Tuyany Ku Ukurump Mulong—“dichuku Dijim Dia [Yehova, Nw] Didi Piswimp”

‘Tuyany kurutu kushik ku ukurump.’—HEB. 6:1.

1, 2. Mutapu ik washikenau in Kristu a mu mivu chitot ya kusambish adinga mu Yerusalem ni mu Yudea ‘kuchinyin ku mikandu’?

PADINGAY Yesu pansh, in kwilej end eza kudiay ndiy ni amwipula anch: “Chijingidij ik cha kwez kwey? Ni cha kwisudiel kwa mangand?” Kuwanyin kwa kusambish kwa chakul cha uprofet winou walonday Yesu wawanyina mu mivu chitot ya kusambish. Yesu wisambina piur pa chinship chimwing chikwikala chijingidij chilejena anch disudiel didi piswimp. Pamanau chom chinech, “[antu adinga] mu Yudea achinyin ku mikandu.” (Mat. 24:1-3, 15-22) Ov, in kwilej a Yesu ela kutwish kujingunin chijingidij chinech chakwel asala kukwatijan nich yom yayilejay?

² Kupwa kwa mivu makum masatu, mu muvu wa 61 C.C., kambuy Paul wayifundina in Kristu in Hebereu adinga ashiching mu Yerusalem ni ku mal ma piswimp uruu umwing wa usu nakash. Paul ni ambay nend akaritiy kadingap ija anch kwashal kal mivu yitan chakwel chijingidij chikutakela “mar mapandakena” chisadika. (Mat. 24:21) Mu muvu wa 66 C.C., Cestius Gallus wayitakela yisak ya amasalay in Rome piswimp ni kusot kumushesh Yerusalem. Pakwez, achirika kwau, chawiy chashau ndond chakwel antu adinga akad kwikal kand mu chak achina nawamp.

3. Chiyul ik chayinkishau in Kristu in Hebereu kudiay Paul, ni mulong wak?

³ In Kristu inay adinga afanyidin kwikal nich njingunin yiwamp ya muspiritu chakwel atwisha kujingunin mutapu usadikina yom ni chakwel atwisha kuchin. Pakwez, amwing au ikala “atujik-matu.” Adinga muspiritu mudi atubas adinga aswirikedina “mayel.” (Tang Hebereu 5:11-13.) Ap amwing au adinga asala kal makum ma mivu mu uyakin, amekesha yijingidij yadinga yimekeshina anch asotil “kudiokal kudi Nzamb mwom.” (Heb. 3:12) Amwing adinga ni “chaku” cha kuburenang ku yikumangan ya win Kristu pa chirung chadinga ni “kusej piswimp” dichuku dia mar. (Heb. 10:24, 25) Chawiy Paul wayikasikesha kamu pa chisu chifanyidina, palonday anch: “Chawiy chifanyidin tushany malejan ma kusambish ma yom ya Kristu, tuyany kurutu kutambul malejan mafanyidinau kwilej amakurump.”—Heb. 6:1, MM.

4. Ov, mulong wak chidi cha usey kucha ku mes muspiritu, ni chom ik chikutukwasha kusal mwamu?

⁴ Niyetu tushich katat mu chisu cha kuwanyin kwa kapamp kansudiel ka uprofet wa Yesu. “Dichuku dijim dia [Yehova, NW]”—dichuku dikeza kulet nsudiel ya ditenchik diawonsu dia Satan—“didi piswimp.” (Sof. 1:14) Kupandakanamu muchadinga pasak, tufanyidin kucha ku mes ni kubabal muspiritu. (1 Pita 5:8) Ov, mwamu tusadilinga chakin kamu? Kupam kwa win Kristu ku kutukwash nlel unou chakwel twijika pisu tudia mu kusut kwa chisu.

Chirumburikina Kupam kwa win Kristu

5, 6. (a) Chitin ik chakwel kukul muspiritu? (b) Chitin tusala usu mu yom ik yaad chakwel tuya kurutu ku ukurump?

