Tambulany Yiyukish Kusutil Kudi Mwant Utakedilau Kudi Spiritu Wa Nzamb!

“Mwiku wa [Yehova] ukez kamwikish ndiy manangu.”​—ISAY 11:2.

1. Ov, chom ik chalejanau kudi antu amwing piur pa milong ya mangand?

ASTROPHYSICIEN Stephen Hawking wipula mu muvu wa 2006 anch: “Mu mangand mayipina kal mu chipolitik, mu mashakamin ma antu ni mu mikadil, ov, antu akutwish kudandamen kushakam kand mivu 100 yikwau?” Mutu umwing wa mulong wa mu gazet New Statesman umekeshin anch: “Twatwishinap kupwish uzwendj ap kutung mangand ma chisambu. Pakwez, chamekana anch twashikena ku kusal chinyim ni chinech. Chidap mudi anch kitwapakishinap kusal chom ap chimwing. Twapakisha kusal usu wetu wawonsu kusambish nich communisme djat ni ku libéralisme; kudiosh ku kukumangej kwa Michid djat ni ku kulikish kusal mat ma nikleyer. Twarisha ‘jinjit [jivud] mulong wa njit’ chakwel twitiyija anch twij mutapu wa kupwish njit.”

2. Ov, mutapu ik ukezay Yehova piswimp ap kusadil ukaleng wend utentamina pa divu diawonsu?

² Mazu minam makutwishap kuyikashimwish atushalapol a Yehova. Bibil utulejin anch antu kayitangap mulong wa kwiyikel ayinau. (Jer. 10:23) Yehova amwinend ndiy udia Mukaleng wetu utentamina. Ndiya ukweta mbil ya kututekin yijil, ya kutulej rutong tufanyidina kwikal nich mu mwom wetu, ni kututakel chakwel tuwanyisha rutong riner. Chikwau kand, ndiy ukez piswimp ap kusadil uyaj wend mulong wa kupwish rusot rikangenya ra antu ra kwiyikel ayinau. Pa chisu chinicha, ukez mulong wa kulik ukaleng wend utentamina kashesh yawonsu yiyilamina antu mu uswik wa chitil, wa kuburen kuwanyin ni wa “[nzamb wa] mangand minam,” Satan Djabul.​—2 Kor. 4:4.

3. Ov, chom ik chatakelay kulejan Isay piur pa Mesia?

³ Mu Paradis pa mangand masu, ukaleng wa rukat wa Yehova akez kuumekesh kudi antu kusutil ku Want wa Umesiya. (Dan. 7:13, 14) Piur pa Mwant winou, Isay wabwaka anch: “Dijiku dia Yese, tatukwend wa Mwant David, difanaken mudi mutond wakatulau kal. Mudi mitiy yisu yikata kuminy ku dishin dia mutond, mwamu kand mukez kabudikay Mwant musu ku a majuku ma Mwant David. Mwiku wa [Yehova] ukez kamwinkish ndiy manangu, ni ronganyin, ni chiyul cha kuyikel nich antwend.” (Isay 11:1, 2) Ov, mu mutapu ik wa pakampwil wamutondau ‘mutiy usu uminyina ku dishin dia Yese’​—Yesu Kristu kudi spiritu utumbila wa Nzamb—​mulong wa kuyitakel antu? Ov, yiyukish ik yikeza kubudikin kusutil ku winyikel wend? Ni chom ik tufanyidina kusal mulong wa kutambul yiyukish yiney?

Atondau Kudi Nzamb Mulong wa Kuyikel

4-6. Ov, ronganyin ik ra usey ramukwasha Yesu chakwel asala mudi Mwant, Mwin kupesh Mujim, ni Nkalansambu wa manangu ni wa riy?

⁴ Yehova usotin anch antwend ashikena ku kuwanyin mwishin mwa umutakel wa Mwant wa manangu makin ni wa riy, Mwin Kupesh Mujim, ni Nkalansambu. Chawiy lel Nzamb wamutonda Yesu Kristu kusutil kudi spiritu utumbila chakwel awanyisha yitinau mulong wa yisend yiney ya usey nakash. Shinshikin mayingish mamwing mamekeshina mulong wak Yesu ukez kuwanyish midimu yamwinkishau kudi Nzamb mu mutapu uwanyidina.

