“Ikalany Ni Mushiku Mu Muchim”

“Kangal wikalany ni usweral ku mudimu wen; ikalany ni mushiku mu muchim; umusadilany Nzamb.”—ROME 12:11.

1. Mulong wak in Isarel adinga ni kupesh yakupesh ya annam ni milambu yikwau?

YEHOVA usangaredining milambu ya atushalapol end yimekeshininga rukat rau mulong wendend ni kuziyil kwau ku rusot rend. Mu yirung ya pakur, witiyija milambu ya annam kushalijan ni milambu ya mitapu yikwau. Milambu yiney adinga ni kuyilambul kukwatijan nich Chijil cha Moses chayinkishau in Isarel mulong wa kwit dilikishin dia yitil ni kumekesh kujikitish kwau. Mu chikumangen cha Ukristu, Yehova katwitiningap tumulambula milambu ya mutapu winou. Pakwez, mu shapitre wa 12 udia mu mukand wayifundilay in Kristu in Rome, kambuy Paul ulejen anch atuchingejidin ni katat anch tupana milambu. El tutalany mutapu tukutwisha kuyilambul.

Yakupesh Yom

2. Chitudia in Kristu, mwom wa mutapu ik tufanyidina kwikal nich, ni witin kand chom ik?

² Tang Rome 12:1, 2. Mu chikunku cha kusambish cha mukand wend, Paul walejana patok anch in Kristu azizidilau many, ikala Ayuda ap In Michid, adinga ni kuyilondin anch adinga atentamin ku mes kwa Nzamb mulong wa ritiy, kichadingap mulong wa midimu. (Rome 1:16; 3:20-24) Mu shapitre wa 12, Paul urumburil anch in Kristu afanyidin kumekesh kujikitish kwau kusutil ku mwom wa kwipan. Pa chinech, tufanyidin twikala nich manangu madia zwang. Mulong wa kuburen kuwanyin kutwaswana, tudi mwinshin mwa “yijil ya chitil ni ya rufu.” (Rome 8:2) Chawiy lel, tuswiridin tukarumuna “manangu [metu mikala] masu mu muchim,” kusutil ku kukarumun yitongijok yetu yawonsu. (Efes 4:23) Kukarumuk kwinoku kukutwishik ching ku usu ni ku ukwash wa Nzamb ni spiritu wend. Kutwitining kand tusala usu nakash, chakwel ‘tusadila spiritu’ wetu. Chirumburikin anch tusala usu wetu wawonsu chakwel kangal “[t]wilikejany mu chaku cha mangand minam” nich mikadil yend ya masandj, kwipuwej kwijondila ni yitongijok yiyimp.—Efes 2:1-3.

3. Mulong wak tusadininga mijikit ya Ukristu?

³ Paul utulejin kand anch ‘tusadila spritu’ wetu chakwel twijika “yiwapila ni yirijekina ni yiwanyidina ku rusot ra Nzamb.” Mulong wak tukata kutang Bibil pichuku-pichuku, kutongijokinang pa yom yitutangina, kulembil, kukumangan ku yikumangan ya Ukristu ni kulejanang rusangu ra Want? Ov, chiding mulong amakurump a chikumangen akat kutushindil kusal yom yiney? Chakin, tuyijikitishining amakurump mulong wa kutuvurish. Pakwez, tusadining mijikit ya Ukristu mulong spiritu wa Nzamb utubachikining tumekesha anch tumukatin Yehova nich muchim wetu. Chikwau, yetu ayinetu twitiyijina anch ridi rusot ra Nzamb tusala mijikit yiney. (Zak. 4:6; Efes 5:10) Yikat kutusangaresh nakash pa kwijik anch, ang twikal nich mashakamin makin ma Ukristu, Nzamb ukutwish watwitiyij.

Yiyukish Yaurokina

4, 5. Mutapu ik ukatau amakurump in Kristu kusadil yiyukish yau?

