Ikalany Nich Mushiku Mulong Wa Difukwil Diakin

“Yakwangul yidi yivud, pakwez in mudimu wa kwangul adi akemp.”​—MAT. 9:37.

1. Ov, mutapu ik ukutwisha kurumburil dizu kuswapej?

UKWET mukand ufanyidinau kushinshikin kudi antu amwing pa kupwa kwa dichuku. Ov, chom ik usadila? Wafundap anch “CHA KUSWAPEJ NAKASH!” Uyil kutanijan ni muntu mulong wa yom ya usey, pakwez chisu chasutang kal. Ov, chom ik usadila? Wamulej mwin kwendish motak anch, “Endishaku swa amboku; chidi cha KUSWAPEJ!” Mwaning, anch ukwet mudimu ufanyidina kusal ni chisu chasutang kal, ukwiyov anch ufanyidin kusal swaa pakad kulab. Ujim wey wasambish kumekan, ni usadil ni usu wey wawonsu mudi muchitwishikina chakwel wipuka. Chinech chidi kuswapej!

2. Ov, mudimu ik wa kuswapej nakash ukwetau in Kristu akin nlel unou?

² Kudi in Kristu akin nlel unou, kwikil chom chipandakenamu kuswapej mudi kulejan rusangu ruwamp ra Want ni kwikadish in kwilej antu a michid yawonsu. (Mat. 24:14; 28:19, 20) Pachirikinay yalonday Yesu, mwin kwilej Marko wafunda anch mudimu winou chifanyidin ku usal “bil,” kurutu kwa kwez kwa disudiel. (Mar. 13:10) Chifanyidin kwikal mwamu chakin kamu. Yesu walonda anch: “Yakwangul yidi yivud, pakwez in mudimu wa kwangul adi akemp.” Yakwangul yikutwishap kuchingel; chifanyidin kuyikumangej kurutu kwa nsudiel ya chisu cha kwangul.​—Mat. 9:37.

3. Ov, mutapu ik wakwilau antu avud ku maswir ma kuswapej kulejan?

³ Mulong mudimu wa kulejan udi wa usey nakash kudi etu, witin anch tupana nakash chisu, usu, ni manangu metu anch chitwishikin. Chidi cha kushiman, mulong akadivar ni anambaz avud asadining mwamu. Amwing apipesha mijikit yau ayinau mulong wa kusambish mudimu wa chisu chawonsu mudi ayibol ap amishoner ap kusal ku chimwing cha yikumbu ya Betel yidia pa mangand mawonsu. Akwet yom yivud ya kusal mu mwom wau. Awiy ipana nakash, ni akwet yikokujol yivud. Pakwez, ayiyukishin nakash kudi Yehova. Tukwet musangar mulong wa awiy. (Tang Luka 18:28-30.) Ap anch antu akwau kakwetap mutapu wa kusal mudimu wa kulejan wa chisu chawonsu, pakwez asutishin yisu yivud pichitwishikina mu mudimu wa kuyikol antu, ni wa kuyikwash anetu chakwel apanda.​—Kuv. 6:6, 7.

4. Ov, mulong wak antu amwing akutwish kushadish chitongijok cha kuswapej?

⁴ Mudi mutwamanang, chitongijok cha kuswapej chikwatijadin nich chisu chitekinau, mwimbu watekau kal, ni disudiel. Tudi mu machuku ma nsudiel, ni kudi uman uvud nakash​—udiokila mu Bibil ni ku jinsangu—​ulejena anch chidi chakin. (Mat. 24:3, 33; 2 Tim. 3:1-5) Chikwau kand, kwikil muntu wija chisu chikweza disudiel. Pisambinay ka chom ni ka chom piur pa “chijingidij” chimekeshina “disudiel dia mangand” Yesu walonda pakampwil anch: “Kwikil muntu wija kushik kwa dichuku dinidia ap kwa chisu chinicha. Aruu a mwiur kijap, ap Mwan, ching kusu Tatuku ndiy wija amwinend.” (Mat. 24:36) Mulong chidi mwamu, antu amwing akutwish kuman anch chikasiken kulam mu manangu usey wa kuswapej muvu ni muvu, pakampwil anch asadin kal mwamu pa chisu chilemp. (Jinsw. 13:12) Ov, niyey umening mwamu yisu yimwing? Chom ik chikutwisha kutukwash kukudish ap kulam chitongijok cha kuswapej kwa mudimu usotinau Yehova Nzamb ni Yesu anch tusala nlel unou?

