PAMWINGAP wasutidinap kal piswimp ni Chot cha Want cha Atuman a Yehova chidia mu ul wen ni wasambisha kwiyipul anch, yom yikatau kusadilamu. Ov, wij anch, antu awonsu akutwish ez kukumangen ku yikumangan yau ya pa rubing ni rubing? Angendj ezininga akat kuyak nich musangar.

Ukutwish pamwingap wikal nich yipul kanang. Ov, mulong wak ukatau Atuman a Yehova kukumanganang pamwing? Yom ik yisadikininga ku yikumangan yiney? Ni yik yilondilingau angendj akad kwikal Atuman a Yehova piur pa yikumangan?

“Yikumangejany Antu”

Kudiosh kamu pa yisu ya pakur, antu adinga ni kukumanganang pamwing mulong wa kumwifukwil ni kwilej piur pa Nzamb. Pasutil kal piswimp mivu 3 500, ayileja in Isarel anch: “Yikumangejany antu, amakundj, ni amband, ni an, ni ngez ushichanya nend chakwel niyau atesha, ilej kumwov [Yehova, NW] Nzamb wen wom chakwel kand alama ni kusadil mazu mawonsu ma yijil yiney.” (Kuvurik Yijil 31:12) Chawiy, mu Isarel ansand pamwing ni amapal adinga ni kuyilej mutapu wa kumwifukwil ni kumuziyil Yehova Nzamb.

Pa kusut kwa yitot ya mivu, pachavadika chikumangen cha Ukristu, yikumangan yadandamena kwikal chom cha usey mu difukwil diakin. Kambuy Paul wafunda anch: “Tutalijanany muntu ni mukwau chakwel tukwashijanany kumekesh rukat ni kusal yisalijok yiwamp. Kangal twalikany chaku cha kukumangan pamwing, mudi mukat kulikau antu amwing. Pakwez chifanyidin tupandakeshany kukasikeshijan muntu ni mukwau.” (Hebereu 10:24, 25, Manswik Masu) Mudi mudinga dijuku, dikat kwikal dikash ching anch yid ya mu dijuku yikat kushakam pamwing ni kwisambin pamwing, chawiy kand moj wa rukat pakach pa antu asotila kumusadil Nzamb akat kuukasikesh pa chisu chikatau in Kristu kukumangan pamwing mulong wa kwifukwil.

Kukwatijan nich Mifund yiney, Atuman a Yehova akumangening pamwing ku Yot yau ya Want tupamp twaad pa rubing. Yikumangan yiyikwashining antu akumangena chakwel asangera, atesha ni kusadil yijidik ya Bibil. Pa chitwishikina, program uding chilik chimwing mu mangand mawonsu, ni chikumangan ni chikumangan chikwet rutong rach ra muspiritu. Kurutu ni kupwa kwa yikumangan, antu adingaku akat kusangerang ‘kwongojijan ku ritiy’ kusutil ku mambamb matungina. (Rome 1:12) Yom ik yisadikininga ku yikumangan yiney?

Diskur Diengamidina pa Bibil

Chikumangan cha kusambish chikumangeningau antu avud chiding diskur diengamidina pa Bibil diatenchikau mulong wa antu awonsu, dikata kusadikang nakash-nakash Diampos ap Diarubing. Chisu ni chisu Yesu Kristu wadinga ni kusal madiskur kurutu kwa antu avud—mu madiskur minam mudi Mafundish ma pa Mukandu. (Mateu 5:1; 7:28, 29) Kambuy Paul wisamba ni antu a ku Atene. (Midimu 17:22-34) Kulondulijan nich chilakej chinech, mu yikumangan ya Atuman a Yehova muding diskur diatenchikau pakampwil mulong wa antu awonsu, mu antu inay mukutwish mwikal in akukumangana kapamp ka kusambish.

Chikumangan chisambishining ni muminy udia mu buku Louons Jéhovah par nos chants.a Antu awonsu asotila kwiman ni kuwang pamwing muminy ayitining asala mwamu. Kupwa kwa malembil miswimp, mwin kulond chifuvu ukusal diskur mu minit 30. (Tal mushet “Madiskur ma Patok Mafanyidin.”) Diskur diend diengamidin kamu pa Bibil. Chisu ni chisu, mwin kulond ukuyit in kumutesh akimba mifund ya usey ni amulondula patanginay maverse. Chawiy lel, ukutwish wez ni Bibil wey, ap ukutwish wamwit Kaman wa Yehova umwing akwinkisha Bibil kurutu kwa kusambish chikumangan.

