Angel—adi “Aspiritu Mu Mudimu Wa Nzamb”

“Ov, aruu a mwiur awiy adi anany? Awiy kwau miku yikata kumusadil Nzamb, chad ndiy wayituma mulong wa kuyikwash antu akeza kutambul dipandish didiokila kudi Nzamb.”—HEB. 1:14, Manswik Masu.

1. Dikasikesh ik tukutwisha kutan mu Mateu 18:10 ni mu Hebereu 1:14?

YESU KRISTU wamubabesha muntu win mwawonsu ukukimba kuyipwakesh in kwilej end anch: “Talangany chakwel kangal ukamudiwolangany umwing wa akemp ang; mulong nakulejany anch, Angel au mwiur akat kushinshik kutal mwis mwa Tatukwam udia mwiur.” (Mat. 18:10) Palonday mulong wa angel ashishamena, kambuy Paul wafunda anch: “Ov, aruu a mwiur awiy adi anany? Awiy kwau miku yikata kumusadil Nzamb, chad ndiy wayituma mulong wa kuyikwash antu akeza kutambul dipandish didiokila kudi Nzamb.” (Heb. 1:14, MM) Mazu minam matwongojin ni matukasikeshin pakwijik anch Nzamb ukat kuyisadil yitang yiney ya mwiur chakwel yiyikwasha antu. Ov, yom ik yitulejinay Bibil piur pa angel? Ov, mutapu ik utukwashiningau? Yom ik tukutwisha kwilejin ku yilakej yau?

2, 3. Yisend ik yimwing yikwetingau angel?

² Kudi mamiliyon ma angel ashishamena mwiur. Awonsu akwet ‘usu nakash, akat kuwanyish dizu dined,’ (Kus. 103:20; Tang Kuburik 5:11.) An a Nzamb inay a muspiritu akwet ngikadil mudi ya Nzamb, ni wan ipau. Ayitenchikin mu mudimu kushalijan ni jindond jizambukina mu kutenchik kwa Nzamb, mudi mwangel mujim Mikayel (Dijin dia Yesu dia mwiur). (Dan. 10:13; Yuda 9) “Mwanat [winou] wa yom yawonsu yatangau”, udi “Dizu”, ap Katum wa Nzamb ni Yehova wamusadila mulong wa kutang yom yawonsu.—Kol. 1:15-17; Yoh. 1:1-3.

³ Mwinshin mwa mwangel mujim mudi aserafin, alejeninga winsant wa Yehova ni kuyikwash antu end ishitula muspiritu. Kudi kand asherub, akata kusadin kukasikesh ni kutumbish ukaleng wend. (Dis. 3:24; Isay 6:1-3, 6, 7) Angel akwau, ap anch aruu, akwet yisend kushalijan mulong wa kusal rusot ra Nzamb.—Heb. 12:22, 23.

4. Ov, mutapu ik wasalau angel patangau ngand, ni kwela kwikal ik anch antu asadila nawamp wan ipau wau?

⁴ Angel awonsu asangara ‘patangau ngand’ ni ipana mu kusal mudimu wau wayinkishau nich musangar chakwel asala ndond yimwing yiwamp yikushakamau antu. (Yob 38:4, 7) Yehova wamutanga muntu wamutek “kwishin kwa angel” pakwez mu “chifu” Chend, chawiy chiyitwishishina antu kwikal nich ngikadil ya Sakatang. (Heb. 2:7; Dis. 1:26) Anch asadila chipan cha wan ipau nawamp, Adam nend Eve ni an au ela kusanger mwom mu paradis mudi chikunku cha dijuku dia Yehova dia yitang yikweta manangu.

5, 6. Kubwambwil ik kwasadika mwiur, ni mutapu ik wasalay Nzamb?

