Katat Chisu Chawanyin Kal’

“Katat, talany, chisu chawanyin kal ilel, diawiy dichuku dia dipandish.”​—2 KOR. 6:2.

1. Ov, mulong wak tuswiridin kujingunin chom cha usey chitufanyidina kusal pa chisu chin chawonsu?

“KUDI chirung cha yom yawonsu, chom ni chom chikwet chisu chau pa mangand.” (Mul. 3:1) Salomon wafunda piur pa usey wa kutongijokin pa chisu chiwapidila nakash mulong wa kusal chom chawonsu cha usey​—mudi kudim, kukas weny, kwisak, ap kwambamb ni antu akwau. Chikalap nchik mwamu, tufanyidin kand kujingunin mudimu ik udia wa usey tufanyidina kusal pa chisu chin chawonsu chitukweta. Mu mutapu ukwau wa kulond, tufanyidin kushinshikin nawamp piur pa yom tutekina pa ndond ya kusambish.

2. Ov, mutapu ik twija anch padingay Yesu ni kulejan, ndiy wading wij nawamp uvud wa chisu chelay kushakam pa divu?

² Padingay pansh, Yesu wading wij nawamp chisu chend chelay kushakam ni chom chafanyidinay kusal. Padingay wija nawamp yom yadinga pa ndond ya kusambish kudiay ndiy, wading wij anch chifanyidin kuchingel chisu chilemp chakwel uprofet uvud wa Mesia uwanyidina. (1 Pita 1:11; Kuj. 19:10) Ndiy wadinga ni mudimu wa kusal mulong wa kumekesh patok anch ndiy udi Mesia wa kushilamu. Ndiy wafanyidina kupan uman piur pa uyakin wa Want ni kukumangej antu akeza kwikal answan mu machuku ma kurutu pamwing nend mu Want. Kupwa, ndiy wafanyidina kutek mufulandal wa chikumangen cha win Kristu chikeza kulejan ni kusal mudimu wa kuyikadish in kwilej pa mangand mawonsu.​—Mar. 1:15.

3. Ov, ronganyin ra Yesu piur pa chisu radinga mutapu ik ni usu pa yisal yend?

³ Ronganyin riner rading ni usu ukash mu mwom wa Yesu, ramubachika ku kwikal nich mushiku wa kusal rusot ra Tatukwend. Ndiy wayileja in kwilej nend anch: “Yakwangul yidi yivud, pakwez in mudimu wa kwangul adi akemp. Mulembijekany mwin chir chakwel ukutum in mudimu wa kwangul avud.” (Luka 10:2; Mal. 4:5, 6) Yesu watonda chakusambish antu 12 kupwa in kwilejend 70, ni wayinkisha yany ya pakampwil, ni kuyitum chakwel alejan uruu ukasikeshina anch: “Want wa mwiur udi piswimp!” Piur pa Yesu amwinend, tutangin anch: “Chapwishay Yesu kulejan mazu minam kudi in kwilejend dikum ni aad, ndiy wadiokala kwinikwa, waya kulejan ni kurumburil mazu ma Nzamb mu mal makwau.”​—Mat. 10:5-7; 11:1; Luka 10:1.

4. Ov, mutapu ik wadingay Paul mwin kumwimburij Yesu Kristu?

⁴ Yesu wapana chilakej chiwanyidina cha mushiku ni cha kwipan kudi in kumulondul end awonsu. Chawiy chisambinay kambuy Paul pa chisu chayibabeshay ambay nend a mu ritiy anch: “Ngilakejany am mudi niyam munikata kumwilakej Kristu.” (1 Kor. 11:1) Ov, mutapu ik wadingay Paul kumwimburij Kristu? Chakusambish kusutil kusal usu wend wawonsu mulong wa kulejan rusangu ruwamp. Mu mikand yafunday Paul ku yikumangen, mudi mazu minam “kangal wikalany nich usweral,” “musadilany Nsalejen,” “salany nich mushiku midimu ya Nsalejetu Yesu,” ni “ku midimu yawonsu yiukusalany, salany nich mushiku mudi muukata kumusadilany Nsalejetu.” (Rom 12:11; 1 Kor. 15:58; Kol. 3:23) Paul kavuramenap kusankanijan kwend ni Nsalej Yesu Kristu mwi njil ya Damas ni mazu ma Yesu mafanyinay mwin kwilej Ananias kumulej anch: “Namutond kal ndiy kwinsadil am chakwel ukutwish kwijikish dijin diam kudi in michim yikwau, ni kudi ant, ni kudi in Isarel.”​—Mid. 9:15; Rom 1:1, 5; Gal. 1:16.

