Mapit Matwinkishiningay Nzamb

ANCH ushinshamen kudiay Nzamb, ov, ukukuyukish nich kukwinkish mapit ma ku mujimbu? Pamwingap, pakwez kakutwishap wakwinkisham chisu chikwau mu mutapu wa mapit miutongidina. Tushinshikinany chilakej cha Mariy, makwend a Yesu. Mwangel Gabriel wamubudikina ni wamwela anch: “Ey yey kakutapishau kal dilau dia mwiur” kudiay Nzamb ni anch ukumuval Mwan a Nzamb. (Luka 1:28, 30-32) Chikalap nchik mwamu, kadingap mpich. Pezay Mariy kupesh yakupesh pavadikay Yesu, waleta kwend “amayemb aad ap an atwinkudimb aad,” adinga yom ya kupesh yadingau ni kumupesh Yehova kudi atuzwendj.—Luka 2:24; In Levi 12:8.

Mudi mwadingay Mariy kazwendj, ov, chirumburikin anch Nzamb kadingap umwitiyijin? Pakwez, payay kumwendil mwanamakwend Elisabet, “Elisabet amwizwisha nich [spiritu utumbila]; ndiy wazambwisha dizu diend ni kubarik nakash anch: Ey [Mariy] uyukila pakach pa amband, diayuk kwau dibuj dia mwivumu mwey!” (Luka 1:41, 42) Mariy witapila dilau dia kwikal makwend a Mwan mukatish wa Nzamb.

Yesu amwinend kadingap mpich. Kichidiap kusu anch wavadikina ni amulidina mu uzwendj pakwez ndiy amwinend wadinga kazwendj mu mwom wend wawonsu panap pansh. Dichuku dimwing wamwakula ikundj wadinga usotila kwikal mwin kwilej wend anch: “Amiyeu akwet mabuku, ni atujil a mwiur akwet yiswal; pakwez Mwan a muntu kakwetip pakuladik mutu wend.” (Luka 9:57, 58) Chikalap nchik mwamu, yom yasalay Yesu Kristu pezay panap pansh yayitwishisha in kwilejend kushiken ku kwak dipit dimwing dijim nakash. Kambuy Paul wafunda anch: “Wikala kazwendj mulong wenen, chakwel akupitishany en ku uzwendj wend.” (2 Korint 8:9) Yesu wayinkisha in kwilejend mapit ma mulad ik? Nlel, tukwet dipit dia mulad ik?

Dipit dia Mulad Ik?

Chisu ni chisu, dipit dia ku mujimbu diding chikangesh cha ritiy, mulong nsand umwing wadinga mpich wachingejina nakash mwi nfalang jend kupandakanamu kumuchingejin Nzamb. Yesu walonda anch: “Chikasiken kamu kudi ampich kwandam mu want wa Nzamb!” (Marko 10:23) Choviken komb patok, Yesu kayinkishap in kwilejend mapit ma ku mujimbu.

Chakin, in Kristu avud adingaku mu mivu chitot ya kusambish adinga kwau atuzwendj. Pitay ikundj umwing wavadika chibid nfalang, Pita wamwakula anch: “Argent ni or ap rumwing kinikwetip; pakwez chinikweta chawiy nikukwinkisha ey: mu dijin dia Yesu Kristu wa ku Nazaret, lank, wenda.”—Midimu 3:6.

Mazu ma kambuy Yakob ni mawiy malejen anch mu chikumangen cha Ukristu mwadinga antu adinga atuzwendj. Ndiy wafunda anch: “Teshany bil, anamakwam a rukat! Ov Nzamb kakat kutondip atuzwendj a mangand kwikal ampich mu ritiy, ni answan a mu want wayishilayimu kudi awiy amukatila ndiy anchi?” (Yakob 2:5) Chikwau, kambuy Paul niyend walonda anch talany kadiap avud “ababela mu chilik cha antu,” “akweta usu” ap “avadika mu majuku majim” atazukau chakwel ikala mu chikumangen cha Ukristu.—1 Korint 1:26.