Shinshikinany Yesu, Chilakej Chetu

5. Mutapu ik wamekeshay Yesu chitongijok cha kuswapej mu mudimu wa kulejan?

⁵ Yesu udi chakin kamu chilakej cha kusambish kudi antu awonsu amekesha kuswapej mu mudimu wau wadingau ni kumusadin Nzamb. Diyingish dimwing dia kuswapej kwinoku didi anch Yesu wading ni yom yivud nakash ya kusal mu mivu yisatu kusu ni chikunku. Pakwez, Yesu wawanyisha yom yivud piur pa difukwil diakin kupandakenamu yasalau antu akwau. Ndiy walejana dijin dia Tatukwend ni rutong rend, walejan rusangu ruwamp ra Want, wamekesh patok rubabek ni malejan ma makasu ma antakel a marelijon, ni wakasikesha ukaleng wa Yehova ap kushik ni ku rufu? Ndiy wanyingumuka mu mutapu uwanyidina mu jingand​—mulong wa kuyifundish, kuyikwash, ni kuyok antu. (Mat. 9:35) Kwikil muntu ap umwing ukutwisha kusal yom yivud mudi mwayisalay mu ka chisu kakemp mudi kinak. Yesu wasala mudimu ukash mudi muchitwishikina.​—Yoh. 18:37.

6. Ov, chom ik chatekay Yesu pa ndond ya kusambish mu mwom wend?

⁶ Chom ik chamubachika Yesu kusal mudimu wa kulejan nich mushiku? Kusutil uprofet wa Daniel, Yesu wajingunina chisu chelay kusal mu kuwanyish mudimu wend kwambatan nich chisu chatekay Yehova. (Dan. 9:27) Chawiy lel, mudi mwafundau, mudimu wend wa kulejan wa pa divu wafanyidina kupwa ‘chikunku cha mivu sambwad,’ ap kupwa kwa mivu yisatu ni chikunku. Kapamp kamwing pandamay ni katumb mu Yerusalem pa kapepil ka muvu wa 33 C.C., Yesu walonda anch: “Katat chisu chawanyin kal chakwel uyaj wakin wa Mwan a Muntu ukez kumekan.” (Yoh. 12:23) Ap anch Yesu wijika anch rufu rend rasej kal piswimp, ndiy katekap mulong winou pa ndond ya kusambish mu mwom wend, chakwel wikala diyingish dimubachikina kusal mudimu ukash. Pakwez, ndiy washinshikina piur pa kusadil yisu yawonsu yadingay nich mulong wa kusal rusot ra Tatukwend ni kuyikat ambay nend antu. Rukat riner ramubachika chakwel ayikumangeja ni kuyijidish in kwilej, ni kuyitum mu makampany ma kulejan. Wasala chinech chakwel anch akez kudandamen nich mudimu wasambishay ni kuwanyish mudimu ukash kupandakenamu wadingay ni kusal.​—Tang Yohan 14:12.

7, 8. Ov, chom ik chasalau in kwilej pamumanau Yesu ukat kutokish tempel, ni mulong wak Yesu wasala mwamu?

⁷ Kudi chom chimwing chashikena mu mwom wa Yesu chimekeshina mushiku wadingay nich Yesu. Chadinga kwinsambishin kwa mudimu wend wa kulejan, pa chisu cha kusut kwa Yehova kwa muvu wa 30 C.C. Yesu ni in kwilej end eza mu Yerusalem ni amana mu tempel “in kulandish angomb, ni amikoku, ni atwinkudimb, watana kand in kuswimpish nfalang ashich.” Ov, chom ik chasalay Yesu, ni chom ik chalejanay kudi in kwilej end?​—Tang Yohan 2:13-17.

