal mwikala antuz, amabeng, ni atupwapu. Chifanyidin kututang maswin ni kowalang chisu ni chisu. Yom yiney yikwatijadin nich yilondinay Bibil.—1/12, paj wa 9-11, (Français).