⁴ Tang Rome 12:6-8, 11, Manswik Masu. Paul ulondil anch: “Tukwet yiyukish ya kusal nich yaurokina kudi muntu ni muntu.” Yimwing ya yiyukish yijimbwilay Paul yidi—kukasikeshan, kwikal mwin kutakel—pakampwil padiau amkurump in Kristu, ababeshinau pa mulong wa kutakel “nich mushiku.”

⁵ Paul ulondil anch, mushiku winou ufanyidin kumekan patok, mu mutapu usadilau amakurump mudi alej ni mulong wa kusal ‘mudimu.’ Mifund yidia kwiur ni yidia kwinshin yisotin kumekesh anch Paul wisambidin pa ndond pinap kusal ‘mudimu’ pol pa chikumangen, ap anch pol pa “mujimbu umwing.” (Rome 12:4, 5) Mudimu winou wawiy umwing wisambidinau mu Midimu 6:4, palondilau atwimbuy anch: “Etu tukudandamenany mu kulembil ni mu kusadil kwa dizu.” Yom ik yikwau yidia mu mudimu winou? Amakurump in Kristu akat kusadil yiyukish yau mulong wa kuyikasikesh yid ya chikumangen. Imekeshin ayinau anch adi tayad kusal ‘mudimu’ winou pa chisu chidiau tayad kamu kupan umutakel ni yany yidiokila mu Dizu dia Nzamb ku chikumangen kusutil ku mushiku wau wa kwilej, kukimbijol, kulejan ni kusal mudimu wa ukafung. Amakurump afanyidin kusadil nawamp yiyukish yau mulong wa kuyilam amikoku “nich musangar.”—Rome 12:7, 8; 1 Pita 5:1-3.

6. Mutapu ik tukata kusadil chiyul chidia mu Rome 12:11, mufund ujim wa mutu wa mulong winou?

⁶ Paul walonda kand anch: “Kangal wikalany ni usweral ku mudimu wen; ikalany ni mushiku mu muchim; umusadilany Nzamb.” Anch twajingunin ka chijingidij ka usweral mu mudimu wetu, tukuswiriken kushinshikin yaku yetu ya kwilej ni kulembil nakash chisu chawonsu chakwel Yehova atwinkisha spiritu wend, ukutwisha kutukwash tura nich usweral ni tuchirisha kand mushiku wetu. (Luka 11:9, 13; Kubur. 2:4; 3:14, 15, 19) Spiritu utumbila wayinkisha in Kristu a kusambish usu wa kulond piur pa “midmu yikash ya Nzamb.” (Mid. 2:4, 11) Chawiy chimwing kand, ukat kutwinkish mushiku mu kulejan, chakwel ‘kangal twikalany ni usweral mu mudimu wetu.’

Kwikepish ni Kwitudish

7. Mulong wak tufanyidina kusal nich kwikepish ni kwitudish?

⁷ Tang Rome 12:3, 16. Yiyukish yitukutwisha kwikal nich yidiokiling ku “ranaken” ra Yehova. Paul ulondin kwindond yindjing anch: “Kuwanyin kwetu kukat kudiok kudi Nzamb.” (2 Kor. 3:5) Chawiy lel, tufanyidinap twibaza ayinetu. Tufanyidin twikepisha ni kwijik anch yawonsu yitukutwisha kusal mu mudimu wetu yidi mulong wa chiyukish cha Nzamb, chidiap mulong wetwetu ayinetu. (1 Kor. 3:6, 7) Kukwatijan nich mazu minam, Paul ulondil anch: “Muntu wawonsu udia pakach pen, kichiwapilip itongang amwinend yom ya piur.” Chidi cha usey anch twilimisha ayinetu ni tutana musangar ni mazang mu mudimu wetu wa Want. Kwikal mwin kutudish, ap anch kwikal wija mimbu yetu, kukutukwash twipuka kwitonginang chipandakena ayinetu. Pakwez, tusotin ‘tutongang mudi in kutudish.’