⁵ Chakin kamu angel atumbila ova kuyip pamanau kubwambwil kwasambisha mu dijuku dia Nzamb. Umwing wa mukach mwau kasangerap kumutumbish Yehova, pakwez waswirikena amwifukwila niyend. Wiyikadisha amwinend Satan (charumburik anch “Mwin Kubwambwil”) mulong warishikisha wintakel utentamina wa Yehova ni waswirikena kutek wintakel wend. Nich makasu masadilay ma kusambish, Satan wayidimba antu akusambish chakwel abombakana nend mu kumubwambwil Sakatang wau mwin rukat.—Dis. 3:4, 5; Yoh. 8:44.

⁶ Yehova wamurumburisha Satan kapamp kamwing palonday mu uprofet wa kusambish udia mu Bibil anch: “Am nikez kutek rukuny pakach pey ni mband, ni pakach pa mbut yey ni mbut ya mband. Ndiy ukez kukuchany ku mutu wey, niyey ukez kumusum ku kapolantundu kend.” (Dis. 3:15) Ukankuny winou wadinga ufanyidin kudandamen pakach pa Satan ni “mband” wa Nzamb. Mwawiy, Yehova umen dirijek dia mwiur dia yitang ya muspiritu yishishamena mudi mukajend mukatish. Uprofet winou wateka mufulandal wa ruchingej rakin, ap anch yom yikwau yashala “ujindj” chakwel akez kuyijingunin pakemp pakemp. Nzamb watenchika anch umwing pakach pa yitang yend ya mu dirijek dia mwiur ufanyidin kuyishesh antombuj awonsu ni kusutin kudiay ndiy “yom ya mwiur ni yom ya pansh” ukuyilet pamwing.—Efes 1:8-10.

7. Yom ik yasalau angel amwing mu machuku ma Nowa, ni yom ik yayishikena?

⁷ Mu machuku ma Nowa, angel avud “asha kwol kwau” ni adjala mijimbu ya mbij chakwel asala jintong jau jiyimp ja kwisangarish pansh pa divu. (Yuda 6; Dis. 6:1-4) Yehova wayidjibwila antombuj inay mu mididim yikurikina, ni abombakana kal nend Satan mu kwikal “mizwizwimb yiyimp ya mu jindond ja mwiur” ni ikadil kal akankuny ayimp a atushalapol a Nzamb.—Efes 6:11-13; 2 Pita 2:4.

Mutapu ik Utukwashiningau Angel?

8, 9. Ov, mutapu ik ukatay Yehova kuyisadil angel chakwel ayikwasha antu?

⁸ Abraham, Yakob, Moses, Yoshua, Isay, Daniel, Yesu, Pita, Yohan, ni Paul adinga pakach pa antu asadilau kudi angel. Angel atentamina aletisha dirumburish dia Nzamb ni kupan kand uprofet ni wintakel, ni Chijil cha Moses. (2 Ant 19:35, NW; Dan. 10:5, 11, 14; Mid. 7:53; Kubur. 1:1) Katat tukwet dizu dia Nzamb diwanyidina, angel kakwetap kand kuswir kwa kutulej jinsangu ja Nzamb. (2 Tim. 3:16, 17) Ap anch kamekeningap ku mes, pakwez angel asadiling kamu nakash rusot ra Nzamb ni kuyikwash atushalapol end.

⁹ Bibil utwinkishin kashinsh anch: “Mwangel wa Nzamb ukat kujing nau awiy akata kumwov Ndiy wom ni kuyikamunin.” (Kus. 34:7; 91:11) Pakwez pa mulong wa kushishaman, Yehova wamulika kal Satan chakwel atuletina yoziu ya mitapu kushalijan. (Luka 21:16-19) Pakwez, Nzamb wij mutapu tukutwisha kujijaman mu yoziu ni kushal ashinshamena kudiay ndiy. (Tang 1 Korint 10:13.) Angel ababeling nakash chakwel kukwashan kukwatijan nich rusot ra Nzamb. Amupandisha Shadrak, Meshak, Abedenego, Daniel, ni Pita pakwez kakangeshap rufu ra Stefan ni Yakob ku makas ma akankuny nau. (Dan. 3:17, 18, 28; 6:22; Mid. 7:59, 60; 12:1-3, 7, 11) Mulong yom yikutwisha kushiken ap milong yikutwish kushalijan. Chilik kand chimwing, akadivar netu amwing ayijipa mu Kompony wa mar wa in Nazi, pakwez Yehova wayipandisha kand avud pakach pau.