⁵ Paul kayikasikeshap kusu in Kristu in Hebereu a mu mivu chitot ya kusambish kuya kurutu mu kukul, pakwez wayileja kand chitina kusal chakwel kukul muspiritu. (Tang Hebereu 5:14.) “Antu akudila” kakatap kuna ching “mayel” kusu. Akat kudia “yakudia yikash.” Chawiy lel, ijing yom yawonsu yaad “ya kusambish” ni “yikurikina” ya uyakin. (1 Kor. 2:10) Chikwau, ifumbil kal manangu mau ma kujingunin yom chakwel amasadil—kusutil ku kusadil yom yijau—mayikwashining kujingunin yom yiwamp ni yiyimp. Chisu chikatau kusot kukwat mupak kanang, kwifumb kwinoku kuyikwashining kujingunin mbil ja Mifund yidiamu ni kwijik mutapu wa kujisadin.

⁶ Paul wafunda anch: “Tufanyidin kudimuk nakash ku yom yitwatesha, chamwamu tukupwepuk ku yom yiney.” (Heb. 2:1) Kupwepuk kwinoku kudiokila ku ritiy kukutwish kwashiken pakad etu kujingunin mutapu kusambishina. Tufanyidin twiyepa yom mudi yiney mu “kudimuk nakash ku yom yitwatesha” pa chisu twileja uyakin wa muspiritu. Chawiy lel, umwing ni umwing wa pakach petu ufanyidin kwiyipul anch: ‘Ov, nichidi ni katat ni kwilej ching yom ya kusambish? Ov, nikat kusalang yom mulong kwau wa kuyisal ni kupwepwok oku ni oku, pakad kutekaku muchim wam wawonsu mu uyakin? Mutapu ik nikutwisha kuya kurutu muspiritu?’ Kuya kwetu kurutu ku ukurump kwitin tusala usu mu yom yaad. Tufanyidin twijika nawamp Dizu dia Nzamb. Ni tuswiridin twileja kuziyin.

Kasikanany mu Dizu

7. Mutapu ik tukutwisha kutaninamu mu kwikal akasikena nakash mu Dizu dia Nzamb?

⁷ Paul wafunda anch: “Mulong wawonsu uchikata kuna mayel kusu udi wakad kukasikan mu dizu dia kutentam; mulong uchidi mwan.” (Heb. 5:13) Chakwel anch tushikena ku ukurump, tufanyidin tukasikana mu dizu dia Nzamb, uruu wend kudi etu. Uruu winou udi mu Dizu diend, Bibil, tufanyidin kwikal in kwilej akash a Mifund pamwing ni mikand ya “kashalapol ushishamena ni kubabal.” (Mat. 24:45-47) Anch twikal nich yitongijok ya Nzamb mu mutapu winou yikutwish yatukwash kufumb usu wetu wa kujingunin. Tushinshikinany bil chilakej cha nambaz mwin Kristu utazukinau anch Orchid.a Walonda anch: “Chivurish chadinga nich usu ujim mu mwom wam chadinga cha kutang Bibil. Nasala mivu yaad pakwel anch nipwisha kutang Bibil mwawonsu, pakwez chadinga mudi kawiy kapamp ka kusambish kutanijan ni Sakatang wam. Nileja jinjil jend, yom yikatilay ni yikisilay, kujimb kwa dikand diend, ni kuvul kwa manangu mend. Kutangang Bibil dichuku diawonsu kwankwasha pa yisu yimwing yikash yanshikena mu mwom wam.”

8. Dizu dia Nzamb dikwet usu ik padi etu?

⁸ Kutangang chisu chawonsu chikunku cha Dizu dia Nzamb kutwishishining rusangu ridiamu kwikal nich “usu” padi etu (Tang Hebereu 4:12.) Kutang kwinoku kukutwish kwaswimp untu wetu wa mukach ni kumusangaresh Yehova chipandakena. Ov, ukwet kuswir kwa program chakwel witekina chisu cha kutangang Bibil ni kutongijokinang pa yom yilondilay?

