“Napamina Kwam mu Balibal”

CHINADINGA PASAK

Antu akat kusend chisu chilemp nakash kurutu ilejina ku kurumbuk kwau. Niyam mwawiy munading. Navadikina ni kupamin mu Barcelone, musumb wa kaad ku kujimb mwi ngand ya Espany. Dijuku dietu diading dishich mu mukal utazukinau anch Somorrostro, ni wading piswimp ni chikum cha wit. Somorrostro wading wijiken nakash mulong wa yom ya kujipijan ni ya kulandish madrog.

Anvajam ading nau an chidivu, ni yama nadinga wa kusambish. Mulong twading atuzwendj nakash, tatuku wantuma kuya kusal mud mwin kunon ndundu ku masengan ma tenis. Nading ni mivu dikum ni nasalang mudimu asaa dikum pa dichuku. Mud chibudikin, natwishap kuya ku shikol mud an a mivu yam. Pinawanyisha mivu 14, nasambisha kusal mu ateliye wa kurijekin yom ya yikung.

Mu muvu wa 1975, antazuka kusal mudimu wa usalay, mulong wading mudimu wa kumushindil muntu mwi ngand ya Espany. Mulong nading nikatin nakash kujingunin yom yisu mu mwom wam, nipana mu Chisak cha Wingendj cha Amasalay mu Espany, chisak chinech chadinga ku Melilla, ndond yidia ku Afrik wa Kwindum. Pa chisu chinacha, nasambisha kuna madrog nakash ni kuleu nakash kand.

Pinadiokala mu Chisak chinech, nashirika mu Barcelone ni nasala chisak cha ampopol. Twiyang yom yin yawonsu twamanang. Kupwa twalandishang yom twiyang mulong wa kuland nich madrog ma kuna mu chisak. Nasambisha kuna mon ya usu nakash ya kulewishan (LSD ni amphetamines), ni nipana kamu nakash mu yom ya masandj, ya maar, ni ya kuta kart wa nfalang. Mashakamin minam ma chamwamu mambachika kwikal mwin chisum nakash kamu. Nendang ching ni mpak, kasok ap ni chindjang, ni novangap wom wa kuyisadin anch naman anch chid cha usey.

Dichuku dimwing, am ni chisak cham cha ampopol, twiya motak ni amasalay asambisha kutukadabish mau. Yom yasadika mud mu filim. Kupwa kwa kwendish motak mu makilometre piswimp 30, amasalay asambisha kutubul yidiany. Kupwa, muntu wading utwendishina, wawa ni motak ni etu awonsu twasambisha kuchin mau ra pansh. Tatuku pajinguninay yom yiney, wangopata ku chikumbu.

Mu mivu yitan yalondulaku, nashakamang kwam mu balibal. Nalalang ku yis ya yikumbu, mu matrak, pa yitwam ya mu park ni mu jinzay. Chisu chimwing mwamu nashakama mu dibuk. Mwom wam wadingap kwau urumburikina, kufa ap kwikal mwom yadingap kwau ya usey kud am. Nivurikin chisu chimwing pinading nalewanga kal madrog, nikatwola ni kwitapol ku makas. Kushik ni nlel unou nichikwet yitaj.

MUTAPU WAKARUMUNAY BIBIL MWOM WAM

Pinikala ni mivu 28, maku weza kwintal ni wanleja anch nichirika ku chikumbu. Nitiya ni namukana anch nikuswimp mwom wam, pakwez changita chisu chilemp mulong wa kuwanyish kushilamu kwinoku.

Dichuku dimwing kupwa kwa midi, Atuman a Yehova akokala kwol kwetu. Pinading niyiteshina, tatuku wasweja mu chikumbu anch nifanyidin kupat chis kapamp kamwing. Mulong nadingap nikatina kwingikish mbil, namudiula kwam. Angikisha tumabuku tusatu mwamu, ni natusenda nich musangar. Nayipula ndond yikatau kusadin yikumangan yau, ni kupwa kwa machuku makemp, nakwata mupak wa kuya ku Chot cha Want.

