Yipul ya in Kutang

Dilejan ik ditulejinau mu Jinswir 24:27?

Padingay ni kumuyul nsand, mwin kufund wa Jinswir ulondil anch: “Tenchik mudimu wey wa pol, irijekina bil chir chey, chad kurutu weza utunga lel chikumbu chey.” Chitong ik chidia mu jinswir jinej japepilau? Chitong chidi anch ikundj ufanyidin bil kwirijek nawamp kurutu asota kwatan chakwel asala dijuku diend amwinend ni kwijik nawamp yisend yezininga pamwing nich urund winou.

Pasak, verse winou adinga ni kumurumburil anch, ngatan udia tatuku kafanyidinap kubangin ching mudimu wend wa ku mujimbu pakwez ufanyidin kand kutung, ap anch kukasikesh dijuku diend, chilakej kusutil ku malejan ma muspiritu. Ap anch chitong chinech chidi chakin ni chikwatijadin ni Mifund, chimeken mudi anch kichawiyap chitong cha verse winou. Mulong wak tulondila mwamu? Tushinshikinany mayingishin maad.

Dia kusambish, verse kisambidinap kutung mu mutapu wa kukasikesh, dijuku didiaku kal. Pakwez, chitong chidi kamu cha kutung chikumbu. Dizu diakarumunau pinap “utunga” akutwish adisadil kand mu mutapu windjing anch, ku kurumburik kwa kutung ap anch kukasikesh dijuku—chinech chidi, kwatan ni kwikal ni an.

Cha kaad, verse ukasikeshidin pa kusal yom mu mutapu uwamp, mudi kulond anch: “Sal bil chom ech; kupwa chad usala chinech.” Chawiy lel, jinswir jinej jiletin chitong chakwel anch yisend ya ku mujimbu yawiy yifanyidina bil kusal kupwa chad kutal ya muspiritu? Bwat kwau!

Pa yirung yafundau Bibil, anch ikundj usotil ‘kutung chikumbu chend,’ ap anch usotil kukasikesh dijuku kusutil ku kwatan, wadinga ufanyidin bil iyipula amwinend anch: ‘Nawanyin kal mulong wa kumulam mband ni an akuvadika?’ Kurutu kwa kusambish dijuku, wadinga ni mudimu wa kusal, kudim bil chir chend. Chawiy Today’s English Version ukarumwin nawamp verse winou mu mutapu unou anch: “Chingel bil chir chey chiswa chad lel utunga chikumbu ni kukasikesh dijuku diey, chawiy ukwikal nich kashinsh anch ukwet ya kuyidish.” Ov, chitong chinech chidi kand cha usey ni nlel unou?

Inge. Ikundj usotina kwatan ufanyidin kwirijek nawamp mulong wa chisend chinech. Anch ukwet mujimbu ukash, ufanyidin kusal mudimu. Chakin kamu, mudimu ukash wa ikundj mulong wa kulam dijuku diend ufanyidinap kwikal ching wa ku mujimbu kusu. Dizu dia Nzamb dilejen anch ikundj wakad kubangin dijuku diend ku mujimbu, mu manangu ni muspiritu udi muyimp kumupandakanamu muntu wakad ritiy! (1 Tim. 5:8) Chawiy lel, pa chisu cha kwirijek mulong wa kwatan ni mulong wa mwom wa dijuku, ikundj uchidia nsand ufanyidin kwiyipul amwinend yipul yiney: ‘Ov, nirijekin kal mu chilik cha kutwish kutan yisakin ya dijuku? Nidi tayad kwikal mutu wa muspiritu wa dijuku? Nikuwanyish chisend cham cha kutakel dilejan dia Bibil pakad kujing pamwing ni mukajam ni anam?’ Chakin kamu Dizu dia Nzamb dikasikeshidin yisend yiney ya usey nakash.—Kuvurik Yijil 6:6-8; Efes 6:4.

Chawiy nsand usotina mband ufanyidin kutongijokin nakash pa chitong chidia mu Jinswir 24:27. Chawiy chimwing kand, niyend changadim ukusal nawamp iyipula anch wirijekin kal mulong wa yisend ya kwikal mband ni maku. Nsand ni changadim atijadina akutwish niyau iyipul yipul mudi yiney piur pa chisend chau cha kuyilil an. (Luka 14:28) Kushakam kukwatijan nich chiyul chinech chapipelay Nzamb kuyikwashining antwend kwipuk yikokujol yivud ni kushiken ku kusanger mwom wa dijuku usangareshina.

[Tablo wa jinsangu udia pa paj wa 10]

Yipul ik yifanyidinay kwiyipul nsand amwinend piur pa uruw?