Bibil Ukarumwin Mwom Ya Antu
OV, chom ik chamubachika muntu umwing wa mu chisak cha Arasta chakwel akatula nswich jend jilemp ni alika kuyikis ayindel? Chom ik chamubachika nsand mukwau wadinga ukweta chisum ni wakumangeja nfalang mulong wa kulandish mon wa kulewishan akarumuna mashakamin mend? Shinshikin yilondinau antu inay.
“Nalika kuyikis akwetu.” —HAFENI NGHAMA
UVUD WA MIVU: 34
NGAND YA KUVADIKIN: ZAMBIE
RUSANGU: MWIN RASTA
CHINADINGA PASAK: Navadikina mu chibeng cha in kuchin mu Zambie. Makwam wachina mu Namibie pa chisu cha njit ni wandama mu ditenchik ditazukinau anch (SWAPO) Organization du peuple du Sud-Ouest africain. Ditenchik dined diading dirishina nich wintakel wa Afrique du sud wadinga utakedina mu Namibie pa dichuku dinidia.
Nashakama mu yibeng yivud ya in kuchin mu mivu 15 ya mwom wam. Mu yibeng ya in SWAPO ansand ading ni kuyijidish mudi ayibol mulong wa kusal mu chisak cha kukolik. Atufundisha chipolitik ni kuyikis ayindel.
Pinawanyisha mivu 11, nasota kwikal mwin Kristu mu ekliz wa mu chibeng wading uyibombikeshina in Katolik a Rome, in Luthérien, in Anglican, ni akwau. Pasteur unaleja kankasikeshap kulondul ruzau riner. Chawiy lel, nikala muntu wakad kwitiyij anch Nzamb udiaku. Pinawanyisha mivu 15, rukat ram ra muzik wa rege ni rusot ra kupwish katond katumeshinau mar kudi ayindel in Afrik, yambachika nandama mu chisak cha Arasta. Nikala nich nswich jivud, nanin ruwand, nalika kudia mbij, ni kukimb want ipau mulong wa ayindel. Pakwez, kinakarumunap mashakamin mam ma masandj ap kulik kutal mafilm ma chisum. Nadandamena kusadil mazu mayimp.
MUTAPU WAKARUMUNAY BIBIL MWOM WAM: Mu muvu wa 1995, pinawanyisha mivu 20, nasambisha kutongin nakash pa mwikadil wa mwom unafanyidina kulondul. Nileja mikand yawonsu ya chisak cha Arasta yinatana. Mikand yimwing pakach pa yiney yading yijimbwil Bibil, pakwez kinateshap kurumburik kwa yom yafundau. Chawiy lel nakwata mupak wa kwilej Bibil amwinam.
Pikwasuta machuku, murund nam umwing wa mu chisak cha Arasta wanginkisha kabuku kamwing ka kwilej nich Bibil kafundau kudi Atuman a Yehova. Nileja amwinam kabuku kinak nich Bibil. Kupwa, nayisankana Atuman a Yehova ni nadandamena kwilej nau Bibil.
Nich usu ukash, nimika kuna ruwand ni kunawol mar. (2 Korint 7:1) Nawapisha mujimbu wam, nakatula nswich jam jilemp, nalika kutal mafilm ma antu akanzikis ni ma chisum, nalika kand kusadil mazu mayimp. (Efes 5:3, 4) Chikwau kand, nalika kuyikis ayindel. (Mid. 10:34, 35) Pakwel anch nikarumuka mwamu chafanyidina nilika kutesh mizik yikasikeshina katond ka ulombu wa chikit, ni kulik arund a pasak, adinga apakishina kwimbachik chakwel niwila kand mu yaku yiney ya pasak.
Kupwa kwa kukarumuk mwamu, Nasambisha kukimb Chot cha Want cha Atuman a Yehova ni kwipul mutapu wa kwinung ku relijon winou. Nasambisha dilejan dia Bibil. Pinakwata chiyul cha kwimbatish nikala umwing wa Atuman a Yehova, dijuku diam kidiasangarap bwat. Makwam wanleja kutond relijon mukwau wa “win Kristu” walika Atuman a Yehova. Mantwam wading muntu wa katumb mu wintakel wa ngand, ndiy wadandamena kwinlond nayimp mulong wa mupak unakwata wa kwinung nau Atuman.
Pakwez, kwilej mutapu washakamay Yesu ni antu ni kusadil chiyul chinech kwankwasha nijijamana kuzengol ni kwinsip. Pinateka pamwing malejan ma Atuman ni yilondinay Bibil, nikala nich kashinsh anch natana relijon wakin. Chilakej, atuman alondwil chijil cha Bibil cha kuyilej antu akwau. (Mateu 28:19, 20; Mid 15:14) Ni kiyandjikinap mu milong ya chipolitik.—Kuseng 146:3, 4; Yohan 15:17, 18.
MUTAPU NATANA YIYUKISH: Kwilej kushakam kulondulijan nich yijil ya Bibil kwankwasha nakash. Chilakej, kulik ruwand kwankwasha nilika kushadish yitot ni yitot ya nfalang ngond ni ngond. Nilatiningap kand yilat yiyimp, ni ukash wam wa manangu ni wa mujimbu wawapin kal.