9, 10. Yom ik yikwau yikwachikina ku kukasikan mu Dizu dia Nzamb? Let chilakej.

⁹ Kwikal akasikena mu Bibil kwitin kwijik yivud chidiap kwau kwimen pa yom yilondilay. Atubas a muspiritu a mu machuku ma Paul adinga ij yom kanang yadinga mu Dizu diapepilay Nzamb. Pakwez, kadingap ni kuyisadil ni kupak usey wadi. Kikasikeshap kwau ayinau nich rusangu radingamu chakwel riyitakela mu kukwat mipak ya manangu mu mwom yau.

¹⁰ Kukasikan mu Dizu dia Nzamb kurumburikin kwijik chidilondila ni kurisadil ronganyin ridiamu. Yom yamanay Kyle, nambaz mwin Kristu yilejen mutapu tukutwisha kusal. Kyle wadinga ni kamulong ni mbay nend a mudimu. Chom ik chasalay chakwel aupwisha? Urumburil mwamu: “Mufund wa Rome 12:18 wangeza mu manangu, ulondila anch: ‘Anch chikasikenip nchik kudi en, ikalany ni chisambu nau antu awonsu.’ Chawiy namukana mbay a mudimu winou chakwel tumanijana kupwa kwa mudimu.” Mambamb madinga mawamp nakash, ni mukwetu twasalanga nend mudimu washimoka nakash pakuman anch Kyle wasal kal ruzau rakusambish. Kyle walonda anch: “Nileja anch, ang twasadil mbil ja Bibil tukutwishap twarumbuk.”

Kwilej Kuziyin

11. Yom ik yimekeshina anch kuziyil mu yishiken ya mar kukutwish kwikal kukash?

¹¹ Kusadin yom tukata kwilej mu Mifund kukutwish kwatukasiken, pakampwil anch kwashiken yom yikash. Chilakej, pasuta chisu chikemp kusu kupwa kwa Yehova kuyikol an a Isarel mu uswik mu Idjibit, awiy “amutedisha Moses” ni ‘amupaka Yehova.’ Mulong wak? Chadinga mulong aburena mem ma kuna. (Kub. 17:1-4) Kupwa kwa angond aad, papwishau kal kusuk manswik nend Nzamb ni kwitiy kwau kusal “mazu mawonsu ma [Yehova, NW],” awiy ajipa chijil chend piur pa kwifukwil akish. (Kub. 24:3, 12-18; 32:1, 2, 7-9) Ov, asala mwamu mulong wom wayikwata pasalay Moses machuku mavud payay kutambul mafundish ku Mukandu wa Horeb? Ap anch atonga anch in Amalek akutwish kand ez kuyirishish kapamp kakwau ni anch in Isarel kukwikalap ni usu pakad Moses kwikalaku, mulong ndiy wadinga ni kuzambul makas mend ni chawiy chawinau? (Kub. 17:8-16) Ap anch chela kwikal mwamu, in Isarel “alikakwau kamuziyil.” (Mid. 7:39-41, MM) Paul wayikasikesha in Kristu ‘ikasikesha’ chakwel iyepa ‘kuwa mudi mwawau antu alika kuziyil’ mudi mwasalau in Isarel povau wom wa kwandam mwi Ngand ya Kushilamu.—Heb. 4:3, 11.

12. Mutapu ik wilejay Yesu kuziyil, ni wataninamu ik?

¹² Kuya kurutu kwitin anch tusala usu wetu wawonsu chakwel tumuziyila Yehova. Mudi muchimekena mu chilakej cha Yesu Kristu, kuziyin kukat kumeken mu yom yikutwisha kutushiken. (Tang Hebereu 5:8, 9.) Kurutu eza pansh, Yesu wadinga umuziyidin Tatukwend. Pakwez, pa kusal rusot ra Tatukwend pa divu chadinga chimwitin amana mar ku mujimbu ni mu manangu. Yesu wikala “utentamin” kusutil ku mar makash mamanay, mulong wa ndond yisu yadingay nich Nzamb mu manangu mulong wendend, ya kumwikadish Mwant ni Mwin Kupesh Mujim.

