Mulong Wak Kumulondul “Kristu”?

“Anch muntu wel anch anlondul panyim pam, ilika bil amwinend . . . ni kwinlondul am.”—LUKA 9:23.

1, 2. Mulong wak chidi cha usey kudi etu kushinshikin mulong utufanyidina kumulondul “Kristu”?

YEHOVA woviling musangar nakash pakuyiman antu asu ni ansand akumangen pakach pa yisak yijim ya in kumwifukwil end adia pansh! Mudi mu udandamedina kwilej Bibil, kukumangan ku yikumangen ya Ukristu pakad kujing ni kukul mu ronganyin ra uyakin ukata kupandish mwom udia mu Dizu dia Nzamb, uswirikedin kulam ku muchim wey mazu ma Yesu malondila anch: “Anch muntu wel anch anlondul panyim pam, ilika bil amwinend, asendang [mutond wend wa mar, NW] pichuku pichuku, ni kwinlondul am.” (Luka 9:23) Yesu ulondil anch muntu ni muntu ufanyidin kwilik amwinend ni ikal mwin kwilej wend. Chidi cha usey kudi etu tushinshikina mulong wak tufanyidina kumulondul “Kristu.”—Mat. 16:13-16.

² Ov, chidi mutapu ik kudi antu amwing a pakach petu akata kwendil mu jinzau ja Kristu? Atukasikeshin tukula “kakwau ni kakwau.” (1 Tes. 4:1, 2) Ap anch twitiyijin katat difukwil diakin ap anch pasutin kal mivu yivud, kutongijokin pa mayingishin ma kumulondul Kristu makutukwash tusadila chiyul cha Paul cha Kumulondul dichuku ni dichuku. El tushinshikinany mayingishin matan malejena mulong utufanyidina kumulondul Kristu.

Tutany Urund wa Piswimp ni Yehova

3. Mu jinjil ik jaad tukutwisha kumwijikin Yehova?

³ Chisu chayilejay in ku Aten “wimana mukach mwa Aropagus,” kambuy Paul walonda anch: “Ndiy watenchika chisu chikushakamau antu a mwi ndond ni ndond, watenchika kand mimbu ya jindond jikushakamau. Ndiy wayitanga antu chakwel akez kumukimb, ap akez kumutan pakusurabau. Chakin, Nzamb kadiap kulemp ni muntu mwawonsu.” (Mid. 17:22, 26, 27, MM) Tukutwish kumukimb Nzamb ni kumwijik nawamp. Chilakej, yom yatangay yikutwish kutulej yom yivud piur pa ngikadil ni ukaliweny wa Nzamb. Anch twatongijokin pa yom yatangay yikutwish yatulej yom yivud piur pa Sakatang wetu. (Rome 1:20) Yehova utulejin kand yom yivud piur pend amwinend mu Dizu diend, Bibil. (2 Tim. 3:16, 17) Anch ‘twatongijokin pa midimu yend’ ni anch ‘twajingunin yisalijok yend,’ tukushiken ku kumwijik Yehova nawamp.—Kus. 77:12.

4. Kumulondul Kristu, kukutukwash mutapu ik kuta urund wa piswimp nend Yehova?

⁴ Njil yimwing yipandakena nakash ya kwikal ni urund wa piswimp nend Yehova yidi ya kumulondul Kristu. Tongijokin bil pa uyaj wadingay nich Yesu padingay ni Tatukwend “piyading ngand kand kal uyitang.”! (Yoh. 17:5, MM) Ndiy udi ‘disambishish dia yom yatangay Nzamb.’ (Kubur. 3:14) Chidiay “mwanat wa yom yawonsu yatangau,” washakama mivu yivud mwiur ni Tatukwend, Yehova. Kurutu kwa kwikal muntu, Yesu wasala yom yivud padingay pamwing ni Tatukwend. Ndiy wadinga murund wa pakampwil wa Nzamb, wasala nich musangar pamwing ni Mwin Dikand Diawonsu, ata nend urund ukash wa rukat. Yesu kamutalangap kusu Tatukwend mutapu wasalangay yom, pakwez washinshikina kand yovil ni ngikadil Yend, ni wipana ni wasadila yom yawonsu yilejay kudiay Tatukwend. Mudi chibudikin, Mwan winou mwin kuziyil wikala kamu mudi Tatukwend—chawiy chimujimbwilau mu Bibil mudi “chifu cha Nzamb wakad kumekan ku mes.” (Kol. 1:15) Anch twamulondul Kristu piswimp, tukushiken ku kumwijik nakash Yehova ni kuta nend urund wa piswimp.

