Ov, Nfalang Jidi Musul wa Musangar Wakin?

SONIA wavadikina mu Espagne. Padingay uchidi mwanikanch, wayanganga ku yikumangan ya Atuman a Yehova pamwing ni makwend. Pakwez, pakulay kal, waya kushakam ku Londre, mu Angleterre, ni wasambisha kusal mudimu mu chapu cha nfalang ni kusambish kulam nfalang jend.

Sonia wadinga ukatining nakash mudimu wend. Wadinga ni kwisak nfalang jivud ni wadinga kusadil nfalang jivud ja antu adinga ni kwez kuland yom kwolikwend. Wadinga mudimu umusangareshina nakash, ni wadinga ni kuya kurutu. Chisu ni chisu, Sonia wadinga ni kusal asaa 18 pa dichuku ni machuku mamwing wadinga ni kusal asaa aad ap asatu. Mudimu wend wawiy wadinga mwom wend. Chad kukashimuk yom yawonsu yawa kapamp kamwing. Sonia wayela mayej makash—pamwing ap madiokala ku kutongijokin nakash pa mashakamin mend. Wadinga ni mivu 30 kusu.

Sonia wayela kalip mutambu umwing wa mujimbu wend, ni adokiter adinga ni kulond anch kijap kand anch ukez kutwish kulond kand. Kapamp kamwing makwend waya ku Angleterre chakwel akamulama. Pasambishay Sonia kwend kand, makwend wamuleja anch, “Niyil ku yikumangan ya chikumangen, ni tukuya ney pamwing mulong kinifanyidinap nikusha amwiney.” Sonia witiyija kuya. Kwadinga chibudikin ik?

Sonia uvurikin anch: “Yom yawonsu yinatesha yadinga yakin. Nasangera kwitiyij kwilej Bibil ni muntu wakusambish wanlangwisha panaya kapamp ka kusambish ku Chot cha Want. Antu nijikijana nau pa kusambish adinga alika kal kwez kwingedin, pakwez arund nam asu adinga in chirungul ni in kwinbangin.”

Sonia wasambisha kulond pakemp-pakemp, ni waya kurutu swa-swa muspiritu. Mu muvu umwing kusu, amubabatisha. Arund nend asu avud adinga in Kristu atushalapol asadila mudimu wa chisu chawonsu, ni wadinga ni kuyiman mutapu usangerau. Sonia wadinga ni kutong anch: ‘Nisotil niyam nikala mudi antu inay. Nisotil nimusadila Yehova ni muchim wam wawonsu!’ Katat Sonia usadil mudi kashalapol mu mudimu wa chisu chawonsu.

Sonia wileja chom ik kusutil ku yom yamushikena? “Ap anch nadinga ni kukwat nfalang jivud, kwiyakamish ni kuburen diking ku mudimu kwadinga ni kwiletin ushon ni kuburen musangar. Katat nashiken kal ku kujingunin anch chom cha usey ujim mu mwom chidi kwikal nich urund uwamp ni Tatukwam wa mwiur, Yehova. Chakin kamu, katat nikwet musangar.”

Kambuy Paul wafunda anch: “Rukat ra nfalang wawiy muj wa mitapu yawonsu yiyimp; antu avud asota kwikal ampich akat kurumbuk mwi njil ya ritiy, abuzikin kal michim yau nich maushon mavud.” (1 Timote 6:10) Sonia wimena amwinend uyakin wa mazu minam.