Lamany “Moj Wa Chibab” Mu Uruw

“Moj wa chibab ukasiken kukatuk swa.”—MUL. 4:12.

1. Nany wayatisha antu aad a kusambish?

KUPWA kwa kuyitang mitond ni annam, Yehova Nzamb wamutanga Adam, muntu wa kusambish. Kupwa Nzamb wamuladika Adam mu tul tukash, ni Nzamb wasadila rubavu rimwing ra Adam chakwel amutangina mwin kumukwash uwanyidina. Pamumanay, Adam walonda anch: “Dined katat didi difup dia mafup mam ni musuny wa misuny yam.” (Dis. 1:27; 2:18, 21-23) Yehova wamekesha kwitiyij kwend, wayinunga antu aad a kusambish mu uruw ni wayiyukisha.—Dis. 1:28; 2:24.

2. Mutapu ik wasalay Satan mulong wa kuyauril Adam ni Eve?

² Cha ushon, pasutil kal mivu yivud uruw kiudiap kand mudi mwautonginay Nzamb. Mutapu ik? Spiritu muyimp, wezau kupil anch Satan, wamudimba Eve wadia ku mutond wayijidikau. Kusambishin kamu pinipa, Adam winunga ni mukajend mu kubwambwil ku winyikel utentamina ni umutakel uwamp wa Nzamb. (Dis. 3:1-7) Payipulay Yehova ambay atijadina anch yom ik yasalau kal, chamekana patok anch urund kiudiap kand uwamp. Adam wamufisha nich mukajend, palonday anch: “Mband wanginkisha kushakam nend, ndiy wanginkishanga dibuj dia mutond ou, chad niyam nadidiang.”—Dis. 3:11-13.

3. In Yuda amwing apalangesha yitongijok ik yiyimp?

³ Kwasutil kal yitot ya mivu, Satan ukat kusadil makasu ma mitapu kushalijan mulong wa kulet mbwandj mu uruw. Chilakej, pa yisu yimwing wayisadila amakurump a chirelijon chakwel apalangesha chitongijok chakad kukwatijan nich mifund piur pa uruw. Antakel amwing in Yuda adinga ni kupipesh yijil ya Nzamb piur pa uruw, ayinkisha angatan mbil ya kujip uruw ni akajau piur pa milong ya chamwamu mudi kupandakesh mungu mu mayij. Pakwez Yesu walonda patok anch: “Muntu wawonsu ukumulika mukajend wakad kusotan, wakachik kudi muntu windjing, ndiy wasotan kal; ni yend ukumwata pachimulikilau wamusot kal wakusot.”—Mat. 19:9.

4. Mutapu ik urishishinau ilel ditenchik dia uruw?

⁴ Satan urishin nakash chakwel ayauril antu atijadina. Kwatijan kwa ikundj ni ikundj, ikundj ni mband ashicha pamwing pakad kwatijan, ni kufa kwa uruw kwa swa-swa yawonsu yiney yimekeshin anch ndiy upandaken pa mulong winou. (Tang Hebereu 13:4.) Chitudia in Kristu, chom ik tufanyidina kusal chakwel yitongijok yiyimp yipalangena piur pa uruw kangal yituyikela? El tushinshikinany ngikadil yimwing ya uruw wa musangar, utwishina.

Mutekany Yehova mu Uruw

5. Dizu “moj wa chibab” dirumburikin ik pa mulong wa uruw?

⁵ Chakwel anch uruw utwisha, chifanyidin anch Yehova ikalamu. Dizu diend dilondil anch: “Moj wa chibab ukasiken kukatuk swa.” (Mul. 4:12) “Moj wa chibab” kudi kulond kwa chifanikesh. Pakatau kusadil chifanikesh chinech mu uruw, isambining bil ngatan ni ngachik, mpwambu jaad ja kusambish, apwatidinau ku rupwambu ridia pa muchim, Yehova Nzamb. Kwikal mu uumwing ni Nzamb kukat kukasikesh ambay atijadina muspiritu chakwel arisha nich milong, ni chawiy chom cha usey chakwel kwikal nich musangar ujim mu uruw.