Tumwimburijany Yehova Nakash

5. Chom ik chikutukwasha tumwimburija Yehova chipandakena ni mulong wak?

⁵ ‘Atutanga mu chifu cha Nzamb, ni tumufanaken,’ chawiy, tukwet ukaliweny wa kusadil ngikadil ya Nzamb. (Dis. 1:26) Kambuy Paul wayikasikesha in Kristu chakwel ‘amwilakeja Nzamb mudi anend akatish.’ (Efes 5:1) Kumulondul Kristu ku kutukwash tumwimburija Tatukwetu wa mwiur. Chidi mulong Yesu wamekesha nawamp yitongijok, yovil, ni untu wa Nzamb, ni wamumekesha nawamp kupandakanamu muntu ap wisu. Padingay pansh, Yesu kijikishap ching kusu dijin dia Yehova. Pakwez, wamulejana Muntu ukweta dijin dined. (Tang Mateu 11:27.) Yesu wachisala kusutil ku mazu mend ni ku yisal yend, ku malejan mend ni ku chilakej chend.

6. Malejan ma Yesu majingunisha chom ik piur pa Yehova?

⁶ Yesu wamekesha yitinay Nzamb ni mutapu wovilingay piur pa in kumwifukwil end kusutil ku malejan mend. (Mat. 22:36-40; Luka 12:6, 7; 15:4-7) Chilakej, pajimbulay chimwing cha Yijil Dikum chilondila anch—“Kangal wimik dis”—Yesu warumburila chitongijok cha Nzamb piur pa yom yidinga bil mu muchim wa muntu chisu chilemp kurutu asala chisal chinech. Ndiy walonda anch: “Muntu mwawonsu ukumutala mband wamwovil ris ra kulal nend, muntu mwinou wasal kal chitil cha kulal nend mu muchim wend.” (Kub. 20:14; Mat. 5:27, 28, MM) Kupwa kwa kwisambin chitongijok chimwing chadingau nich Afarise piur pa dizu dimwing dia Chijil dilondila anch—“Kamukata iwey, ni kumukis mukankuny ney”—pakwez Yesu wijikisha chitongijok cha Yehova palonday anch: “Yikatany akankuny en, ni kuyilembidil awiy akata kunizengolany.” (Mat. 5:43, 44; Kub. 23:4; Lev. 19:18) Anch twijik yitongijok ya Nzamb, yovil yend ni yitwitinay kusal, chikutukwash tumwimburija muchifanyidina.

7, 8. Yom ik twilejina piur pa Yehova kusutil ku chilakej cha Yesu?

⁷ Yesu wijikisha kand mutapu udiay Tatukwend kusutin ku chilakej chend. Pitutangininga mu Rusangu Ruwamp rilejena mutapu wayovilay Yesu ranaken atuzwendj, wayovila riy ayiman mar, wakisa chisu in kwilej end ayilikisha anikanch, ov, tumen chovilay Tatuku yovil ya chilik chimwing? (Marko 1:40-42; 10:13, 14; Yoh. 11:32-35) Tonginany mutapu yisal ya Yesu yitukwashina kwijik ngikadil yinying yijim ya usey ya Nzamb. Ov, yilay yasalay Yesu yimekeshinap usu upandikena wadingay nich? Pakwez kadingap ni kuusadil usu winou mulong wa yisakin yend amwinend ap mulong wa kuyisal akwau nayimp. (Luka 4:1-4) Chisal chend cha kuyopat in kulandish yom in ris mu tempel chimekeshin kukat kwend kutentam! (Marko 11:15-17; Yoh. 2:13-16) Malejan mend ni mazu mend ma ranaken masadilay mayishika antu ku michim chimekeshin anch ndiy wadinga ‘umupandaken Salomon’ ku manangu. (Mat. 12:42) Yom ik tukutwisha kulond piur pa rukat ramekeshay Yesu pa kupan mwom wend mulong wa antu akwau palonday anch: “Kwikil muntu ukweta rukat rujim rupandaken riner”?—Yoh. 15:13.

⁸ Mwan a Nzamb wamumekesha Yehova nawamp win kamu mu yom yin yawonsu yalonday ni yasalay chawiy chalondinay anch: “Wamena kal am wamumen kal Tatuku.” (Tang Yohan 14:9-11.) Kumulondul Kristu kwilaken pamwing ni kumulondul Yehova.

Yesu Udi Uzizidilau Many wa Yehova

9. Chisu ik ni mutapu ik wikalay Yesu, Uzizidilau Many wa Nzamb?

⁹ Tushinshikinany yom yasadika pa chishipu mu muvu wa 29 C.C. pikalay Yesu ni mivu 30 weza kudiay Yohan chakwel amubabatisha. “Ni Yesu, chamubabatishau kal, watuntuk mu mem; kukashimuk diur adimwanzuril, waman [spiritu] wa Nzamb ukat kushirik mudi iyemb, washirika wawil padiay ndiy.” Pa chisu chinicha, ndiy wikala Kristu, ap anch Mesia. Pa chisu chinicha kand, Yehova amwinend wamwijikisha Yesu mudi Uzizidilau Many wend, palonday anch: “Mwinou ndiy Mwanam ukatishena, mwi ndiy nikat kusanger.” (Mat. 3:13-17) Diyingishin diwamp mudi ik kudi etu chakwel tumulondul Kristu!