⁸ Chom chasalay Yesu ni kulond pa chisu chinicha cha yivurisha nawamp in kwilej end mazu ma uprofet ma nfund a kuseng umwing David anch: “Mushiku unikweta wa chikumbu chey ukat kwintemish ku muchim.” (Kus. 69:10) Mulong wak? Mulong chasalay Yesu chading chom chikash nakash cha chak ni ubaj. Chimeken anch, antakel a ku tempel​—in kupesh, in kufund ni antu akwau—​ading akasikeshin kwisak kwinoku ni kutaninamu. Mulong wa kumekesh patok ni kulikish mafef mau, Yesu walika amwinend kulondul yisal ya antakel a chirelijon a mu machuku minima. Mudi mwamwelau patok kudi in kwilej pa mulong winou, ‘mushiku wa chikumbu cha Nzamb,’ ap mushiku mulong wa difukwil diakin, wamekana patok. Ov, pakwez, mushiku chom ik? Ov, ushalijadin nich kuswapej?

Kwisikesh kwa Kuswapej ni Mushiku

9. Ov, mutapu ik tukutwisha kurumburil mushiku?

⁹ Ndinguril umwing urumburil “mushiku” mudi “chirungul ni rusot rikash ra kusal chom kampand,” ni urumburil kand mu mazu makwau mudi kukatish, rusot, usu, ni chirungul. Chakin kamu mudimu wa kulejan wa Yesu ukutwish kumekesh mikadil yiney. Chawiy lel, mu Bible en français courant akarumwin verse winou anch: “Kwipan kwam ku chikumbu chey kukat kwintemish mudi kasu.” Chom chishimokishina, mu mazu makwau ma kwingangel, dizu “mushiku” dikwet yikunku yaad yirumburikina “kutem kwa muchim,” mudi muchim ukat kutem. Chikashimwishenap anch in kwilej avurika mazu ma David pamanau yom yasalay Yesu ku tempel. Chawiy lel, ov, chom ik chamosha Yesu ku muchim, ni kumubachik chakwel asala mwamu.

10. Ov, chom ik chirumburikina “mushiku” mudi mu ulejenau mu Bibil?

¹⁰ Dizu “mushiku” mu kuseng kwa David didiokil ku dizu dia Hebereu dikarumwinau yisu yivud anch “mukau” mu jindond jikwau jidia mu Bibil. Mu Mukand wa Nzamb akarumwin anch “nidi Nzamb wa mukau.” (Tang kubudik 20:5; 34:14; Joshua 24:19.) Ndinguril umwing wa Bibil ulejen anch: “Dizu dined akat kudisadilang piur pa kushakam mu uruw . . . Mudi kamu mudinga mukau pantaliken ni ikundj ap ni mband, chom chikash chitining kutentam kukash, chawiy lel, Nzamb witin kutentam kwinoku, kudi antwend.” Chawiy lel, kwambatan ni Bibil, mushiku upandikenamu usu ap chirungul mulong wa yom kanang yikimbinau antu, mudi mukatau kumekesh antu avud mushiku mulong wa masengan makatinau. Mushiku wa David wading mukau mu mutapu uwamp, wading ulikin kulikidil kupwitijan ap masaal, ni usu ukash wa kulam dijin diwamp ap kupwish mulong.

11. Ov, chom ik chamubachika Yesu ku kwikasikesh nich mushiku?

¹¹ In kwilej a Yesu alonda uyakin pilikejau mazu ma David nich yom yamumanau Yesu ukat kusal mu tempel. Yesu kikasikeshap mulong wading ni mupak bwat, pakwez ndiy wading ni mushiku​—ap mukau—​mulong wa dijin dia Tatukwend ni wa difukwil dishitwila. Pamanay usany ni masaal matekinau pa dijin dia Nzamb, ndiy wading ni mbil ya kwikal ni mukau, ni wasala usu mulong wa kutenchik yom. Pamanay Yesu mutapu wadingau ni kuyimesh mar antu itudishina ni kuyisadish midimu ya chamwamu kudi antakel a chirelijon, mushiku wend wamubachika chakwel aleta rongoj kudi antu ni kuyilond patok antakel a chirelijon adinga ayimeshina mar.​—Mat. 9:36; 23:2, 4, 27, 28, 33.