Katat mwom wam ukwet ntakel ni rutong rinadinga ni kusot kudiosh ku usand wam. Cha usey nakash, niyovil katat anch nitwishin kumushejin Nzamb piswimp.—Yakob 4:8.
“Nileja kuyikel ujim wam.” —MARTINO PEDRETTI
UVUD WA MIVU: 43
NGAND YA KUVADIKIN: AUSTRALIE
RUSANGU: MWIN KULANDISH MON WA KULEWISH
CHINADINGA PASAK: Dijuku diam diading ni kushemunok nakash panading nipamina. Nashakama mu tumal tukemp, mu mal majim, ni yisu yimwing mu mudimu mwin ndond ya chivadikin yidia kulemp nakash nich misumb. Nivurikin nawamp yisu yadingau asanyam ni amantwam akat—kuta ansh, kuyizomb anam, kwendol oku ni oku, ni kusongol yom yikwau.
Tatukwam wading boxer ni wasambisha kwinlej mutapu wa kubulijan pinichidia mwanikanch. Mwom wam wasambisha kwikal wa chisum. Pinawanyisha mivu dikum, nasutisha yisu yivud mu kunawol mar mu ma bar. Am ni arund nam twading ni kukimb ching mutapu wa kubulijan. Twasadila jimpak ni mitond mulong wa kutend ni chisak cha antu 20 ap antu avud nakash.
Napata mfalang mukulandish mon wa kulewishan ni yom yadingau ni kwiy kudi antu adinga ni kusal ku chau. Nakumangeja kand nfalang mulong wa in kulandish mon wa kulewish ni kuyakamish antu, nich mat ma ntot ni marevolver. Rutong ram rading ra kwikal mwin kujipan. Mazu mam mading, Yijipa ap akez kukujip.
MUTAPU WAKARUMUNAY BIBIL MWOM WAM: Pasambisha kuvul mivu yam, natesha piur pa Atuman a Yehova. Pinawanyisha mivu 20, nivurikin mutapu namwita makwam chakwel anleja kudinga atuman. Pasuta machuku maad, Kaman umwing watazukau anch Dixon weza wakokal ku chis cham. Kupwa kwa kwambamb nend, ndiy wantazuka ku chikumangan cha Atuman a Yehova. Naya ku chikumangan chinicha, kudiosh pinipa ni katat pasutin kal mivu 20 ya makukumangan pakad kujing. Atuman atwisha kwakul ku yipul yawonsu yinadinga nich kusutil Bibil.
Nasangera pa kwilej anch Yehova uyisangeridin ap antu ayimp. (2 Pita 3:9) Najingunina anch udi Tatukwetu wa rukat winkwashina kupandakanamu muntu mukwau. Nasangara kand pa kwilej anch ndiy ukez kuwinlikishin yitil yam panakarumwina mwom wam. Maverse ma Bibil madia mu Efes 4:22-24 madinga ni usu ukash padi am. Verse winou wankasikesha ‘kudjol muntu mukur’ ni ‘kudjal muntu musu watangau mudi mudiay Nzamb mu kutentam kwakin.’
Pasuta yisu yivud chakwel nikarumuna mwom wam. Natwisha kulik kuna mwon wa kulewishan rubing rawonsu, pakwez diampos ni diarubing arund nam ambachikanga kuna mon wa kulewishan. Nashikena mu kujingunin anch nifanyidin kuya kulemp ni arund nam anch nisotin kutokish mwom wam, chawiy lel nakwata mupak wa kuya mwingand yikwau. Arund amwing ita chakwel antwalaku mu weny, kupwa nitiyija. Mu weny, asambisha kuna ruwand ni kwinginkish mukwau. Pakwez nayileja anch nalikin kal yaku yiney, pitwashika ku mimbu ya ngand, awiy achirika. Pasutap machuku mavud natesha anch arund nam iya ku bank umwing, nich mat mantot.
MUTAPU NATANA YIYUKISH: Kudiosh pinalika urund wam nau arund inay, natwisha kukarumun mwom wam mu mutapu ufanyidina. Mu muvu wa 1989, natambula dibatish nikal Kaman. Kupwa kwa kwimbatish, mpanyam, makwam, ni tatukwam awonsu inunga kudi am mu kumusadil Yehova.
Katat nasutishin kal mivu 17 mu uruw ni nikwet an akatish asatu. Nilejin kuyikel ujim wam, ap anch asambish kwinsarumun. Ni nileja kuyikat antu a ‘michid, mangand, ni jindim’ jawonsu. (Kuburik 7:9) Nimen anch mazu ma Yesu mamekana kwikal makin ku mutambu wam. Mulong ndiy ulondin anch: “Anch en waziyilany malejan mam, en udiany in kwilejam chakin. Ukez kijikany uyakin, chad uyakin ukez kakukwolany.”—Yohan 8:31, 32.
[Dizu dirumburila chipich chidia pa paj wa 9]
Pakwel anch nikarumuka mwamu chafanyidina nilika kutesh mizik yikasikeshina katond ka ulombu wa chikit
[Dizu dirumburila chipich chidia pa paj wa 10]
Am ni arund nam twading ni kukimb ching mutapu wa kubulijan. Twasadila jimpak ni mitond mulong wa kutend ni chisak cha antu 20 ap antu avud nakash