13. Yom ik yikumekesha anch twilejin kuziyil?

¹³ Chidiap nchik padi etu? Twakwatin kal mipak ya kumuziyil Yehova ap anch tukat kurish nich milong yikash? (Tang 1 Pita 1:6, 7.) Chiyul cha Nzamb piur pa kwishitul, kashinsh, kusadin kuwamp kwa rudim, kutang ni kwilej pakampwil Mifund, kukumangan ku yikumangan ya Ukristu, ni kudandamen kusal mudimu wakulejan yikumekesh patok. (Yosh. 1:8; Mat. 28:19, 20; Efes 4:25, 28, 29; 5:3-5; Heb. 10:24, 25) Ov, tukat kumuziyil Yehova mu yom mudi yiney ap anch tudi mu rukuny? Kuziyil kwetu kumekeshin anch tuyil kurutu.

Kukul Muspiritu—Kukwet Usey Ik?

14. Let chilakej mutapu ik kuya kurutu ku ukurump kukutwisha kulet diking.

¹⁴ Didi diking diakin kudi mwin Kristu kwikal nich usu wa kujingunin yom ufumbilau nawamp mulong wa kujingunin yom yiwamp ni yiyimp mu mangand am ma “kwimik dish.” (Efes 4:19) Chilakej, mukadivar umwing utazukinau anch James, utangininga chisu chawonsu ni kusanger mikand yishindamedina pa Mifund, witiyija kusal mudimu pamwing ni amband. James walonda anch: “Mu amband inay avud amekesha anch akwet dis, umwing wau wamekana kwikal nich chaku chiwamp ni wasangera uyakin wa Bibil. Pakwez, pa chisu twadinga mu chikumbu cha kusadin mudimu ayinetu, wasambisha kwinzez ni kwinsosomb. Natonga anch winswimbwil kwend, pakwez yankasikena kumukangesh. Pakwez navurika rusangu rumwing ralondau mu Chinong cha Kalam piur pa mukadivar umwing warisha nich choziu cha mutapu winou ku mudimu wend. Muntu wa mulong wasadina chilakej cha Yosef ni mband wa Potifar.b Namubachika changadim pakad kulab, ni ndiy wabudika mau pol.” (Dis. 39:7-12) James walamanga kom kawamp ap anch kwamushiken chom kanang.—1 Tim. 1:5.

15. Ov, mutapu ik kuya kurutu ku ukurump mukukasikeshininga muchim wetu wa chinfan?

¹⁵ Ukurump udi kand wakutaninamu mulong ukat kukasikesh muchim wetu wa chinfan ni kutulam chakwel “Kangal anidiosha ku malejan mavud makad kwijikany.” (Tang Hebereu 13:9.) Chisu tusadila usu wa kuya kurutu muspiritu, manangu metu makwimanyin pa “yom yiwanyidina.” (Filip. 1:9, 10) Tukumekeshin musangar wetu ujim kudi Nzamb, piur pa yom yawonsu yasalay chakwel tutaninamu. (Rome 3:24) Mwin Kristu udia mukurump mu “manangu” ufanyidin kukudish mwikadil mudi wa kujikitish ni kusanger kwikal mu urund wa piswimp nend Yehova.—1 Kor. 14:20.