Dilejan dia Chinong cha Kalam

Mu yikumangen yivud ya Atuman a Yehova, kupwa kwa diskur dia patok, kuding Dilejan dia Chinong cha Kalam, mu saa umwing wa minsamb ya yipul ni yakul piur pa rusangu rimwing ra mu Bibil. Chikumangan chinech chiyikasikeshining antu akumangena chakwel alondula chilakej cha in Berea adingaku pa chirung cha Paul, awiy “patambulau dizu nich michim yitentamina adinga ni kutang mukand wa Nzamb pichuku pichuku.”—Midimu 17:11.

Dilejan dia Chinong cha Kalam disambishining nich muminy. Rusangu ra kwisambin ni yipul yikwipulay mwin kutakel yiding mu mutu wa kwilej wa gazet winou. Ukutwish watambul gazet wey mudia mutu wa kwilej kudiay umwing wa Atuman a Yehova. Mu mitu ya milong yisu yitwilejina mwadi mitu yiney: “Anvaj Yililany Anen Nich Rukat,” “Kangal Wamufundikeshinany Muntu Kuyip ku Kuyip,” ni “Mar Mawonsu Makupwa Katat Kamu Ak!” Ap anch chikumangan akat kuchitakel nich yipul ni yakul, in kukumangan niyawiy akat kulond mudi musotinau ni kupan yirumburil pakampwil kudi antu atangina ni kutongijokin pa mutu wa mulong ni kukasikesh yirumburil yau nich mifund. Chikumangan chikupwa nich muminy ni malembil.—Mateu 26:30; Efes 5:19.

Dilejan dia Bibil dia Chikumangen

Pa urel umwing pa rubing ni rubing, Atuman a Yehova akumangening kand ku Chot cha Want mulong wa kusal program wa yikunku yisatu yisadilinga yawonsu saa 1 ni minit 45. Chikunku cha kusambish chiding Dilejan dia Bibil dia Chikumangen, chisadining minit 25. Chiyikwashining antu akumangeningaku ijikijana nich Bibil wau, kutenchik yitongijok ni ngikadil yau, ni chakwel aya kurutu mudi in kwilej a Kristu. (2 Timote 3:16, 17) Mudi mudinga Dilejan dia Chinong cha Kalam, chikumangan chinech chiding cha minsamb ya yipul ni yakul piur pa mutu wa mulong wa Bibil. Antu akwilinga asadiling mwamu cha kwisotil. Chisu chivud akat kusadilang buku ap broshir wapalangeshau Atuman a Yehova mulong wa kwilej Bibil.

Ov, mulong wak ukatau kusadil mukand wengamidina pa Bibil ku chikumangan? Kwinyim pa yirung yafundau Bibil, kichadingap kusu chiwanyidina kutang kwau Bibil chamwamu. “Awiy ading ni kutang mu Mukand wa Yijil ya Nzamb, ading ni kukarumun ni kwovakesh nawamp mazu matangau.” (Nehemi 8:8) Mu mivu ya katat, mikand yirumburila mukand wa Isay, wa Daniel ni wa Kuburik yayikwashin antu akata kukumangan ku chikumangan chinech chakwel atesha nawamp yikunku yiney ya Bibil.

Shikol ya Mudimu wa Uteokras

Kupwa kwa Dilejan dia Bibil dia Chikumangen, kulondwiling Shikol ya Mudimu wa Uteokras. Chikumangan chinech cha minit 30 achitenchika mulong wa kuyikwash in Kristu akudisha “kushimpish muchim ni kulejan.” (2 Timote 4:2) Chilakej, ov, mwaney ap murund ney wakwipulap kal chipul piur pa Nzamb ap piur pa Bibil ni chakukasikena kumwakul nawamp? Shikol ya Mudimu wa Uteokras yikutwish yakulej mutapu wa kwakul ku yipul yikash nich kwengamin pa Bibil. Chawiy niyetu tukutwish twalond mudi mwalonday muprofet Isay, anch: “Nsalejam [Yehova, NW] wanleja yom ya kulond, chakwel nikutwish kukasikesh aziyina.”—Isay 50:4.

Shikol ya Mudimu wa Uteokras yisambishining nich diskur diengamidina pa chikunku cha Bibil chayikasikeshidinau antu akumangena kutang mu rubing rawonsu. Kupwa kwa diskur, mwin kulond ukuyit in kukumangan chakwel arumburila mu wiswimp piur pa yom kanang ya usey yataninau patanginau chikunku chinech. Kupwa kwa minsamb yiney, ansand a shikol afundisha majin mau ku shikol akusal yikunku yau.