10, 11. (a) Mu mutapu ik musadidilau mwaz “Kristu” padiay Yesu? (b) Mulong wak tufanyidinap kulik kumulondul Yesu Kristu?

¹⁰ Mu Bibil, dijin “Kristu” adisadidin padiay Yesu mu mitapu kushalijan, mudi anch, Yesu Kristu, Kristu Yesu, ni Kristu. Yesu amwinend wasadila dijin “Yesu Kristu”—dijin adilondwil kudi mwaz. Palembilay kudi Tatukwend, walonda anch: “Kupand kwin kwa chikupu kwawiy oku, chakwel akwijika ey Nzamb wakin, ni watuma ey, ndiy kamu Yesu Kristu.” (Yoh. 17:3) Kusadil kwinoku kwapwitina manangu piur pa muntu watumay Nzamb ni wikala Uzizidilay Many wend. Anch mwaz autek kurutu kwa dijin, mudi anch: “Kristu Yesu,” akasikeshidin chisend chikwetay muntu pa ndond ya mudimu usadilay. (2 Kor. 4:5) Kusadil dijin dia mwaz “Kristu,” udi kand mutapu ukwau ukasikeshidina mudimu wa Yesu mudi Mesia.—Mid. 5:42.

¹¹ Payitadila mutapu usadidilau mwaz “Kristu” padiay Yesu ukasikeshidin uyakin unou wa usey: Ap mwamu Mwan a Nzamb weza pansh mudi muntu ni wijikisha rusot ra Tatukwend kadingap mudi muntu wa chamwamu ap mudi muprofet wa chamwamu; wikala Uzizidilau Many wa Yehova. Tufanyidinap kulik kumulondul Muntu winou.

Yesu Ndiy Njil Yimwing ya Dipandish

12. Mazu mamulejau kambuy Tomas marumburikin ik kudi etu?

¹² Diyingishin dikwau dia usey dia kudandamen kumulondul Mesia didi mu mazu mend mayilejay atwimbuy end ashinshamena, palonday masaa makemp kurutu kwa rufu rend. Pakulay chipul cha Tomas chamwipulay piur pa mazu malonday mulong wa kuya kwend ni kuyirijekin ndond, Yesu walonda anch: “Yam njil ni uyakin ni mwom; kwikil ukwiyezila kudi Tatuku ching kudi am.” (Yoh. 14:1-6) Yesu wadinga uyilejin atwimbuy ashinshamena 11. Washilamu kuyinkish jindond mwiur, pakwez mazu mend madinga kand makweta usey mulong wa antu akweta ruchingej ra kutambul mwom wa chikupu pansh pa divu. (Kubur. 7:9, 10; 21:1-4) Mu mutapu ik?

13. Mu mutapu ik udiay Yesu “njil”?

¹³ Yesu Kristu udi “njil.” Chamekan anch, chidi ching kusutin kudiay ndiy kusu, kwawiy tukutwishina kumusejin Nzamb. Mwamu chidia piur pa malembil, mulong chidi kusu ching kulembil kusutil mu dijin dia Yesu kwawiy tukwikala nich kashinsh anch Tatuku ukutwinkish chom chin chawonsu tukumwita kukwatijan nich rusot Rend. (Yoh. 15:16) Pakwez, Yesu udi kand “njil” mu mutapu ukwau. Chitil chayaurila antu kudi Nzamb. (Isay 59:2) Pakwez Yesu wapana “kupand kwend kuyikingiluku avud.” (Mat. 20:28) Mudi chibudikin, Bibil urumburil anch: “Mash ma rufu ra Mwanend Yesu matutokisha ku yitil yetu yawonsu.” (1 Yoh. 1:7, MM) Mwan watwazurila njil ya kuchakul nend Nzamb. (Rome 5:8-10) Ching anch twatek ritiy mudiay Yesu ni twaziyil kudiay ndiy, tukutwish chad kwikal nich urund witiyikina kudi Nzamb.—Yoh. 3:36.