6, 7. (a) Chom ik chifanyidinau in Kristu kusal chakwel ashinshikina anch Nzamb udi mu uruw wau? (b) Chom ik chadingay ni kusanger nakash nambaz umwing mwi nfumwend?

⁶ Pakwez, chom chikutwishau kusal ambay atijadina chakwel ashinshikina anch uruw wau udi mudi moj wa chibab? David mwin kufund kuseng wawanga anch: “Nasangar kusadil rusot rey, A Nzamb wam, mwawiy, yijil yey yidi kal mu muchim wam.” (Kus. 40:8) Kumukat kwetu Nzamb nikwawiy kukat kutubachik tumusadila nich muchim umwing. Chawiy, ambay awonsu aad afanyidin kukudish urund wa muntu ni muntu ipend ni Yehova ni kusanger mu kusal rusot rend. Ambay atijadina afanyidin kand kusal usu wa kukasikesh chakwel mbay nau amukata Nzamb.—Jinsw. 27:17.

⁷ Anch chijil cha Nzamb chidi chakin kamu mu muchim wetu, tukez kumekesh ngikadil mudi ritiy, ruchingej, ni rukat ni yikutukwash tukasikesha moj wa uruw. (1 Kor. 13:13) Sandra, mband umwing mwin Kristu, wasadila kal mivu 50 mu uruw, ulondil anch: “Yinikata kusanger nakash yikwetay nfumwam yidi umutakel ni yiyul yend ya muspiritu ni kumukat kwend Yehova, kudi kukash kupandakanamu mwinkatiningay.” Ov, en angatan, niyen akutwish akulondilany mwamu?

8. Chom ik chiswirikena chakwel kutambul ‘difut diwamp’ mu uruw?

⁸ Mudi ambay atijadina, ov, utekinany milong ya muspiritu ni yisakin ya Want pa ndond ya kusambish mu mwom wen? Chikwau, ov, umumening mbay ney wa uruw mudi mbay ney mu mudimu umusadidilanya Yehova? (Dis. 2:24) Mwant Salomon muka manangu wafunda anch: “Antu aad asadila mudimu pamwing amupandakenamu muntu umwing, difut dia mudimu wau didi diwamp.” (Mul. 4:9) Chakin kamu, ngatan ni ngachik afanyidin kusadil nakash pamwing chakwel atwish kutan “difut . . . diwamp” mudi kwinung kwa rukat ni kwa chikupu kukweta chiyukish cha Nzamb.

9. (a) Yisend ik yikwetau angatan? (b) Kulondul jan nich Kolosay 3:19, mutapu ik ufanyidinay ngatan kusadil mukajend?

⁹ Chijingidij chimwing chilejena anch Nzamb udiamu mu uruw udi usu usadilay ngatan ni ngachik chakwel asala yom mudi muyitinay Nzamb. Angatan akwet chisend cha kusambish cha kuyikimbin yid ya majuku mau yom ya ku mujimbu ni ya muspiritu yiswiridinau. (1 Tim. 5:8) Ayikasikeshin kand asambish kuta muchim pa maswir ma yovil ya akajau. Mu Kolosay 3:19, tutanginamu anch: “Amakundj, yikatany akajen, kangal uyizazilangany.” Mwin kwilej Bibil umwing warumburila anch mu dizu “uyizazilangany” mudi “kuyilond mazu mayimp, ap kuyibul jimbat, ni kulik kuyinkish rukat rau, kuyibangin, kuyinkish yisotinau, kuyilam, ni kuyikwash.” Chakin kamu, chaku mudi chinech chifanyidinap kwikal mu dijuku dia mwin Kristu. Ngatan usadidila umutu wend nich rukat ukasikeshin anch mukajend amuziyila.