Anch Yesu kayinkishap in kwilejend mapit ma ku mujimbu, chad mapit ma mulad ik lel mayinkishay? Mu mukand watumay Yesu ku chikumangen cha Smirna, ndiy walonda anch: “Am nij kal yakamish yey, ni uzwazu wey pakwez udi kal mpich.” (Kuburik 2:8, 9) In adinga ku Smirna, ap anch adinga atuzwendj, pakwez adinga nich mapit ma usey nakash kupandakanamu argent ni or. Adinga ampich mulong wa ritiy rau ni kujijaman kwau kudiay Nzamb. Ritiy kusu arinar ridi ra usey nakash mulong “kawiyip awonsu akweta ritiy.” (2 Tesalonik 3:2) Chakin kamu antu akad ritiy adi atuzwendj ku mes ma Nzamb.—Kuburik 3:17, 18.

Mapit Mezininga ku Ritiy

Ritiy ridi ra usey mwinjil ik? Antu akweta ritiy mudi Nzamb atanyidinamu “mapit ma kuwap kwend ni kwitudish ni riy.” (Rome 2:4) Asangaredin kand kutambul “dijimangeshil dia tuyimp” twau mulong wa ritiy rau mu yakupesh ya difut dia Yesu. (Efes 1:7) Chikwau kand, ikadil kal nich mulad wa manangu madiokila mu “mazu ma Kristu” makwetau ching antu akweta ritiy. (Kolosay 3:16) Mudi mukatau kumulembil Nzamb nich ritiy, “chisambu cha Nzamb chisutila ronganyin rawonsu” chilamin michim yau ni manangu mau, ni kuyiletin musangar ni mazang.—Filipoi 4:7.

Kuwejin pa yiyukish yiney yawonsu, antu akweta ritiy mudiay Nzamb kusutil kudiay Mwanend, Yesu Kristu, akwet ruchingej ramushena ra kutambul mwom wa chikupu. Mazu manam ma Yesu Kristu mijiken nakash: “Nzamb wakata ngand, ndiy wapana Mwanend wa kuval kwend umwing chakwel mwawonsu ukwitiya kudiay ndiy kakujiyip, pakwez ukwet kal mwom wa chikupu.” (Yohan 3:16) Ruchingej riner ramushena rikat kwikalang rikash anch muntu washiken ku kwikal nich ronganyin rakin piur penday Tatuku ni Mwan, mulong Yesu walonda kand anch: “Kupand kwin kwa chikupu kwawiy oku, chakwel akwijika ey Nzamb wakin, ni watuma ey, ndiy kamu Yesu Kristu.”—Yohan 17:3.

Ap anch yiyukish ya Nzamb yiding nakash nakash ya muspiritu, kuding yiyukish ya mu manangu ni ya ku mujimbu. Talany chilakej cha Dalídio udinga mu Brésil. Kurutu ikala nich ronganyin rakin ra rusot ra Nzamb, wadinga ni kura nich pa kulik kuna maar chipandakena. Kuna kwinoku kwadinga ni kumuletin yikokujol nakash mu dijuku diend. Chikwau, kadingap ni mutapu wa kulam nfalang. Chawiy wasambisha kwilej Bibil ni Atuman a Yehova ni washikena ku kukarumuk nakash.

Ronganyin risu rajinguninay Dalídio ramushikija ku kulik yaku yiyimp. Waya kurutu muspiritu ni walonda anch: “Nadinga ni kuya ku chapu ni chapu cha maar, katat niyil ku chikumbu ni chikumbu.” Wikadil kal kashalapol wa chisu chawonsu wa Dizu dia Nzamb. Kukarumuk mudi kwinoku kwadingap ching kusu mulong wa ukash wa mujimbu wend pakwez ni pa mulong wa kulam nfalang jend. Dalídio walonda anch: “Nfalang jinadinga ni kushesh mulong wa kuna kwau maar, katat nikat kujisadil mulong wa kuyikwash antu adia mu maswir ap mulong wa kuland yom yinikweta nich kuswir.” Wikadil kal kand ni arund awamp avud mulong wa kwinung kwend ni antu amena chilik chimwing yom ya muspiritu mudi ndiy. Katat Dalídio ukwet chisambu mu manangu ni musangar kupandakanamu kulemp chom ap chisu chikutwishay kutongin padingay kandikal amwijika Nzamb.