Ikalany ni Mushiku Mulong wa Difukwil Diakin

12, 13. Chom ik chisadinau nlel unou antakel a marelijon ma Kristendom piur pa (a) Dijin dia Nzamb? (b) Want wa Nzamb?

¹² Yisal ya antu alondina nlel unou anch akat kumwifukwil Nzamb​—yidi mudi ya—​antu a pa chirung cha Yesu. Chilakej, vurik anch chom cha kusambish chayilejay Yesu in kumulondul end chading kulembil mulong wa dijin dia Nzamb anch: “Dijin diey aditumbish.” (Mat. 6:9) Ov, wamen kal antakel a chirelijon, pakampwil abishop a Kristendom, akat kuyilej antu chakwel amwijika Nzamb pa dijin ni kuditumbish, ap kudilimish dijin dined? Pakwez, awiy a mumekesha Nzamb mu mutapu uyimp kusutil malejan ma makasu mudi Usatu, mupim wa muntu wakad kufang, ni karung ka misiny, ni kumusal Nzamb amekana muntu wakad kwijikan, ukasikena kutesh, wa chisu, ap mwin kuyimesh antu mar. Ateka kand usany padiay Nzamb kusutil yisal yau yiyimp ni rubabek. (Tang Rom 2:21-24.) Chikwau kand, asala usu wau wawonsu mulong wa kujindjik dijin dia Nzamb, ap kudidiosh mu ma Bibil makarumwinau. Chawiy lel, ayikangesha antu kwikal piswimp ni Nzamb ni kukudish urund wau ni ndiy.​—Jak. 4:7, 8.

¹³ Yesu wayileja kand in kwilej end kulembil mulong wa Want Nzamb anch: “Want wey weza. Rusot rey arusala pansh mudi mwiur.” (Mat. 6:10) Ap anch antakel a ma relijon ma Kristendom akat kuchirikin yisu yivud malembil minam, ayileja antu chakwel akasikesha politik ni yirijek yikwau ya antu. Chikwau kand, awiy akat kuyiswingish in kulejan ni kupan uman wa Want winou. Mudi chibudikin, pakach pa antu avud alondina anch adi in Kristu, kakatap kwisambin piur pa Want wa Nzamb, ap kwikal ni ritiy mu Want winou.

14. Ov, mutapu ik wayipishau abishop a Kristendom Dizu dia Nzamb?

¹⁴ Pamulembilay Nzamb, Yesu walonda patok anch: “Dizu diey diawiy uyakin.” (Yohan 17:17) Ni kurutu kwa kuchirik mwiur, Yesu wamekesha anch ndiy ukez kamutek “Kashalapol ushinshamena ni kubabal” chakwel ayinkisha antwend yakudia ya muspiritu. (Mat. 24:45) Ap anch alondin anch akat kuyifundish antu Dizu dia Nzamb, ov, abishop a Kristendom amekesha anch ashinshamen mu mudimu wayinkishau kudi Mwant? Bwat. Pakwez asambisha kulejan yilondinay Bibil anch ringany. Pa ndond pa kuyidish antu yakudia ya muspiritu, ni kuyiletin rongoj ni chitokish, abishop ayifundisha antu mafilozofi ma antu. Chikwau kand, ayipisha yijil ya Nzamb ya mwikadil, ni kulet yitazukinau anch mwikadil usu.​—2 Tim. 4:3, 4.

