Nzamb Washilamu kal Kukwinkish Mapit?

‘Nzamb washilamu kal kukwikadish mpich—ukupit motak ya milad ni milad, kwisak kwey kukuya kurutu. Mwitiyija kwey kusu, buril kachibut key ka kulamin nfalang ni mwinkisha yawonsu yiukweta.’

WAWIY uruu ukatau kulejan amakurump amwing a marelijon adia mu Brésil, kukwatijan nich yilondila jurnal umwing wa mwinimwa. Antu avud awitiyijin ni kuusadil uruu winou. Kukwatijan nich kukimbijol kumwing kwasadinau mu États-Unis payipulau antu alondininga anch adi in Kristu, magazin Time ulondil anch: “Antu 61 pa chitot itiyijin anch Nzamb usotin antu ikal ampich. Ni antu 31 pa chitot . . . itiyijin anch, ang wamwinkish Nzamb nfalang jey, ukukuyukish ni kukuchirishin nfalang jivud.”

Yitiyij ya mutapu winou, ayitazukin chisu chivud anch malejan ma kupit, mapalangen nakash pakampwil mu jingand jidia mu Amerik wa Kurul, mudi Brésil, ni chawiy antu ayil lel ku ma egliz mayilejina anch Nzamb ukuyiyukish ni akupit. Ov, chakin kamu Nzamb ukat kushilamu kuyipitish antu amusadidila? Ov, atushalapol awonsu a pasak a Nzamb adinga ampich?

Chidi chakin anch mu Mifund ya Hebereu, tutaniningamu chisu ni chisu anch chiyukish cha Nzamb cheza ni mapit. Chilakej, mu Kuvurik Yijil 8:18, tutanginamu anch: “Muvurikany [Yehova] Nzamb wen, mulong ndiy ukwinkishinany en usu winou wa kupit mapit minam.” Mazu minam mayinkisha in Isarel kashinsh anch, ang amuziyil Nzamb, akez kwikal muchid wa ampich.

Chad chidi nchik piur pa muntu umwing umwing? Yob ikundj mwin kushinshaman wadinga mpich mujim, ni pamusheshinau mapit mend kudiay Satan, wikal kazwendj, Yehova wamuchirishina kand Yob dipit diend “tupamp twaad.” (Yob 1:3; 42:10) Abraham niyend wadinga mpich. Disambishil 13:2 ulondil anch Abraham wadinga “mpich nakash wa yivam, ni wa utad wa argent, ni wa or.” Chisu chezau amasalay a ant anying a Kwingangel ni amukwata ni kumusend Lot mwipwenday Abraham, ndiy “wayitazuka atushalapol end avadikina mu chikumbu chend. Kuvul kwau kwading yitot yisatu ni dikum ni chinan, wayilondula.” (Disambishil 14:14) “Atushalapol” end 318 adinga atwishina kukwat mat, chimeken anch Abraham wadinga ni dijuku dijim. Kulond anch wadinga utwishin kulam dijuku dined dijim kudi uman ulejena anch ndiy wadinga mpich mujim, wadinga ni yivam yivud.

Inge, atushalapol avud a pasak a Nzamb—mudi Abraham, Isak, Yakob, David, Salomon—adinga ampich. Ov, chom chinech chirumburikin anch Nzamb ukuyikadish atushalapol end awonsu ampich? Chikwau, kulond anch muntu udi kazwendj chirumburikin anch kakwetap chiyukish cha Nzamb? Mutu wa mulong ulondwilaku oku ukuyakul yipul yiney.