8. Mutapu ik tukutwisha kwipuk kwikal ‘ababela mu michim yetu ayinetu’?

⁸ Chikwikal cha usup anch twibaz ayinetu mulong wa yom yitusadila. Mulong ‘Nzamb ndiy mwin kusongish.’ (1 Kor. 3:7) Paul ulondil anch Nzamb wamwinkisha muntu ni muntu udia mu chikumangen “chilik cha ritiy.” Pandond pa kwiyov kwikal piur, tufanyidin twitiyija anch ni antu akwau asadil yom mu chilik cha ritiy rikwetau. Paul wawejinaku kand anch: “Shakamany mu kovijan; kangal wikalany in kwibaz.” Mu mikand yend yikwau, kambuy utulejin anch kangal “wasalany yom ya kwaurok ap ya kwitumbwish nich, pakwez ikepishany umwing amutonga mukwau kujimb chipandakena amwinend.” (Filip. 2:3) Chitining kwikepish kwakin ni kusal usu nakash chakwel kwitiyij anch akadivar ni anambaz netu atupandakenamu mu chom ech ap ech. Kwikepish kukutwipwish ku kwikal ‘ababela mu michim yetu ayinetu.’ Ap anch yisend kanang ya mudimu wa pakampwil yikutwish yasal anch antu amwing ijikana nakash, pakwez antu awonsu akutwish asanger kusal “yom yakad katumb,” midimu ya usweral yakad kwijikanik kudi antu.—1 Pita 5:5.

Uumwing Wetu wa Ukristu

9. Mulong wak Paul wayifanikesha in Kristu azizidilau many ni yid ya mujimbu?

⁹ Tang Rome 12:4, 5, 9, 10. Paul uyifanikeshin in Kristu azizidilau many ni yid ya mujimbu yisadila mu uumwing mwishin mwa umutakel wa Kristu, Mutu wau. (Kol. 1:18) Uyivurishin in Kristu azizidilau many anch mujimbu ukwet yid yivud yisadila midimu kushalijan ni awiy niyau, ‘ap anch avudilap nchik adi mujimbu umwing wa Kristu.’ Mu chitongijok chawiy chimwing, Paul wayikasikesha in Kristu azizidilau many adinga ku Efes anch: ‘Tukudilany mu rukat mu yom yawonsu kudiay ndiy udia mutu, Kristu kamu. Mujimbu wawonsu aulimikin mwi ndiy, ausankeshil ku manungin mawonsu mudi mukasikeshilay chom chawonsu ipau, chakwel chid ni chid chisala mudimu wach mudi muchifanyidina chakwel mujimbu wawonsu ukutwish kukul ni kukasikan mu rukat.’—Efes 4:15, 16.

10. Ulabu ik witiyijidinau “amikoku akwau”?

¹⁰ Ap anch “amikoku akwau” kadiap kwau yid ya mujimbu wa Kristu, akutwish ilejin yom yivud ku chilakej chinech. (Yoh. 10:16) Paul ulondil anch Yehova “wayiteka yom yawonsu mwishin mwa yidjatil yend [Kristu], ni kumupan kwikal pamutu pa yom yawonsu ku chikumbu cha Nzamb.” (Efes 1:22) Nlel, amikoku akwau adia chikunku cha “yom yawonsu” yatekay Yehova mwishin mwa yidjatil ya Mwanend. Adi kand mukach mwa “yom” yapanay Kristu kudiay “kashalapol [wend] ushishamena ni kubabal.” (Mat. 24:45-47) Antu inay akwet ruchingej ra kushakam pansh, amwitiyijin Kristu mudi Mutu wau ni amuziyidil kashalapol ushishamena ni kubabal pamwing ni Chisak chend Chitakedina ni amakundj atekinau mulong wa kuchilam chikumangen. (Heb. 13:7, 17) Chawiy chisadila anch kwikala uumwing wa Ukristu.