10. Ngikadil ik yifanyidinau kwikal nich amband in Kristu?

¹⁰ Amband in Kristu asotila anch Yehova ikal mu uruw wau afanyidin kand niyawiy kusal yom kulondulijan nich yitinay Nzamb. Kambuy Paul wafunda anch: “Amband ikepishany ayinen kudi [anfumwen] mudi kudi Mwant. Mulong ikundj ndiy mutu wa mband, mudi chidiay Kristu mutu wa chikumbu cha Nzamb.” (Efes 5:22, 23) Satan wamudimba Eve, wapalangesha makasu anch want ipau kudiokal kudi Nzamb kukez kulet musangar wa chikupu. Chakin kamu, spiritu wa kusot want ipau umeken mu mauruw mavud. Pakwez, ku mutambu wa amband in kumwov Nzamb wom, kakisiningap kuyiziyil mitu yau yiyikatininga. Awiy avurikin anch Yehova wamutanga Eve chakwel ikal “mwin kumukwash” nfumwend, chawiy chamanay Nzamb yidi ndond ya ntumb nakash. (Dis. 2:18) Chakin kamu, mband mwin Kristu usadila kulondulijan nich ditenchik dined udi “chibangul” cha nfumwend.—Jinsw. 12:4.

11. Chom ik chalonday mukadivar umwing anch chawiy chikwashina uruw wend?

¹¹ Ukwash ukwau chakwel Nzamb ikala mu uruw kudi kwilej kwa ambay atijadina pamwing Dizu dia Nzamb. Gerald, wasadila kal mivu 55 mu uruw, ulondil anch, “Chom cha usey nakash mu kutwish kwa uruw kudi kutang ni kwilej Bibil pamwing.” Wawejinaku kand anch, “Kusalang yom pamwing, nakash nakash yom ya muspiritu, kukat kuyikadish ambay atijadina piswimp piswimp nakash umwing ni mukwau ni piswimp kand ni Yehova.” Kwilejang Bibil pamwing kuyikwashining yid ya dijuku yilama mu michim yijil ya Yehova, yikula, ni yiya kurutu muspiritu.

12, 13. (a) Ov, mulong wak kulembil pamwing kudi kwa usey nakash kudi ambay atijadina? (b) Mijikit ik yikwau ya muspiritu yikasikeshina uruw?

¹² Ambay atijadina akweta musangar akat kulembilang pamwing. Pakatay ngatan ‘kuburil muchim wend’ nich kwit yom yikwatijadina nich mwikadil yau, kukutwish kwakwash ni kukasikesh uruw. (Kus. 62:8) Chilakej, chiswapeling mudi ik kulikin kwa kutadikijan kwawonsu ni mbay ney anch en awonsu wamwitany Mwin Dikand Diawonsu akwinkishany yany ni umutakel! (Mat. 6:14, 15) Kukwatijan nich malembil, chikwikal chifanyidina mudi ik kudi mbay umwing ni umwing kukwat mupak wa kumukwash mukwau ni kulikishijadin “muntu ukweta mulong ni mukwau.” (Kol. 3:13) Ijikany anch malembil mamekeshining anch umukungamedinany Nzamb. Mwant David walonda anch: “Mes ma antu awonsu madi padi ey.” (Kus. 145:15) Anch twakarumukin ni kumuchingejin Nzamb mu malembil, tukwikal nich yakamish yikemp, ni twij anch ‘ndiy utulamin.’—1 Pita 5:7.

¹³ Chom chikwau tukutwisha mulong wa kumulamin Yehova mu uruw chidi kukumangan ku yikumangan ya chikumangen ni kusal pamwing mudimu wa kulejan. Ku yikumangan yetu, ambay atijadina ilejining mutapu wa kura nich “yoziu” yisadidilay Satan mulong wa kuyauril majuku. (Efes 6:11) Ngatan ni mukajend akata kusal pamwing mudimu wa kulejan akwilej mutapu wa kwiman “da-a wakad kushemunik.”—1 Kor. 15:58.