“Chisu Chawanyin Kal”

5. Ov, chom ik chamubachika Paul chakwel asala mudimu wend wa kulejan nich mushiku?

⁵ Kwambatan nich mukand wa Midimu, tumen patok chirungul ni mushiku wamekeshay Paul mu kusal mudimu wend wa kulejan. (Mid. 13:9, 10; 17:16, 17; 18:5) Paul wading wij usey wa chisu chadingay ushich. Ndiy walonda anch: “Katat, talany, chisu chawanyin kal ilel, diawiy dichuku dia dipandish.” (2 Kor. 6:2) Pasak mu muvu wa 537 K.C.C., chadinga chisu chiwamp kudi antu aya mu winkwal mu Babilon mulong wa kuchirik mwingand yau. (Isay 49:8, 9) Pakwez, Paul wading ni kwisambin chom ik pinap? Mazu mend matukwashin kuman yadingay nich mu manangu.

6, 7. Ov, katumb ik katambwilay Paul ni in Kristu azizidilau many, ni a nlel unou, ni anany asadina pamwing ni azizidilau many nlel unou?

⁶ Pakusambish mu mukand wend, Paul wisambina piur pa kalimish kajim kamwinkishinau ndiy ni ambay nend in Kristu azizidilau many. (Tang 2 Korint 5:18-20.) Ndiy wayirumburila anch Nzamb wayitazuka mulong wa rutong rimwing ra pakampwil, chakwel asala “mudimu wa kuyichakwish antu,” kuyilembijek antu chakwel itiya “kuchakul nend Nzamb.” Chinech chirumburikin kuchirish urund ap kwovijan ni Nzamb.

⁷ Kudiosh pasambisha wimbwambol, antu awonsu iteka kulemp ni Yehova. (Rom 3:10, 23) Kushakam kulemp ni Nzamb kwa yiteka antu awonsu mu kuburen kumwijik Nzamb ni rusot rend, ni kuyitwal ku mar ni ku rufu. Paul wafunda anch: “Twij anch, yom yawonsu yatangay Nzamb yikat kukimwok.” (Rom 8:22) Pakwez Nzamb wakwata mupak wa kuyikasikesh, ap ‘kuyilembijek,’ antu chakwel amuchirikina ap achakwisha nend. Wawiy wadinga mudimu wamwinkishau Paul ni ambay nend in Kristu azizidilau many. “Chisu chiwamp” chinech chela kumekan anch didi “dichuku dia dipandish” kudi antu awonsu atekina ritiy mudiay Yesu. In Kristu awonsu azizidilau many ni arund nau, “amikoku akwau,” asadina pamwing nau, adandamedin kuyitazuk antu chakwel atana yiyukish yidiokila ku “chisu [chinech] chiwamp.”​—Yoh. 10:16.

8. Ov, chom ik chisadina anch kuswir kwa kuchakwish kwikala kwa pakampwil?

⁸ Chom chisadina anch kuswir kwa kuchakwish kwikala kwa pakampwil chidi anch ap anch kubwambul kwading ku mutambu umwing kusu​—kwamekena kusutil ku wimbwambol wa muntu mu Eden—​Nzamb amwinend wakwata chiyul cha kuchirish urund winou. (1 Yoh. 4:10, 19) Ov, mulong wak wasala mwamu? Paul wakula anch: “Mulong Nzamb wachakula nau antu awonsu a pa mangand mu Kristu wakad kuyichindil yitil yau. Chad watwinkisha etu mudimu wa kulejan rusangu ra kuchakwish.”​—2 Kor. 5:19; Isay 55:6.

9. Ov, chom ik chasalay Paul mulong wa kumekesh kusanger kwend mulong wa riy ra Nzamb?

⁹ Kusutil ku kulet yakupesh ya difut, Yehova wasala anch antu awonsu atekina ritiy mudiay ndiy atwisha kutambul dilikishin ku yitil yau, kwikal arund ap kwovijan nend. Chikwau kand, ndiy wayituma aruu end chakwel ayikasikesha antu awonsu ikala mu chisambu nend anch chitwishikin. (Tang 1 Timote 2:3-6.) Mulong wading wij rusot ra Nzamb ni kwitiyij piur pa chisu chadingay mwom, Paul wipana nich mushiku mu “mudimu wa kuyichakwish antu akwau.” Rusot ra Yehova rikatap kukarumuk. Udandamedin ni nlel unou kusal chakwel antu achirisha urund nend. Mazu ma Paul “Katat, talany, chisu chawanyin kal ilel,” ni “diawiy dichuku dia dipandish.” madi ma kusadil ni nlel unou. Yehova udi Nzamb wa riy ni wa ranaken mud ik!​—Kub. 34:6, 7.