10. Kuwejin pa ukwash wa angel, ukwash ik kand tukutwisha kutambul?

¹⁰ Mifund yitulejinap anch muntu ni muntu udia pansh ukweting mwangel wend. Tukat kulembil nich kashinsh anch: “Anch twit chom ku rusot rend, [Nzamb] ukutwov.” (1 Yoh. 5:14) Mwaning, Yehova ukutwish wamutum mwangel wend chakwel atukwasha, pakwez ukwash winou ukutwish kwez mu mitapu kushalijan. Akadivar netu in Kristu akutwish ayibachik kutukwash ni kutwongoj. Nzamb ukutwish watwinkish manangu ni usu utuswiridina mulong wa kurish nich “muy mu mujimbu wa mbij” utumeshina mar mudi anch “muruu wa Satan” ukat kutubul.—2 Kor. 12:7-10; 1 Tes. 5:14.

Mwimburijany Yesu

11. Ov, mutapu ik wayisadilau angel kumukwash Yesu, ni mutapu ik wawanyishay kushinshamen kudi Nzamb?

¹¹ Tushinshikinany mutapu wasadilay Yehova angel padiay Yesu. Alejana kuvadik kwend ni kusanguk kwend ni amusadila chisu chadingay panap pansh. Angel adinga afanyidin kukangesh kumukwat ni kumujip nich chisum. Pakwez, mwangel umwing amutuma mulong wa kumukasikesh. (Mat. 28:5, 6; Luka 2:8-11; 22:43) Kukwatijan nich rutong ra Yehova, Yesu wafa rufu ra mulambu wa yakupesh ni wamekesha anch muntu uwanyidina ukutwish walam kushinshaman kwend kudi Nzamb ap anch amupakap nchik djat ni kurufu. Chawiy Yehova wamusangula Yesu ni wamwinkisha mwom wakad kufang mwiur, “ukash wawonsu” ni wayileja angel kumuziyil. (Mat. 28:18; Mid. 2:32; 1 Pita 3:22) Yesu wamekana kwikal chikunku cha dishin cha “mbut” ya “mband” wa Nzamb.—Dis. 3:15; Gal. 3:16.

12. Ov, mu mutapu ik tukutwisha kwimburij chilakej cha Yesu chisikena?

¹² Yesu wadinga wij anch chidi chiyimp kumupak Yehova ku kwiyandjik mu chisal chiyimp ni kuchingejin anch ndiy ukutum angel end kwez kumupandish. (Tang Mateu 4:5-7.) Chawiy lel twimburijany chilakej cha Yesu cha kushakam nich “michim yitudila,” pakad kwiyandjikang mu ubaj, pakwez turishany nich yizengol ni ruchingej.—Titus 2:12.

Yom ik Tukutwisha Kwilejin Kudiau Angel Ashinshamena?

13. Yom ik tukutwisha kwilejin ku chilakej cha angel atentamina isambidinau mu 2 Pita 2:9-11?

¹³ Payipupay antu akata “kupipej ukash wa piur” wa atushalapol azizidilau many a Yehova, kambuy Pita wisambina piur pa chilakej chiwamp cha angel atentamina. Ap anch akwet usu ujim, angel kakatap kayisal masaal ma kuyirumburish “kurutu kwa Mwant.” (Tang 2 Pita 2:9-11.) El komb niyetu twiyepang kuyitonginang nayimp, tuyilimishang antu atondilau mulong wa kutakel mu chikumangen, ni tulikang milong mu makas ma Yehova, ndiy udia Nzuj Mujim.—Rome 12:18, 19; Heb. 13:17.

