Antu Akemp Akuyikel, Pakwez Antu Avud Akutaninamu

KUDIOSH pa machuku ma atwimbuy, Nzamb watondin kal mu antu uvud antu akemp in Kristu ashinshamena, ni wayilila mudi an. Kuswimp kuswimpinau an inay alidinau kudi kujim nakash mu chilik chakwel anch Dizu dia Nzamb dilondil anch kudi mudi kuvadik kwa antu asu. Rutong ra kuvadik muntu musu ridi ra kuyirijek atushalapol in akuvadika asu a Nzamb chakwel ikala anyikel mwiur. (2 Timote 2:12) Chakwel anch ikala anyikel, akat kuyisangul ayikadish aom mwiur. (Rome 6:3-5) Anch ashik mwiur, ‘awiy akuyikel pa mangand’ pamwing ni Kristu.—Kuburik 5:10; 11:15.

Pakwez, Dizu dia Nzamb dilondil kand anch antu akwau kuwejin pa in avadikina asu ay akez kutambul dipandish dia chikupu. Mu Bibil (mu Mifund ya Hebereu ni mu Mifund ya Grek ya Ukristu), alondilamu anch Nzamb ukwet rutong ra kuyipandish yirund yaad ya antu—nich kwilikej chirund chikemp cha anyikel akwikala mwiur ni cha antu avud akwikala pansh. Tushinshikinany mudi chilakej, yom yayifundinau ambay akaritiy adinga afanyidina kuvadik asu kudiay kambuy Yohan. Ndiy walonda piur pa Yesu anch: “Ndiy udi yakupesh ya yitil yetu; ni kadip ya yitil yetwetu kusu [chisak chikemp], pakwez kand ni ya mangand mawonsu [chisak chijim].”—1 Yohan 2:2.

Chawiy chimwing, kambuy Paul niyend wafunda anch: “Yom yawonsu yatangau [chisak chijim] yikat kuchingil kumekan kwa an a Nzamb [chisak chikemp].” (Rome 8:19-21) Mutapu ik ufanyidina kutesh mazu minam ma kambuy Yohan ni Paul? Mu mutapu unou: Antu avadikina asu akez kwikal yid ya guvernema wa mwiur. Mulong wak? Chidi mulong wa kuyiletin mamiliyon ma antu yiyukish ya chikupu, antu akeza kushakam pa divu ni akuyikelau kudi guvernema wa Nzamb. Chawiy lel, Yesu wayileja in kwilej end kulembil anch: “Want wey weza. Rukat [rusot, MM] rey arusala pansh mudi mwiur.”—Mateu 6:10.

Uyakin winou piur pa dipandish dia yisak yiney yawonsu yaad udi kand ni mu Mifund ya Hebereu. Tushinshikinany mudi chilakej, yom yamulejau Abraham ngakend a Yesu, kudiay Yehova anch: “Ku a majuku [chisak chikemp] mey kwawiy kukez kuyukila michid yawonsu ya pansh [chisak chijim].” (Disambishil 22:18) Mwaning, ela kuyiyukish michid yawonsu kusutil ku “a majuku” ma Abraham.

Nany “a majuku” inay? Yesu Kristu, pamwing ni antu avadikina asu, an alilau kudiay Nzamb. Kambuy Paul urumburil anch: “Anch en udiany ayen a Kristu, chawiy udiany a majuku ma Aburaham.” (Galatia 3:16, 29, NW) Ni yiyukish ik yikutambulau in michid yawonsu kudiau “a majuku” ma Abraham? Kwitapil dilau dia kuchirish kwitiyik kudiay Nzamb ni kusanger mwom wa chikupu mu paradis panap pansh. Mwin kufund kuseng David wabwaka anch: “Mwin kutentam ukez kaswan ngand, ukez kashakamamu chikupu.”—Kuseng 37:29; Isay 45:18; Kuburik 21:1-5.

Chakin kamu, ayitekidin antu akemp dilau dia kuyikel mwiur, pakwez yiyukish wa winyikel winou wa mwiur—charumburik anch, mwom wa chikupu panap pansh ni yiyukish yawonsu—yidi mulong wa antu avud. Ov ey, ni dijuku diey ukutwish wikalany pakach pa antu akeza kutambul yiyukish ya chikupu yikeza kulet want wa Nzamb.

[Chipich chidia pa paj wa 12]

Mamiliyon ma antu akez kuyukishiu nich mwom wa chikupu panap pansh. Ov, ukez kwikal nau?