Uzwendj, Udi Uman Ulejena Anch Nzamb Kakwitiyijinap?
NZAMB wayileja in Isarel a pasak anch: “kikukez kwikalap kazwendj pakach pen.” Chadinga mwamu mulong mu Chijil chayinkishay, mwadinga yitenchik pa mulong wa kumubangin kazwendj ni piur pa kulikishin mabaz. (Kuvurik Yijil 15:1-4, 7-10) Chawiy lel, kikwadingap kufanyidin kwikal atuzwendj pakach pa in Isarel, mulong Yehova washilamu anch ukuyiyukish. Pakwez, chiyukish chinech chadinga chengamidin pa kuziyil Chijil, chakanganyau in Isarel kulam.
Pakwez, chinech charumburikap anch, Nzamb wayilika antu adinga akwet mapit makemp ma ku mujimbu, ni kusot kutongin anch antu adinga ni mapit mavud ma ku mujimbu adinga ching in kamu ayukishinau kudiay Nzamb. Atushalapol ashinshamena avud a Nzamb, adinga kwau atuzwendj ku mujimbu. Muprofet Amos wadinga kwend kafung wa amikoku ni ndim. (Amos 1:1; 7:14) Mu machuku menday muprofet Eliya, pakweza kamungun mu Isarel, Eliya wengamidina pa muchim wa kupan wa mband kazwendj ni mwad-a-mufu, wadinga ni yakudia ni many mu mutapu wa chilay pa chirung chawonsu cha kamungun. Pa awonsu aad Eliya ap mwad-a-mufu kwikil wadinga mpich; Yehova wadinga ni kuyinkish ching kusu yom yadinga yiswiridinau.—1 Ant 17:8-16, Les Saintes Écritures — Traduction du monde nouveau.
Yishiken yakad kuchingejin yikutwish yayishikij antu ku kwikal atuzwendj. Ubaj ni mayej yikutwish yamukangesh muntu mu ka chisu ap rawonsu kusal mudimu. Rufu rikutwish rasha an anshon ni adia-afu. Ap mikadil yiney yiyimp nakash yidiap uman ulejena anch Nzamb umulikin muntu. Rusangu ra Naomi nenday Rut ridi chilakej chimwing chisangareshina cha rukat ra Yehova ra kuyibangin atuzwendj. Ap anch Naomi nenday Rut ashala atuzwendj pafau anfumwau, Yehova Nzamb wayiyukisha ni wakwata yitenchik mulong wa kuyibangin.—Rut 1:1-6; 2:2-12; 4:13-17, NW.
Chakin kamu, uzwendj kiudiap uman ulejena anch Nzamb umulikin muntu. Antu ashinshamena kudiay Yehova Nzamb akutwish itiyijin mazu malonday Mwant David anch: “Nading nsand, katat nananap kal, pakwez kand kal nimumanangip mwin kutentam amulikil, ap anend aswadil yakudia.”—Kuseng 37:25.
[Chipich chidia pa paj wa 8]
Ap anch adinga atuzwendj, Naomi nenday Rut ayiyukisha kudiay Nzamb ni wayibangina nich rukat