⁵ Yesu wading ni ronganyin ra piswimp ra Nzamb. Mwan kapokal wamwijika Tatuku pasak nakash kupandakanamu muntu mwin mwawonsu, chitwishikin washakaman nend pamwing mu mamiliyon yivud ya mivu. Pa chisu chinicha, Yesu watambula ronganyin rawonsu ra Yehova pawiy pamutazukau anch “chifu cha Nzamb wakad kumekan ku mes.” (Kol. 1:15, TMK) Yesu walonda amwinend anch: “Muntu mwawonsu wamena kal am, wamumen kal Tatuku.”​—Yoh. 14:9.

⁶ Chikwau kand kudi Yehova, Yesu wadinga nich ronganyin rijim nakash ra yitang yawonsu, ni ra antu. Kolosay 1:16, 17, TMK ulejen anch: “Mulong yom yawonsu ayitangila mwi ndiy [Mwan a Nzamb] mwiur ni pansh, yom yimekana ku mes, ni yakad kumekan ku mes . . . Ndiy udi kurutu kwa yom yawonsu, ni yom yawonsu yisankedin mwi ndiy.” Tongin bil pa chinech! Yesu padingay “mwant wa mudimu,” wa Nzamb, ndiy wijika mikadil yikwau yawonsu ya chitangil. Chawiy lel, ndiy wijika ka chom pa ka chom piur pa mangand mawonsu, kudiosh ku kachikunku kakemp nakash ka atom kushik ni ku wong wa muntu wamushena. Mwaning, Kristu udi chakin kamu manangu mamekeshinau mudi muntu!​—Jinsw. 8:12, 22, 30, 31.

7, 8. Ov, spiritu wa Nzamb wamukwasha Yesu mu mudimu wend wa kulejan mutapu ik?

⁷ Yesu amuzizila spiritu utumbila wa Nzamb. Yesu walonda anch: “Mwiku wa [Yehova] udi ni yamam, mulong watonda kal kurumburil Rusangu Ruwamp kudi atuzwendj. Ndiy wantuma kuyilej ankwal rusangu ra kuyikol, ni kuyilej amputames rusangu ra kuyerik, ni kuyikwol azengodilau. Wantuma kand kulejan chisu chiwamp cha ranaken ra [Yehova] chikupandishay antwend.” (Luka 4:18, 19) Patambulay Yesu dibatish, spiritu utumbila wamuvurisha yom yawonsu yilejay padingay mwiur kurutu kwa antu kwikalaku, ni yom yasotay Nzamb anch asala mu mudimu wend wa kulejan pa divu mud Mesia.​—Tang Isay 42:1; Luka 3:21, 22; Yohan 12:50.

⁸ Mulong ndiy wadinga nich spiritu utumbila, mujimbu ni manangu mawanyidina, Yesu kadingap ching kusu muntu mujim nakash wadinga pa divu pakwez ndiy wading kand Mulej mujim nakash. Chawiy lel, in kumutesh end “ashimwoka nakash mulong wa malejan mend.” (Mat. 7:28) Chom chimwing, Yesu watwisha kwisambin pa misul ya milong ya antu​—chitil, kuburen kuwanyin, ni kuburen kwijik yom ya muspiritu. Chikwau kand, ndiy watwisha kuman yom yadinga mu muchimu wa antu ni kuyikwash kulondulijan nich yovil yau.​—Mat. 9:4; Yoh. 1:47.