Ansand a shikol ayinkishining chikunku cha Bibil chikutanginau kurutu ap kusal chakumenaku chilejena mutapu wa kumulej muntu windjing piur pa mutu wa mulong udia mu Mifund. Kupwa kwa chikunku ni chikunku, mwin kuyulan ukweta ronganyin ukumujikitish nsand a shikol piur pa yasalangay nawamp, chiyul chend chikwimanyin pa yom yidia mu buku Tirez profit de l’École du ministère théocratique. Kupwa, ku ujindj, ukutwish wamuyul nsand a shikol nich kumulej mutapu ukutwishay kuya kurutu.

Chikunku chinech cha program chibachikininga kurutu achitenchika mulong wa kumukwash nsand a shikol ukutanga pamwing ni in kukumangan awonsu asotila kutangang nawamp, kulond nawamp ni kukudish ukaliweny wa kulejan. Kupwa kwa Shikol ya Mudimu wa Uteokras, akuwang muminy wengamidina pa Bibil kurutu kwa kusambish Chikumangan cha Mudimu.

Chikumangan cha Mudimu

Chikunku cha nsudiel cha program chidi Chikumangan cha Mudimu. Kusutil ku madiskur, yakumenaku, ma interview, ni minsamb nau in kukumangan, antu inay akumangena akat kwilej mutapu uwamp wa kulejan Bibil. Kurutu ayituma in kwilej end aya mu kulejan, Yesu wayikumangeja ni wayileja malejan kushalijan. (Luka 10:1-16) Payifumbau nawamp mulong wa mudimu wa kulejan, awiy asangera yom yiwamp yamanau. Kwinyim, in kwilej a Yesu amuleja yamanau. (Luka 10:17) Yisu yivud, in kwilej adinga ni kulejijan yom yamanau umwing ni mukwau.—Midimu 4:23; 15:4.

Program wa Chikumangan cha Mudimu cha minit 35 amulejen mu Mudimu Wetu wa Want wa ngond ni ngond. Mitu ya milong yisu yitwilejina mudi: “Mwifukwilany Yehova Pamwing mu Dijuku,” “Mulong wak Tukata Kuchirik Chisu ni Chisu,” ni “Mwimburija Kristu mu Mudimu Wey wa Kulejan.” Program upwiling nich muminy, ni chid chimwing cha chikumangen chikusal malembil mansudiel.

Yom Yalondau Angendj

Yikumangen yisadiling usu wa kumwak muntu ni muntu chakwel iyova mudi udi kwolikwend. Chilakej, Andrew wadinga watesha kal jinsangu jivud jiyimp piur pa Atuman a Yehova. Pakwez, pezay kapamp ka kusambish ku chikumangan, wakashimuka pa kuman mutapu wamwakau. Andrew ulondil anch: “Yadinga ndond yisangareshina kwikal. Nakashimuka pa kuman mutapu uwamp wasadilau ni mutapu wadinga wisotinay muntu ni muntu.” Ashel, nsand ukweta mivu 17 wa mu Canada, ulondil anch: “Chikumangan chadinga chisangareshina nakash! Chadinga chiswapel kutesh.”

José, ushichinga mu Brézil, wadinga wijiken mu ul mwadingay anch uding mwin chisum. Ap mwamu, amutazuka chakwel eza akumangan ku Chot cha Want cha pol pau. Ndiy ulondil anch: “Antu adinga mu Chot cha Want, angaka nich musangar, ap anch adinga ij munadinga pasak.” Atsushi ushichinga mu Japon, uvurikin anch: “Nifanyidin nilonda patok anch, panakumangana kapamp ka kusambish ku chikumangan cha Atuman a Yehova, niyova nich kausu kakemp. Ap mwamu, nashikena ku kwijik anch antu inay adi antu awamp. Awiy asala usu wau wawonsu chakwel angongoja.”

Akutazukin

Mudi mulejena yirumburil yidia kwiur oku, kukumangan ku Chot cha Want kukutwish kwalet difut diwamp. Ukwilej piur pa Nzamb, ni kusutil ku malejan ma Bibil miukwileja kwinikwa, Yehova Nzamb ukukulej mutapu “ukutaninamu amwiney.”—Isay 48:17, NW.

Kadingap kufut mulong wa kuya ku yikumangan ya Atuman a Yehova. Ov, usotin kukumangan ku chikumangan ku Chot cha Want chidia mu ul wen? Tukutazukin nich musangar weza ukumangana..