“Kangal Washadishany [Rutong] ra Nzamb”

10. Ov, “dichuku dia dipandish” dirumburikin chom ik kudi in Kristu azizidilau many, a pasak ni nlel unou?

¹⁰ Antu akusambish kutaninamu mu mazu ma ranaken ading antu adia mu umwing ni “Kristu.” (2 Kor. 5:17, 18) Kud awiy, “dichuku dia dipandish” diasambisha pa Pantekot mu muvu wa 33 C.C. Kudiosh pinipa, antu inay ayinkisha mudimu wa kulejan “rusangu ra kuchakwish.” Nlel unou, atushal a in Kristu azizidilau many adandamedin kusal “mudimu wa kuchakwish.” Awiy ij anch angel anying amanau kudi kambuy Yohan mu chishimu cha uprofet akat ‘kumukangesh rinkind munying kupepet pa mangand.’ Chawiy, ni nlel unou tuchidi mu “dichuku dia dipandish” ni pa “chisu chawanyin kal.” (Kuj. 7:1-3) Pa chinech, kudiosh kwinsambishil kwa mivu chitot ya 20, atushal azizidilau many ipana nich mushiku mu “mudimu wa kuyichakwish antu akwau” mu mangand mawonsu.

11, 12. Ov, mutapu ik in Kristu azizidilau many amekesha ronganyin rau pasak mu mivu chitot ya 20? (Tal chipich chidia pa paj wa 23.)

¹¹ Chilakej, mudi mwafundau mu buku Les Témoins de Jéhovah : Prédicateurs du Royaume de Dieu mu mivu chitot ya 20, “C. T. Russell ni arund nend ading ni ritiy rikash anch ading pa chisu cha kwangul ni anch antu aswiridin kutesh uyakin ukeza kuyipandish.” Ov, chom ik chasalau pa chinech? Pamanau anch ading pa chisu cha kwangul, pa “chisu [chimwing] chiwanyidin,” akadivar inay kimenap ching kusu pa kuyitazuk antu chakwel eza ku midimu kanang ya difukwil. Abishop a Kristendom ading asambishin kal kusal mwamu kudiosh pasak. Pakwez, in Kristu azizidilau many asambisha kusadil mitapu yikwau yiwamp mulong wa kupalangesh rusangu ruwamp. Pakach pa yom yikwau, asadina nich manangu winchij (Technologie) wa katat mulong wa kuya kurutu mu mudimu wau.

¹² Mulong wa kupalangesh rusangu ruwamp ra Want, in kulejan akemp akweta mushiku akat kusadil ma trakt, mabroshir, magazet, ni mabuku. Afunda kand madiskur ni mitu ya milong mu tunan ni tunan twa majurnal. Apalangesha malejan ma Nzamb kusutil ku yisaj ya ngand ap ya pa mangand mawonsu. Asala ni kusadil mafilim nich mazu madingau ni kukwat, ap kurutu asambisha kusal mu mangand mafilim mabudishina mazu makatau kumekesh kudi antu. Ov, mushiku winou ukash wading ni chibudikin ik? Nlel unou, kudi mamiliyon sambwad ma antu itiyija ni kwibomb mu kulejan uruu winou anch: “[Ikalany in] kuchakul nend Nzamb.” Chakin kamu, atushalapol a Yehova inay a kusambish aleta chilakej chiwamp cha kwikal ni mushiku ap anch ading aburedina yom yikwau.

13. Ov, rutong ik ra Nzamb ritufanyidina kulam mu muchim?

¹³ Chalonday Paul anch “katat chisu chawanyin kal” chidi chakin kamu. Etu twamana ranaken ra Yehova tujikitishin mulong atwinkisha chisu cha kutesh ni kwitiyij uruu wa kuchakwish. Pa ndond pa kuburen musangar, tufanyidin kulam mu muchim yalonday kand Paul anch: “Twakulembijekany chakwel kangal washadishany [rutong] ra Nzamb chamwamu.” (2 Kor. 6:1) Rutong ra Nzamb ridi ‘kuchakul nau antu awonsu a pa mangand’ kusutil kudiay Kristu.​—2 Kor. 5:19.

14. Ov, mikadil ik yazurikina mu jingand jivud?

¹⁴ Antu avud mu mangand, ayibwikil kal pa mes kudi Satan, ni achidi kulemp ni Nzamb ni kijap rutong rend ni ranaken rend. (2 Kor. 4:3, 4; 1 Yoh. 5:19) Pakwez, mikadil yiyimp nakash yidia mu mangand yasala anch antu avud itiya pakatau kuyilej anch mar ni uyimp wa antu udiokil ku kwitek kulemp ni Nzamb. Ap mu jingand mudinga antu avud alikina kusanger piur pa mudimu wetu wa kulejan, katat antu avud itiyijin rusangu ruwamp ni akwatin mupak wa kuchakul ni Nzamb. Ov, twijany katat anch chawiy chisu kud etu cha kwipan nich mushiku upandikena mu mudimu wa kulejan anch: “[Ikalany in] kuchakwish kudi Nzamb”?