9. Ov, mutapu ik ukasikeshinau ruchingej rey mudiay Yesu mudi Nyikel kusutil ku kutongijokin pa yom yamushikena pa divu?

⁹ Yesu washakama mudi muntu. Yom yamushikena amwinend padingay muntu ni urund wend wa piswimp ni antu akad kuwanyin yamukwasha nakash Yesu chakwel awanyisha yitiyijinau mulong wa kwikal Mwant. Kambuy Paul wafunda anch: “Chifanyidin [kudi Yesu] kufanakan nau anamakwend mu mitapu yawonsu, chakwel ukwikal mwin kupesh mujim, mwin riy, mwin yakin ndiy kand mwin kuyilondilap kudi Nzamb, mulong wa kuyilikishin antu yitil yau. Chawiy katat Yesu ukutwish kuyikwash antu ozinau kudi Sakudimban, mulong niyend wamana mar pamwozau kudi Sakudimban.” (Heb. 2:17, 18) Mulong ‘amwoza’ Yesu, ndiy ukutwish kuyovil riy antu awila mu yoziu. Riy ra Yesu ramekana patok padingay mu mudimu wend wa kulejan pa divu. Ayej, ayilim, ayimana mar​—ap an—​asangera kumushejin. (Mar. 5:22-24, 38-42; 10:14-16) Antu itudishina ni akweta nzal ya muspiritu ading akat kumushejin niyawiy. Ku mutambu ukwau, antu akweta chibud, ni adinga ‘akad kumukat Nzamb’ amulika, amukisa, ni alika kumwitiyij.​—Yoh. 5:40-42; 11:47-53.

10. Ov, mu mutapu ik ujim wamekeshay Yesu rukat rend kudi etu?

¹⁰ Yesu wapana mwom wend mulong wetwetu. Pamwing ap chom chijim chimekeshina anch Yesu uwanyidin kwikal Ntakel chading rusot rend ra kufa mulong wetwetu. (Tang Kuseng 40:6-10.) Kristu walonda anch: “Kwikil rukat rupandakena kujimb mudi muntu kufa mulong wa arund nend.” (Yoh. 15:13) Mwaning, chinyim ni anyikel antu akad kuwanyin, akat kushakamang ni mwom uwamp kusutil ku kuyiy antu ayikedilau, Yesu ndiy wapana mwom wend mulong wa antu.​—Mat. 20:28.

Ndiy Watambula Usu wa Kusadil Difut

11. Ov, mulong wak tukutwish kwikal nich ruchingej rikash mudiay Yesu mudi mwin Kutukol?

¹¹ Chidi chom chiwanyidina mudi ik anch Yesu mudi Mwin kupesh Mujim udi muntu utakedila mulong wa kusadil padi etu yiyukish ya chakupesh cha difut diend! Pakwez, padingay pansh mu mudimu wend wa kulejan, Yesu watakela kutulej yom yikezay kusal mudi mwin Kutukol mu Mivu Kanan ya Winyikel wend, yitukeza kusanger anch twashal ashinshamena. Ndiy wayoka ayej ni ayilim, wayidisha antu avud, ni wapwisha ap mar ma yitangil. (Mat. 8:26; 14:14-21; Luka 7:14, 15) Chikwau kand, ndiy kasalap yom yiney mulong wa kumekesh ulabu ni ukash wend, pakwez wayisala mulong wa kumekesh riy ni rukat rend. Ndiy wamuleja muyej a mak wamulembijeka chakwel amwoka anch: “Nikatin kukok.” (Mar. 1:40, 41) Yesu ukez kumekesh riy ra chilik chimwing mu mivu Kanan ya Wintakel wend​—mu mangand mawonsu.

12. Ov, mutapu ik ukeza kuwanyin Isay 11:9?

¹² Kristu ni in kutakel end akez kudandamen kand nich program wa malejan ma muspiritu masambishay Yesu mu mivu 2 000 yasutina. Chawiy lel mazu ma Isay 11:9 makez kuwanyin: “Ngand yikez kizul nich ronganyin ra [Yehova], mudi mukata kwizul mem mu karung.” Mu malejan minam ma Nzamb mukez kwikal chakin kamu yany yilejina mutapu wa kulam divu ni yitang yad yivud, mudi mwamulejau Adam kusal pa kusambish. Kwinsudiel kwa mivu 1 000, rutong ra kusambish ra Nzamb mudi murilejenau mu Disambishil 1:28 rikez kuwanyin, ni yakupesh ya difut yikwikal ayisadidil kal sens.