11. Uumwing wetu wimanyidin pa chom ik, ni chiyul ik chaletay Paul?

¹¹ Uumwing winou wimanyidin pa rukat, “mwoj uwanyidina ukasila yawonsu pamwing mu kwovijan.” (Kol. 3:14) Mu Rome shapitre 12, Paul ukasikeshidin chom chinech, palonday anch rukat retu rifanyidin kwikal “rakad kubabek” ni anch “katijanany mudi divar, ulimishijanany muntu ni mukwau.” Chom chinech chikat kusal anch kwikala kulimishijan muntu ni mukwau. Kambuy ulondil anch ikalany a kusambish mu ‘kulimishijan muntu ni mukwau.’ Chakin, tufanyidinap kurumbangesh rukat ni yovil ya rukat. Tufanyidin tusala yom yawonsu yitukutwisha mulong wa kulam chikumangen chishitwila. Papanay chiyul chend cha rukat, Paul wawejinaku kand anch: “Katukinany ku yiyimp; ulamatany ku yiwamp.”

Iyakany Aeny

12. Pa mulong wa kuyikwash antu akwau, chom ik tukutwisha kwilejin kudiau in Kristu adinga ku Makedonia?

¹² Tang Rome 12:13. Kuyikat kwetu akadivar netu kutubachikining ku kukwashijan “ni yom yiswiridinau” ni kukwatijan nich yom yitukweta. Ap anch tukwet mapit makemp, tukutwish twayikwash akwetu nich yom yitukweta. Payifundinay in Kristu a ku Makedonia, Paul walonda anch: “Mu kupakish kwa mar makash, muruzu wa musangar wau ni uzwendj wau yivulijan ku rupit ra kupan kwau. Mulong apana mudi mudia usu wau, ni mu rusot rau ayinau, inge chipandiken usu wau; atulembijeka kuman ranaken ra kwikal pamwing ni yetwetu mu mudimu winou wa kuyikwash in Kristu [adia mwi ngand ya Yudeya, MM].” (2 Kor. 8:2-4) Ap anch adinga atuzwendj, in Kristu a ku Makedonia adinga in kupanang. Amana anch chadinga kwitapil dilau pa kuyinkish akadivar nau atuzwendj adinga mu Yudeya.

13. ‘Kuyak aeny’ kurumburikin ik?

¹³ Mazu “iyakany aeny” amakarumwin kudiokal ku dizu dia Grek dikweta chitongijok cha kwikal wa kusambish kusal chom. Manswik Masu makarumwin mazu minam anch: “Akany aeny ku yikumbu yen.” Kuyak aeny kumekening chisu chimwing kusutil ku kumutazukin muntu kanang yakudia, ni anch wamutazuk mulong wa rukat, chawiy chipandakena kuwap. Pakwez anch twikal akusambish kutazukan, tukez kujingunin mitapu yikwau ya kuyak aeny. Pakwez anch kitukwetap mutapu wa kuyitazukin antu akwau yakudia, kuyinkish kwau kafe, chay, ap chom chikwau cha kuna ni kwawiy kudi mutapu wa kuyak aeny.

14. (a) Dizu dia Grek diakarumunau anch “kwakan” didiokil ku mazu ik? (b) Mutapu ik tukutwisha kumekesh mu mudimu wa kulejan anch tuyibangidin angendj?