15. Pa ndond pa kulejan uruu mulong wa kuyisangaresh antu, chom ik tusotina kuyilej antu adia mu mangand mawonsu?

¹⁵ Mudimu wetu udiap kusu wa kuyilej antu anch ang amulondul Nzamb, ndiy ukez kuyikwash mu milong yau yawonsu ni akez kwov nawamp. Antu avud achingejining kutaninamu pakatau kuya ku maegliz, ni maegliz ni mawiy masotining kuwanyish maswir mau ma kuyipwitin antu avud ku maeglis mau. (2 Tim. 4:3, 4) Rutong riner ridiap ra mudimu wetu wa kulejan. Rusangu ruwamp ritulejina ridi anch Yehova, mulong wa rukat rend, usotin kutulikishin yitil kusutin Kristu. Chawiy lel, antu akutwish kwikal piswimp ni kuchakul nend Nzamb. (Rom 5:10; 8:32) Pakwez, “chisu chawanyin kal,” chezin swaa kwisudiel.

“Ikalany ni Mushiku mu Muchim”

16. Ov, chom ik cha mukwasha Paul chakwel ikala ni usu wa kumekesh mushiku?

¹⁶ Ov, mutapu ik tukutwisha kukudish ni kulam mushiku wetu mulong wa difukwil diakin? Antu amwing akutwish kwikal kwau akad kuzangurok ni kuman anch chiyikasikedin kulejan patok yovil yau ap kwikal ni arund. Pakwez, chiwapidil kuvurik anch mushiku urumburikinap kumekesh yovil mu mutapu ukash; ni wimedinap pa untu wetu. Paul walejana payikasikeshay ambay nend in Kristu anch: “Ikalany ni mushiku mu muchim.” (Rom 12:11) Spiritu wa Yehova wasala usu ukash mu kuyinkish atwimbuy mushiku ni kujijaman mu mudimu wa kulejan. Kudiosh pa chisu chamutazukau kudi Yesu djat ni pamukasau kapamp kansudiel ni kumujip ku Rom​—pasuta mivu 30—​mushiku wa Paul kiwakepap. Ndiy wadandamena kumuchingejin Nzamb, wamwinkisha usu ufanyidina kusutil spiritu wend. Ndiy walonda anch: “Nikutwish kusal yom yawonsu mwi ndiy ukata kwinkasikesh am.” (Fil. 4:13, TMK) Chikwikal cha ukwash mudi ik anch twilej kusutil chilakej chend!

17. Ov, mutapu ik tukutwisha ‘kwikal ni mushiku mu muchim’?

¹⁷ Dizu dikarumwinau anch “mushiku” dirumburikin “kuyil.” Chakwel mem madia mwin nnung madandamena kuyil, chifanyidin kuwejaku kasu. Chilik chimwing, chakwel ‘twikala ni mushiku mu muchim,’ tuswiridin kudandamen kwikal nich spiritu wa Nzamb. Chakwel twikala nich spiritu winou, tufanyidin kusadil yakudia yawonsu yitwinkishinay Yehova mulong wa kutukasikesh mu spiritu. Chirumburikin kukwat nich usey dijuku dietu ni difukwil dia chikumangen​—kwikal ni dilejan dia muntu ipend ni dia dijuku, kulembil, ni kukumangan pamwing ni ambay netu in Kristu pakad kujing. Chawiy chikeza kutukwash kwikal nich “kasu” mulong wa kulam “kuyil” kukeza kutukwash tudandamena kwikal ni “mushiku mu muchim.”​—Tang Midimu 4:20; 18:25.

18. Pitudia in Kristu ipanina kal, ov, tufanyidina kuta muchim pa rutong ik?

¹⁸ Muntu wipanina kal udi muntu utila muchim nakash pa rutong rimwing ni kakatap kumuzuwol chiswapela ap kuziy pakatay kulondul rutong riner. Pitudia in Kristu ipanina kal, rutong retu ridi ra kusal yom yawonsu yisotinay Yehova anch tusala, mudi mwasalay Yesu. (Heb. 10:7) Nlel unou, Yehova usotin anch antu avud ikal in kuchakul nend. Chawiy ipanany amboku nich mushiku​—mu kumwimburij Yesu ni Paul—​mu kusal mudimu winou wa usey nakash, ni wa kuswapej ufanyidina kusadik nlel unou.

Ov, Uvurikin?

• Ov, wisu wadinga “mudimu wa kuchakwish” wamwinkishau Paul ni in Kristu akwau azizidilau many?

• Ov, mutapu ik akat kusadil nawamp atushal a azizidilau many ‘chisu chawanyina kal’?

• Ov, mutapu ik ukutwishau atushalapol in Kristu “kwikal nich mushiku mu muchim”?

[Chipich chidia pa paj wa 20]

Paul kavuramenap kusankanijan kwend ni Nsalej Yesu Kristu