Ndiy Watambula Usu wa Kurumburish

13. Ov, mutapu ik wamekeshay Yesu anch ukatin kutentam?

¹³ Kristu udi “ndiy kamu winou watondau kudi Nzamb mulong wa kuyirumburish antu aom ni afu.” (Mid. 10:42) Chidi chom chikasikeshina mudi ik, pa kwijik anch Yesu utentamin, kutentam kwinoku ni kushinshaman kudi mudi nshipu ya chikit ya mwi mbund! (Isay 11:5) Ndiy wamekesha anch wading ukisin ris, rubabek, ni yom yikwau yiyimp, ni wayiswejina antu akad riy pantaliken ni ayimana mar. (Mat. 23:1-8, 25-28; Mar. 3:5) Chikwau kand, Yesu wamekesha anch kadingap ni kumudimb nich yom yimekena ku mes, “mulong amwinend wading wij yom yidia mu michim yau.”​—Yoh. 2:25.

14. Ov, mu mutapu ik umekeshinay Yesu anch ukatin nlel unou kuburen kasolikany ni kutentam, chom ik tufanyidina kwiyipul ayinetu?

¹⁴ Yesu udandamedin kumekesh anch ukatin kutentam ni kuburen kasolikany kusutil ku kutakel kampany mujim nakash wa mudimu wa kulejan mu rusangu ra mangand. Kwikil muntu, ap winyikel wa antu, ap spiritu muyimp ukutwisha kwimik mudimu winou chakwel aukangesha kusadik mudi mu mutapu umusangareshina Nzamb. Chawiy, lel tukutwish kwikal nich ruchingej anch kupwa kwa Harmagedon, kutentam kwa Nzamb kukez kupandakan. (Tang Isay 11:4; Mateu 16:27.) Iyipula amwiney anch: ‘Ov, nikat kumekesh mwikadil wa Yesu kudi antu nitanina mu mudimu wam wa kulejan? Ov, nisadining usu wam wawonsu mulong wa kumusadil Yehova ap anch ukash wa mujimbu ap mikadil yam yikutwish kwinkangesh kusal yinisotina?’

15. Ov, chom ik tulamina mu manangu chikutwisha kutukwash chakwel tusala usu wetu wawonsu mulong wa kumusadil Nzamb nawamp?

¹⁵ Tukez kutambul ukwash wa kumusadil Nzamb ni muchim wetu wawonsu anch twalam mu manangu anch mudimu winou wa kulejan udi mudimu wend. Ndiy walejana kuusal; kusutil kudi Mwanend ukat kuutakel; ni kusutil spiritu utumbila wayinkisha antu ausadina mudimu winou usu. Ov, ukat kusanger chisend chinech chiukweta cha kusal mudi ambay a mudimu a Nzamb pamwing nich Mwanend utakedilau kudi spiritu? Kwikil muntu mukwau, pakwez ching Yehova ndiy ukutwisha kubachik mamiliyon sambwad ni kusut ma antu, avud pakach pau amenau mudi “amwamu akad kwilej,” chakwel alejana uruu wa Want kudi antu adia mu jingand 236?​—Mid. 4:13.

Iyukisha Amwiney Kusutil Kristu!

16. Ov, chom ik chilejenau mu Disambishil 22:18 piur pa yiyukish ya Nzamb?

¹⁶ Yehova wamuleja Aburaham anch: “Ku a majuku mey kwawiy kukez kayukil michid yawonsu ya pansh mulong ey waziyil kal dizu diam.” (Dis. 22:18) Chinech chimekeshin anch antu asangaredina akutwish kuchingel nich ruchingej yiyukish ya Mbut ya Umesia. Ni asadin nlel unou nich mushiku ni yiyukish yiney mu manangu.

17, 18. Ov, chom ik chakanay Yehova chitutangina mu Kuvurik Yijil 28:2, ni chinech chirumburikin ik kudi etu?