Anch Milong Yalank

14. Yom ik yikutwisha kulet yakamish mu uruw?

¹⁴ Chakin, yiyul yidia kwiur oku kiyidiap yisu, ov, mulong wak ulikina kwisambinay patok ni mwin nkwey? Talany anch kudi yom kanang yifanyidina kutenchik mu uruw wen. Bibil witiyijin anch, ap antu akweta Nzamb mu uruw wau “akwikal ni milong ya mangand.” (1 Kor. 7:28) Mulong wa kuburen kwa kuwanyin kwa chiuntu, usu uyimp wa mangand manam makad kulimish chijil, ni mipit ya Djabul, ap mauruw ma atushalapol ashinshamena a Nzamb makutwish mikal mu yakamish. (2 Kor. 2:11) Pakwez Yehova ututwishish turisha nich yakamish yiney. Inge, chitwishikin. Yob ikundj ushinshamena washadisha yivam yend, antu end a mudimu, ni anend. Pakwez, Bibil ulondil anch: “Mu mar mawonsu [ Yob] kasalap chitil, ap kamushinyinap Nzamb kuyip.”—Yob 1:13-22.

15. Kuzengolan kukat kuyishikij antu ku kusal ik, ni mutapu ik uwamp ukutwisha kusal ambay atijadina anch umwing wasal mwamu?

¹⁵ Pakwez, mukajend a Yob, wamwela anch: “Ov, ni katat, komb uchishich kwey daang nich kwiyingish kwey? Mushinga kwey Nzamb chakwel ufa!” (Yob 2:9) Chakin kamu, anch kwikal yikokujol ap mar makwau, yakamish yezininga pamwing nich mar minam yikutwish yamushikij muntu ku kutong kuyimp. Muntu mwin manangu walonda anch: “Kuzengolan kukutwish kwamushikij muntu mwin manangu asala yom mudi chisup.” (Mul. 7:7, NW) Anch mwin nkwey walond mazu mayimp mulong wa ujim pantaliken nich ‘kumuzengol,’ shakam kwey zong. Kwakulijan mu mutapu umwing kukutwish kwamushikij mwin nkwey ap en awonsu aad ku kulond chom chikutwisha chayipish kand chipandakena mwikadil. (Tang Kuseng 37:8.) Komb ufanyidinany kulik “mazu . . . ma usup” makutwisha kulet runeng ap kuziyishan.—Yob 6:3.

16. (a) Mazu ma Yesu madia mu Mateu 7:1-5 masadil nchik mu uruw? (b) Ov, mulong wak kwisikan kudi kwa usey mu uruw?

¹⁶ Ambay atijadina aswiridin kuchingejijadin mu mutapu wovikena. Mbay umwing kafanyidinap kupipesh tuyilim twa mukwau ni kutongijokin anch, ‘Nikutwish namukarumun.’ Nich rukat ni kushimpish, ukutwish wamukwash mwin nkwey itenchika pakemp pakemp. Kangal wavuramen anch, ap Yesu wamufanikesha muntu ukata kulondul londul tuyilim tukemp tukemp twa muntu windjing mudi muntu umena “kachishoshot” kadia mu dis dia mwanamakwend pakwez ukangeny kuman “mukambu” udia mu dis diend amwinend. Yesu watukasikesha anch: “Kangal warumburishany, chakwel ni yen ez anirumburish.” (Tang Mateu 7:1-5.) Chinech chirumburikinap anch chifanyidin kudiwul kurumbuk kujim bwat. Robert, wasadila kal mivu piswimp 40 mu uruw, walonda anch: “Kulondang kamu patok umwing ni mukwau ni kwikal tayad kwitiyij uyakin ulondilau kukutwish kwayishikij ambay atijadina akarumun mwom wau.” Komb ikalany isikena. Pa ndond pa kwimen ching pa ngikadil yisotila anch mwin nkwey ikala nich, ileja mutapu wa kusanger ni kusanger ngikadil yiwamp yikwetay katat.—Mul. 9:9.

17, 18. Anch matat malank, kwisu kutukutwisha kutan ukwash?