14. Yilakej ik ya kusal mudimu wa kwikepish yatushilau angel?

¹⁴ Angel a Yehova akat kutuletinang chilakej chiwamp cha kusal mudimu wa kwikepish. Angel amwing kalejanap kwau majin mau kudi antu. (Dis. 32:29; Ank. 13:17, 18, NW) Ap anch kudi ma miliyon ma yitang ya mu spiritu mwiur, pakwez Bibil ulejen kwend dijin dia Mikayel ni dia Gabriel. Chinech chikutukwash mudi diking chakwel tulika kuyinkish angel ntumb yakad kuyifanyin. (Luka 1:26; Kubur. 12:7) Chisu chaway kambuy Yohan pansh chakwel amwifukwila mwangel, amubabesha anch: “Tal, ey kangal wasal mwamu; am nidi kashalapol ni mukwen ni mukadivar ney.” (Kubur. 22:8, 9) Kwifukwil kwetu ni malembil metu yifanyidin kuya ching kudi Nzamb.—Tang Mateu 4:8-10.

15. Ov, mutapu ik watushilau angel chilakej cha kwishimpish?

¹⁵ Angel asha kand chilakej cha kwishimpish. Ap anch ipanining nakash chakwel ijika ujindj wa Nzamb, pakwez kawijap wawonsu. Bibil ulondin anch: “Yawiy yom yasotau angel kutaliku.” (1 Pita 1:12) Chad, yom ik yasalau? Achingela nich kwishimpish kushik ni pa chisu chatekay Nzamb mulong wa “manangu [mend] mapandakena kujimb” chakwel awijikina ku “chikumbu cha Nzamb”—Efes 3:10, 11.

16. Ov, mwikadil wetu ukwet usu ik padiau angel?

¹⁶ In Kristu adia mu yoziu ading mudi ‘ayijipin patok pa dibur kurutu kwa angel.’ (1 Kor. 4:9) Nich musangar ujim, angel akat kutalang yisal yetu ya kushinshaman ni akat kusangarang anch mukayitil wakarumuk. (Luka 15:10) Angel ij mwikadil wa amband in Kristu. Bibil ulejen anch: “Mband ufanyidin kwikal ni chijingidij pa mutu wend, mulong wa angel.” (1 Kor. 11:3, 10) Mwawiy, angel akat kusanger payimeningau amband in Kristu ni atushalapol awonsu a Nzamb adia pansh alondwil umutakel wa uteokras ni wa umutu. Kuziyil kwinoku kudi chivurish chiyifanyidina an inay a mwiur a Nzamb.

Angel Akwashening Kusal Mudimu wa Kulejan

17, 18. Mulong wak tukutwisha kulond anch angel akwashining mudimu wetu wa kulejan?

¹⁷ Angel asadil yom yishimokishena yisadikina pa “dichuku dia Mwant.” Mu yom yiney mudi kuvadik kwa Want mu muvu wa 1914 ni kumwopat Satan ni ayilembil end mwiur kudiay “[Mikayel] ni angel end.” (Kubur. 1:10; 11:15; 12:5-9) Kambuy Yohan wamana “mwangel mukwau ukat kutwik pakach pa diur, ukwet rusangu ruwamp ra chikupu rayilejay asokilinga pansh.” Mwangel walonda anch: “Mwovany Nzamb wom, umwinkany uyaj; mulong muten wa kwimikish kwend wez kal. Mwifukwilany ndiy watanga diur ni divu ni karung, ni misul ya mem.” (Kubur. 14:6, 7) Atushalapol a Yehova ij anch angel ayikwashining payilingau mu mudimu wa kulejan rusangu ruwamp ra Want chikalap nchik rupompat rikash ra Djabul.—Kubur. 12:13, 17.

¹⁸ Nlel, angel kakatap kwez kutulej ni kututakel chakwel tuyitana antu akweta michim yiwamp mudi mwamulejau Filip ni kumutakel amutana ntung mwin Etiop. (Mid. 8:26-29) Pakwez, yom yimenau mu machuku minam yipanin kashinsh anch angel akwashin mudimu wa kulejan wa Want ni akat kututakel kudiau antu “adinga mu mwikadil ufanyidina kutambul mwom wa chikupu.”a (Mid. 13:48, NW) Chidi cha usey mudi ik anch twipana mu kusal mudimu chisu chawonsu chakwel tutwisha kusal chikunku chetu mu kuyikimbang antu aswirikedina “kumwifukwil mu [spiritu] ni uyakin”!—Yoh. 4:23, 24.