¹⁷ Kud mbut ya ku mujimbu ya Aburaham, muchid wa in Isarel, Nzamb walonda kand anch: “Yiyukish yiney yawonsu [yifundinau mu manswik ma Chijil] yikez kikal yenen ni kukuwilany anch en wez waziyilany ku dizu dia [Yehova] Nzamb wen.” (Kuv. 28:2) Chitwishikin kulond chilik chimwing piur pa atushalapol a Nzamb nlel unou. Anch usotinany kutambul yiyukish ya Yehova, dandamenany ‘kuziyil’ ku dizu diend. Chawiy lel yiyukish yend “yikez kikal yenen ni kukuwilany.” Ov, ‘kuziyil’ kwinoku kwitin chom ik?

¹⁸ Kuziyil kwitin chakin kamu kulam mu muchim yilejenau mu Dizu dia Nzamb ni mu yakudia ya muspiritu yiletinay. (Mat. 24:45) Kurumburikin kand kumuziyil Nzamb ni Mwanend. Yesu walonda anch: “Kadiap antu awonsu akata kwintazuk anch, ‘Nsalejetu, Nsalejetu,’ akeza kwandam mu Want wa Mwiur, pakwez ching antu akata kusal mudi musotinay Tatukwam udia mwiur.” (Mat. 7:21) Kumutesh Nzamb kurumburikin kand kuziyil ku yirijek yitenchikinay, chikumangen cha win Kristu nich amakurump atondau mudi, ‘amakundj mud yipan.’​—Efes. 4:8.

19. Ov, mutapu ik tukutwisha kutambul chiyukish?

¹⁹ Pakach pa ‘amakundj [inay] adia mud yipan’ kudi yid ya Chisak Chitakedila, yisadina mudi yitakedila chikumangen chawonsu cha in Kristu. (Mid. 15:2, 6) Pakwez, mwikadil wetu pantaliken ni anamakwend a Kristu a muspiritu chidi chom chijim chikeza kumekesh mutapu akezau kuturumburish pa chisu cha mar makash. (Mat. 25:34-40) Chawiy lel, mwikadil umwing wa mutapu tukutwisha kutambul chiyukish udi kusutil ku kuyikasikesh kwetu mu mutapu ushinshamena azizidilau many a Nzamb.

20. (a) Ov, chisend ik chijim chikwetau ‘amakundj mud yipan’? (b) Mutapu ik tukutwisha kumekesh anch tuyisangaredin akadivar inay?

²⁰ Pakach pa ‘amakundj mud yipan’ padi kand yid ya ma Komite ma Mutiy, atulam in kwendangan, ni amakurump a mu chikumangen​—awonsu inay ayitonda kudi spiritu utumbila. (Mid. 20:28) Chisend cha kusambish cha akadivar inay chidi cha kuyikasikesh antu a Nzamb “djat ni pitukwikadila mu umwing mu ritiy ni mu kumwijik Mwan a Nzamb, . . . amakurump mu ritiy, kushik ku chilik chiwanyidina cha Kristu.” (Efes 4:13) Chawiy lel, niyawiy adi akad kuwanyin mudi etu. Chikwau kand, tukutwish kwiyukish ayinetu anch twitiyij nich musangar ku wintakel wau wa rukat.​—Heb. 13:7, 17.

21. Ov, mulong wak chidi cha kuswapej kudi etu kumuziyil Mwan a Nzamb?

²¹ Piswimp ap Kristu ukez kushesh ditenchik diyimp dia Satan. Pakuwanyina chisu chinech, mwom wetu ukez kwikal mu makas ma Yesu, mulong amwinkisha kudi Nzamb mbil ya kutakel “chisak chipandakena kujimb” ku “musul wa dijiy dia mem ma kupand.” (Kuj. 7:9, 16, 17, TMK) Chawiy lel, tusalany amboku usu wetu wawonsu chakwel tuziyila kwa kwisotil ni kusanger kudi Mwant utakedilau kudi spiritu wa Yehova.

Chom ik Wilejidina Kusutil . . .

• Isay 11:1-5?

• Marko 1:40, 41?

• Midimu 10:42?

• Disambishil 22:18?

[Chipich chidia pa paj wa 25]

Ranaken ra Yesu ramekana patok pa chisu chamusangulay mwan mband wa Yayirus