Chom cha kusambish namana kud Atuman chid anch ading adjit nawamp nakash. Pakwez am nading ni nsuk jilemp, wedj wakad kuzangul ni nading nidjit kamu masun mayimp. Niyova anch niwanyidinap kwandam, chawiy nakwata mupak wa kushal pol pa Chot. Nashimwoka nakash pinamumana mbay umwing mukur wa mu chisak cha ampopol dijin diend Juan, ni wading wadjalang kal koch muwamp. Kupwa najingunina anch wikadil Kaman wa Yehova muvu wasutang ou. Pinamumana, nikala ni usu wa kwandam ni kukumangan ku yikumangan. Pawiy kamu pinapa pasambisha yom yawonsu kuswimp mu mwom wam.

Nitiya dilejan dia Bibil ni kapamp kamwing najingunina anch mulong wa kwitapil dilau dia Nzamb, nifanyidin kuswimp yaku yam ya chisum ni mikadil yiyimp. Chadingap chiswapela kuswimp yom yiney. Nileja anch mulong wa kumusangaresh Yehova Nzamb, nifanyidin ‘kukarumuk mu kuswimp manangu mam.’ (Rom 12:2) Riy ra Nzamb rampukuna nakash. Chikalap nchik uyimp wawonsu nasala, namana anch wading winshidin chisu cha kuswimp mwom wam. Yom nileja piur pa Yehova Nzamb yandama mu muchim wam nakash. Namana kamu patok anch kwading komb Sakatang wading wimbangidina.​—1 Pita 5:6, 7.

Chinech chambachika kusambish kuswimp. Chilakej, chisu twileja piur pa kuna ruwand, natonga anch: ‘Anch Yehova Nzamb ukatin kamu anch nikala wishitwila ni wakad kwijond mu mitapu yawonsu, nifanyidin kulikap kuna ruwand!’ (2 Korint 7:1) Nadjibula ku dishitil ruwand mwawonsu nadinga nich!

Nafanyina kand kulik kusadin ni kulandish madrog. Kusal mwamu kwasenda chisu ni usu. Mulong wa kulikap kamu rawonsu, namana anch nifanyidin kulik kubombakan nau arund nam akur. Yibachikin yau yankwashap kuya kurutu mu spiritu. Chawiy mu kusut kwa chisu, nasambisha kumuchingejin Nzamb nakash ni kuchingejin kand ukwash wa arund nam asu a mu chikumangen. Kubangin kwau ni rukat ranmekeshinau yading yom ya usey nakash, ading kand kal ansadinap mwamu kud muntu mukwau. Mu kusut kwa angond, natwisha chad kulikap kuna ruwand ni “nadjala wuntu usu,” wankwasha kwikal ni dilau dia Nzamb. (Efes 4:24) Mwi Ngond wa 8 muvu wa 1985, ambatisha ni nikala Kaman wa Yehova.

MUTAPU NATANA YIYUKISH

Bibil wankwasha kwikal ni mwom uwamp nakash. Wandiosha mu mashakamin mamwing mayimp mading mayipishina mujimbu ni kwinkepishin kalimish. Kulond kushal kwinyim, arund akur 30 ni kusut afa padingau ansand ni mayej ma SIDA ap ni mayej makwau madiokila ku kuna madrog. Musangar mud ik nikweta mulong kusutil kusadin mbil ja Bibil, natwisha kwipuk kushiken ku yom yiyimp mud yiney.

Katat nikusendangap kand mpak ap kasok mud munasalang pakur pinading mwin chisum. Natonginap anch pa ndond pa kusend yom yiney nikutwish dichuku dimwing kusend Bibil ni kumusadin mulong wa kuyikwash nich antu. Nlel, am ni mukajam tud mu mudimu wa chisu chawonsu wa kulejan rusangu ruwamp.

Anvajam kand kal asendangap mupak wa kwikal Atuman a Yehova, pakwez asangera yiyukish nikala nich mulong wa kwilej Bibil. Chikwau kand, tatuku wayilondinang Atuman kurutu kwa ambay nend a mudimu awonsu. Wamana kamu anch ritiy ram risu rankwasha kuswimp yom yivud nakash mu mwom wam. Maku walondang anch nafanyina kwilej Bibil kurutu kwa chisu. Nitiyin kamu anch uyingin kwend nich!

Yom yanshikena mu mwom yanfundisha anch ud usup kamu kukimb musangar mu madrog ap yom yikwau yiyimp. Nlel unou nikwet musangar nakash wa kuyilej antu akwau mafundish madia mu Dizu dia Nzamb​—mafundish mapandisha mwom wam.