Chilakej chikwau cha mwom usangareshina nakash cha antu akudisha ritiy rau mudiay Yehova Nzamb, chidi cha Renato. Anch wamuman chidiay nlel, mwin musangar ni masip, ukutwishap watongin ap pakemp anch uyingin kwikal mwamu mulong amusala yom yiyimp mu mwom wend. Pavadikay, makwend wamudjibula. Wamusha mu chibut ku chikum cha wit pa usukuril, amuchanya nayimp ni wadinga uchikwet mukuvu wend wakad kukatul. Amband aad adinga asutidina kwinika amana chibut chanyikek lel. Atonga bil anch kudi muntu wavuramenang kan ka kamesh kend. Pajinguninau anch udi mwan wavalau kal, amusenda mau akamutwal ku rupital radinga piswimp chakwel akamwoka.

Umwing wa amband inay aad wadinga Kaman wa Yehova, wamuleja Rita, Kaman mukwau rusangu ra mwan winou. Rita, mavumu madinga ni kumudiokal chisu ni chisu, chawiy wadinga kwend kusu ni mwanend changadim umwing. Wadinga usotin nakash kwikal ni mwan ikundj, chawiy chakwatay mupak wa kumulil Renato mudi mwanend.

Rita wamuleja Renato padingay uchidi mwanikanch nakash anch kadiap ndiy makwend wakin wamuvala. Pakwez wamulila nich rukat ni wakata nakash kumulej usey wa yom ya muspiritu. Papamay kal, wasambisha kusanger yom yilondinay Bibil. Wajikitisha nakash mulong wa mutapu wamupandishau ni kumulil apama mu mutapu wakadiay kutongijokin. Chisu chawonsu chikatay kutang mazu mafunday David mu kuseng anch: “Tatukwam ni makwam anch anlik, chawiy [Yehova] ukwintambul,” ukat ching kushikok kudil mansoj.—Kuseng 27:10.

Mudi uman wa kujikitish kwend mulong wa yawonsu yamusadilau kudi Yehova, Renato amubabatisha mu muvu wa 2002 ni wikala kashalapol mwin kusal mudimu wa chisu chawonsu mwin Kristu mu muvu walondulap. Ni katat kandikal amwijika tatukwend wakin ni makwend wakin ni pamwingap kakezap kuyijik. Pakwez, Renato wiyovil anch chimwing cha yipan yipandakena kuwap yatambwilay kal kudi kumwijik ni kwikal ni ritiy mudiay Yehova mudi Tatukwend mwin rukat ni mwin kumubangin.

Pamwingap niyey usotil wikala nich urund wa piswimp ni wa rukat ni Nzamb, wawiy ukutwisha kukupitish chakin kamu. Chis chidi cha kwazuril mulong weyey chakwel wikala nich urund mudi winou nenday Yehova Nzamb ni Mwanend Yesu Kristu—wikalap mpich ap kazwendj. Urund winou ukutwishap wakuletin ching mapit ma ku mujimbu pakwez ukutwish wikal nich chibudikin cha kutan chisambu ni mazang mu muchim yom yawakad kutwish kuland ni nfalang. Chakin kamu mazu madia mu Jinswir 10:22 madi makin: “Chiyukish cha [Yehova] chawiy chikata kulet dipit, ni Ndiy kakuwejangikup ushon.”

Yehova Nzamb uyisangaredin nakash antu ezina kudiay ndiy: “Anch en wadiany in kutesh malejan mam, ing yiyukish yam yelang kwikal kudi en mudi wit wakad kuumang mem! Kupandakan kwelang kwikal kudi en mudi mambek makata kwezang ku chikum cha karung.” (Isay 48:18) Ni washilamu kal anch antu awonsu akweza kudiay ndiy nich manangu mawamp ukez kuyipitish nakash, ni anch: “Ku kwitudish ni kumwov [Yehova] wom kwawiy kwa kupitil dipit, ni katumb, ni mwom.”—Jinswir 22:4.

[Tablo wa jinsangu udia pa paj wa 6]

Kwikal ni ritiy mudiay Nzamb kuletining chisambu, mazang ni musangar

[Chipich chidia pa paj wa 5]

Ap anch diadingap ni mapit ma ku mujimbu, Nzamb wadiyukisha dijuku mwavadikinay Yesu panap pansh