16. Chom ik chamukwasha nambaz umwing chakwel akudisha ‘kujamish muchim’?

¹⁶ Nambaz umwing ukweta dijin anch Louise walonda anch chisu chimwing kupwa kwa kutambul dibabatish diend, diyingishin diend diakudandamen kusal mudimu diayisangareshap akwau. Walonda anch: “Kinasalap chom ap chimwing chiyimp, pakwez muchim wam wadingap kand nich maswir ma kumusadin Yehova. Namana anch nadi nifanyidin kuswimp yaku yimwing pa niyova anch nifanyidin kumwink Yehova chom chawonsu chinikweta. Kuswimp kwam kujim kwadinga mulong wakupan muchim wam wawonsu ku difukwil diend.” Chasalay usu mudi winou, Louise wakudisha ‘kujamish muchim,’ ni chamekana cha usey chisu charishangay nich milong ya kumujimbu. (Yak. 5:8) Louise walonda anch: “Narisha nakash, pakwez naseja kamu piswimp kudi Yehova.”

‘Ziyilany Nich Michim’

17. Mulong wak kuziyil kwadinga kwa usey mu mivu chitot yakusambish?

¹⁷ Payulanay Paul kuya “kurutu ku ukurump” yamekesha kupandish mwom ya in Kristu a mu mivu chitot ya kusambish adinga mu Yerusalem ni mu Yudea. Antu adinga nich kujingunin kwa yom ya muspiritu aswirikena kwijik chijingidish cha Yesu chayinkishay mulong wa kuchinin “ku mikandu.” Chisu chamanau “rukuny ra kusheshan . . . kwiman mwin ndond yitumbila,” chamekena anch, yadinga yisak ya amasalay a in Rome awunyimuka ni kwandam mu Yerusalem, pawiy pijikau anch chawiy chinech chisu chakuchin. (Mat. 24:15, 16) Mukulam kubabesh kwa uprofet walejanay Yesu, kwayikwasha in Kristu kudiokal mu musumb wa Yerusalem wajiyishau, kulondwish Eusebius, mukurump umwing wa chirelijon mwin kufund jinsangu ja pakur, walonda anch antu inay ayitwala mu musumb wa Pella wadinga mwi ndond ja mikandu ku Gilead. Awiy iyepa kamu ku disheshik diyimp diashikena mu Yerusalem diafundau mu rusangu ra pakur.

18, 19. (a) Mulong wak kuziyil kudi kwa usey mu machuku metu? (b) Yom ik tukeza kushinshikin mu mutu wa mulong udia kurutu ou.

¹⁸ Anch kuziyil kudiokiling ku kuya kurutu ku ukurump kukez kupandish mwom pa chisu chitukeza kurish nich milong yikash ya kuwanyin kwa uprofet wa Yesu ulondila anch: “Kukez kikal mar mapandakena” makad kwisikej. (Mat. 24:21) Ov, tukez kumekesh kuziyil ku yom yikusadika kurutu oku kulondul wintakel tutambwilinga kudiay “kashalapol wakin ukweta manangu”? (Luka 12:42, MM) Mutapu ik chidia cha usey anch twilej ‘kuziyil nich michim’!—Rome 6:17.

¹⁹ Kushik kwetu ku ukurump kwitin anch tujingunina usu wetu wakuman. Tukushiken ku chinech anch twasal usu nakash wakukwatikan nich Dizu dia Nzamb ni kwilej kuziyil. Kuya kurutu ku ukurump kwa win Kristu kuletining milong nakash kudi ansand. Mutu wa mulong udia kurutu ou ukurumburil mutapu tukutwisha kuwin milong mudi yiney.

[Mazu madia kwishin kwa paj]

Yom ik Wileja Kal?

• Kuya kurutu muspiritu chom ik, ni mutapu ik tukushikenaku?

• Kwikal akasikena nich Dizu dia Nzamb kukwet usey ik mu kuya kwetu kurutu ku ukurump?

• Ov, mutapu ik tukwileja kuziyil?

• Mu jinjil ik tukutwisha kutaninamu mu kuya ku ukurump?

[Chipich chidia pa paj wa 15]

Kusadin chiyul cha Bibil kukat kutukwash kujijamen milong mu mutapu wa ukurump

[Chipich chidia pa paj wa 16]

Kulondul chiyul cha Yesu kwadinga kupandish mwom kudi in Kristu akusambish