14. Mutapu ik udiay Yesu “uyakin”?

¹⁴ Yesu udi “uyakin” chidiap anch mulong walondanga uyakin ni washakama kukwatijan nich, pakwez chidi mulong uprofet wawonsu uvud wafundau piur pa Mesia wawanyina padiay ndiy. Kambuy Paul wafunda anch: “Ku kushilamu kwawonsu kwa Nzamb. Chawiy tukata kulondil anch: ‘Amen’ mu dijin diend.” (2 Kor. 1:20, MM) Ap “mwizwizwimb wa yom yiwamp yisotila kwez” wadinga mu Chijil cha Moses wikala kashinsh padiay Yesu Kristu. (Heb. 10:1; Kol. 2:17) Mulong uprofet wawonsu wadinga ukumangedin padiay Yesu, ni wakwasha kutesh chisend chend chikweta usey mudi cha mwin kusal mudimu mu rutong ra Yehova. (Kubur. 19:10) Chakwel anch tutaninamu mu kuwanyin kwa rutong ra Nzamb riturijekidinay, komb tufanyidin kamu kumulondul Mesia.

15. Mutapu ik udiay Yesu “mwom”?

¹⁵ Yesu udi “mwom” mulong walanda muchid wa antu nich mash mend, ni mwom wa chikupu chidi chipan chikupanay Nzamb “mu Kristu Yesu Nsalejetu.” (Rome 6:23) Yesu udi kand “mwom” mulong wa antu afila kal. (Yoh. 5:28, 29) Pa chinech, tongin pa chikezay kusal pakwikalay Mwin Kupesh Mujim mu chirungu cha Winyikel wa Mivu Kanan. Mutapu ukezay kuyikol chikupu ku chitil ni rufu antu end pa divu!—Heb. 9:11, 12, 28.

16. Diyingishin ik tukweta dia kumulondul Yesu?

¹⁶ Chakul cha Yesu, chamwakulay Tomas, chikwet kurumburik kujim kudi etu. Yesu udi njil, uyakin ni mwom. Ndiy watumay Nzamb mu mangand chakwel mangand mapandina kudiay ndiy. (Yoh. 3:17) Ni kwikil ukwiyezina kudiay Tatuku pakad kusutil kudi ndiy. Bibil ulondil patok anch: “Dipandish kididip mu muntu mukwau; ap kwikil kand dijin dikwau mwishin mwa diur dipanyinau pakach pa antu mutukwipandishila etu.” (Mid. 4:12) Ap anch twadinga nich yaku ya mutapu ik pakur, pakwez, yidi njil ya manangu kudi etu kwitiyij mudiay Yesu ni kumulondul ndiy chakwel atutwala ku mwom.—Yoh. 20:31.

Atwitin Tumutesha Kristu

17. Mulong wak Chidi cha usey kudi etu kumutesh Mwan a Nzamb?

¹⁷ Pita, Yohan ni Yakob imena ayinau kukarumuk kwa Yesu. Pa chisu chinicha, awiy atesha dizu mwiur dialond anch: “Mwinou Mwanam, iwam utondilau, muteshany.” (Luka 9:28, 29, 35) Komb, kuziyil ku chijil cha kumutesh Mesia kudi kwa usey kudi etu.—Tang Midimu 3:22, 23.

18. Mutapu ik tukutwisha kumutesh Yesu Kristu?

¹⁸ Kumutesh Yesu kwitin kand ‘tumutala ndiy, ni kutongijokin pa chilakej chend.’ (Heb. 12:2, 3) Chawiy lel, “tufanyidin kudimuk nakash ku yom yitwatesha” yitutangina piur pend mu Bibil ni mu mikand ya “kashalapol ushishamena ni kubabal,” ni yitukata kutesh ku yikumangan ya Ukristu. (Heb. 2:1; Mat. 24:45) Chitudia amikoku end, twikalany lel nich mushiku wa kumutesh Yesu ni kumulondul.—Yoh. 10:27.

19. Chom ik chikutwisha kutukwash kumulondul Kristu chisu chawonsu?

¹⁹ Ov, tukudandamen kamu kumulondul Kristu chisu chawonsu, ap anch kwikalap nchik milong? Mwaning, tukutwish, anch twalondul “chilik cha mazu makin” mu kusadinang yom tukata kwilej “mu ritiy ni mu rukat ridia mu Yesu Kristu.”—2 Tim. 1:13.

Yik Wileja Kal?

• Mulong wak kumulondul “Kristu” kukat kukasikesh urund wetu nend Yehova?

• Mulong wak kumwimburij Yesu kudi kumwimburij Yehova?

• Mutapu ik udiay Yesu “njil ni uyakin ni mwom”?

• Mulong wak tufanyidina kumutesh Uzizidilau Many wa Yehova?

[Chipich chidia pa paj wa 28]

Malejan ma Yesu mamekesha yitongijok ya piur ya Yehova

[Chipich chidia pa paj wa 29]

Tufanyidin kumulondul Uzizidilau Many wa Yehova nich kushinshaman

[Chipich chidia pa paj wa 31]

Yehova walonda anch: ‘Winou ndiy Mwanam, muteshany’