Kumushejin Nzamb Piswimp

Ov, Kukutwish Kumunenganesh?

ANKALANSAMBU 2:11-18

PITUDIA antu akad kuwanyin, twoviling etu awonsu runeng mu yisu kanang. Chilikej, tukutwish kunenganan kupwa kwa kujingunin anch twarumbuk kal. Chishimokishena, Bibil ulondil anch Yehova ukutwish kwov runeng. Ulondin anch ‘pakwez Nzamb udi uwanyidina.’ ‘Kakatap kurumbuk!’ Chad, ov, mu mulad ik mukatay Nzamb kwov runeng? Chakul chikutwish kutukwash kutesh chom chimwing cha pakampwil: Yehova ukwet yovil, ni yom tusadila yikutwish kupukun ku yovil yend. Shishikin mazu mafundinau mu Ankalansambu 2:11-18.

Buku wa Bibil wa Ankalansambu ulejen mutapu ulondulijadina chirungu cha ruvundu mu rusangu ra Isarel. Muchid wa Isarel wading ushich katat mu Kanan, ngand yashilayimu Nzamb kumwinkish Aburaham. Mu yitot yivud ya mivu yalondulap, mwikadil wa Isarel mu kulond kwa kwiswipish wadinga nich yisal mudi yichirikidinau mu yikunku yinying: kubwambwil, mar, kwit ukwash mu malembil, ni dipandish.a

Kubwambwil. Nich chibachikin cha in Kanan, in Isarel ‘amulika Yehova’ ni asambisha kulondul anzamb akwau; chapakampwil, “ayisadila akish a Bal ni Asitaret.”b Kubwambwil kwa mutapu winou kwamekesh kupumbwok. Chishimokishen mudi ik Isarel ‘wasala yom yiyimp kurutu kwa Yehova,’ Nzamb wayipandisha kudiokal ku Idjibit!—Verse wa 11-13; Ankalansambu 2:1.

Mar. Mulong asarumuna ujim utentamina, Yehova wadiosha diking diend pantaliken ni antu amubwambwila. Kupwa in Isarel awila mu makas ma “akankuny nau,” abuwa ngand.—Verse wa 14, MN.

Kwit ukwash mu malembil. Katat pamanau mar nakash, in Isarel anenganana nakash mulong wa uyimp wau ni amwita Nzamb ukwash. Kwit ukwash mu malembil kwau kumekedin ku mazu ma “kwinan kwau mulong wa in kuyimesh mar.” ((Verse wa 18, MN) Adinga ni kumwitang Nzamb ukwash pakad kujing. (Ankalansambu 3:9, 15; 4:3; 6:6, 7; 10:10) Ov, mutapu ik wakulay Nzamb?

Dipandish. Yehova watesha kwinan kwa in Isarel ni “wayovila riy.” Dizu dia Hebereu dikarumwinau anch “wayovila riy” dikutwish kurumburik “kuswimp yitongijok ya muntu ap rutong.” Referans umwing ulondil anch: “Yehova, wikala ubachikinau nich kwinan kwau, waswimpa kudiokal ku rutong rend ra kuyipup kuya chakwel kuyipandish.” Mu ranaken rend, Yehova chawiy “chayilangwishinay ankalansambu,” akeza kayipandish antu end kudi akankuny nau.—Verse wa 18.

Ov, ujingunin chom chamubachika Nzamb kuyovil riy, ap kuswimp chitongijok chend? Kwading kuswimp kwa yitongijok ya antu end. Tong bil mu mutapu unou: Tatuku mwin rukat ukutwish kumupup mwan urumbukina, pamwing ap nich kumukish yisend kanang. Pakwez pa kuman anch mwan wit kal chakin kamu dilikishin, tatuku wakwat mupak wa Kwimik dipup.

Yom ik twilejina piur pa Yehova kusutil ku rusangu riner? Palangwishinay chitil cha kwikatil ujim wend, muchim wa kwit dilikishin ni kukarumuk ukat kumubachik ku kumekesh riy. Chidi cha usey kutong anch yom tusadila yikutwish kupukun ku yovil ya Nzamb. Ov, mulong wak ukwilejap mutapu ukutwisha kwez “usangarish muchim” wa Yehova? (Jinswir 27:11, MN) Kiukezap kanenganan mulong wa chinech.

[Mazu madia kwishin kwa paj]