Kwikil Kwindond Nayangang Pakad Ut

CHINADINGA PASAK:

Navadikina ni kupamin mu mukal mwasadinangau midimu nakash kud atuzwendj mu Rom. Mashakamin mading makash. Namwijikap kwam maku wanvala, ni nadingap ni urund uwamp ni tatuku. Napamina kwam mu balibal.

Nasambisha kwiy pinawanyisha kamu mivu dikum. Pinikala ni mivu 12, nachina ku chikumbu kapamp ka kusambish. Tupamp tuvud, tatuku wezang kwinsend ku biro wa ampurish mulong wa kwinchirish ku chikumbu. Yisu yivud natendang nakash ni akwetu​—nading ni chisum ni nayovilang antu awonsu ujim. Pinawanyisha mivu 14, nadiokala kamu ku chikumbu rawonsu. Nasambisha kuna madrog ni kushakam mu balibal. Mulong nadingap ni kwa kulal, yisu yivud urel nandamang mu motak wayen ni kulalamu kushik pamanch. Kupwa nakimbang ndond yidia mem mulong wa kwowal.

Nikala ni ukaliweny nakash mu kwiy​—nadiokala ku wij wa yom mu masakosh kushik mu chilik cha kusambish kwiy uchuku mu yikumbu yijim ni mu mikal yitunginau nawamp. Antu avud angijika nakash ni kupwa antazuka kwandam mu chisak chimwing cha ampopol chijikena nakash. Chisak chinech changinkisha “mutapu ” wa kusambish kwiy ku mabank. Mulong nading ni chisum nakash, antu akwau a mu chisak anlimishang nakash. Kwikil kwi ndond nayangang pakad ut wam; ap uchuku, naulalang nich ku mutu wa ulal wam. Chisum, madrog, kwiy, masaal ni yom ya masandj yawiy yading yom yakusambish mu mwom wam. Ampurish ankimbang chisu chawonsu. Ankwatang yisu yivud ni ankasang mu rukan nakash.

MUTAPU WAKARUMUNAY BIBIL MWOM WAM:

Chisu chimwing pinabudika mu rukan, nakwata mupak wa kuya kumutal maku mwanikanch. Nadingap kwam nija, pakwez ndiy ni anend aad ading ikadin kal Atuman a Yehova. Antazuka kwez kukumangan ku yikumangan ya Atuman a Yehova. Nitiya kwam mulong wa kuman mutapu ukata kusadik yom. Pitwashika ku Chot cha Want, nasala usu wa kushakam kwinyim piswimp ni chis mulong wa kutal antu awonsu andamina ni abudikina. Mud machuku mawonsu, nading ni ut wam.

Yikumangan yinaya yaswimpa mwom wam. Nivurikin nading nikat kutong anch pamwing ap nid mu planet mukwau. Antu avud angikisha moy nich musangar ni ading in masip. Ni katat nichidandamedining kuvurik mutapu wadingau Atuman: antu awamp ni in kashinsh. Yom yiney yading kamu yishalijadin nakash ni mashakamin nading nijidina kal!

Nasambisha kwilej Bibil nau Atuman. Pinileja nakash, nasambisha kuman anch nifanyidin kamu kuswimp mashakamin mam. Nakwata nich usey nakash mazu madia mu Jinswir 13:20: “Muntu ukata kwend nau in manangu, niyend ukwikal mwin manangu, pakwez ukata kwend nau ayisup ukuman mar.” Najingunina anch nifanyidin kudiokal mu chisak cha ampopol. Chadingap chiswapela kusal mwamu, pakwez nich ukwash wa Yehova, natwisha.

Nasala kand usu nakash mulong wa kwipuk yom yawonsu yading yinjondishina ku mujimbu. Nasala usu nakash, ni natwisha kwimik kuna ruwand ni madrog. Nakidisha nsuk jilemp nadinga nich, nadiosha tuziy nadjalang ni nalikap kulond yom ya masaal. Kapamp ka kusambish mu mwom wam, nasambisha kutwish kusop yisal yam.

Mulong nasangerangap kutang ni kwilej, chankasikena nakash kwilej kamu Bibil chikurikina. Pakwez nadandamena kwikasikesh, ni pakemp pakemp, nashikena kumukat Yehova, ni chom chimwing chasambisha kuswimp mukach mwam—kom kam kasambisha kwinfish nich. Yisu yivud nading ni yitongijok yiyimp, namanang anch Yehova kakutwishap kwend kwinlikishin mulong wa yom yawonsu yiyimp nasadina kal. Mu yisu mud yiney, nikala ni rongoj pa kutang piur pa mutapu wamulikishinau Mwant David kud Yehova kupwa kwa kusal yitil yijim.​—2 Samwel 11:1–12:13.

Chom chikwau chankasikena chading kulejan ritiy ram kud antu akwau ku chis ni chis mu mudimu wa kulejan. (Mateu 28:19, 20) Novang wom anch nikutwish kutanijan ni muntu nasala nayimp ap wanarumbukina pasak. Pakwez pakemp pakemp, natwisha kupandakan wom wam. Nasambisha kwov musangar nakash pa kuyikwash antu akwau kwilej piur pa Tatukwetu mukatish wa mwiur, ukata kulikishin nich muchim umwing.

MUTAPU NATANA YIYUKISH:

Kwilej piur pa Yehova kwanpandisha! Arund nam akur avud afil kal ni akwau ad mu rukan, pakwez am nlel nikwet mwom uwamp ni ruchingej ruwamp nakash ra machuku ma kurutu. Nileja kwikal muntu wikepishina, mwin kuziyin ni kusop ujim wam. Mud chibudikin, nikat kusanger urund uwamp ni antu nishicha nau. Nikwet musangar nakash mulong namwata mband umwing muwamp, Carmen. Etu awonsu pamwing, tukat kuyikwash nich musangar antu akwau kwilej Bibil.

Eh, katat nikwet mudimu uwamp​—chisu ni chisu nikat kuyang ku mabank, kadiap kand mulong wa kwiy, pakwez mulong wa kuminangish!