19, 20. Angel akwet chikunku ik mu yom yikusadika “kwisudiel kwa mangand”?

¹⁹ Pisambinay mulong wa machuku metu, Yesu walonda anch: “kwisudiel kwa mangand” angel akez “kuyauril antu ayimp ni antu atentamina.” (Mat. 13:37-43, 49) Angel akwet chisend mu mudimu wa nsudiel wa kuyikumangej ni kuyitek chijingidij antu azizidilau many. (Tang Mateu 24:31; Kubur. 7:1-3) Chikwau, Yesu ukwikal ni angel pa chisu chikezay kwauril “amikoku kuyidiosh kudi ampemb.”—Mat. 25:31-33, 46.

²⁰ Pakwezay “kumekan . . . Mwant Yesu, . . . mwiur ni angel end a usu” antu awonsu “akad kumwijik Nzamb, ni . . . akad kuziyil katumb kawamp ka Nsalejetu Yesu” akez kayijiyish. (2 Tes. 1:6-10) Chisu chamanay Yohan yishimushimu ya chilik chimwing, wamumana Yesu ni yisak yend ya angel a mwiur akat kuya kapurumutay pa atubar atok mulong wa kurish njit nich kutentam.—Kubur. 19:11-14.

21. Chom ik chikezau kumusal Satan ni ayilembil end kudiay mwangel ukweta “nfungul ya dibuku diakad musul, ni rubwambu, mu chikas chend”?

²¹ Yohan wamana kand “mwangel ubudikin mwiur, ukwet nfungul ya dibuku diakad musul, ni rubwambu, mu chikas chend.” Winou wadinga mwangel mujim Mikayel, ukeza kumukas Djabul ni kumudjibul—pamwing ni ayilembil end—mu dibuku diakad musul. Akez kayilikishaku ka chisu kakemp kwisudiel kwa Winyikel wa Mivu Kanan wa Kristu pakuyipakau antu kapamp ka nsudiel. Kupwa, Satan ni antombuj awonsu akez chad kuyijiyish. (Kubur. 20:1-3, 7-10; 1 Yoh. 3:8) Wintombuj wawonsu mulong wa Nzamb akez kaudiosh.

22. Ov, mutapu ik ukwatikenau angel mulong wa yom yidia kurutu, ni mutapu ik tufanyidinap kwiyov pa mudimu wau?

²² Kukolik kujim ku dirijek diyimp dia Satan kudi kurutu oku. Angel akez kusal mudimu wa usey mu yom yiney yikusadika mulong wa kuchidij ukaleng wa Yehova ni kuwanyish rutong rend piur pa divu ni antu. Angel atentamina adi “miku yikata kumusadil Nzamb, chad ndiy wayituma mulong wa kuyikwash antu akeza kutambul dipandish didiokila kudi Nzamb.” Tumujikitishany Yehova Nzamb mulong wa mutapu usadidilay angel chakwel atukwasha kusal rusot rend ni kutambul mwom wa chikupu.

[Mazu madia kwishin kwa paj]

Ov, Ukwakul Nchik?

• Mutapu ik uyitenchikinau yitang ya muspiritu ya mwiur?

• Yom ik yasalau angel amwing mu machuku ma Nowa?

• Mutapu ik usadedilay Nzamb angel mulong wa kutukwash

• Mudimu ik ukwetau angel atentamina mu machuku metu am?

[Chipich chidia pa paj wa 22]

Angel akat kusanger kusal rusot ra Nzamb

[Chipich chidia pa paj wa 24]

Mudi muchadinga padiay Daniel, angel ababeling nakash chakwel kukwashan kukwatijan nich rusot ra Nzamb

[Chipich chidia pa paj wa 25]

Tutakamanany, mulong angel atukwashining mu mudimu wetu wa kulejan Want!

[Dizu dirumburila]

Ngand: Foto wa NASA