¹⁴ Kuyak aeny kukwatin ni ku manangu metu. Dizu dia Grek dikarumwinau ‘kwakan’ didiokil ku misul yaad ya mazu marumburukina “rukat” ni “ngendj.” Twoviling nchik ku mujimbu anch twayiman angendj ap anch aeny? In Kristu asadiling usu wa kwilej rudim rindjing mulong wa kuyilej angendj ashemunikidin mu teritwar wa chikumangen chau rusangu ruwamp, akutwish chakin kamu kuyichindin mu antu akata kuyak angendj. Chakin kamu, antu avud adia pakach petu kakutwishap kwilej rudim rindjing. Ap mwamu, etu awonsu tukwet chom cha usey chitukutwisha kusal mulong wa kuyikwash angendj kusutil ku kusadil nawamp broshir Une bonne nouvelle pour des gens de toutes nations, ukweta uruu wa Bibil mu jindim jivud. Ov, wamenap kal yibudikin yiwamp ya kusadil broshir winou mu mudimu wa kulejan?

Ovany Yovil Yovilau Akwen

15. Mutapu ik wasadilay Yesu chiyul chidia mu Rome 12:15?

¹⁵ Tang Rome 12:15. Chiyul cha Paul chidia mu verse winou chitwishikin kuchilond mu wiswimp mu mazu maad kusu anch: Kumekesh ranaken. Tuswiridin twileja kutesh ap kwovu yovil yovilau akwetu, yikala musangar ap anch ushon. Anch twikal ni mushiku mu muchim, yovil yetu ya musangar ap ya ushon yikumekan. Pachirikau in kwilej 70 a Kristu, izulijadina too musangar mulong wa mudimu ujim wa kulejan wasalau ni palondau yom yamanau mu mudimu wau, Yesu niyend, “wasangera mu [spiritu utumbila, NW].” (Luka 10:17-21) Musangar wau wamukwata niyend. Dichuku dikwau, Yesu “wadila pamwing nau antu adinga adidila” pafay Lazar.—Yoh. 11:32-35.

16. Mutapu ik tukutwisha kumekesh ranaken, ni anany afanyidina kusal mwamu pa kampwil?

¹⁶ Tusotil tulondula chilakej cha Yesu cha kumekesh ranaken. Anch mbay netu mwin Kristu usanger, tusotining niyetu tusangara pamwing nend. Chawiy chimwing, tufanyidin twova kusansan ni kwovu mar mamenau akadivar ni anambaz etu. Chisu ni chisu, tukutwish twayitudishaku akwetu akaritiy amena mar mu manangu anch twitekin chisu cha kuyitesh ni kuyanaken nakash. Ni pa yisu yimwing, tukutwish twashiken ku kuman anch yom yiney yatukwat nakash ku muchim djat ni mu chilik cha kudil mansoj. (1 Pita 1:22) Pakampwil en amakurump, ufanyidinany kusadil chiyul cha Paul pa mulong wa kumekesh ranaken.

17. Yom ik yitwileja kal mu shapitre wa 12 udia mu mukand wa in Rome, ni ik tukwileja mu mutu wa mulong ulondwilaku ou?

¹⁷ Maverse mitwashinshikina kal am mu shapitre winou wa 12 mu mukand wa in Rome, utwinkishin chiyul chitukutwisha kusadil mu mashakamin mu mwom wetu mudi in Kristu ni mu mutapu utufanyidina kushakam ni akadivar netu. Mu mutu wa mulong ulondwilaku ou, tukushinshikin maverse mashalaku kal am mu shapitre winou, misambidina pa mutapu utufanyidina kuyiman ni kuyisadil antu adia pol pa chikumangen cha Ukristu, pamwing ni akankuny netu nau in kutuzengol.

Kuchirikinamu

• Mutapu ik tukata kumekesh anch tukwet “mushiku mu muchim”?

• Mulong wak utufanyidina kumusadil Nzamb nich kwikepish ni kwitudish?

• Mu jinjil ik mutukutwisha kuyimekeshin akwetu akaritiy ranaken ni riy?

[Chipich chidia pa paj wa 12]

Mulong wak tusadilinga midimu yiney ya Ukristu?

[Chipich chidia pa paj wa 14]

Mutapu ik ukutwishay umwing ni umwing wetu kuyikwash angendj chakwel ileja piur pa Want?