15. Ov, mutapu ik wiyoviling piur pa yom yawonsu yasalau abishop mu dijin dia Nzamb?

¹⁵ Mulong wa yom yiney yawonsu yasadika​—ni kudimban anch mu dijin dia Nzamb wa mu Bibil—​antu avud a kashinsh asambishin kuziy ap kushadish ritiy rau rawonsu mudiay Nzamb ni mu Bibil. Awiy awila mu makasu ma Satan ni mu ditenchik diend diyimp dia yom. Piumena ni kutesh yom yisadikina dichuku ni dichuku, ov, mutapu ik ukata kwiyov? Piudia kashalapol wa Yehova, anch waman mutapu watekinau usany ni masaal pa dijin dia Nzamb, ov, usotining kusal yawonsu ukutwisha mulong wa kudiosh uyimp winou? Piumena anch antu akin ni akweta michim yiwamp akat kuyidimb ni kuyisadil midimu ya chamwamu, ov, wiyoviling kwikal ubachikinau kuyongoj ayimana mar? Pamanay Yesu antu a pa chirung chend “adinga mudi amikoku akad kafung,” ndiy wayovila riy. Kupwa “wasambisha kuyilej yom yivud.” (Mat. 9:36; Mar. 6:34) Tukwet diyingish diakin dia kwikal ni mushiku mulong wa difukwil diakin, mudi mwadingay Yesu.

16, 17. (a) Ov, chom ik chifanyidina kutubachik chakwel twipana mu mudimu wa kulejan nich mushiku? (b) Ov, chom ik tukeza kushinshikin mu mutu wa mulong ulondwilaku?

¹⁶ Anch tukwet mushiku mu mudimu wetu wa kulejan, mazu ma kambuy Paul madia mu 1 Timote 2:3, 4 makwet kurumburik kwa pakampwil. (Tang.) Tusadinap nich mushiku mudimu wa kulejan mulong twij anch tudi mu machuku mansudiel pakwez tusadil mwamu mulong twij anch rawiy rusot ra Nzamb. Ndiy usotil anch antu ashikena ku kwikal nich ronganyin ra uyakin chakwel niyawiy ileja mutapu wa kumwifukwil ni kumusadil chakwel ayiyukisha. Tusadil usu wa kwipan mu mudimu wa kulejan, chidiap anch mulong cha chisu chakepa kal, pakwez chidi mulong tusotin kulimish dijin dia Nzamb ni kuyikwash antu ijika rusot rend. Tukwet mushiku mulong wa difukwil diakin.​—1 Tim. 4:16.

¹⁷ Pitudia antu a Yehova, atuyukishin nich ronganyin ra uyakin piur pa rutong ra Nzamb mulong wa antu ni divu. Tukwet mutapu wa kuyikwash antu chakwel atana musangar ni ruchingej ra kashinsh mu machuku ma kurutu. Tukutwish kuyilej njil ya kulondul chakwel apanda pakeza kusheshik ditenchik dia yom dia Satan. (2 Tes. 1:7-9) Pa ndond pa kwakam ap kuziy mulong dichuku dia Yehova dimeken mudi dilabin, tufanyidin kusangar anch tukwet kand chisu cha kwipan nich mushiku mu difukwil diakin. (Mike 7:7; Aba. 2:3) Ov, mutapu ik tukutwisha kukudish mushiku winou? Tukez kushinshikin pa chinech mu mutu wa mulong ulondwilaku.

Ov, Ukutwish Kurumburil?

• Ov, chom ik chamubachika Yesu kusal mudimu wa kulejan nich mushiku?

• Ov, chom ik chirumburikina kwikal nich “mushiku” kwambatan ni yilejenay Bibil?

• Ov, chom ik chitumena nlel unou chifanyidin kutubachik chakwel twikala nich mushiku mulong wa difukwil diakin?

[Chipich chidia pa paj wa 16]

Yesu washinshikina pa kusal rusot ra Tatukwend ni wamekesha rukat pantaliken ni ambay nend antu

[Chipich chidia pa paj wa 18]

Tukwet mayingish mawonsu ma kwikal nich mushiku mulong wa difukwil diakin