¹⁷ Kukutwish kwikal yoziu anch mikadil ya mu mwom yakarumuk. Ambay atijadina akutwish ara nich yikokujol anch ikal ni an. Mwin nkwey ap mwan ukutwish wayel mayej makash. Anvaj ikadila kal amapal akutwish asot mutapu wa kuyilam. An apama kal akutwish adiokal ku chikumbu aya kulemp. Kuswimp kukwau kukutwish kwadiokal ku kuwanyish yisend ya uteokras ni yisend yikwau. Kuswimp kwinoku kwawonsu kukutwish kwalet yakamish mu urund.

¹⁸ Anch kupwitijan mu uruw wey kwakushikij pa chilik chiumena anch sot ufa, chom ik ukutwisha kusal? (Jinsw. 24:10) Kangal walikap! Satan kakuyisotilap atushalapol a Nzamb chom chiwamp anch chimwing ching kusu kusot kuyiman alik difukwil dishitwila. Ukutwish wasangar nakash anch ambay atijadina alik difukwil dishitwila. Chawiy lel, salany yawonsu ukutwishanya wikal nich kashinsh anch uruw wen udi mudi moj wa chibab. Mu Bibil mudi jinsangu jivud ja antu ashala ashinshamena chikalap nchik yoziu. Chilakej, dichuku dimwing, David wamuburila Yehova muchim wend, ni walonda anch: “Nzamb wam, ngovilap riy, mulong antu [in kufa, NW] asotil kwinminy; akat kwingakamishang.” (Kus. 56:1) Ov, wiyovap kal anch ‘muntu ukata kufa’ ukwakamishin? Ap anch kukwamish kuwovila kudiokil kudi muntu wa kulemp ap wa piswimp ney, vurikan anch: David watana usu wa kujijamen, niyey ukutwish wajijamen. David walonda anch: “Am namusota [ Yehova, NW], Ndiy wangakula wankamunina ku wom wam wawonsu.”—Kus. 34:4.

Yiyukish Yikwau

19. Mwi njil ik tukutwisha kura nich kurishish kwa Satan?

¹⁹ Mu chisu chinech cha kwisudiel, ambay atijadina aswiridin “[ongojijana] pamwing umwing ni mukwau.” (1 Tes. 5:11) Kangal wavuramenany anch, Satan ufil mukan anch kushinshaman kwetu kudi Yehova kwengamidin pa kutaninamu kwa choy. Ukutwish wasadil chawonsu chitwishikina, pamwing nich kujip uruw, kushesh kushinsham kwetu kudiay Nzamb. Chakwel kujijamen kurishish kwa Satan, tuswiridin tumuchingejina nakash Yehova. (Jinsw. 3:5, 6) Paul wafunda anch: “Nikutwish kusal yom yawonsu mwi ndiy ukata kwinkasikesh am.”—Filip. 4:13.

20. Yiyukish ik yidingaku anch Nzamb wikal mu uruw?

²⁰ Kudi yibudikin yivud yidiokila ku kumuchingejin Nzamb mu uruw. Mwamu chadinga ku mutambu wa Joel ni mukajend wadinga ni mivu 51. Ndiy ulondil anch: “Nimujikitishin Yehova chisu chawonsu mulong wa mukajam ni mulong wa urund wend wa musangar. Ndiy wikala mbay wam mukash.” Ujindj wau chom ik? “Tukat kusal chisu ni chisu usu wa kwikal nich riy, kushimpish, ni kukatijan umwing ni mukwau.” Kwikil umwing wetu ukutwisha kusal mu ditenchik dined dia yom. Pakwez, el tusalany nakash chakwel tusadila yijil ya Bibil chakwel tumulama Yehova mu uruw wetu. Anch twasal mwamu, uruw wetu ukwikal mudi “moj wa chibab ukasikena kukatuk swa.”—Mul. 4:12.

Ov, Uvurikin?

• Chirumburikin ik kwikal ni Yehova mu uruw?

• Chom ik chifanyinau ambay a uruw kusal anch kwalank yikokujol?

• Mutapu ik twija anch Nzamb udi mu uruw?

[Chipich chidia pa paj wa 18]

Kulembil pamwing kukat kuyikwash ambay atijadina ara nich yikokujol